Aktoaba

Wen wi geh fi noa Jeezas, wi wahn tink an ak laik hihn. Ahn di moa wi fala di way how Jeezas tink, di kloasa wi frenship wid ahn wahn get. How wi ku tink laik Jeezas? Tink bowt dis egzampl. Jeezas mi tink bowt help adaz moa dan fi pleez ihself. (Mach. 20:28; Roam. 15:1-3) Bikaaz hihn mi tink laik dis, hihn mi giv a ihself an ih mi fergivin. Hihn neva geh ofendid eezi bai weh peepl mi seh bowt ahn. (Jan 1:46, 47) Ahn hihn neva mek sombadi mistayks weh dehn mi mek lang taim chaynj fi hihn atichood tuwaadz dehn. (1 Tim. 1:12-14) Jeezas mi seh: “If unu lov wan anada, den evribadi wahn noa dat unu da fi mee disaipl.” (Jan 13:35) Ih gud fi aks yuself, “Ai di du aal weh Ah kud fi kip di pees wid mi bradaz ahn sistaz?” w20.04 24 ¶11

Eevn doa wi liv eena wahn werl weh ful op wid peepl weh tel lai bowt Jehoava ahn weh insolt ih naym, yoo ga di apachooniti fi difen Jehoava naym ahn tel peepl dat hihn hoali, raichos, gud, ahn lovin. Yoo ku chooz hihn fi bee yu Roola. Yoo ku help peepl andastan dat onli Jehoava roolaship raichos an onli fi hihn roolaship wahn bring pees ahn hapinis fi evribadi. (Ps. 37:9, 37; 146:5, 6, 10) Wen wi teech peepl di chroot fahn di Baibl, wi teech dehn dat Gaad ga di rait fi rool di yoonivers. Eevn doa ih impoatant fi foakos pahn Gaad laa dehn, wi mayn goal da fi help adaz laan fi lov Jehoava, wi Faada, ahn fi bee laayal tu ahn. Soh wi haftu shoa dehn Jehoava gud kwalitiz ahn help dehn fi si di kaina Persn weh di naym Jehoava stan fa. (Isa. 63:7) Wen wi teech laik dat, wi help peepl fi lov Jehoava ahn fi obay ahn bikaaz dehn waahn bee laayal tu ahn. w20.06 6 ¶16; 7 ¶19

Di hyooman brayn dizain eena wahn amayzin way. Wen yu mi deh eena yu ma beli, yu brayn groa akaadn tu di way how ih dizain. Ahn towznz a nyoo brayn sel mi-di faam evri minit! Peepl weh stodi di brayn seh dat wahn adolt brayn gat een bowt 100 bilyan speshal kaina nerv sel weh faam fi wee brayn an ih way bowt 3.3 pong (1.5 kg). Tink bowt weh hapm wen yu taak. Evri werd weh yu seh, yu brayn haftu sen mesij fi mek bowt 100 mosl eena yu tong, chroat, lip, jaa, ahn ches werk tugeda. Fi mek yu ku prononks wahn werd eena di karek way, aala dehnya mosl haftu moov eena wahn spesifik aada. Wahn stodi weh poblish eena 2019 shoa dat nyoobaan baybi ku rekonaiz ahn pik op wan wan werdz. Dis stodi sopoat weh wahn lata peepl weh du risaach bileev—dat wi baan wid di abiliti fi rekonaiz ahn laan difrent langwij. Wi abiliti fi taak da wahn gif fahn Gaad fi chroo! w20.05 22-23 ¶8-9

Aybraham mi wilin fi lef di komfatabl way a laif weh ih mi ga da di siti a Er. Wai? Bikaaz hihn mi-di wayt fi di “siti weh ga reel fongdayshan.” (Heeb. 11:8-10, 16) Di siti weh Aybraham mi-di wayt fa da Gaad Kingdom. Da Kingdom mek op a Jeezas Krais ahn 144,000 anointid Kristyanz. Paal mi kaal di Kingdom “di siti a di livin Gaad.” (Heeb. 12:22; Rev. 5:8-10; 14:1) Jeezas mi teech ih disaipl dehn fi pray fi mek dis Kingdom kohn soh dat evribadi pahn ert ku obay Gaad jos laik how evribadi obay ahn da hevn. (Mach. 6:10) Yu tink Aybraham mi noa how Gaad Kingdom mi wahn geh aaganaiz? No. Fi honjridz a yaaz, da infamayshan da-mi wahn “hoali seekrit.” (Ifee. 1:8-10; Kol. 1:26, 27) Bot Aybraham mi noa dat som a ih disendant dehn mi wahn geh fi bee king bikaaz Jehoava mi pramis dat tu ahn.​—Gen. 17:1, 2, 6. w20.08 2-3 ¶2-4

