Joon

Di wido mi liv wahn haad laif. An ih praabli neva eevn ga inof moni fi bai di baysik tingz weh ih need fi liv. Stilyet, shee gaahn tu wan a di moni baks ahn put een too smaal koin, ahn yu praabli kudn eevn hyaa wen di moni jrap eena di baks. Bot Jeezas mi noa weh shee mi put een deh. Shee mi put een too lepta koin, di smaalis koin weh dehn yoostu yooz eena dehn dayz. Dat da neva eevn inof moni fi bai wan sparo, wahn cheep berd weh peepl yoostu sel fi food. Dis wido mi reeli impres Jeezas. Soh hihn mi kaal ih disaipl dehn ahn point tu di wido ahn tel dehn: “Dis poa wido put een moa moni eena di kanchribyooshan baks dan aala di ada peepl.” Den ih seh: “Dehn [espeshali di rich peepl] gi fahn owta dehn richiz, bot shee, eevn doa ih soh poa, giv evriting weh shee mi gat.” (Maak 12:43, 44) Wen dis faytful wido mi giv op di laas lee bit a moni weh ih mi gat da day, shee mi-di put ih laif eena Jehoava lovin han.—Ps. 26:3. w21.04 6 ¶17-18

Wen Jeezas mi deh pahn ert, hihn mi aalwayz ga wahn pazitiv atichood tuwaadz ih minischri, ahn hihn mi waahn ih falowaz ga da saym pazitiv atichood tuwaadz di minischri tu. (Jan 4:35, 36) Wail Jeezas mi deh wid ih disaiplz, dehn mi eksaitid bowt di preechin werk. (Look 10:1, 5-11, 17) Bot wen dehn mi ares Jeezas ahn kil ahn, ih disaiplz neva hapi fi preech nohmoh. (Jan 16:32) Bot afta Jeezas mi geh rayz op bak tu laif, hihn mi inkorij dehn fi foakos pahn di preechin werk. An afta ih gaahn da hevn, dehn mi soh eega fi preech dat dehn enimiz mi seh weh di skripcha teks fi tudeh seh. Jeezas mi gaid di erli Kristyanz eena di preechin werk, ahn Jehoava mi bles dehn. Soh wahn lata peepl mi aksep dehn mesij. Fi egzampl, da Pentikaas 33 C.E., bowt 3,000 peepl mi geh baptaiz. (Aks 2:41) Ahn di nomba a disaiplz mi kantinyu fi groa moa ahn moa. (Aks 6:7) Stilyet, Jeezas mi prafesai dat di preechin werk mi wahn ga eevn moa sokses eena di laas dayz.—Jan 14:12; Aks 1:8. w21.05 14 ¶1-2

Yoo memba di fers taim yu mi riyalaiz dat weh yu mi-di laan da-mi di chroot? Yu mi tink dat evribadi mi wahn hapi fi laan di tingz weh yu mi-di laan. Ahn yu mi noa fi shoar dat di tingz weh yu laan fahn di Baibl mi wahn gi yu wahn beta laif now ahn wahn eevn beta laif eena di fyoocha. (Ps. 119:105) Yu mi geh soh eksaitid fi taak bowt di chroot wid yu frenz ahn faamli. Bot weh mi hapm? Wel, yu mi shak fi fain owt dat wahn lata dehn neva waahn hyaa notn weh yu ga fi seh. Wi shudn bee sopraiz wen peepl noh lisn tu di mesij weh wi preech. Wen Jeezas mi deh ya pahn ert, hihn mi du wahn lata miraklz weh mi proov dat Jehoava mi deh wid ahn. Fi egzampl, Jeezas mi rezorek Lazaros. Bot stilyet, moas peepl neva lisn tu ahn. Non a di peepl weh mi persikyoot Jeezas kuda mi seh dat da mirakl neva hapm. Bot eevn soh, di Jooish leedaz stil neva bileev dat Jeezas da-mi di Mesaiya. Dehn mi eevn waahn kil Jeezas ahn Lazaros!—Jan 11:47, 48, 53; 12:9-11. w21.05 2 ¶1-2

