Aypril

Jeezas mi shoa dat hihn ga lata lov fi wi wen ih mi wilin fi giv ih laif fi wi. (Jan 15:13) Wee kuda neva pay bak Jehoava ahn Jeezas fi di lov weh dehn shoa wi. Bot wi ku shoa dehn dat wi tankful bai di way how wi liv wi laif evri day. (Kol. 3:15) Di ransom veri preshos tu di anointid bikaaz ih mek fi dehn wandaful hoap pasabl. (Mach. 20:28) Bikaaz a dehn fayt eena Krais sakrifais, Jehoava si dehn az raichos ahn hihn adap dehn az fi hihn chiljren. (Roam. 5:1; 8:15-17, 23) Di ada sheep tankful fi di ransom tu. Bikaaz dehn ga fayt eena Krais sakrifais, Gaad si dehn az kleen ahn dehn ga di hoap fi kom owta “di grayt chribyulayshan.” (Rev. 7:13-15) Di anointid ahn di ada sheep shoa dat dehn tankful fi di ransom wen dehn goh da di Memoaryal evri yaa. w22.01 23 ¶14-15

Jeezas mi opset oava di reezn wai dehn mi-di kil ahn. Dehn mi akyooz Jeezas dat hihn neva ga no rispek fi Gaad er fi Gaad naym, ahn dat neva chroo non ataal. (Mach. 26:64-66) Dat mi opset hihn soh moch dat hihn mi hoap dat ih Faada neva mi wahn alow ahn fi sofa eena dis way. (Mach. 26:38, 39, 42) Jeezas mi haftu ded pahn wahn stayk fi set di Jooz free fahn wahn kers. (Gal. 3:10) Dehn mi deh anda dis kers bikaaz dehn mi agree fi obay Gaad Laa bot dehn neva obay it. Soh dehn mi dizerv fi ded bikaaz dehn mi deh anda da kers ahn bikaaz dehn da-mi Adam chiljren. (Roam. 5:12) Gaad Laa seh dat if wahn man mi komit wahn sin weh ih dizerv fi ded fa dehn shuda kil ahn. Sohntaim dehn wuda heng ih ded badi pahn wahn stayk aftawodz. (Deut. 21:22, 23; 27:26) Soh bikaaz Jeezas mi ded pahn wahn stayk, dat wuda set di Jooz free fahn di kers ahn fi hihn sakrifais wuda help dehn eevn doa dehn rijek ahn. w21.04 16 ¶5-6

Tink bowt weh mi hapm pahn di laas day a Jeezas laif pahn di ert. Hihn mi alow di Roaman soalja dehn fi ares ahn, an fi beet ahn widowt mersi. (Mach. 26:52-54; Jan 18:3; 19:1) Dehn beet ahn wid wahn wip weh tayr ih skin. Laytaraan, dehn mek ih bak di hevi taacha stayk weh dehn mi wahn heng ahn pan. Jeezas mi chrai bak di stayk tu wehpaat dehn mi wahn kil ahn, bot afta wahn lee wail di Roaman soalja dehn mi foas wahn nada man fi kehr it far ahn. (Mach. 27:32) Wen Jeezas mi reech di plays wehpaat ih mi wahn ded, di soalja dehn nayl ih han ahn fut tu di stayk. Wen dehn lif op di stayk, di wayt a fi hihn badi mi pul pahn di nayl dehn weh mi deh eena ih han ahn fut. Ih ma an ih fren dehn mi dehdeh ahn dehn mi-di krai, bot di Jooish roola dehn mi-di mak ahn. (Look 23:32-38; Jan 19:25) Jeezas mi sofa fi owaz. Di pozishan weh ih mi deh eena mi mek ih haat ahn longz haftu werk ekschra haad an ih mi haad fi mek ih breed. Jeezas mi noa dat hihn mi faytful tu di en, ahn jos bifoa ih mi ded ih mi seh wan laas pryaa tu Jehoava. Den ih bow ih hed an ih ded. (Maak 15:37; Look 23:46; Jan 10:18; 19:30) Dat da-mi wahn reeli sloa, paynful, ahn kruwil way fi ded! w21.04 16 ¶4