Wi haftu rijek apastayt teechinz. Fahn sins di Kristyan kangrigayshan mi fers staat, di Devl aalwayz di chrai mek Gaad peepl fayt geh week. Soh wi haftu noa how fi tel wat da chroo ahn wat da lai. Wi enimi dehn mait yooz di Intanet er soashal meedya fi spred lai weh ku mek wi stap chros eena Jehoava ahn stap lov wi bradaz ahn sistaz. Dehndeh lai kohn fahn Saytan, soh noh bileev dehn! (1 Jan 4:1, 6; Rev. 12:9) Fi mek wi ku stan op tu Saytan atak dehn, wi haftu schrentn wi fayt eena Jeezas an eena how Jehoava di yooz ahn fi du fi hihn wil. Wi aalso need fi chros di onli wan dehn weh Jehoava di yooz tudeh fi dairek fi hihn aaganaizayshan. (Mach. 24:45-47) Wi schrentn wi fayt wen wi stodi Gaad Werd regyula. Den wi fayt wahn bee laik wahn chree weh ga roots weh goh deep dong eena di grong. Di apasl Paal mi seh sohnting simila wen ih mi rait di werdz eena di skripcha teks fi tudeh. w20.07 23-24 ¶11-12

Bikaaz non a wi noh perfek, ih eezi fi mek wi joj peepl bikaaz a di way how dehn luk. (Jan 7:24) Bot wi ku onli laan wahn lee bit bowt sombadi jos bai weh wi ku si wen wi luk pahn dehn. Fi egzampl, eevn wahn smaat dakta weh ga lata ekspeeryens di ten tu peepl kyaahn laan moch bowt sombadi jos bai weh ih si wen ih luk pan ahn. Di dakta haftu lisn gud fi noa wahn persn medikal hischri, how ih feel, er weh simtomz ih gat. Di dakta mait sen di persn fi goh du wahn eks-chray soh dat ih ku si di eensaida di persn badi. If nat, di dakta ku en op di chreet di persn fi di rang kandishan. Jos laik da dakta, wi kyaahn andastan wi bradaz ahn sistaz jos bai weh wi si wen wi luk pahn dehn. Wi haftu chrai fi andastan weh kaina persn dehn. Af koars, wi kyaahn reed nobadi haat. Bot wi need fi du wi bes fi fala Jehoava egzampl. Hihn lisn tu peepl weh wership ahn. Hihn andastan how ahn wai dehn ak di way dehn ak. Ahn Hihn shoa kompashan tu dehn. w20.04 14-15 ¶1-3

Wi haftu laan fi bee hombl bikaaz peepl weh prowd noh ‘sensabl eena di way dehn tink.ʼ Prowd peepl tink dehn moa impoatant dan evribadi els ahn dehn noh gree wid nobadi. Lata taimz, di way dehn tink ahn di tingz weh dehn du mek dehn hert dehnself er ada peepl. If dehn noh chaynj di way dehn tink, Saytan wahn blain dehn ahn korop dehn main. (2 Kor. 4:4; 11:3) Hombl peepl sensabl eena di way how dehn tink bowt dehnself. Dehn andastan dat eena lata wayz ada peepl beta dan dehn. (Fil. 2:3) Ahn dehn noa dat “Gaad fait gens dehn wan weh prowd, bot ih help dehn wan weh hombl.” (1 Peet. 5:5) Sensabl peepl noh waahn bee Jehoava enimi. Fi kip wiself hombl, wi haftu du weh di Baibl seh: “Giv op da [oal] way a laif deh wid dehndeh bad habit. Insteda dat, yu fi put aan di nyoo self.” Wi haftu stodi Jeezas egzampl ahn chrai az haad az pasabl fi liv di saym way.​—Kol. 3:9, 10; 1 Peet. 2:21. w20.07 7 ¶16-17

Wi ga di wandaful privilij fi bee paat a Jehoava kangrigayshan! Wi injai pees ahn hapinis az wi wership Jehoava wid wi bradaz ahn sistaz eena di kangrigayshan. Weh roal yoo gat eena di kangrigayshan? Di apasl Paal mi kompyaa di kangrigayshan tu di hyooman badi. Hihn mi aalso kompyaa eech persn eena di kangrigayshan tu di difrent paats a di badi. (Roam. 12:4-8; 1 Kor. 12:12-27; Ifee. 4:16) Wan ting weh wi ku laan fahn Paal iloschrayshan da dat eech wan a wi ga wahn impoatant roal eena Jehoava famili. Paal staat aaf ih iloschrayshan di seh: “Evribadi ga wan badi weh ga lata difrent paats, ahn eech a dehn paat ga dehn oan jab weh dehn du, ahn eech paat serv di badi. Sayhn way, eevn doa wi da lata peepl, wi da wan badi, kaa wi da wan wid Krais, ahn aala wi jain aan tu wan anada az difrent paat a wan badi.” (Roam. 12:4, 5) Paal mi meen dat eevn doa eech wan a wi ga wahn difrent roal eena di kangrigayshan, eech wan a wi stil preshos tu Jehoava. w20.08 20 ¶1-2; 21 ¶4

