May

Bikaaz Jehoava lov wi, an ih waahn mek wi noa fi hihn Son, hihn mi inklood di foa Gaspl dehn eena fi Hihn Werd. Di Gaspl dehn tel wi bowt Jeezas laif ahn minischri. Dehn tel wi weh Jeezas mi seh, weh ih mi du, ahn how ih mi feel. Dehnya foa buk help wi fi “tink bowt di egzampl” weh Jeezas set. Da laik dehn gat een di futstep dehn weh Jeezas lef bihain. Soh if wi stodi di Gaspl dehn, wi ku geh fi noa Jeezas beta ahn beta. Ahn den wi wahn ku fala fi hihn futstep dehn kloas-wan. If wi reeli waahn benifit fahn di Gaspl dehn, wi haftu du moa dan jos reed dehn. Wi haftu tek di taim fi stodi dehn gud ahn meditayt pahn weh wi reed. (Kompyaa Joshua 1:8, futnoat.) Mek weh yu reed eena di Gaspl dehn bee moa reel tu yu. Yooz yu imajinayshan fi si, hyaa, ahn feel weh di hapm. Du sohn risaach eena di poblikayshan dehn weh Jehoava aaganaizayshan gi wi. w21.04 4-5 ¶11-13

Honjridz a yaaz bifoa Jeezas mi kohn tu di ert, Jehoava mi prafesai dat sohnbadi wuda bichray di Mesaiya fi 30 pees a silva. (Zech. 11:12, 13) Di persn weh mi wahn bichray Jeezas wuda mi bee wan a ih kloas fren. (Ps. 41:9) Di prafit Zakaraiya mi aalso rait: “Atak di shepad, ahn mek di sheep skyata.” (Zech. 13:7) Peepl weh mi sinsyaa neva mi wahn rijek Jeezas wen dehnya tingz hapm. Insted, dehn fayt wuda mi geh schranga wen dehn si aala dehndeh prafesi di kohn chroo. Wee di si di saym prablem tudeh? Yes. Eena fi wee taim, sohn Witnisiz lef di chroot, ton apastayt, ahn chrai ton adaz fahn di chroot tu. Dehn spred negitiv ripoat ahn tel lai bowt Jehoava Witnisiz eena nyoozpaypa, pahn di rayjo, pahn TV, ahn pahn di Intanet. Bot peepl weh ga di rait haat kandishan noh faal intu dehndeh chrap. Insted, dehn riyalaiz dat di Baibl mi prafesai dat dehndeh tingz mi wahn hapm.—Mach. 24:24; 2 Peet. 2:18-22. w21.05 11 ¶12; 12-13 ¶18-19

Di Baibl mek it klyaa dat Gaad peepl wahn andastan di chroot beta az taim paas bai. (Kol. 1:9, 10) Jehoava mek wi andastan di chroot lee bit bai lee bit, soh wi haftu bee payshent ahn wayt til wi ku andastan di chroot beta. Wen di bradaz weh di tek di leed riyalaiz dat dehn need fi chaynj di way wi andastan er du sohn tingz, dehn mek di chaynj kwik-wan. Lata di cherch dehn chaynj dehn teechinz bikaaz dehn waahn pleez dehn membaz er bikaaz dehn waahn bee faymos. Bot wee, az Jehoava Witnisiz, mek chaynjiz bikaaz wi waahn bee kloasa tu Gaad ahn wi waahn wership hihn di way Jeezas mi wership ahn. (Jay. 4:4) Wen wee mek chaynjiz, da noh bikaaz wi waahn fala weh peepl tink ahn seh, bot bikaaz wi andastan di Baibl beta. Wee lov di chroot!—1 Tes. 2:3, 4. w21.10 22 ¶12

Weh yoo ku du if yu feel loanli? Tink bowt how Jehoava di help yoo. (Ps. 55:22) Dat wahn help yu fi si dat yu noh deh bai yuself. Aalso, tink bowt how Jehoava di help wi bradaz ahn sistaz weh feel loanli. (1 Peet. 5:9, 10) Fi yaaz, Hiroshi da-mi di onli wan eena ih famili weh da-mi wahn Witnis. Hihn seh: “Wi noa dat wi di du wi bes fi serv Jehoava ahn dat ku inkorij eni wan a wi weh feel laik wee da di onli wan eena wi famili weh deh eena di chroot.” Aalso, wi haftu aalwayz pray, reed di Baibl, ahn goh da meetin. Wen yu pray tu Jehoava, tel ahn egzakli how yu feel. Ih impoatant fi reed Gaad Werd regyula ahn meditayt pahn di paats weh proov dat Jehoava lov yoo. Sohn Kristyanz memoraiz skripchaz weh gi dehn lata komfert, laik Psalm 27:10 an Isaiah 41:10. Adaz laik lisn tu di aadyo rikaadn a di Baibl er di rikaadn a di mateeryal weh dehn yooz fi pripyaa fi di meetin dehn, ahn dat help dehn fi noh feel soh loanli. w21.06 9-10 ¶5-8