Jeezas mi taak tu ih 11 faytful apasl bowt too kovenant, er agreement. Hihn mi taak bowt di nyoo kovenant ahn di Kingdom kovenant. (Look 22: 20, 28-30) Dehndeh kovenant mi mek it pasabl fi mek onli wahn sertn amonk a peepl, inkloodin di apasl dehn, bee king ahn prees da hevn. (Rev. 5:10; 14:1) Soh onli di anointid Kristyanz weh stil alaiv pahn ert, ahn weh da paat a dehndeh too kovenant, fi eet di bred ahn jrink di wain da di Memoaryal. Jehoava gi dehn wahn wandaful hoap. Da hevn, dehn wahn neva ded ahn dehn badi wahn neva geh ratn ahn dehn wahn serv langsaid Jeezas Krais ahn di res a di 144,000. Pahn tap a dat, dehn wahn deh rait fronta Jehoava Gaad! (1 Kor. 15:51-53; 1 Jan 3:2) Di anointid noa dat dehn haftu stay faytful til dehn ded.—2 Tim. 4:7, 8. w22.01 21 ¶4-5

Too kriminal mi deh pahn taacha stayk langsaid Jeezas. (Look 23:40, 41) Wan a dehn mi ton tu Jeezas an ih mi tel ahn: “Memba mi wen yu get eena yu Kingdom.” (Look 23:42) Jeezas kuda mi gi dis kriminal wahn hoap fi di fyoocha bikaaz hihn mi noa dat fi hihn Faada mersiful. (Ps. 103:8; Heeb. 1:3) Jehoava eega fi fergiv wi ahn fi shoa wi mersi, bot hihn wahn onli fergiv wi if wi reeli sari fi di bad tingz weh wi du an if wi ga fayt eena di sakrifais a Jeezas Krais. (1 Jan 1:7) Som peepl mait fain it haad fi bileev dat Jehoava kuda eva fergiv dehn. If yoo eva feel da way deh, tink bowt dis: Jos bifoa Jeezas mi ded, hihn mi shoa mersi tu di kriminal weh jos mi-di staat tu shoa fayt. Soh humoch moa Jehoava wuda bee wilin fi shoa mersi tu fi hihn faytful servant dehn!—Ps. 51:1; 1 Jan 2:1, 2. w21.04 9 ¶5-6

Bikaaz Jeezas mi stay faytful tu ih Faada til ih ded, Jeezas mi du sevral tingz. Fers, hihn mi proov dat Saytan laiyad. Jeezas mi shoa dat wahn perfek hyooman kud stay faytful tu Jehoava noh mata weh Saytan du dehn. Sekant, Jeezas mi giv op ih laif az wahn ransom. Bikaaz hihn mi sakrifais ih laif fi wi, wee ku ga wahn raichos standin fronta Gaad, ahn wi ga di hoap fi liv fareva. Terd, Jeezas mi proov dat Jehoava da wahn raichos roola an ih mi klayr ih Faada naym. Mek wi liv eech day laik if da wi laas chaans fi stay faytful tu Jehoava til wi ded! Den, eevn if wi fays det, wi wahn ku seh: “Jehoava, Ah du mi bes fi stay faytful, fi proov dat Saytan laiyad, ahn fi klayr yu naym ahn sopoat yu sovrenti!” w21.04 12 ¶13-14

Peepl mi akyooz Jeezas ahn seh dat ih mi gilti a wahn kraim weh hihn neva komit. Dehn mi mak ahn, taacha ahn, an den nayl ahn tu wahn taacha stayk. Di nayl dehn eena ih han an ih fut mosi mi kaaz ahn eevn moa payn wen ih mek eni lee moov, an ih mosi mi paynful fi eevn taak. Bot ih mi haftu taak, bikaaz ih mi ga impoatant tingz fi seh. Wi ku laan sohn impoatant lesn fahn di laas tingz weh Jeezas mi seh bifoa ih ded! Dehn rimain wi dat wi need fi fergiv adaz, ahn wi need fi chros dat Jehoava wahn fergiv wee. Wee ga di privilij fi bee paat a wahn wandaful spirichwal famili a bradaz ahn sistaz weh redi fi help wi. Bot wen wi need help, wi mos aks dehn far it bikaaz dehn kyaahn reed wi main ahn haat. Wi noa dat Jehoava wahn help wi fi bayr op anda eni chraiyal weh wi fays. Ahn wi si how impoatant ih impoatant fi liv eech day laik if da mi di laas day a wi laif fi proov dat wi laayal tu Jehoava ahn dat wi shoar dat Jehoava wahn rezorek wi if wi ded. w21.04 8 ¶1; 13 ¶17