Du yu bes fi goh da meetin regyula. Di meetin proagram wahn inkorij yu, ahn yu wahn ku geh fi noa yu bradaz ahn sistaz. Mek frenz wid peepl eena di kangrigayshan weh yu ku laan fram, eevn if dehn oalda er yonga dan yoo er if dehn kohn fahn wahn difrent kolcha. Di Baibl rimain wi dat oalda peepl ga moa wizdom. (Job 12:12) Oalda bradaz ahn sistaz eena di kangrigayshan ku laan fahn faytful yonga bradaz ahn sistaz tu. Dayvid mi moch yonga dan Janatan, bot dat neva stap dehn fahn bee kloas frenz. (1 Sam. 18:1) Dayvid ahn Janatan mi help wan anada fi serv Jehoava eevn wen dehn mi-di goh chroo haad taimz. (1 Sam. 23:16-18) Irina, wahn sista weh da di onli Witnis eena ih famili, seh: “Wi bradaz ahn sistaz ku reeli bee laik wi spirichwal ma er pa, er wi spirichwal brada er sista. Jehoava ku yooz dehn fi bee fi wee famili.” Yu frenz waahn inkorij ahn sopoat yu, bot yoo haftu tel dehn how dehn ku du dat. w21.06 10-11 ¶9-11

Jeezas mi tel ih disaipl dehn wahn iloschrayshan bowt wahn king an ih slayv. Di slayv mi oa di king lata moni dat ih mi wahn kyaahn pay ahn bak. Bot di king mi kyansl weh di slayv mi oa. Laytaraan, da saym slayv neva wilin fi kyansl weh wahn neks slayv mi oa ahn, eevn doa da mi onli lee bit a moni. Soh di king mi en op di chroa da meen slayv eena prizn. Di slayv eena Jeezas iloschrayshan neva onli hert ihself bot ih mi hert adaz rong ahn tu. Fers, ih mi hert di ada slayv bikaaz ih mi meen tu ahn, an ih neva shoa ahn no mersi wen ih “chroa ahn eena prizn til ih kuda mi pay bak evriting weh ih oa.” Sekant, ih mi hert di ada slayv dehn weh mi si weh mi hapm. Wen “di ada slayv dehn si weh hapm, dehn geh sad.” (Mach. 18:30, 31) Sayhn way soh, weh wi du afek adaz rong wi. Weh ku hapm if wi noh wilin fi fergiv wi brada er sista? Fers, wi hert dehn bikaaz wi noh wilin fi fergiv dehn, wi noh pay dehn no main, ahn wi noh chreet dehn eena wahn lovin way. Sekant, wi hert adaz eena di kangrigayshan bikaaz dehn feel sad wen dehn si dat wi ga wahn prablem wid wi brada er sista ahn wi noh wilin fi fiks wi rilayshanship wid dehn. w21.06 22 ¶11-12

Gaad kriyayt hyoomanz eena fi hihn imij, bot Saytan lov fi mek dehn du imoaral tingz. Wen “Jehoava si dat di wikidnis a man mi-di tek oava di ert” eena Noawa dayz, hihn “mi feel sari dat hihn mi mek man pahn di ert, an ih haat mi geh sad.” (Gen. 6:5, 6, ftn., 11) Yu tink di werl geh beta sins den? Non ataal! Di Devl veri hapi fi si dat aal kaina sekshwal imoraliti di geh kaman tudeh, inkloodin sekshwali imoaral kandok bitween man ahn uman, man ahn man, an uman ahn uman! (Ifee. 4:18, 19) Saytan feel veri hapi wen peepl weh wership Jehoava komit wahn seeryos sin. Anda Saytan kanchroal, hyoomanz noh onli di rool dehnself ahn kaaz payn, bot dehn aalso di rooin di ert ahn dehn noh di tek kayr a di animalz weh Jehoava kriyayt fi dehn. (Eccl. 8:9; Gen. 1:28) Weh di hapm sayka dat? Sohn saiyentis seh dat eena di neks fyoo yaaz, wan milyan difrent kaina animal ahn plaant ku stap egzis sayka di damij weh hyoomanz kaaz. w21.07 12 ¶13-14