If yoo da wahn payrent, how yu ku fala Jehoava egzampl ahn bee hombl? If di sichuwayshan alow it, aks yu chiljren how dehn tink unu shuda du sohnting. An if pasabl, tek dehn sojeshanz. Jehoava aalso shoa dat ih hombl wen ih shoa payshens, eevn wen ih servant dehn aks ahn kweschanz bowt ih disizhanz. Hihn mi lisn tu Aybraham wen Aybraham mi tel ahn dat ih tink ih neva rait fi dischrai Sadam ahn Gomora. (Gen. 18:22-33) Yu memba how Jehoava mi deel wid Aybraham waif, Saara, wen shee mi laaf kaaz Hihn mi pramis dat shee mi wahn geh pregnant eena ih oal ayj? (Gen. 18:10-14) Hihn neva geh ofendid wen shee mi du dat. Insteda dat, hihn mi chreet ahn wid rispek. If yoo da wahn payrent er wahn elda, weh yoo ku laan fahn Jehoava egzampl? Weh yoo du wen yu chiljren er sombadi eena di kangrigayshan noh gree wid yu disizhanz? Yoo kwik fi difen yuself ahn tel dehn dat dehn rang? Er yoo chrai fi andastan weh dehn di chrai eksplayn tu yu? Wen sombadi weh ga atariti fala Jehoava egzampl, di famili ahn di kangrigayshan benifit. w20.08 10 ¶7-9

Wen wi mi fers laan di chroot, wi mi wilin fi aksep help fahn adaz bikaaz wi mi noa dat wi need wahn lata help. (1 Kor. 3:1, 2) How bowt now? Maybi wi di serv Jehoava fi wahn lang taim now ahn wi mait ga lata ekspeeryens, bot wi mait noh bee wilin fi aksep help fahn adaz, espeshali if dehn jos kom eena di chroot. Bot wahn lata taim, Jehoava yooz wi bradaz ahn sistaz fi schrentn wi. (Roam. 1:11, 12) Soh, if wi waahn geh schrent fahn Jehoava, wi need fi aksep di help weh wi bradaz ahn sistaz gi wi. Ih noh mata wehpaat wahn persn kohn fram er humoch schrent, ejukayshan, er moni ih gat. If di persn hombl ahn chros eena Jehoava, ih ku du lata gud tingz. Soh mek aala wi (1) pen pahn Jehoava, (2) laan fahn Baibl egzamplz, an (3) aksep help fahn wi bradaz ahn sistaz. Den yes, noh mata if wi feel week, Jehoava wahn gi wi di schrent fi du eniting! w20.07 14 ¶2; 19 ¶18-19

Wan ting weh ku tes wi payshens da wen wi preech tu wi famili membaz weh da noh Witnis. Bot Ecclesiastes 3:1, 7 ku help wi. Ih seh: ‘Fi evriting dehn ga wahn taim, wahn taim fi kip kwaiyet ahn wahn taim fi taak.ʼ Di way wi bihayv ku help wi famili fi waahn lisn tu wi mesij. Bot sayhn taim, wi need fi bee redi fi taak tu dehn bowt Jehoava. (1 Peet. 3:1, 2) Wi need fi werk haad fi preech ahn mek disaiplz, bot wi need fi ga payshens wid evribadi, inkloodin wi famili. Wi ku laan how fi bee payshent fahn Gaad faytful servants eena di paas ahn fahn wi bradaz tudeh day tu. Habakok mi waahn Gaad en aal wikidnis, bot hihn mi shoa payshens wen ih seh: “Ah wahn kip di stan op da mi gyaad stayshan.” (Hab. 2:1) Di apasl Paal mi reeli waahn finish ih minischri, bot ih mi bayr payshens ahn “tel evribadi di Gud Nyooz.”​—Aks 20:24. w20.09 11-12 ¶12-14

Eevn doa Jehoava da di onli wan weh ga moa atariti dan Jeezas, Jeezas neva tink tu moch a ihself. Laik Jeezas, if wi hombl, wi wahn shoa moa lov fi adaz. Ahn Jeezas mi seh dat Gaad chroo servants wahn shoa lov fi eech ada. (Look 9:48; Jan 13:35) Weh yu shuda du if yu feel laik di eldaz noh di handl prablemz eena di kangrigayshan di way dehn sopoas tu? Insteda komplayn, yu ku shoa dat yu hombl ahn dat yu sopoat di bradaz weh di tek di leed. (Heeb. 13:17) How yu ku shoa dat yu sopoat dehn bradaz? Aks yuself kweschanz laik dehnya: ‘Di prablemz weh Ai si eena di kangrigayshan reeli soh seeryos dat di eldaz need fi deel wid dehn? Dis da di karek taim fi fiks dehn? Da mai rispansabiliti fi fiks di prablem? Ai reeli di chrai promoat yooniti er Ai di chrai mek ada peepl tink dat Ai impoatant?ʼ Tu Jehoava, ih moa impoatant fi mek wi bee hombl dan fi ga skilz. An ih moa impoatant fi mek wi bee yoonaitid dan fi foakos onli pahn geh tingz don tu taim. Dats wai yu fi du yu bes fi kip yuself hombl eena yu servis tu Jehoava. If yu du dat, yu wahn help di kangrigayshan bee yoonaitid.​—Ifee. 4:2, 3. w20.07 4-5 ¶9-11