Yoo sad bikaaz wahn famili memba er fren ded? Tek di taim fi schrentn yu fayt eena di hoap a di rezorekshan. Yu ku du dis wen yu tek di taim fi reed bowt di difrent rezorekshan weh mi hapm eena Baibl taimz. Yoo feel sad bikaaz sohnbadi weh yu lov geh disfeloship? Stodi moa fi proov tu yuself dat disiplin weh kohn fahn Jehoava da di bes. Noh mata weh prablem yu di fays, yooz it az wahn apachooniti fi bil op fi yoo fayt. Tel Jehoava egzakli how yu di feel. Noh put yuself eena wahn kaana, insteda dat, stay kloas tu yu bradaz ahn sistaz. (Prov. 18:1) Du tingz weh wahn help yu fi noh giv op, eevn if yu fain yuself di krai wen yu memba weh yu di goh chroo. (Ps. 126:5, 6) Kantinyu fi goh da di meetin dehn, kip bizi eena di preechin werk, ahn du yu Baibl reedin. Noh ferget bowt aala di wandaful tingz weh Gaad don pramis yu fi di fyoocha. Wen yu si how Jehoava di help yu rait now, yu fayt eena hihn wahn geh schranga ahn schranga! w21.11 23 ¶11; 24 ¶17

Wai Jeezas kaal ih disaiplz “dehnya lee wan”? Wel, peepl eena di werl luk op tu dehn wan weh rich, faymos, ahn powaful. Jeezas disaipl dehn da noh laik dat, akchwali peepl luk dong pahn dehn. (1 Kor. 1:26-29) Bot, dat da noh how Jehoava vyoo dehn. Wai Jeezas mi taak bowt “dehnya lee wan”? Ih disaipl dehn mi aks ahn wahn kweschan: “Hoo wahn bee di graytis persn eena di Kingdom a hevn?” (Mach. 18:1) Lata Jooz bak den mi waahn mek ada peepl tink dat dehn veri impoatant. Wahn profesa seh: “Di moas impoatant ting eena fi dehn laif da-mi fi bee faymos ahn fi mek ada peepl aana dehn.” Jeezas mi noa dat lata Jooz mi tink dat ih impoatant fi bee beta dan adaz. Soh, fi hihn disaipl dehn mi haftu werk haad fi chaynj di way how dehn tink. w21.06 20 ¶2; 21 ¶6, 8; 22 ¶9

Di apasl Paal mi set wahn gud egzampl az wahn elda. Fi egzampl, Paal mi gi di bradaz da Tesalonaika kongsl wen dehn mi need it, ahn hihn neva hoal bak fahn gi dehn kongsl. Bot, eena di letaz weh ih mi sen fi dehn, Paal mi komen dehn fers fi dehn haad werk ahn how dehn neva giv op. Hihn mi aalso tink bowt dehn sichuwayshan, an ih mi tel dehn dat hihn noa dat dehn laif haad an dat dehn mi-di bayr op anda persikyooshan. (1 Tes. 1:3; 2 Tes. 1:4) Hihn mi eevn tel dehn dat dehn da-mi wahn gud egzampl fi ada Kristyanz. (1 Tes. 1:8, 9) Dehn mosi mi reeli hapi fi di way how Paal mi komen dehn! Wi noa fi shoar dat Paal mi lov ih bradaz ahn sistaz wahn lat. Dat da wai eena di letaz weh ih mi rait tu di bradaz da Tesalonaika, hihn mi gi dehn kongsl weh kuda mi help dehn.—1 Tes. 4:1, 3-5, 11; 2 Tes. 3:11, 12. w22.02 15 ¶6

Saytan yooz leedaz fahn faals rilijan fi seh dat Jehoava kruwil ahn dat hihn da di wan weh di kaaz hyooman sofarin. Som a dehn eevn seh dat wen wahn baybi ded, da Gaad kehr ahn bikaaz hihn mi need wahn nada aynjel da hevn. Dis reeli di disrispek Jehoava! Bot wee noa beta. Wee noa dat Jehoava da wahn lovin Faada. Wen wee ga wahn seeryos helt prablem, er wen sombadi weh wi lov ded, wi noh blaym Gaad. Insted, wi bileev ahn chros dat wan day hihn wahn bring bak tu laif dehn wan weh ded. Wi ku tel evribadi weh wahn lisn dat Jehoava da wahn lovin Gaad. Den Jehoava wahn ku ansa di wan weh kip di insolt ahn. (Prov. 27:11) Jehoava da wahn Gaad weh ga kompashan. Soh ih reeli hert hihn wen ih si wi di sofa, maybi bikaaz a persikyooshan, wahn seeryos siknis, er maybi bikaaz a wi oan imperfekshan. (Ps. 22:23, 24) Jehoava andastan weh wi di goh chroo, ahn hihn wahn du sohnting bowt it.—Kompyaa Exodus 3:7, 8; Isaiah 63:9. w21.07 9-10 ¶9-10