Sohn peepl kyaahn stap dehnself fahn feel gilti bowt di mistayk weh dehn mek. Dehn kip di tink dat Jehoava wahn neva fergiv dehn eevn afta dehn aks fi fergivnis ahn stap du weh rang. If yoo feel laik dat, dehn ga sohnting weh ku help yu stap feel da way. Yu need fi andastan dat Jehoava waahn shoa yu fi hihn laayal lov, ahn dat wahn help yu fi bee hapi di serv Jehoava wid wahn kleen kanshans. Dis onli pasabl bikaaz a “di blod a Jeezas ih Son [weh] mek wi kleen fahn aal sin.” (1 Jan 1:7) Weneva yu feel diskorij bikaaz a sohnting weh yu du, memba dat if yu ripent, Jehoava reeli waahn fergiv yu. Noatis how di saamis Dayvid shoa wi dat laayal lov ahn fergivnis goh tugeda. Hihn mi rait: “Jos laik how di hevnz haiya dan di ert, sayhn way soh fi hihn laayal lov deh tuwaadz dehn wan weh fyaa hihn. Az faar az di sonraiz deh fahn di sonset, dat da how faar fahn wi hihn put wi sin dehn.”—Ps. 103:11, 12. w21.11 5-6 ¶12-13

Wahn Kristyan hozban haftu chreet ih waif wid rispek. (1 Peet. 3:7) Fi egzampl, wahn hozban rispek ih waif wen ih shoa ahn dat shee impoatant tu hihn. Hihn noh wahn aks ahn fi du moa dan weh ih ku du. Ahn fi shoar ih noh wahn kompyaa shee wid eni ada uman. Imajin how wahn waif wuda feel if ih hozban du ahn sohnting laik dat. Wahn sista weh naym Rosa seh dat ih hozban, weh da noh wahn Witnis, aalwayz kompyaa shee wid ada uman. Di meen werdz weh ih tel ahn noh onli mek ih feel bad bowt ihself bot ih mek ih feel dat nobadi lov ahn. Shee seh, “Ah aalwayz need fi rimain miself dat Jehoava lov mi.” Pahn di ada han, wahn Kristyan hozban shoa dat ih rispek ih waif. Hihn noa dat wen hihn du dat, hihn mek ih rilayshanship wid ih waif ahn wid Jehoava beta. Wahn hozban weh ga rispek fi ih waif prayz ahn wen ih taak gud bowt ahn, wen ih tel ahn humoch ih lov ahn, an wen ih shoa ahn dat shee preshos tu ahn. w21.07 22 ¶7-8

Imajin dat yu di ekspek wan a yu frenz fi bring sohnting fi yu weh yu reeli need. Yu wuda feel disapointid if ih noh reech wen yu mi-di ekspek it? Bot den yu fain owt dat yu fren ga wahn gud reezn wai ih neva reech pahn taim. Now yu noh main wayt far ahn, an ga payshens, noh chroo? Proverbs 13:11 teech wi wai wi need fi bee payshent. Ih seh: “Sombadi weh geh rich faas looz ih richiz faas tu, bot sombadi weh werk haad, lee bit bai lee bit ih gyada ih richiz.” Weh wi laan fahn dis vers? Wahn waiz persn ga sokses bikaaz ih kyaaful how ih du tingz an ih payshent. Proverbs 4:18 tel wi dat “di way a di raichos wan da laik di lait erli da maanin weh geh braita ahn braita til ful daylait.” Weh di Baibl seh rait ya help wi fi si dat lee bit bai lee bit Jehoava di help ih peepl andastan wat da fi hihn perpos. Pan di ada han, dis vers ku aalso help wi andastan how wahn Kristyan wuda mek chaynjiz eena ih laif ahn jraa kloasa tu Jehoava. Ih tek taim fi mek aala dis hapm. w21.08 8 ¶1, 3-4

Wi ga lata werk fi du bikaaz Jehoava wahn soon dischrai dis wikid sistem. (Mach. 24:14; Look 10:2; 1 Peet. 5:2) Aala wee waahn serv Jehoava az moch az wi kud. Lata bradaz ahn sistaz di chrai du moa eena di minischri. Som a dehn waahn serv az painyaaz. Adaz waahn serv da Betel er dehn waahn help eena di difrent kanschrokshan proajek. Ahn dehn ga wahn lata bradaz weh di werk haad soh dat dehn ku kwalifai fi bee wahn ministeeryal servant er elda. (1 Tim. 3:1, 8) Jehoava veri hapi wen ih si how fi hihn peepl wilin fi serv ahn! (Ps. 110:3) Bot yoo eva feel diskorij bikaaz yu noh reech wan a yu spirichwal goalz? If dat da how yoo feel, pray tu Jehoava ahn tel ahn how yu feel. (Ps. 37:5-7) Pahn tap a dat, yu ku aks spirichwali machoar bradaz ahn sistaz eena di kangrigayshan fi help yu si how yu ku du beta eena yu servis tu Jehoava. Den, chrai yu bes fi fala di advais weh dehn gi yu. If yu du dat, yu mait en op di geh di privilij weh yu mi waahn er yu mait reech yu goal. w21.08 20 ¶1; 21 ¶4