Sohn faytful uman yoostu “tek moni fahn owta dehn oan pakit fi tek kayr a Jeezas,” ahn hihn mi apreeshiayt dat. (Look 8:1-3) Hihn mi teech dehn sohn impoatant chroot bowt di wil a Gaad. Fi egzampl, ih mi tel dehn dat ih wahn ded ahn kohn bak tu laif. (Look 24:5-8) Jos laik how hihn mi tel ih apasl dehn weh mi wahn hapm tu dehn, saym way ih mi aalso tel dehnya uman weh mi wahn hapm tu dehn. (Maak 9:30-32; 10:32-34) Ahn tink bowt dis tu: Wen dehn mi ares Jeezas, ih apasl dehn ron weh ahn lef ahn bai ihself. Bot wen ih mi-di ded pahn di taacha stayk, da hoo mi deh rait saida ahn? Da mi som a di faytful uman dehn hoo mi sopoat ahn eena ih minischri. (Mach. 26:56; Maak 15:40, 41) Sohn faytful uman da-mi di fers fi si ahn afta Gaad rezorek ahn. Hihn mi aks dehn fi goh gi di apasl dehn dis nyooz. (Mach. 28:5, 9, 10) Ahn wen Gaad mi poar owt ih hoali spirit pahn di disaipl dehn pahn di day a Pentikaas eena di yaa 33 C.E., ih pasabl dat dehnya saym uman mi deh rait deh tu, soh dehn wuda mi geh di hoali spirit ahn dehn geh di gif fi taak eena difrent langwij ahn tel adaz bowt “di grayt ting dehn weh Gaad du.”​—Aks 1:14; 2:2-4, 11. w20.09 23 ¶11-12

Di werk weh wi du fi mek disaiplz ku sayv peepl laif! How wi noa dat? Da Machyu 28:19, 20, Jeezas mi gi dis koman: ‘Goh ahn teech peepl fi bee mai disaipl, ahn baptaiz dehn.ʼ Yu tink ih impoatant fi geh baptaiz? Weh di Baibl tel wi bowt baptizm? If wi waahn get evalastin laif, wi haftu geh baptaiz. Sombadi weh waahn geh baptaiz haftu bileev dat ih onli ku get evalastin laif bikaaz Jeezas mi ded fi wi. Dat da wai di apasl Peeta mi tel di bradaz bak den: “Baptizm . . . di sayv unu now, . . . bikaaz a fayt eena Jeezas Krais hoo don kohn bak tu laif.” (1 Peet. 3:21) Soh wen wahn nyoo disaipl geh baptaiz, ih ga di hoap fi liv fareva. Fi mek disaiplz, wi need fi laan fi “teech peepl gud.” (2 Tim. 4:1, 2) Wai? Bikaaz Jeezas mi gi wi dis koman: ‘Goh ahn teech peepl fi bee mai disaipl. Teech dehn fi obay aal di tingz weh Ai mi koman unu.ʼ Di apasl Paal mi tel wi fi “kip aan di werk haad” fi mek disaipl, ahn den ih seh dat if wi du dis, wi wahn sayv wiself ahn di peepl weh lisn tu wi. w20.10 14 ¶1-2

Di disaipl Peeta mi laan fi lov fi kech peepl insteda fish. Ahn wid Jehoava help, Peeta mi laan fi du dis preechin werk reeli gud. (Aks 2:14, 41) Di moas impoatant reezn wai wi du dis werk da bikaaz wi lov Jehoava. Wi lov fi Jehoava ku help wi tel adaz bowt hihn, eevn doa wi mait feel dat wi noh gud inof. Wen Jeezas mi invait Peeta fi bee ih disaipl, hihn mi tel ahn: “Noh frayd.” (Look 5:8-11) Peeta neva frayd fi weh kuda mi hapm tu hihn if ih mi staat tu fala Jeezas. Insted, ih mi sopraiz fi si humoch fish Jeezas mi help dehn kech. Hihn mi noa dat Jeezas mi jos du wahn mirakl, an Peeta mi feel dat ih neva gud inof fi werk lang wid Jeezas. Jos laik Peeta, yoo mait feel frayd tu. Maybi yu feel nervos bowt evriting weh yu wahn haftu du fi bee wan a Krais disaipl. If dat da how yu feel, schrentn yu lov fi Jehoava, Jeezas, ahn yu nayba. Den yu wahn waahn aksep Jeezas invitayshan fi bee ih disaipl.—Mach. 22:37, 39; Jan 14:15. w20.09 3 ¶4-5