Wen wi fala eena Jeezas futstep, wi ku geh evalastin laif. Wen wahn rich yong man mi aks Jeezas weh ih mi need fi du fi geh evalastin laif, Jeezas mi tel ahn: “Kohn bee mi disaipl.” (Mach. 19:16-21) Wen Jeezas mi-di taak tu sohn Jooz weh neva bileev dat hihn da di Krais, Jeezas tel dehn: “Mai sheep . . . fala mi. Ai wahn gi dehn evalastin laif.” (Jan 10:24-29) Wee shoa dat wi ga fayt eena Jeezas wen wi fala ih teechinz ahn wen wi kapi fi hihn egzampl. If wi du dat, wi wahn stay pahn di road tu evalastin laif. (Mach. 7:14) Bifoa wi ku fala eena Jeezas futstep dehn kloas-wan, wi haftu geh fi noa ahn. Ahn wi haftu kantinyu “get fi noa” Jeezas beta ahn beta. Wi haftu laan bowt ih kwalitiz, ih tinkin, an ih standadz. Noh mata how lang wi deh eena di chroot, wi haftu kantinyu “get fi noa” Jehoava an ih Son. w21.04 4 ¶9-10

Di apasl Paal mi praabli feel reeli bad weneva hihn tink bowt aal di tingz weh ih mi du bifoa ih mi ton wahn Kristyan. Hihn mi kaal ihself di “wers” sina, ahn wi ku andastan wai! (1 Tim. 1:15) Bifoa hihn mi laan di chroot, hihn mi persikyoot di Kristyanz eena wan siti afta di neks. Hihn mi put som a dehn eena prizn, an ih mi sopoat di disizhan weh di koat mek fi kil sohn ada Kristyanz. (Aks 26:10, 11) Sopoaz eena dehn dayz, wahn Kristyan kopl mi ded sayka Paal, ahn den laytaraan hihn meet wan a fi dehn pikni eena wahn kangrigayshan weh ih vizit. Yoo ku imajin how Paal wuda mi feel? Paal mi veri sari fi di mistayk dehn weh ih mek, bot hihn mi noa dat ih kyaahn chaynj di paas. Hihn mi aksep dat Krais mi ded far ahn, an ih mi rait: “Da onli bikaaz a Gaad grayt kainis dat Ai da wahn apasl.” (1 Kor. 15:3, 10) Wat da di lesn fi wee? Aksep dat Krais ded fi yoo ahn da hihn mek it pasabl fi mek yoo ga wahn kloas frenship wid Jehoava. (Aks 3:19) Weh impoatant tu Jehoava da weh wi du now an eena di fyoocha, noh di mistayk dehn weh wi mek eena di paas.—Isa. 1:18. w21.04 23 ¶11

Aldoa lata Jooz eena Jeezas day neva ekspek dat di Mesaiya mi wahn haftu ded, noatis weh di Skripchaz mi prafesai: “Hihn mi giv op ih laif, ahn peepl mi tink dat hihn da wahn sina; hihn mi pay fi lata peepl sinz, ahn hihn mi step een fi di sinaz.” (Isa. 53:12) Soh eevn doa Jeezas mi ded laik wahn sina, dat shudn a mi gi di Jooz wahn reezn fi rijek ahn. Tudeh, weh ku help wi fi neva stap serv Jehoava da wen wi laan di faks. Eena di Sermon pahn di Mongt, Jeezas mi waan ih falowaz dat sohn peepl mi wahn “tel aal kaina wikid lai” pahn dehn. (Mach. 5:11) Dehndeh lai kohn fahn Saytan. Hihn mek peepl weh hayt di chroot spred aal kaina lai bowt peepl weh lov di chroot. (Rev. 12:9, 10) Wi haftu rijek dehndeh lai. Wi noh waahn alow notn fi fraitn wi ahn stap wi fahn serv Gaad er mek wi fayt geh week. w21.05 11 ¶14; 12 ¶16

Help yu Baibl styoodent fi chros eena Jehoava. Jeezas mi tel ih disaiplz dat Jehoava mi wahn help dehn bikaaz Hihn lov dehn. (Mach. 10:19, 20, 29, 30) Rimain yu styoodent dat Jehoava wahn help ahn tu. Wen yu pray wid yu styoodent, aks Jehoava fi help ahn werk pan ih goalz. Dis wahn help ahn fi chros eena Jehoava. Franciszek, weh liv da Poland, seh: “Mi teecha yoozhwali pray bowt weh Ah need fi werk pan. Wen Ah mi si how Jehoava ansa mi teecha pryaaz, dat mi mek Ai staat pray. Ah mi si how Jehoava mi help mi wen Ah mi haftu aks fi taim aaf fahn werk fi goh da meetinz ahn kanvenshan.” Wi Baibl styoodents reeli impoatant tu Jehoava. Hihn noa how haad Baibl teechaz need fi werk fi help peepl fi jraa kloasa tu hihn, ahn hihn lov dehn fi aal weh dehn di du. (Isa. 52:7) Ahn if yu noh di kandok wahn Baibl stodi rait now, yu stil ku help Baibl styoodents fi mek proagres ahn kwalifai fi geh baptaiz wen yu jain ada poblishaz pahn dehn stodi. w21.06 7 ¶17-18