Ana da-mi wahn wido ahn wahn prafit. Shee mi 84 yaaz oal ahn shee mi “aalwayz deh da di templ.” Bikaaz shee neva mis ih “meetin dehn,” Jehoava bles ahn an shee mi geh fi si Jeezas az wahn baybi. (Look 2:36-38) Eena fi wee taim, wahn lata faytful oalda wanz da gud egzampl fi di yonga wanz. Wee wahn benifit wahn lat wen wi tek di taim fi get fi noa dehn ahn lisn wen dehn tel wi bowt aal di tingz dehn mi injai eena dehn servis tu Jehoava. Wi oalda bradaz ahn sistaz veri impoatant tu Jehoava ahn fi hihn aaganaizayshan. Eena difrent wayz dehn si how Jehoava bles fi hihn aaganaizayshan ahn dehn si how hihn bles dehn persnali. Dehn laan sohn impoatant lesn fahn fi dehn oan mistayks. Si dehn laik wahn “fongtin a wizdom,” ahn laan fahn fi dehn ekspeeryens. (Prov. 18:4) If yu tek di taim fi geh fi noa dehn, yu fayt ku geh schranga. w21.09 3 ¶4; 4 ¶7-8; 5 ¶11, 13

Laik weh Aizaiya mi diskraib, “di milk a di nayshan dehn” avaylabl tu Jehoava peepl. (Isa. 60:5, 16) Wid di skilz a dehnya preshos man ahn uman weh di kom eena di chroot, wi di preech di gud nyooz eena 240 difrent lan ahn wi di projoos lichricha eena oava 1,000 langwij. Eena dis taim a di en, di preechin a di mesij weh di shayk di nayshan dehn di lef peepl di tink. Dehn riyalaiz dat dehn haftu mek wahn disizhan now. Weh dehn wahn du? Dehn wahn sopoat Gaad Kingdom, er dehn wahn kantinyu sopoat di govament dehn a dis werl? Dis da di impoatant disizhan weh evribadi wahn haftu mek. Eevn doa Jehoava peepl obay di laa dehn a di govament wehpaat dehn liv, dehn stay nyoochral ahn noh tek said eena eniting weh ga fi du wid palitiks. (Roam. 13:1-7) Dehn noa dat Gaad Kingdom da di onli solooshan fi aala wi prablemz. Da Kingdom da no paat a dis werl.—Jan 18:36, 37. w21.09 17-18 ¶13-14

Wen sohnbadi weh yu lov lef Jehoava, ih veri impoatant fi mek yu kip yu fayt schrang ahn fi help yu famili membaz tu. How yu ku du dat? Yu ku mek yu fayt geh schranga if yu kantinyu reed Gaad Werd, meditayt pahn weh yu reed, an kip di goh da di meetin dehn. Sista Joanna pa an ih sista mi lef di chroot; shee seh: “Ai feel moa kaam wen Ah reed bowt Abigayl, Ester, Joab, Joazef, ahn Jeezas. Fi dehn egzampl inkorij mi ahn help mi bee moa pazitiv.” Wen yu feel sad, noh stap pray tu Jehoava. Kip di aks wi lovin Gaad fi help yu si tingz di way hihn seeʼt, ahn fi “gi yu andastandin ahn teech yu di way yu fi goh.” (Ps. 32:6-8) Da chroo, ih mait noh eezi fi tel Jehoava how yu reeli feel. Bot memba, Jehoava noa weh yu di goh chroo; hihn noa how yu feel. Hihn waahn yu tel ahn bowt evriting weh di wori yu.—Ex. 34:6; Ps. 62:7. w21.09 28 ¶9-10