Soon obeedyant hyoomanz wahn ga di graytis aana eva—di aana fi lov ahn wership Jehoava fareva! Jeezas wahn solv aala di prablemz weh kohn afta Adam ahn Eev mi chooz fi disobay Jehoava an abandan fi Hihn famili. Jehoava wahn rezorek milyanz a peepl ahn gi dehn di apachooniti fi liv fareva. Dehn wahn liv fareva eena perfek helt pahn wahn byootiful ahn perfek ert. (Look 23:42, 43) Wen aal hyoomanz weh serv Jehoava geh perfek, dehn wahn ga di “aana ahn gloari” weh Dayvid mi rait bowt. If yoo da paat a di “big krowd,” yoo ga wahn wandaful hoap. (Rev. 7:9) Gaad lov yoo ahn hihn waahn yu bee paat a fi hihn famili. Soh du yu veri bes fi mek hihn hapi. Kip di pramis dehn weh Gaad gi yu eena yu main ahn haat. Cherish di privilij weh Gaad gi yu fi wership an prayz ahn fareva! w21.08 7 ¶18-19

Di prafit Jerimaiya mi preech fi bowt 40 yaaz eevn doa peepl mi deh gens ahn an neva waahn lisn. Sayka weh peepl mi-di “insolt [hihn] op ahn laaf aata [hihn] aal day,” ih mi feel soh diskorij dat ih mi waahn giv op. (Jer. 20:8, 9) Bot Jerimaiya neva giv op! Weh mi help ahn fi kantinyu fain jai eena di minischri? Hihn mi foakos pahn dehnya too impoatant faks. Fers, Gaad mesij weh Jerimaiya mi tel di peepl wuda gi dehn “wahn fyoocha ahn wahn hoap.” (Jer. 29:11) Sekant, Jehoava mi chooz Jerimaiya fi taak fi Hihn ahn fi shayr fi Hihn mesij tu di peepl. (Jer. 15:16) Wee aalso di shayr wahn mesij a hoap tu peepl, an az Jehoava Witnisiz, wee di bayr Jehoava naym. Wen wi foakos pahn dehnya faks, wi ku fain jai eena di minischri noh mata how peepl rispan tu di mesij. Soh noh feel diskorij er giv op if yu tink yu Baibl styoodent di tek tu lang fi mek proagres. Ih tek payshens fi mek disaiplz.—Jay. 5:7, 8. w21.10 27 ¶12-13

Noh mata how lang wi di serv Jehoava, wi fi kantinyu kip wi fayt eena hihn schrang. Wai? Bikaaz if wi noh du dat, wi fayt ku staat tu geh week. Memba, fayt bays pahn proof eena tingz weh wi kyaahn si. Ih ku bee soh eezi fi ferget bowt tingz weh wi kyaahn si. Dat da wai Paal mi seh dat wen sohnbadi fayt geh week, da laik wahn “sin weh eezi fi chrap wi.” Soh, weh wi ku du fi mek wi kip wi fayt schrang ahn noh faal eena da chrap? (2 Tes. 1:3) Fers, kip di bayg Jehoava fi ih hoali spirit. Wai? Bikaaz fayt da wahn kwaliti weh kohn fahn Gaad hoali spirit. (Gal. 5:22, 23) Widowt di help a Gaad hoali spirit, wi kyaahn kip wi fayt schrang. If wi kip di aks Jehoava fi ih hoali spirit, hihn wahn gi wi. (Look 11:13) In fak, wi ku eevn pray: “Help wi fi ga moa fayt.” (Look 17:5) Ahn wi need fi stodi Gaad Werd regyula.—Ps. 1:2, 3. w21.08 18-19 ¶16-18

Wi ku laan wahn lat fahn wi oalda bradaz ahn sistaz. Eevn doa dehn mait noh az schrang az bifoa, dehn ga wahn lata ekspeeryens weh wee ku benifit fram. Jehoava ku kantinyu yooz wi oalda bradaz ahn sistaz eena difrent wayz. Fi egzampl, di Baibl tel wi bowt faytful wanz weh mi kantinyu serv Jehoava eevn doa dehn mi oal. Moaziz mi bowt 80 yaaz oal wen Jehoava mi chooz ahn fi serv az wahn prafit ahn fi leed di nayshan a Izrel. Jehoava stil mi-di yooz Danyel az wahn prafit eevn doa hihn mi eena ih 90ʼs. Di apasl Jan mi aalso eena ih 90ʼs wen Jehoava yooz ahn fi rait di buk a Revilayshan. Di Baibl noh tel wi moch bowt Simiyan, ‘wahn raichos man hoo mi fyaa Gaad,ʼ bot Jehoava mi noa hoo hihn an ih mi giv ahn di privilij fi si Jeezas wen ih da-mi wahn baybi ahn fi prafesai bowt Jeezas an ih ma.—Look 2:22, 25-35. w21.09 3-4 ¶5-7