Wi ku shoa dat wi apreeshiayt di Baibl if wi reed ahn stodi it regyula. Wi shuda mek wahn skejul soh dat wi reed ahn stodi di Baibl evri day. Wi noh jos wahn reed it wen wi feel laik wi ga taim. If wi mek shoar wi stodi di Baibl regyula, wi wahn kip wi fayt schrang. Fi wee fayt difrent fahn “di ejukaytid ahn waiz peepl;” ih bays pahn Gaad Werd. (Mach. 11:25, 26) Di Baibl eksplayn wai di ert deh di way ih deh rait now ahn weh Jehoava wahn du bowt it. Soh mek wi du evriting fi kip wi fayt schrang ahn help az moch peepl az pasabl fi ga fayt eena wi Kriyayta. (1 Tim. 2:3, 4) Ahn mek wi kantinyu di luk faawod tu di taim wen evribadi pan ert wahn prayz Jehoava ahn seh weh deh eena Revilayshan 4:11: “Jehoava, wi powaful Gaad, da yoo dizerv aala di gloari ahn di aana, bikaaz da yoo mek evriting.” w21.08 19 ¶18-20

Az shepadz, di eldaz rispansabl fi gi kongsl tu enibadi weh need it. Dehn fi chrai gi kongsl weh wahn benifit adaz ahn “mek di haat hapi.” (Prov. 27:9) Di eldaz lov dehn bradaz ahn sistaz. Sohntaim, dehn shoa da lov wen dehn gi kongsl tu sohnbadi weh bowt fi mek wahn mistayk. (Gal. 6:1) Bifoa wahn elda taak tu wahn persn, ih gud fi mek ih tink bowt weh di apasl Paal mi seh bowt lov. Hihn mi seh: “Lov payshent ahn kain. . . . Lov bayr op anda evriting, bileev evriting, hoap eena evriting, an ih noh giv op noh mata weh hapm.” (1 Kor. 13:4, 7) Wen wahn elda tink bowt dehndeh vers, ih wahn help ahn fi mek shoar dat ih gi di kongsl eena wahn lovin way. If di persn weh di geh kongsl feel dat di elda kay bowt ahn, ih wahn moa dan laikli aksep di kongsl. w22.02 14 ¶3; 15 ¶5

Jehoava mi kriyayt di aynjelz an ih hyooman chiljren eena wahn perfek way. Bot den, wan a ih perfek aynjelz mi ribel ahn ton gens ahn. Soh now Saytan, di aynjel weh mi ton gens Jehoava, mi kanvins Jehoava perfek hyooman chiljren, Adam ahn Eev, fi du di saym ting. (Jood 6) Soh wi ku onli imajin how Jehoava mi feel wen dehn mi bichray ahn. Bot hihn stil di indyoar ahn hihn wahn kip di indyoar til di taim kohn wen hihn wahn dischrai aal dehn wan weh ton gens ahn. Dis wahn bee soch a wandaful taim! Jehoava, lang wid ih faytful servants, noh wahn haftu deel wid Saytan an ih eevl sistem nohmoh. Saytan mi akyooz Joab an ih mi seh dat aala Jehoava faytful servant dehn wership Hihn onli bikaaz a weh dehn ku geh fan ahn. (Job 1:8-11; 2:3-5) Di Devl kip di akyooz hyoomanz tu dis day. (Rev. 12:10) Wee ku help proov dat Saytan laiyad if wi kantinyu indyoar chroo wi chraiyalz an if wi stay laayal tu Jehoava bikaaz wi lov Ahn. w21.07 9 ¶7-8

Di apasl Paal mi yooz wahn iloschrayshan fi teech wi dat ih veri impoatant fi chaynj di way how wi liv wi laif. Hihn mi seh dat wi fi heng di oal persn “pahn di stayk.” (Roam. 6:6) In ada werdz, wi waahn fala Krais egzampl. Jeezas mi wilin fi geh heng pahn wahn stayk fi pleez Jehoava. Saym way soh, wi pleez Jehoava wen wi wilin fi geh rid a eni dizaiya er habit weh Jehoava hayt. Wi fi du dehnya tingz soh dat wi ku ga wahn kleen kanshans ahn ga di hoap fi liv fareva. (Jan 17:3; 1 Peet. 3:21) Jehoava noh wahn chaynj fi hihn standadz fi mek wee hapi, da wee need fi chaynj hoo wee ahn fala fi hihn standadz. (Isa. 1:17-18; 55:9) Eevn afta yu geh baptaiz, yu wahn need fi kantinyu fait rang dizaiyaz. Pray fi Jehoava help, ahn pen pahn fi hihn hoali spirit, noh pahn yu oan schrent. (Gal. 5:22; Fil. 4:6) Wi haftu werk haad fi geh rid a di oal persn ahn geh rid a it fi gud. w22.03 6 ¶15-17