Afta di Paasoava a 32 C.E., di apasl Peeta, Jaymz, ahn Jan mi si wahn amayzin vizhan. Pahn wahn hai mongtin, maybi pahn Mongt Herman, Jeezas apyaarans mi chaynj fronta dehn. “Ih fays staat tu shain brait laik di son, an ih kloaz geh az wait az lait.” (Mach. 17:1-4) Di apasl dehn mi hyaa Gaad seh: “Dis da mai Son, di wan weh Ah onli lov, ahn di wan weh Ah pleez wid. Unu mos lisn tu ahn.” Di way how dehn chree apasl liv dehn laif afta dat shoa dat dehn mi reeli lisn tu Jeezas. Wee waahn fala fi dehn egzampl. Wi soh tankful dat Jehoava gi wi lovin dairekshan chroo di “hed a di kangrigayshan,” Jeezas Krais. (Ifee. 5:23) Mek wi “lisn tu ahn” laik weh di apasl Peeta, Jaymz, ahn Jan mi du. Wen wi mek pees ahn stay pahn di road weh leed tu laif, wi wahn geh wahn lata blesin now ahn hapinis weh wahn laas fareva eena di fyoocha. w21.12 22 ¶1; 27 ¶19

Wahn Kristyan da Korint mi-di liv wahn imoaral laif wid ih oan pa waif. Di apasl Paal mi tel di bradaz fi disfeloship ahn. Da disgostin bihayvya mi-di afek adaz eena di kangrigayshan. Som a dehn neva eevn tink dat dat da-mi wahn seeryos sin! (1 Kor. 5:1, 2, 13) Afta sohntaim mi paas, Paal mi andastan dat di man mi ripent fan ih sin! Paal mi tel di eldaz fi ‘fergiv ahn fahn dehn haat ahn giv ahn komfert.ʼ Noatis wai Paal mi seh dehn fi du dis: “Soh dat [di man] noh geh soh sad ahn giv op.” Paal haat mi gaan owt tu di man bikaaz ih mi ripent. Hihn neva waahn di man feel soh sad bowt weh ih mi du dat ih wuda giv op ahn noh eevn chrai geh fergivnis. (2 Kor. 2:5-8, 11) Jos laik Jehoava, di eldaz lov shoa mersi tu adaz. If dehn haftu, dehn wahn gi schrang disiplin tu sohnbadi weh komit wahn seeryos sin, bot dehn wahn aalso shoa az moch mersi az pasabl tu da persn wen dehn fain reezn fi du it. If di eldaz noh disiplin di persn weh komit wahn seeryos sin ataal, dehn noh di shoa mersi tu da persn. Insteda dat, ih wahn bee laik if dehn di talarayt rangdooin. w21.10 11-12 ¶12-15

Wen sohnbadi hert wi feelinz, wi ku kompyaa it tu wahn kot. Som a dehn mait smaal, wail adaz mait biga. Fi egzampl, wen wi oapm wahn enviloap, wi mait geh wahn lee paypa kot pahn wi finga. Dat ku hert wahn lat, bot afta wan er too dayz, wi mait noh eevn si weh di kot mi deh. Saym way soh, som a di tingz weh adaz du tu wi noh mait impoatant. Fi egzampl, wahn fren mait seh er du sohnting widowt tink ahn hert wi feelinz, bot ih eezi fi mek wi fergiv dehn. Bot if wi geh wahn deepa kot, wahn dakta mait haftu stich it op. If wi kip di dig di kot, wi onli wahn di mek ih geh wers. Wahn persn weh geh ih feelinz hert mait di du sohnting laik dat if ih kip di tink bowt how bad ih feel ahn humoch di persn hert ahn. Bot dehn wan weh hoal malis onli di mek it wers fi dehnself. Ih moch beta if dehn wuda obay di kongsl eena di skripcha teks fi tudeh! w21.12 12 ¶15