Payrents shuda chrai dehn bes fi noh kompyaa dehn pikni wid adaz er fi ekspek dehn fi du moa dan weh dehn ku du. If payrents aalwayz di kompyaa dehn pikni wid adaz, dat wahn diskorij dehn. (Ifee. 6:4) Wahn sista weh naym Sachiko seh: “Mi ma mi waahn Ah geh 100 persent pahn mi egzam dehn, bot dat neva pasabl. Eevn doa Ai kom owta skool lang taim, sohntaim Ah stil feel laik if Jehoava noh hapi wid mi, eevn if Ah du mi bes.” King Dayvid mi seh dat hihn noh “aym fi notn weh tu grayt” er du tingz weh hihn kyaahn du. Bikaaz hihn mi hombl, hihn mi hapi wid weh ih mi gat an ih mi ga pees. (Ps. 131:2) Weh payrents ku laan fahn weh Dayvid mi seh? Fi mek payrents bee hombl, dehn noh fi ekspek tu moch a dehnself ner fahn dehn pikni. Payrents haftu noa weh dehn pikni gud pan ahn weh dehn noh gud pan. If dehn du dat, dehn wahn ku help dehn pikni fi set goalz weh dehn ku reech, ahn dis wahn help dehn pikni fi feel gud bowt dehnself. w21.07 21-22 ¶5-6

Jehoava giv eech wan a wi di freedom fi mek wi oan disizhanz. Dis meenz dat da wee fi chooz if wi waahn obay hihn er nat. Som chiljren neva ga payrents weh set wahn gud egzampl, bot dehn disaid fi serv Jehoava ahn stay faytful tu hihn. An adaz mi ga payrents weh mi du dehn bes fi teech dehn fi lov Jehoava, bot laytaraan dehn mi lef Jehoava wen dehn geh oalda. Soh da eech wan a wi fi disaid if wi wahn serv Jehoava. (Josh. 24:15) If yoo da wahn payrent ahn yu sad bikaaz yu pikni stap serv Jehoava, noh tink dat da fi yoo faalt wai yu pikni stap serv hihn! Sohntaim, wahn ma er wahn pa stap serv Jehoava an ih eevn lef ih famili. (Ps. 27:10) Dis ku bee reeli haad fi pikni weh luk op tu dehn payrents az wahn gud egzampl. Unu yong peepl, if unu payrents geh disfeloship, pleez noa dat Jehoava noa humoch dis hert yu. Hihn lov yu an ih hapi dat yu stay faytful tu hihn. Ahn pleez memba dis: Da noh fi yoo faalt wai yu ma er yu pa geh disfeloship. w21.09 27 ¶5-7

Wahn Kristyan weh geh disfeloship da laik wahn sheep weh sik wid wahn kaina siknis weh kwik fi spred tu di res a sheep. Bikaaz ih rilayshanship wid Jehoava damij, ih sik eena wahn spirichwal way. (Jay. 5:14) Jos laik peepl weh ga wahn siknis weh eezi fi mek adaz kech, sohnbadi weh sik eena wahn spirichwal way ku inkorij adaz fi du bad tingz. Bikaaz a dis, sohnbadi weh spirichwali sik eena di kangrigayshan mait need fi geh disfeloship ahn bee separaytid fahn di res a di kangrigayshan. Dis kaina disiplin shoa Jehoava lov fi faytful peepl eena di kangrigayshan an ih ku help di persn weh komit dis seeryos sin fi riyalaiz weh ih mi du ahn fi ripent. Sohnbadi weh disfeloship ku aten di meetin dehn. Rait deh ih ku laan moa fahn di Baibl an ih ku mek ih fayt geh schrang agen. Ih ku geh lichricha fi reed ahn stodi, an ih ku aalso wach JW Braadkyaastin. Ahn wen di eldaz si dat ih di mek chaynjiz, dehn mait giv ahn sohn kongsl fahn taim tu taim fi help ahn bil op bak ih rilayshanship wid Jehoava soh dat ih ku kohn bak ahn bee paat a di kangrigayshan agen. w21.10 10 ¶9, 11