Jehoava pramis dat if wi put di Kingdom fers eena wi laif an obay fi hihn raichos standadz, hihn wahn gi wi weh wi need, laik food, kloaz, ahn shelta. (Mach. 6:33) If wi chros eena da pramis, wi noh wahn tink dat di mateeryal tingz a dis werl wahn protek wi ahn mek wi hapi. Wi noa dat wen wi du Jehoava wil, dat da di onli way wi ku ga reel pees. (Fil. 4:6, 7) Eevn if wi ga di moni fi bai lata tingz, wi fi aks wiself if wi reeli ga di taim er di enerji fi yooz ahn tek kayr a dehn. Aks yuself: “Ai ku liv widowt som a di tingz weh Ah oan?” Memba dat az paat a Gaad famili, hihn don gi wi werk fi du. Dat meenz dat wi noh fi alow eniting fi mek wi looz wi foakos. Fi shoar, wi noh waahn bee laik di man weh mi laik di tingz weh ih oan soh moch dat ih disaid fi noh fala Jeezas. Hihn mis ih chaans fi serv Jehoava ahn fi mek Jehoava adap ahn az wan a ih son dehn.—Maak 10:17-22. w21.08 6 ¶17

Az yu stodi di Skripchaz, yu wahn laan bowt Jehoava persnaliti an ih difrent kwaliti dehn. Dehnya da di sayhn kwaliti dehn weh yu mi laan bowt wen yu mi stodi bowt kriyayshan. Wen wi laan bowt Jehoava kwaliti dehn, ih kanvins wi dat Jehoava reeli egzis. (Ex. 34:6, 7; Ps. 145:8, 9) Az yu geh fi noa Jehoava beta ahn beta, yu fayt eena hihn wahn groa, yu lov fi hihn wahn geh schranga, ahn yu frenship wahn geh schranga. Taak tu adaz bowt Gaad. Bot wat if sombadi weh yu preech tu aks weda er nat Gaad egzis ahn yu noh noa weh fi seh? Wel, chrai fain infamayshan eena wi poblikayshanz weh bays pahn di Baibl ahn taak bowt it wid di persn. Yu ku aalso aks wahn brada er sista fi help yu ansa da kweschan. Weda er nat di persn aksep di ansa, yoo wahn benifit bikaaz yu mi du risaach. Yu fayt wahn geh schranga. w21.08 18 ¶14-15

If wi waahn mek Jehoava hapi, ih noh meenz dat wi need fi giv op evriting wi injai. (Eccl. 5:19, 20) Soh if wi hoal bak fahn mek sakrifais fi Jehoava jos bikaaz wi noh waahn giv op tingz wi laik, wi ku en op di mek di sayhn mistayk laik di man eena Jeezas iloschrayshan weh mi liv wahn gud laif bot neva ga taim fi Gaad. (Look 12:16-21) Wen wi di goh chroo wahn prablem, wi need fi pray tu Jehoava soh dat wi ku tink gud bowt weh wi wahn du. (Prov. 3:21) Jehoava bles wi eena lata wayz. Mek wi shoa dat wi graytful fi di gud tingz weh hihn gi wi ahn mek wi du wi bes fi prayz ahn. (Heeb. 13:15) Wi ku du moa eena wi servis tu Jehoava. Wen wi du dis, wi wahn geh lata blesin fahn Jehoava. Eech day, mek wi luk fi wayz fi “tays ahn si how gud Jehoava gud.” (Ps. 34:8) Den wi wahn bee laik Jeezas, weh mi seh: “Mai food da fi du di wil a di Wan weh sen mi, ahn fi finish di werk weh hihn gi mi fi du.”—Jan 4:34. w21.08 30-31 ¶16-19