Sopoaz wahn elda di wori bowt di way how wahn brada er sista chooz fi jres. Di elda ku aks ihself, ‘Di Baibl gi eni reezn fi mek Ah tel ahn bowt how ih jres?ʼ Bikaaz di elda noh waahn gi fi hihn oan opinyan, hihn mait aks wahn nada elda er wahn spirichwali machoar brada er sista fi si weh dehn tink. Tugeda dehn mait kansida Paal kongsl bowt how fi yooz gud jojment wen wi jres. (1 Tim. 2:9, 10) Paal neva mek roolz bowt weh wahn Kristyan shuda wayr ahn weh ih shudn wayr. Insted, hihn mi gi prinsiplz weh shoa dat dehn shuda jres eena wahn sensabl way, weh shoa rispek, ahn weh deesent. Paal mi noa dat di bradaz ahn sistaz ku wayr weh dehn waahn az lang az ih noh goh gens weh di Baibl seh. Soh wahn elda shuda chrai si weda er nat di persn chooz fi jres eena wahn deesent ahn sensabl way. Ih impoatant fi memba dat too spirichwali machoar Kristyanz mait mek difrent disizhanz, bot dat noh meenz dat wan rait ahn di ada wan rang. Wi neva waahn foas wi bradaz fi du weh wee tink rait. w22.02 16 ¶9-10

Wi ga gud reezn fi shoa laayal lov tu wan anada. Wat da som a dehn? Mek wi fain di ansa eena dehnya skripchaz: “Noh mek laayal lov ahn faytfulnis lef yu. . . . Den evribadi wahn lov yu ahn yu wahn bee waiz fronta Gaad ahn man.” “Wahn man a laayal lov benifit ihself.” “Hooeva goh afta raichosnis ahn laayal lov wahn fain laif.” (Prov. 3:3, 4; 11:17, ftn.; 21:21) Dehnya skripchaz menshan chree reezn wai wi need fi shoa laayal lov. Fers, wi preshos tu Jehoava wen wi shoa laayal lov. Sekant, wi benifit now wen wi shoa laayal lov. Fi egzampl, wi ku mek frenz wid ada peepl ahn wi frenship wahn laas fareva. Ahn terd, wen wi shoa laayal lov, wi wahn geh lata blesinz eena di fyoocha, inkloodin evalastin laif. Soh ih klyaa fi si dat wi ga gud reezn fi obay Jehoava ahn “shoa laayal lov ahn mersi tu wan anada.” w21.11 8 ¶1-2

If wahn chraiyal weh yu don gaahn chroo er weh yu di goh chroo rait now di shoa yu dat yu fayt noh schrang inof, noh mek dat diskorij yu. Seeʼt az wahn apachooniti fi schrentn yu fayt. Pray haad tu Jehoava, espeshali wen yu di goh chroo wahn chraiyal. Si dat Jehoava ku yooz di bradaz ahn sistaz ahn yu famili membaz fi provaid weh yu need. If yu alow Jehoava fi help yu goh chroo yu chraiyalz rait now, yu wahn bee shoar dat hihn wahn aalso help yu fi bayr op anda eni chraiyal weh yu wahn fays eena di fyoocha. Jeezas mi help ih disaipl dehn fi si eena weh ayryaz dehn mi need fi ga moa fayt. Bot hihn neva dowt dat wid Jehoava help ih disaipl dehn mi wahn bayr op anda eni chraiyal eena di fyoocha. (Jan 14:1; 16:33) Hihn mi shoar dat wahn grayt krowd wahn servaiv di grayt chribyulayshan bikaaz a dehn schrang fayt. (Rev. 7:9, 14) Yoo wahn bee wan a dehn wan weh servaiv if yu du evriting weh yu kud rait now fi schrentn fi yoo fayt!—Heeb. 10:39. w21.11 25 ¶18-19

Wee noh ekspek Jehoava fi du wahn mirakl fi protek wi tudeh. Bot wee noa dat aala dehn wan weh chros Jehoava wahn get evalastin laif eevn if dehn ded tudeh. Wee chros dat Jehoava wahn protek wi, bot eena di fyoocha da chros wahn geh tes. Wen Gag a Maygag, wahn groop a nayshan, atak Gaad peepl, wi mait tink dat dehn wahn ku kil wi. Bot wi wahn need fi bee shoar dat Jehoava ga di powa fi sayv wi, ahn dat da egzakli weh hihn wahn du. Di nayshan dehn wahn luk pahn wee laik sheep weh noh ga nobadi fi protek wi. (Ezek. 38:10-12) Wi noh wahn ga no wepan ahn wi noh wahn noa how fi fait. Di nayshan dehn wahn tink dat ih wahn bee eezi fi kil wi owt. Dehn noh noa dat Jehoava aynjel dehn redi fi difen wi. Bot wee noa dis bikaaz wi ga fayt. Af koars, di nayshan dehn wahn kyaahn si di aynjelz bikaaz dehn noh ga no fayt eena Gaad. Dehn wahn sopraiz wen di hevnli aami fait fi wi!—Rev. 19:11, 14, 15. w22.01 6 ¶12-13