Tudeh, wee fala di egzampl a di fers-senchri Kristyanz wen ih kohn tu wership Gaad, fi egzampl, eena di way how wi aaganaiz. Jos laik dehn, wee ga chravlin oavaseeyaz, eldaz, ahn ministeeryal servants. (Fil. 1:1; Taitos 1:5) Ahn laik di fers-senchri Kristyanz, wi aalso rispek Jehoava laa dehn bowt seks ahn marij, weh Gaad seh bowt di yoos a blod, ahn wi protek di kangrigayshan fahn dehn wan weh noh waahn fala Gaad laa dehn. (Aks 15:28, 29; 1 Kor. 5:11-13; 6:9, 10; Heeb. 13:4) Di Baibl tel wi playn ahn schrayt dat onli “wan fayt deh” weh Gaad aproov. (Ifee. 4:4-6) Da wahn grayt privilij fi bee wan a Jehoava Witnisiz ahn fi noa di chroot bowt Gaad ahn weh ih wahn du eena di fyoocha! Soh wi waahn du aal weh wi kud fi hoal aan tait tu di chroot ahn bee kanvins dat wee ga di chroot. w21.10 22-23 ¶15-17

King Jehoshafat mi fays wahn big prablem. Wahn big aami a Amonaits, Moawabaits, ahn peepl fahn di mongtinz a Seer mi chretn hihn, ih famili, an ih peepl. (2 Chron. 20:1, 2) Weh Jehoshafat mi du? Hihn mi aks Jehoava fi help ahn an schrentn ahn. Jehoshafat hombl pryaa, weh deh eena 2 Chronicles 20:5-12, shoa dat hihn mi chros eena Jehoava wahn lat. Jehoava mi taak tu Jehoshafat chroo wahn Leevait weh naym Jahazyel. Jehoava mi tel ahn weh wi reed eena di skripcha teks fi tudeh. Jehoshafat mi chros eena ih Gaad, soh hihn mi obay ih inschrokshanz. Wen hihn ahn di peepl mi gaahn owt fi meet di enimi, hihn neva put di bes soaljaz fronta di aami. Insted, ih mi put di man dehn weh neva ga no wepan ahn weh mi prayz Jehoava wid sang. Jehoava mi kip ih pramis tu Jehoshafat; Hihn mi win oava di enimi.—2 Chron. 20:18-23. w21.11 15-16 ¶6-7

Weneva wi di goh chroo haad taimz, wi ku bee shoar dat Jehoava wahn help wi kip wahn gud rilayshanship wid hihn soh dat wi ku stay faytful tu ahn. (2 Kor. 4:7-9) Wi ku bee shoar dat Jehoava wahn kantinyu fi shoa laayal lov tu wee bikaaz dat da weh di Baibl seh. Di saamis mi seh: “Jehoava di wach oava dehn wan hoo fyaa hihn, dehn wan hoo wayt pahn fi hihn laayal lov.” (Ps. 33:18-22) Bifoa wi mi staat tu serv Jehoava, wi benifit fahn di lov weh hihn shoa tu aal hyoomanz. Bot now dat wee di wership hihn, wi aalso di benifit fahn fi hihn laayal lov. Bikaaz Jehoava ga laayal lov fi wee, hihn hog wi op tait ahn wi sayf eena fi hihn lovin han dehn. Hihn wahn aalwayz kip wi kloas tu hihn an ih wahn mek shoar dat ih wandaful pramis dehn kohn chroo. Hihn waahn mek wi bee fi hihn frenz fareva! (Ps. 46:1, 2, 7) Soh den, noh mata weh kaina chraiyalz wi mait haftu fays, Jehoava wahn gi wi di schrent weh wi need fi stay faytful tu hihn. w21.11 7 ¶17-18

Wahn lata wi mait noa peepl weh hoal malis gens wahn werkmayt, skoolmayt, er wahn famili memba—sohntaim eevn fi yaaz! Memba dat Joazef ten breda dehn mi reeli hayt hihn, ahn bikaaz dehn mi hayt ahn soh moch dehn en op di du sohnting reeli bad. (Gen. 37:2-8, 25-28) Laytaraan, Joazef mi geh wahn hai pozishan an atariti. Hihn kuda mi tek rivenj pan ih breda dehn, bot hihn mi shoa dehn mersi an ih fergiv dehn. Joazef neva hoal malis. Insteda dat, hihn mi du weh Leviticus 19:18 seh. (Gen. 50:19-21) Kristyanz weh waahn pleez Gaad ku fala Joazef egzampl. Hihn mi fergiv ih breda dehn insteda tek rivenj pahn dehn. Jeezas mi seh dat wi fi fergiv adaz weh sin gens wi. (Mach. 6:9, 12) Saym way soh, di apasl Paal mi tel di Kristyan dehn: “If sombadi du unu sohnting bad, noh chrai mek dehn pay fi weh dehn du unu.”—Roam. 12:19. w21.12 11 ¶13-14