Saytan waahn mek wi bee prowd, kaaz den wee wahn bee jos laik hihn an wi wahn looz owt pan evalastin laif. Dats wai di apasl Paal mi waan wi dat wahn persn ku “geh tu prowd ahn fays di saym jojment laik di Devl.” (1 Tim. 3:6, 7) Dat ku hapm tu eni wan a wi, weda wi jos kom eena di chroot er if wi di serv Jehoava fi yaaz. Prowd peepl selfish. Saytan chrai mek wi tink moa bowt wiself dan wi tink bowt Jehoava, espeshali wen wi ga prablemz. Fi egzampl, sohnbadi eva akyooz yu fi du sohnting weh yu neva du? Enibadi eva chreet yu eena wahn way weh neva fyaa? Saytan wuda lov it if wi blaym Jehoava er wi bradaz ahn sistaz. Hihn waahn wi tink dat di onli way fi fiks di prablem da fi du tingz wi oan way insteda fala di gaidans weh Jehoava gi wi eena di Baibl.—Eccl. 7:16, 20. w21.06 15 ¶4-5

Jehoava mi gi di prafit Hagai wahn impoatant asainment. Eena 537 B.C.E., wahn groop a Jooz gaahn bak da Jeroosalem fahn Babilan. Hagai mi praabli deh rait monks dehn Jooz. Noh lang afta dehn reech Jeroosalem, dehn staat tu bil bak Jehoava templ. (Ezra 3:8, 10) Bot noh tu lang afta dat, sohnting bad mi hapm. Peepl weh mi liv rong dehn mi staat tu persikyoot dehn, ahn dis mi mek dehn feel diskorij ahn stap bil Jehoava templ. (Ezra 4:4; Hag. 1:1, 2) Soh eena 520 B.C.E., Jehoava mi tel Hagai fi inkorij di Jooz soh dat dehn ku get bak op ahn finish bil di templ. (Ezra 6:14, 15) Di Jooz mi feel veri diskorij, soh di mesij weh Jehoava mi tel Hagai fi gi di Jooz da-mi fi inkorij dehn ahn mek dehn fayt geh schranga. Di ekspreshan “Jehoava di Komanda a di hevnli aami” mosi mi reeli inkorij di Jooz. Jehoava ga atariti oava wahn big aami a aynjelz, soh di Jooz mi need fi chros eena Jehoava if dehn mi waahn ga sokses. w21.09 15 ¶4-5

Tudeh, Jehoava Witnisiz aal oava di werl ekspeeryens chroo lov ahn yooniti. Wee difrent fahn aal ada rilijan bikaaz wi da laik wan famili eevn doa wi kohn fahn difrent konchri ahn kolcha. Wi si proof a dis lov da wi difrent meetin, asembli, ahn kanvenshan. Dis help wi fi bee shoar dat wi di wership Jehoava eena wahn way weh pleez hihn. (Jan 13:34) Di Skripchaz seh dat wi fi “lov wan anada fahn [wi] haat.” (1 Peet. 4:8) Wan way how wi shoa dat wi lov wan anada fahn wi haat da wen wi fergiv wan anada ahn wen wi put op wid wan anada. Wi aalso luk fi wayz fi bee jenaros ahn fi shoa haspitaliti tu evribadi eena di kangrigayshan, eevn tu peepl weh ofen wi. (Kol. 3:12-14) Wen wi shoa dis kaina lov, wi proov dat wee da chroo Kristyanz. w21.10 22 ¶13-14

Wen sohnbadi geh disfeloship, ih ku help ahn ripent fan ih sinful wayz. Wahn lata bradaz ahn sistaz hoo mi-di praktis seeryos sin ahn geh disfeloship seh dat dat da egzakli weh dehn mi need fi help dehn si how bad dehn mi sin gens Jehoava. Dis mi help dehn fi ripent ahn kohn bak tu Jehoava. (Heeb. 12:5, 6) Tink bowt dis iloschrayshan: Wahn shepad noatis dat wan a ih sheep sik. Hihn noa dat fi help dis sheep geh beta, ih need fi separayt ahn fahn di res a di flak. Bot dis ku bee haad bikaaz sheep laik deh wid di res a di flak, dehn noh laik deh separaytid fahn eech ada. Bot yu tink di shepad kruwil bikaaz ih separayt da wan sheep fahn di res a di flak soh dat ih ku feel beta? Af koas nat! Di shepad aalso noa dat if hihn lef di sheep weh sik wid di ada sheep dehn, di hoal flak ku geh sik. Soh wen hihn separayt dehn, hihn akchwali di protek di hoal flak. w21.10 10 ¶9-10