Wi hapi fi giv a wi taim, enerji, ahn moni fi help evribadi weh “ga di rait haat kandishan fi get evalastin laif.” (Aks 13:48) Wen wi du dis, wi di fala Jeezas egzampl. Hihn mi seh: “Mai food da fi du di wil a di Wan weh sen mi, ahn fi finish di werk weh hihn gi mi fi du.” (Jan 4:34; 17:4) Ahn dat da aalso fi wee dizaiya. Wee waahn finish di werk weh Jeezas gi wi fi du. (Jan 20:21) Ahn wi waahn adaz, inkloodin wi bradaz ahn sistaz weh noh aktiv eena di kangrigayshan nohmoh, fi stay faytful eena dis werk lang wid wi. (Mach. 24:13) Da chroo, ih noh eezi fi du weh Jeezas koman wi fi du. Bot wi noh di du dis werk pahn wi oan. Jeezas mi pramis wi dat ih mi wahn deh wid wi. Wen wi mek disaiplz, “wee di werk lang wid Gaad” ahn wi da “falowaz a Krais.” (1 Kor. 3:9; 2 Kor. 2:17) Soh den, wee kud finish dis werk. Ahn da wahn privilij fi du dis werk ahn fi help adaz fi du di saym werk tu!​—Fil. 4:13. w20.11 7 ¶19-20

Yoozhwali, di disizhanz weh payrents mek afek dehn chiljren fi wahn lang taim. Soh if payrents mek bad disizhanz, dehn ku kaaz prablemz fi dehn chiljren. Bot if dehn mek gud disizhanz, dehn di gi dehn chiljren wahn chaans fi liv wahn hapi laif. Bot chiljren need fi mek gud disizhanz tu. Ahn di bes disizhan weh enibadi ku mek da fi serv wi lovin hevnli Faada, Jehoava. (Ps. 73:28) Mayri ahn Joazef mi waahn help dehn chiljren fi serv Jehoava, ahn di disizhanz weh dehn mi mek mi shoa dat fi serv Jehoava da-mi di moas impoatant ting eena dehn laif. (Look 2:40, 41, 52) Jeezas mi aalso mek gud disizhanz weh mi help ahn fi du weh Jehoava mi waahn ih du. (Mach. 4:1-10) Jeezas mi groa op fi bee wahn laayal, kain, ahn brayv man. Aal payrents hoo lov Jehoava wuda mi bee prowd ahn hapi fi ga wahn son laik Jeezas. w20.10 26 ¶1-2

Tink bowt dehnya chree egzampl. Wahn oalda sista di luk bak pahn aala di gud memriz fan ih paas. Eevn doa fi shee laif haada now, shee stil kantinyu du ih bes fi Jehoava. (1 Kor. 15:58) Evri day shee picha ihself lang wid ih famili ahn frenz di liv tugeda eena di Paradais weh Gaad pramis wi. Wahn nada sista tink bowt how sombadi eena di kangrigayshan mi hert shee, bot shee disaid fi noh tink tu moch bowt weh di persn mi du tu ahn. (Kol. 3:13) Wahn brada memba di mistayk dehn weh hihn mi mek eena di paas, bot hihn disaid fi du aal weh ih kud now fi bee faytful tu Jehoava. (Ps. 51:10) Weh dehnya chree Kristyan gat eena kaman? Aala dehn memba weh mi hapm tu dehn eena di paas, bot dehn lef di paas eena di paas; dehn noh aalwayz tink bowt it. Insteda dat, dehn luk schrayt heda dehn ahn kip dehn aiy pahn di fyoocha. Wai dat impoatant? Jos laik how wahn persn kyaahn waak schrayt if ih kip aan di luk bihain, wee kyaahn mek proagres eena wi servis tu Jehoava if wi kip aan di luk bak—eeda bikaaz wi di tink bowt tingz weh mi hapm tu wi er wi di tink bowt tingz weh wee mi du eena di paas.​—Look 9:62. w20.11 24 ¶1-3

Golaiyat, hoo da-mi wahn powaful soalja, mi si Dayvid az sombadi weh week. Aftaraal, Golaiyat mi biga dan Dayvid, an ih mi ga beta ikwipment ahn chraynin fi fait waar. Pahn di ada han, Dayvid neva ga non a dehndeh tingz. Bot Dayvid mi pen pahn Jehoava, ahn Jehoava mi giv ahn di powa fi fait Golaiyat. (1 Sam. 17:41-45, 50) Dayvid mi haftu deel wid wahn nada chalenj weh kuda mi mek ih feel week. Dayvid mi noa dat Jehoava mi chooz Saal az king oava Izrel, soh Dayvid mi laayal tu ahn. At fers, King Saal mi rispek Dayvid. Bot afta dat, Saal mi geh prowd ahn den ih mi jelos Dayvid. Ih mi chreet Dayvid bad, an ih mi eevn chrai kil ahn. (1 Sam. 18:6-9, 29; 19:9-11) Eevn doa Saal mi chreet Dayvid bad, Dayvid mi stil ga rispek fi di king weh Jehoava mi apoint. (1 Sam. 24:6) Dayvid mi pen pahn Jehoava fi mek ih giv ahn di schrent weh ih mi need fi bayr op chroo da haad taim.​—Ps. 18:1, hedin. w20.07 17 ¶11-13