Pahn di nait a Naisan 14, 33 C.E., Jeezas gaahn da di gyaadn a Getsemani. Ahn rait deh ih mi poar owt ih haat tu Jehoava. (Look 22:39-44) Jeezas mi “bayg Gaad wid wahn lowd vais, lang wid tyaaz.” (Heeb. 5:7) Weh Jeezas mi pray fa di nait bifoa ih mi ded? Hihn mi pray fi di schrent fi stay laayal tu Jehoava ahn fi du fi Hihn wil. Jehoava mi hyaa ih Son pryaa an ih mi noatis how schres owt ih mi schres owt, ahn bikaaz a dat ih mi sen wahn aynjel fi schrentn ahn. Jeezas mi noa how impoatant ih mi impoatant fi stay laayal tu Jehoava ahn fi klayr Ih naym. Jehoava mi lisn tu Jeezas wen ih mi aks ahn fi help. Wai? Bikaaz Jeezas mayn foakos da-mi fi stay laayal tu ih Pa ahn fi klayr Ih naym. If fi wee mayn foakos da di saym, Jehoava wahn ansa fi wee pryaaz wen wi aks ahn fi help.—Ps. 145:18. w22.01 18 ¶15-17

Lata peepl tudeh geh beks wid wi bikaaz wi noh tek paat eena palitiks. Dehn ekspek wi fi voat wen ilekshan taim kohn. Bot wee noa dat if wi chooz wahn hyooman roola fi rool oava wi, den wi di rijek Jehoava. (1 Sam. 8:4-7) Som peepl mait tink dat wi shuda bil skool ahn haaspital ahn du ada tingz weh wuda help di kamyooniti. Dehn rijek wi mesij bikaaz wi werk haad fi preech insteda chrai fiks aala di prablemz weh di werl di goh chroo rait now. Weh wahn help wi fi kip wi fayt? (Mach. 7:21-23) Di moas impoatant ting wee ku du rait now da di werk weh Jeezas koman wi fi du. Wi noh waahn geh dischraktid di chrai fiks aala di prablemz eena di werl. Wi lov peepl ahn wi kay bowt di prablemz weh dehn di goh chroo, bot wi noa dat di bes way fi help wi naybaz da fi teech dehn bowt Gaad Kingdom ahn fi help dehn fi bee Jehoava fren. w21.05 7 ¶19-20

Eevn doa wahn lata di roolaz klaym fi serv Gaad nowadayz, dehn noh waahn giv op dehn powa. Jos laik how di roolaz mi stan bak eena Jeezas day, di roolaz hoo di atak Jeezas faytful falowaz tudeh akchwali di goh gens Jeezas, di wan hoo Jehoava anoint. (Aks 4:25-28) How Jehoava di chrai help di nayshan dehn weh rijek di Kingdom mesij? Psalm 2:10-12 seh: “Soh now, unu roolaz, unu hoo di joj di ert, shoa wizdom an aksep karekshan. Fyaa Jehoava ahn rijais. Aana di son. If nat, Gaad wahn geh beks an unu wahn ded bikaaz a fi Hihn anga. Dehn wan weh luk tu Hihn fi protekshan wahn hapi.” Jehoava kain an ih di gi dehn taim fi chaynj dehn main ahn chooz fi aksep fi Hihn Kingdom. Bot onli lee bit a taim lef. (Isa. 61:2) Now moa dan eva bifoa, peepl need fi noa di chroot ahn chooz fi serv Jehoava. w21.09 15-16 ¶8-9

Paal mi-di seh dat wi shuda bee kantentid wid weh wi gat. (Fil. 4:12) Di moas impoatant ting fi wee da wi rilayshanship wid Gaad, noh di mateeryal tingz weh wi gat. (Hab. 3:17, 18) Tink bowt weh Moaziz mi tel di Izrelaits afta dehn mi spen 40 yaaz eena di wildanes. Hihn mi seh: “Jehoava unu Gaad don bles unu eena aal weh unu du. . . . Dehnya 40 yaaz Jehoava unu Gaad deh wid unu, an unu noh lak notn.” (Deut. 2:7) Joorin dehndeh 40 yaaz, Jehoava mi gi di Izrelaits mana fi eet. Dehn kloaz—di saym kloaz weh dehn mi lef Eejip wid—neva did geh oal. (Deut. 8:3, 4) Jehoava wahn pleez wid wi if wi laan fi bee kantentid. Hihn waahn wi bee tankful fi eevn di smaalis tingz weh ih gi wi, an ih waahn wi andastan dat dehndeh tingz da wahn gif fahn hihn. w22.01 5 ¶10-11