Wi soh tankful dat wi ga wahn famili a bradaz ahn sistaz fahn aal oava di werl weh lov wan anada. Wi waahn az moch peepl az pasabl fi jain wi fi wership wi Gaad. Soh wi noh waahn du notn weh ku mek peepl tink bad bowt Jehoava er fi hihn peepl. Wi aalwayz chrai bihayv gud soh dat peepl waahn laan bowt Jehoava ahn serv hihn. Sohntaim sohn peepl mait kritisaiz wi er deh gens wi bikaaz wi obay wi hevnli Faada. Weh wi ku du if wi feel nervos er frayd wen wi di taak tu adaz bowt weh wi bileev eena? Wi ku bee shoar dat Jehoava an ih Son wahn help wi. Jeezas mi tel ih disaiplz dat dehn noh need fi wori bowt weh fi seh. Wai nat? Jeezas mi seh: “Gaad wahn mek unu noa weh fi seh wen da taim kom; bikaaz da noh jos unu wahn di taak, bot da di spirit a fi unu Faada wahn di taak fi unu.”—Mach. 10:19, 20. w21.09 24 ¶17-18

Moaziz mi aalso taak bowt wahn plays a protekshan. (Ps. 90:1, ftn.) Noh tu lang bifoa Moaziz mi ded, hihn mi seh sohnting byootiful; ih mi seh: “Gaad da wahn plays a protekshan fahn aynshent taimz, fi hihn evalastin han dehn di sopoat yu.” (Deut. 33:27) Weh di frayz “fi hihn evalastin han dehn di sopoat yu” tel wi bowt Jehoava? Wen wi chros dat Jehoava di protek wi, wi feel sayf. Bot dehn mait stil ga taimz wen wi feel soh diskorij dat wi jos kyaahn stap feel da way. Weh yu tink Jehoava wahn du fi wi wen wi feel da way? (Ps. 136:23) Eena wahn jentl ahn lovin way hihn lif wi op ahn help wi fi stap feel soh diskorij. (Ps. 28:9; 94:18) Ih reeli help wi fi noa dat wi ku aalwayz pen pahn Jehoava. Fers, wi noa dat noh mata wehpaat wi liv, wi ku bee shoar dat Jehoava wahn aalwayz protek wi. Sekant, wi noa dat wi lovin hevnli Faada reeli kay bowt wi. w21.11 6 ¶15-16

Jeezas mi noa dat injostis wuda tes di fayt a ih disaipl dehn. Fi help dehn bayr op, hihn gi dehn wahn iloschrayshan weh geh rait dong eena di buk a Look. Jeezas mi tel dehn bowt wahn wido weh mi stay di goh da wahn joj fi chrai geh jostis gens ih enimi. Da joj neva ga no rispek fi Gaad. Shee mi noa dat if ih kip aan di aks di joj fi help, hihn mi wahn ivenchwali giv ahn weh ih aks fa. Wel, dat da egzakli weh mi hapm. Wat da di lesn fi wee? Jehoava da wahn Gaad a jostis, soh Jeezas seh: “Fi shoar hihn [Gaad] wahn gi jostis tu di wan dehn weh hihn chooz, di wan dehn weh krai owt tu hihn day ahn nait.” (Look 18:1-8) Den Jeezas kantinyu fi seh: “Wen di Son a man kom, yu tink hihn reeli wahn fain dis kaina fayt pahn di ert?” Wen wi di sofa bikaaz a injostis, wi need fi bee laik di wido eena Jeezas iloschrayshan ahn shoa dat wi ga fayt wen wi payshent ahn noh giv op. Wid da kaina fayt, wi ku bee shoar dat soona er layta Jehoava wahn help wi. Wi aalso need fi bileev eena di powa a pryaa. w21.11 23 ¶12; 24 ¶14

Unu yong peepl, unu eva feel laik unu kyaahn du weh unu waahn bikaaz unu haftu obay Jehoava standadz? Dat da egzakli weh Saytan waahn yu tink. Ih mait luk laik di peepl weh di chravl pahn di waid road di ga fon ahn Saytan waahn yu foakos pahn dat. Hihn waahn yu tink dat yu noh di injai laif laik yu klaasmayt dehn ahn peepl weh yu si pahn di Intanet. Saytan waahn yu tink dat Jehoava standadz di kip yu bak fahn injai laif az moch az yu kud. Bot memba dis: Saytan noh waahn di peepl weh di chravl pahn dis waid road noa wehpaat dehn wahn en op. (Mach. 7:13, 14) Pahn di ada han, Jehoava waahn yu noa how wandaful fi yoo laif wahn bee if yu stay pahn di road weh leed tu laif.—Ps. 37:29; Isa. 35:5, 6; 65:21-23. w21.12 23 ¶6-7