Aala Jehoava servant dehn impoatant tu hihn, soh dehn shuda bee impoatant tu wee tu. Wi haftu bee wilin fi du wateva wi kud fi protek dehn ahn kay fi dehn. Soh if wi fain owt dat wi hert er ofen sombadi, wi shudn play laik notn hapm ahn tink dat da fi dehn prablem ahn dehn need fi get oava it. Wai som a wi bradaz eezi fi kech feelinz? Maybi da bikaaz a how dehn groa op dehn ga wahn negitiv vyoo bowt dehnself. Adaz jos kom eena di chroot, ahn dehn stil di laan dat dehn haftu fergiv adaz wen dehn mek wahn mistayk. Bot noh mata wai wee er sombadi els geh hert, wi haftu chrai wi bes fi mek pees. Aalso, if sombadi eezi fi kech feelinz, dehn need fi andastan dat ih noh gud fi ga da kwaliti ahn dehn need fi werk pan it. Wen dehn du dat, dehn wahn bee hapiya ahn dehn wahn get lang wid dehn bradaz. w21.06 21 ¶7

Jeezas andastan how wi feel. Wen wi di wori, wi hapi fi ga wahn fren weh andastan how wi feel, espeshali if dehn don gaahn chroo sohnting laik weh wee di goh chroo. Jeezas da wahn fren laik dat. Hihn andastan how wi feel wen wi feel week ahn need help bikaaz hihn don gaahn chroo sohnting laik dat. Hihn wahn mek shoar dat wi geh di help weh wi need “da di rait taim.” (Heeb. 4:15, 16) Jos laik how Jeezas mi aksep help fahn wahn aynjel eena di gyaadn a Getsemani, Jehoava ku help wee eena wahn lata wayz. Ih ku help wi chroo wahn poblikayshan, wahn veedyo, wahn taak, er wahn inkorijin vizit fahn wahn elda er wahn spirichwali machoar brada er sista. (Look 22:39-44) Jehoava wahn gi yu pees an ih wahn schrentn yu. Wen wi pray, Jehoava wahn gi wi “wahn kaina pees weh peepl kyaahn andastan.”—Fil. 4:6, 7. w22.01 18-19 ¶17-19

Jehoava aalwayz du weh rait. Fi som a wi, doh, ih mait bee haad fi mek wi chros di man dehn weh hihn apoint rait ya pahn ert. Wi mait wanda if dehnya man weh ga atariti eena Jehoava aaganaizayshan di du weh Jehoava waahn dehn fi du er if dehn di du dehn oan ting. Jehoava chros dehn wan weh hihn apoint fi tek di leed eena ih aaganaizayshan an eena di kangrigayshan. Soh, if wi noh chros dehnya man, den wi kyaahn seh dat wi chros Jehoava. Tudeh, Jehoava di yooz “di faytful ahn waiz slayv” fi leed ih aaganaizayshan rait ya pahn ert. (Mach. 24:45) Jos laik di govanin badi eena di fers senchri, “di faytful ahn waiz slayv” di luk afta Gaad peepl aal oava di werl ahn dehn di gi dairekshan tu di eldaz eena di kangrigayshan dehn. Den di eldaz mek shoar dat di kangrigayshan di fala dehndeh dairekshan. Wi shoa dat wi chros di way how Jehoava du tingz wen wi obay di dairekshan weh wi get fahn di aaganaizayshan ahn fahn di eldaz. w22.02 4 ¶7-8

Wi veri hapi ahn prowd fi bee wan a Jehoava Witnisiz! Wi rijais wen wi help sohnbadi weh “ga di rait haat kandishan fi get evalastin laif” fi bee wahn bileeva. (Aks 13:48) Wi feel di saym way Jeezas mi feel. Hihn mi “rijais” wen ih disaipl dehn mi tel ahn bowt aala di gud ekspeeryens weh dehn mi geh wail dehn mi-di preech. (Look 10:1, 17, 21) Di apasl Paal mi tel Timoti: “Du yu bes fi bee wahn gud egzampl ahn fi bee wahn gud teecha.” Ih mi aalso tel ahn: “If yu du dis, yu wahn sayv yuself ahn di peepl weh lisn tu yu.” (1 Tim. 4:16) Soh wi preechin werk sayv peepl laif. Wi du wi bes fi bee wahn gud egzampl bikaaz wee da sitiznz a Gaad Kingdom. Wi aalwayz waahn bihayv eena wahn way weh bring prayz tu Jehoava ahn weh shoa dat wi bileev eena di gud nyooz weh wi di preech. (Fil. 1:27) Wi shoa dat wi di du wi bes ‘fi bee wahn gud teechaʼ wen wi pripyaa gud fi di minischri ahn wen wi aks Jehoava fi help wi bifoa wi preech tu adaz. w21.10 24 ¶1-2