If yoo da wahn hozban, yu ga di rispansabiliti fi tek kayr a yu famili, soh werk haad fi protek ahn sopoat yu famili. Wen yu ga prablemz, yu mait feel laik yu ku solv dehndeh prablemz bai yuself. Bot noh chros eena yu oan schrent. Insted, wen yu deh bai yuself, pray tu Jehoava fi help. Aalso, pray fahn yu haat wid yu waif. Luk fi dairekshan fahn Jehoava wen yu stodi di Baibl ahn di poblikayshanz weh bays pahn di Baibl weh Gaad aaganaizayshan provaid, an yooz weh yu laan eena yu laif. Adaz mait noh gree wid di disizhanz weh yu mek weh bays pahn di Baibl. Dehn mait seh dat moni ahn tingz weh yu ku bai wahn gi yu di bes protekshan fi yu famili. Bot memba King Jehoshafat egzampl. (2 Chron. 20:1-30) Hihn mi chros eena Jehoava an ih mi shoa it eena di tingz weh ih mi du. Jehoava neva abandan da laayal man, ahn hihn noh wahn abandan yoo needa.—Ps. 37:28; Heeb. 13:5. w21.11 15 ¶6; 16 ¶8

Gaad mek wi wid di abiliti fi ga di sayhn kwalitiz laik hihn, soh wi waahn si peepl geh chreet eena wahn fyaa way. (Gen. 1:26) Bot bikaaz wi noh perfek, wi mait joj mataz di rang way, eevn wen wi tink wi ga aala di faks. Fi egzampl, memba how beks Joana mi beks wen Jehoava mi shoa mersi tu di peepl a Niniveh? (Jonah 3:10–4:1) Bot tink bowt weh mi hapm bikaaz Jehoava mi shoa dehn mersi. Moa dan 120,000 peepl fahn Niniveh mi ripent, ahn bikaaz a dat dehn mi geh sayv! Soh eena da Baibl akonk, wi si dat da mi Joana weh neva joj di rait way, noh Jehoava. Jehoava noh need fi eksplayn fi hihn disizhanz tu hyoomanz. Da chroo, Jehoava mi alow ih servants eena di paas fi ekspres how dehn feel bowt di disizhan dehn weh hihn mi mek er weh ih mi bowt fi mek. (Gen. 18:25; Jonah 4:2, 3) Ahn sohntaim, hihn mi eksplayn tu dehn wai hihn mi mek sertn disizhanz. (Jonah 4:10, 11) Bot, Jehoava noh need fi mek wi aproov wahn disizhan weh hihn don mek er weh hihn wahn mek.—Isa. 40:13, 14; 55:9. w22.02 3-4 ¶5-6

Wi ak laik wee da “di yongis” wen wi “kansida ada peepl fi bee moa impoatant” dan wee. (Fil. 2:3) Wen wi ak laik dat, wi noh wahn hert wi bradaz ahn sistaz. Aala wi bradaz ahn sistaz moa impoatant dan wee eena sohn kaina way. Dat eezi fi andastan wen wi foakos pahn dehn gud kwalitiz. Wi shuda tek tu haat di kongsl weh di apasl Paal mi gi di Kristyanz da Korint. Hihn mi tel dehn: “Da wat mek yoo difrent fahn enibadi els? Ahn weh yoo gat weh Gaad neva gi yu? An if Gaad mi gi yu evriting, den wai yu di boas laik if Gaad neva gi yu notn?” (1 Kor. 4:7) Wi wuda neva waahn kaal atenshan tu wiself er chrai mek ada peepl tink dat wee moa impoatant dan enibadi els. Soh if wahn brada da wahn gud speeka, er wahn sista aybl fi staat lata Baibl stodiz, dehn shuda aalwayz gi prayz tu Jehoava fi di tingz weh dehn du. w21.06 22 ¶9-10

Wahn lata Witnisiz di fain it haada ahn haada fi reech peepl da dehn hows. Som poblishaz liv da wahn plays wehpaat lata apaatment bildin ahn naybahud ga sikyoariti, ahn yu kyaahn goh een anles sohnbadi weh liv deh invait yu een. Ada poblishaz mait onli fain lee bit a peepl hoam. er dehn goh preech da sohn plays wehpaat onli wahn lee bit a peepl liv. Di poblishaz mait haftu chravl faar fi chrai preech tu wan persn weh praabli noh eevn deh hoam. If wee fays dehndeh kaina chalenj, wi kyaahn giv op! Chrai preech tu peepl da wahn difrent taim. Wi wahn get fi taak tu moa peepl if wi goh preech joorin wahn taim wen dehn moa laikli deh hoam. Aftaraal, evribadi haftu goh hoam som taim! Wahn lata bradaz ahn sistaz preech eena di aftanoon bikaaz dehn noatis dat moas peepl deh hoam joorin da taim. Pahn tap a dat, di howshoalda dehn yoozhwali moa rilaks joorin da taim ahn redi fi lisn tu weh wi ga fi seh. w21.05 15 ¶5, 7