Wahn lata di prafesi bowt di king a di naat ahn di king a di sowt don kohn chroo, soh wi ku bee shoar dat di res a it wahn kohn chroo tu. Fi andastan di prafesi eena Daniel chapta 11, wi haftu memba sohn impoatant faks. Wi haftu memba dat dis prafesi onli taak bowt di difrent king dehn ahn govament dehn weh mi ga dairek deelinz wid Gaad peepl, eeda fi rool oava dehn er atak dehn. Gaad peepl da onli wahn lee bit wen yu kompyaa dehn tu aala di peepl weh liv pahn di ert. Soh wai wen sohnting impoatant hapm eena di werl Gaad peepl aal taim deh rait eena di midl a it? Bikaaz Saytan ahn fi hihn hoal sistem ga wan mayn goal. Hihn waahn dischrai enibadi weh serv Jehoava ahn Jeezas. (Gen. 3:15, Rev. 11:7; 12:17) Pahn tap a dat, di prafesi weh Danyel mi rait haftu gree wid ada prafesi eena Gaad Werd tu. Az a mata a fak, wi onli ku andastan Danyel prafesi karek if wi kompyaa it tu weh di res a di Baibl seh. w20.05 2 ¶1-2

Wahn lata peepl tudeh ga difrent bileef bowt weh wahn hapm afta wi ded. Bot weh di Baibl teech wi? Wen wahn persn ded, ih badi ratn. Bot di Wan hoo kriyayt evriting eena di yoonivers ku rezorek da persn ahn giv ahn di kaina badi weh ih need. (Gen. 1:1; 2:7) Di apasl Paal mi yooz wahn iloschrayshan fi help wi si dat Gaad wudn need fi bring bak di saym badi. Tink bowt di seed fi wahn plaant. Wen wahn persn plaant da seed eena di grong, ih staat tu groa an ih ton intu wahn nyoo plaant. Da nyoo plaant weh staat tu groa veri difrent fahn di smaal seed weh di persn mi plaant. Paal mi yooz da iloschrayshan fi shoa dat fi wee Kriyayta ku gi eech wan wahn “[badi] di way hihn waahn.” Paal mi aalso seh dat “wan kaina badi deh da hevn ahn wan kaina badi deh pahn di ert.” Di kaina badi weh deh pahn di ert da fizikal badi, bot di kaina badi weh deh op da hevn da spirit, laik di aynjel dehn.​—1 Kor. 15:36-41. w20.12 9-10 ¶7-9

Aala wi waahn ga wahn kaam ahn peesful laif. Nobadi laik wori. Bot sohntaim, wi mait stil feel angshos er ga tingz weh mek wi wori an aks di saym kweschanz weh King Dayvid mi aks eena di skripcha teks fi tudeh. Wahn lata tingz ku mek wi wori er feel angshos. Ahn wi noh ga no kanchroal oava som a dehndeh tingz. Fi egzampl, di prais a food, kloaz, ahn shelta kip di goh op evri yaa, ahn wi noh ga no kanchroal oava dat. Ahn wi kyaahn kanchroal how aafn di peepl weh wi werk wid er goh da skool wid wahn chrai temp wi fi lai er komit sekshwal imoraliti. Ahn wi kyaahn stap peepl fahn komit kraim eena wi naybahud. Di reezn wai wi fays dehndeh chalenjiz da bikaaz wi liv eena wahn werl wehpaat peepl noh kay bowt weh di Baibl seh. Ahn Saytan, hoo da di roola a dis werl, noa dat som peepl wahn alow “di woriz a dis laif” fi stap dehn fahn serv Jehoava. (Mach. 13:22; 1 Jan 5:19) Soh ih noh sopraiz wi dat di werl ful op a prablemz weh kaaz peepl fi wori soh moch! w21.01 2 ¶1, 3

Di apasl Jan mi aalso tel wi dat wi noh fi hayt wi bradaz ahn sistaz. If wi noh obay da advais, wi di alow Saytan fi tek advantij a wi. (1 Jan 2:11) Dat da egzakli weh mi hapm tu som a wi bradaz ahn sistaz da di en a di fers senchri C.E. Saytan mi-di chrai ih bes fi mek Gaad peepl hayt eech ada ahn fi divaid dehn. Bai di taim Jan mi rait ih leta dehn, sohn man weh mi-di chrai fi du di saym ting weh Saytan mi-di du mi en op di bee paat a di kangrigayshan. Fi egzampl, Daiyachrifeez mi-di kaaz sohn seeryos divizhan eena wahn kangrigayshan. (3 Jan 9, 10) Hihn neva ga no rispek fi di eldaz weh di govanin badi mi sen fi inkorij di kangrigayshan. An if enibadi mi shoa haspitaliti tu peepl weh hihn neva laik, hihn mi eevn chrai fi chroa dehn owta di kangrigayshan. Hihn da-mi wahn terabl persn! Saytan stil di chrai haad fi divaid Gaad peepl tudeh. Bot wi shuda neva mek eniting kaaz wi fi hayt wi bradaz ahn sistaz ahn stap sopoat dehn. w21.01 11 ¶14