Wi haftu fergiv adaz. Wi noa dat da di rait ting fi du, bot da noh sohnting weh eezi fi du. Di apasl Peeta kuda mi feel laik dat sohntaim. (Mach. 18:21, 22) Weh ku help wi fi fergiv adaz? Fers, tink bowt humoch Jehoava don fergiv yoo. (Mach. 18:32, 33) Wi noh dizerv fi hihn fergivnis, bot hihn wilin fi fergiv wi. (Ps. 103:8-10) Soh, “wee haftu lov wan anada tu.” Dat meenz dat wi haftu fergiv wi bradaz ahn sistaz. (1 Jan 4:11) Sekant, tink bowt weh hapm wen wi fergiv adaz. Wi ku help di persn weh mi hert wi, wi help kip di pees eena di kangrigayshan, wi protek wi rilayshanship wid Jehoava, ahn wi noh haftu bak da berdn nohmoh. (2 Kor. 2:7; Kol. 3:14) Fainali, pray tu di Wan weh aks wi fi fergiv. Noh gi Saytan di chaans fi get bitween yoo an yu bradaz ahn sistaz. (Ifee. 4:26, 27) Wi need Jehoava help soh dat wi ku ga pees eena di kangrigayshan. w21.06 22 ¶11; 23 ¶14

Dayvid mi-di ron fi ih laif. Saal, di powaful king a Izrel, da di wan weh mi waahn kil ahn. Wen Dayvid mi need food, ih stap da di siti a Nob, an ih mi onli aks fi faiv loaf a bred. (1 Sam. 21:1, 3) Laytaraan, hihn an ih soalja dehn mi shelta eena wahn kayv. (1 Sam. 22:1) How Dayvid mi en op eena da sichuwayshan? Saal mi veri jelos a Dayvid bikaaz Dayvid da-mi sohnbadi weh lata peepl mi laik an ih mi win wahn lata waar. Saal mi noa dat sayka weh hihn neva obay, Jehoava mi rijek hihn az king a Izrel ahn chooz Dayvid fi bee di fyoocha king. (1 Sam. 23:16, 17) Bot Saal da-mi stil di king a Izrel, an ih mi ga wahn big aami ahn lata peepl mi sopoat ahn, soh Dayvid mi haftu ron fi ih laif. Saal mi reeli tink dat hihn kuda mi fait gens Gaad disizhan fi mek Dayvid king? (Isa. 55:11) Di Baibl noh seh, bot wee ku bee shoar a dis: Saal mi-di put ihself eena wahn daynjaros sichuwayshan. Enibadi weh fait gens Gaad aalwayz looz! w22.01 2 ¶1-2

Jeezas mi werk haad eena di minischri. Hihn mi shoa lov fi peepl wen ih mi yooz evri apachooniti fi teech dehn. (Look 19:47, 48) Jeezas mi du dis bikaaz hihn mi ga kompashan fi peepl. Dehn mi ga taimz wen peepl mi waahn hyaa weh Jeezas mi ga fi seh dat hihn an ih disaipl dehn “neva eevn ga wahn chaans fi eet wahn meel.” (Maak 3:20) Wen wahn man mi waahn taak tu Jeezas da nait, Jeezas mi wilin fi meet wid ahn. Jeezas mi wilin fi taak tu da man da wahn taim weh mi gud far ahn. Moas a di peepl weh mi lisn tu Jeezas neva geh fi bee ih disaiplz. Bot aala dehn wan weh mi lisn tu ahn mi geh fi hyaa bowt di gud nyooz. Tudeh, wi waahn giv evribadi di apachooniti fi hyaa bowt di gud nyooz. (Aks 10:42) Fi du dat, wi haftu chaynj di way how wi du wi minischri. Wi noh onli fi preech da wahn taim weh gud fi wee. Wi shuda bee wilin fi chaynj op di taim wen wi preech soh dat wi ku preech tu moa peepl. Wen wi du dat, wi ku bee shoar dat Jehoava wahn bee hapi wid wi. w22.01 17 ¶13-14

Tudeh wahn lata peepl fain it haad fi chros enibadi weh ga atariti. Dehn seh dat di leegal ahn politikal sistem protek peepl weh ga moni ahn weh powaful ahn dehn noh help poa peepl. Pahn tap a dat, sohn rilijos leedaz du bad tingz ahn dat mek peepl looz dehn chros eena Gaad. Soh if wi stodi di Baibl wid sohnbadi, wi need fi help da persn fi chros eena Jehoava ahn dehn wan weh Hihn apoint rait ya pahn ert. Af koars, Baibl styoodents da noh di onli wan dehn weh need fi laan fi chros eena Jehoava an eena fi hihn aaganaizayshan. Eevn if wi di serv Jehoava fi wahn lata yaaz, wi neva waahn dowt dat Jehoava way a du tingz da aalwayz di bes way. Sohntaim, sohnting ku hapm weh mait tes wi chros eena Jehoava. w22.02 2 ¶1-2