Wee di si di saym prablem tudeh? Yes. Lata peepl geh opset bikaaz Jehoava Witnisiz noh selibrayt bertday ahn Krismos an ada haliday weh noh gree wid di Baibl. Adaz geh beks bikaaz Jehoava Witnisiz noh selibrayt eni nashanal haliday er bikaaz dehn noh fala finaral kostom weh noh gree wid Gaad Werd. Peepl weh geh beks wid Jehoava Witnisiz bikaaz a dehnya ting mait reeli bileev dat Gaad aksep di way how dehn di wership ahn. Bot dehn kyaahn pleez Gaad if dehn prifaa di werl chradishanz oava di klyaa teechinz weh wi fain eena di Baibl. (Maak 7:8, 9) Weh wahn help wi fi kip wi fayt? Wi need fi ga schrang lov fi Jehoava laa ahn prinsipl dehn. (Ps. 119:97, 113, 163-165) Wen wi lov Jehoava, wi wahn rijek eni chradishan weh hihn noh laik. Wi noh wahn mek notn bee moa impoatant dan wi lov fi Jehoava. w21.05 6 ¶15-16

How wi ku fala di advais weh di apasl Paal mi giv? Wi ku kip wi fayt schrang wen wi stodi regyula, pray aal di taim, ahn stay bizi eena di werk weh Jehoava gi wi fi du. (2 Tim. 4:4) If wi ga fayt, wi noh wahn geh frayd wen wi hyaa negitiv ripoat bowt Jehoava Witnisiz. (Isa. 28:16) Wi lov fi Jehoava, fi ih Werd, ahn fi wi bradaz wahn help wi fi kip wi fayt schrang soh dat peepl weh lef di chroot kyaahn chrik wi. Eena Jeezas taim, lata peepl mi rijek ahn, bot lata peepl mi aksep ahn. Eevn wan a di joj eena di Jooish Sopreem Koat ahn “wahn big krowd a prees” mi aksep ahn. (Aks 6:7; Mach. 27:57-60; Maak 15:43) Sayhn way soh, milyanz a peepl tudeh disaid fi fala Jeezas. Wai? Bikaaz dehn noa an lov di chroot weh dehn fain eena di Skripchaz. Gaad Werd seh: “Di wan dehn weh lov yu laa wahn ga lata pees; notn ku mek dehn stombl.”—Ps. 119:165. w21.05 13 ¶20-21

Di apasl Paal mi riyalaiz dat da Jehoava giv ahn di schrent fi du evriting weh hihn mi du eena ih servis tu ahn. Jehoava mi gi Paal ih hoali spirit fi finish di werk weh hihn giv ahn fi du eevn doa ih mi en op da jayl, ih mi fays persikyooshan, an ih mi fays ada chalenjiz. Wen Timoti mi yonga, hihn yoostu chravl wid Paal ahn hihn mi aalso haftu pen pahn Gaad powa fi du ih minischri. Timoti yoostu chravl wid Paal pahn sohn lang chrip fi goh vizit an inkorij di kangrigayshan dehn. Paal yoostu sen ahn bai ihself fi goh vizit di kangrigayshan dehn tu. (1 Kor. 4:17) Timoti kuda mi feel dat hihn neva gud inof fi du aala dat. Maybi dat da wai Paal mi tel ahn: “Noh mek enibadi luk dong pahn yu bikaaz yu yong.” (1 Tim. 4:12) Pahn tap a dat, Timoti mi “aalwayz sik.” (1 Tim. 5:23) Bot Timoti mi noa dat Jehoava powaful hoali spirit wuda mi giv ahn di schrent weh ih need fi preech di gud nyooz ahn fi serv ih bradaz ahn sistaz.—2 Tim. 1:7. w21.05 21 ¶6-7

Fi shoar, di prinsipl weh deh da Jaymz 1:19 wahn help dehn wan weh gi kongsl. Jaymz mi rait: “Wahn persn shuda aalwayz bee redi fi lisn, bot ih fi tek ih taim bifoa ih taak, ahn noh bee eezi fi geh beks.” Wahn elda mait feel laik hihn andastan evriting bowt di persn sichuwayshan, bot yu tink hihn reeli andastan evriting? Proverbs 18:13 rimain wi: “Da wahn foolish ting wen sohnbadi ansa bak tu wahn mata bifoa ih hyaa di faks.” Ih wuda beta if di elda aks di persn fi eksplayn ih sichuwayshan. Dat meenz dat di elda wuda haftu lisn bifoa ih taak. Di elda mait aks kweschanz laik: “How tingz di goh?” “How Ah ku help yu?” If eldaz tek di taim fi fain owt bowt di persn sichuwayshan, den dehn wahn ku help an inkorij dehn bradaz ahn sistaz. Wen wahn elda gi kongsl, ih fi du moa dan jos reed skripchaz er gi sojeshanz. Wi bradaz ahn sistaz need fi feel dat di eldaz kay bowt dehn, dat dehn andastan dehn, ahn dat dehn waahn help dehn. w22.02 17 ¶14-15