Eena di fers werl waar, di German govament ahn di British govament mi persikyoot Gaad peepl hoo mi rifyooz fi fait eena di waar. Ahn di U.S. govament mi tek di bradaz weh mi-di tek di leed eena di preechin werk ahn chroa dehn eena prizn. Dis persikyooshan mi fulfil di prafesi eena Revilayshan 11:7-10. Den, joorin di 1930ʼs, di king a di naat mi atak Gaad peepl widowt mersi ahn dat mi onli geh wers joorin di sekant werl waar. Hitler ahn fi hihn falowaz mi ban di werk weh Gaad peepl mi-di du. Di king a di naat mi kil honjridz a Jehoava peepl ahn dehn mi sen towznz moa da kansenchrayshan kyamp. Di king a di naat mi aybl fi “mek di hoali plays noh bee hoali nohmoh” ahn “stap di regyula sakrifais” wen ih mi ban di preechin werk. (Dan. 11:30b, 31a) Hitler, hoo da-mi di roola a Germany, mi eevn pramis fi kil aala Gaad peepl weh mi deh da Germany. w20.05 6 ¶12-13

Wen wi ga lov fi wan anada, wi noh wahn chrai kompeet wid wan anada; dis protek evribadi eena di kangrigayshan. Memba dat Janatan neva jelos Dayvid, an ih neva chrai kompeet wid Dayvid fi bee king. (1 Sam. 20:42) Aala wi ku fala Janatan egzampl. Wi wuda neva waahn bee jelos a wi bradaz ahn sistaz ner chrai kompeet wid dehn. Insteda dat, wi waahn ‘kansida ada peepl fi bee moa impoatant dan wee.ʼ (Fil. 2:3) Memba dat eech persn eena di kangrigayshan ga sohnting gud fi aafa. Soh if wi stay hombl, wi wahn si di gud eena wi bradaz ahn sistaz, ahn wi wahn benifit fahn fi dehn faytful egzampl. (1 Kor. 12:21-25) Wen wi shoa lov fi wan anada, wi schrentn di yooniti weh dehn monks Gaad peepl. Wi proov dat wee da Jeezas disaipl dehn, ahn dis mek sinsyaa peepl waahn kohn serv Jehoava lang wid wi. Ahn moa dan eniting els, wi gi gloari tu Jehoava, “di Faada weh ga lata mersi ahn di Gaad weh aal komfert kohn fram.”​—2 Kor. 1:3. w21.01 24 ¶14; 25 ¶16

Tudeh, som peepl eena di werl noh rispek Jehoava peepl ahn dehn mak wi bikaaz dehn tink wi foolish ahn week. Wai? Bikaaz wi noh ga di saym atichood laik di peepl eena di werl rong wi. Wee chrai fi bee hombl an obeedyant. Bot peepl eena di werl prayz op peepl weh prowd, peepl weh aalwayz waahn du dehn oan ting, ahn peepl weh noh waahn nobadi tel dehn weh fi du. Pahn tap a dat, wi noh get involv eena palitiks, ahn wi noh jain di aami eena no konchri. Wee difrent fahn di peepl eena di werl, soh dehn tink dehn beta dan wee. (Roam. 12:2) Eevn doa peepl eena di werl tink dat wi week, Jehoava di yooz wi fi du grayt tingz. Hihn ga fi hihn peepl di du di graytis preechin werk eva, ahn hihn di mek shoar dat notn stap dehn. Tudeh, hihn di yooz ih servants fi projoos magazeen weh avaylabl eena moa konchri ahn moa langwij dan eni ada magazeen, an ih aalso di mek dehn yooz di Baibl fi help milyanz a peepl soh dat dehn ku ga wahn beta laif. Da onli Jehoava mek dis werk pasabl. w20.07 15 ¶5-6

Jeezas rispek Jehoava atariti, bot dat noh meenz dat hihn noh smaat er dat hihn noh ga skilz. Onli wahn persn weh reeli smaat ku teech eena wahn way weh simpl an eezi fi andastan, laik di way how Jeezas mi teech. (Jan 7:45, 46) Jehoava noa dat Jeezas ga skilz. Wi noa dis bikaaz Jehoava mi alow Jeezas fi werk lang wid ahn wen ih mi-di kriyayt di yoonivers. (Prov. 8:30; Heeb. 1:2-4) An afta Jehoava mi rezorek Jeezas, ih giv ahn “aal atariti da hevn ahn pahn di ert.” (Mach. 28:18) Eevn doa Jeezas ga lata skilz, hihn stil luk tu Jehoava fi gaid ahn. Wai? Bikaaz hihn lov fi hihn Pa. Wahn hozban fi memba dat jos bikaaz Jehoava put di waif anda ih atariti, dat noh meenz dat Hihn feel laik man moa impoatant dan uman. Jehoava ihself mi mek dat klyaa wen ih chooz man an uman fi rool wid Jeezas eena hevn. (Gal. 3:26-29) Jehoava mi shoa dat ih chros ih Son wen ih giv ahn atariti. Saym way soh, wahn waiz hozban wahn chros ih waif ahn gi shee sohn atariti tu. w21.02 11 ¶13-14

Di Baibl da laik wahn miro. Ih help wi fi si weh wi need fi werk pan ahn how wi ku du dat. (Jay. 1:23-25) Fi egzampl, afta wi stodi Gaad Werd, wi mait riyalaiz dat wi need fi kanchroal wi tempa. Jehoava teech wi dat wi need fi ga wahn jentl haat. Soh wid fi hihn help, wi ku laan how fi deel wid peepl er prablemz weh mek wi geh beks. Wi wahn ku aalso tink schrayt ahn mek beta disizhanz. (Jay. 3:13) Soh ih veri impoatant dat wi geh fi noa di Baibl gud fi chroo! Sohntaim, wi noh laan weh fi avoid til afta wi don mek wahn mistayk. Wahn moch beta way fi geh wizdom da fi laan fahn ada peepl egzampl, weda gud er bad. Dats wai Jaymz inkorij wi fi luk pahn di egzampl a peepl eena di Baibl laik Aybraham, Rayhab, Joab, an Ilaija. (Jay. 2:21-26; 5:10, 11, 17, 18) Dehndeh laayal servants a Jehoava kuda mi bayr op anda chraiyalz weh kuda mi mek it haad fi stay hapi. Fi dehn egzampl shoa wi dat wid Jehoava help, wee ku bayr op jos laik dehn. w21.02 29-30 ¶12-13

Pahn wahn Baibl stodi, di teecha ga di rispansabiliti fi help di styoodent andastan Gaad Werd. If di teecha invait yu fi goh lang wid ahn, den yoo dehdeh fi help ahn. (Eccl. 4:9, 10) Bot weh yu ku du fi bee wahn gud helpa joorin di Baibl stodi? Pripyaa fi di Baibl stodi. Fers, yu ku aks di teecha fi tel yu wahn lee bit bowt di styoodent. Wat da di styoodent bakgrong? Weh tapik yu wahn di stodi wid ahn? Weh yu waahn mek di styoodent laan fahn di stodi tudeh? Eniting deh weh Ah shud er shudn seh er du wail wi deh pahn di stodi? How Ai ku inkorij di styoodent fi mek proagres? Af koars, di teecha noh wahn gi yu no praivit infamayshan bowt di styoodent, bot eni infamayshan weh ih doo shayr wid yu wahn reeli help yu. Wahn mishineri weh naym Joy seh: “Dis infamayshan help mi paadna fi waahn help di styoodent, an ih aalso help ahn fi noa weh fi seh joorin di stodi.” w21.03 9 ¶5-6

Sohntaim, peepl hayt wi bikaaz wi liv akaadn tu Gaad standad a weh rait ahn weh rang. Gaad standadz veri difrent fahn di werl standadz. Fi egzampl, lata peepl tink notn rang wid di disgostin sekshwal imoraliti weh peepl praktis tudeh, bot dat da egzakli weh Gaad mi dischrai Sadam ahn Gomora fa! (Jood 7) Lata peepl insolt wi ahn tel wi dat wi tu schrik bikaaz wi obay weh di Baibl seh bowt dehndeh tingz. (1 Peet. 4:3, 4) Weh ku help wi fi bayr op wen peepl hayt wi an insolt wi? Wi haftu ga schrang fayt dat Jehoava wahn help wi. Wi fayt da laik wahn sheel weh wi ku yooz fi ‘blak aala di aro dehn weh di bon wid faiya weh di wikid wan di shoot aata wi.ʼ (Ifee. 6:16) Bot wi need moa dan fayt. Wi aalso need lov. Wai? Bikaaz lov “noh eezi fi geh beks.” Ih “bayr op anda evriting . . . an ih noh giv op noh mata weh hapm.” (1 Kor. 13:4-7, 13) Lov fi Jehoava, fi wi bradaz ahn sistaz, an eevn fi wi enimi dehn wahn help wi fi bayr op wen peepl hayt wi. w21.03 20-21 ¶3-4

Sohntaim, wi ku proov tu wi bradaz ahn sistaz dat wi lov dehn bai di tingz weh wi noh du. Fi egzampl, wi noh wahn geh beks eezi if dehn seh sohnting weh wi noh laik. Tink bowt weh mi hapm lee wail bifoa Jeezas mi giv op ih laif fi wi. Hihn mi tel ih disaipl dehn dat if dehn mi waahn geh evalastin laif, dehn mi haftu eet ih flesh ahn jrink ih blod. (Jan 6:53-57) Wahn lata Jeezas disaipl dehn neva laik weh ih mi seh, soh dehn mi stap fala ahn. Bot fi hihn reel frenz mi stay rait bai ih said. Dehn neva andastan weh Jeezas mi-di seh, ahn dat da praabli wai dehn mi sopraiz wen dehn hyaa weh ih seh. Bot Jeezas reel frenz neva kwik fi tink dat weh ih mi seh mi rang ahn geh beks wid ahn. Insted, dehn mi chros ahn bikaaz dehn mi noa dat eniting weh hihn mi seh da chroo. (Jan 6:60, 66-69) Ih veri impoatant dat wi noh eezi fi geh beks fi di tingz weh wi frenz seh! Insted, wi gi dehn wahn chaans fi eksplayn wai dehn seh weh dehn seh.​—Prov. 18:13. w21.01 11 ¶13