Sohnbadi put aan “di nyoo persn” wen ih shoa di kwalitiz weh Gaad hoali spirit bayr, an yu ku kompyaa dat tu wen wahn persn put aan kleen kloaz. Dat meenz dat hihn alow di hoali spirit fi gaid di way how ih tink, feel, an ak. Fi egzampl, ih lov Jehoava ahn fi Hihn peepl. (Mach. 22:36-39) Ih kantinyu fi bee hapi eevn wen ih di goh chroo chraiyalz. (Jay. 1:2-4) Ih da wahn persn weh redi fi mek pees. (Mach. 5:9) Ih payshent ahn kain wen ih di deel wid adaz. (Kol. 3:13) Ih lov du gud tingz fi adaz. (Look 6:35) Ih shoa dat ih ga schrang fayt eena ih hevnli Faada bai di tingz weh ih du. (Jay. 2:18) Wen adaz chrai pik fait wid ahn er get ahn beks, ih stay kaam, an ih shoa self-kanchroal wen ih fays temtayshan. (1 Kor. 9:25, 27; Taitos 3:2) Fi put aan di nyoo persn, wi need fi werk haad fi ga aala di kwalitiz weh geh menshan da Galayshanz 5:22, 23 an ada paats a di Baibl. w22.03 8-9 ¶3-4

Eldaz ku fala di apasl Paal egzampl, noh onli wen dehn preech fahn hows tu hows, bot aalso wen dehn redi fi preech weneva dehn kud ahn tu hooeva dehn kud. (Ifee. 6:14, 15) Jos laik Paal, eldaz ku yooz di taim weh dehn spen eena di minischri fi chrayn adaz, inkloodin ministeeryal servants. (1 Peet. 5:1, 2) Bot eldaz shuda neva bee soh bizi wid dehn werk dat dehn noh ga no taim fi preech. (Mach. 28:19, 20) Fi mek eldaz ku ga taim fi du di tingz weh dehn need fi du, sohntaim dehn mait noh aksep sertn asainments. Afta dehn pray ahn tink bowt di asainment, dehn mait riyalaiz dat if dehn aksep it dehn wahn kyaahn tek kayr a di moa impoatant tingz, laik fi kandok famili wership, fi tek paat eena di preechin werk, er fi teech dehn pikni fi preech. Dehn ku bee shoar dat Jehoava andastan dat dehn waahn bee balans eena evriting weh dehn du. w22.03 27 ¶4, 7; 28 ¶8

Yu mait memba how yoo mi feel wen yu mi-di stodi di Baibl. Maybi yu mi feel laik yu kuda neva goh preech wid di kangrigayshan. Er maybi yu mi frayd dat yu famili er frenz mait ton gens yu. If dis da how yoo mi feel, den yu mait andastan how yu Baibl styoodent feel. Jeezas mi seh dat ih naamal fi som peepl feel dis way. Bot hihn mi tel ih falowaz noh fi mek dat stap dehn fahn serv Jehoava. (Mach. 10:16, 17, 27) Lee bit bai lee bit, chrayn yu Baibl styoodent fi taak bowt ih fayt. Jeezas disaiplz mosi mi feel frayd ahn nervos wen hihn mi sen dehn owt fi preech. Bot Jeezas mi help dehn; hihn mi tel dehn wehpaat fi preech ahn weh fi preech bowt. (Mach. 10:5-7) How wi ku kapi Jeezas egzampl? Help yu styoodent fi si wehpaat ih ku preech. Fi egzampl, aks ahn if ih noa enibadi weh ku benifit fahn wahn spesifik Baibl chroot. Den shoa ahn wahn eezi way how fi du it. w21.06 6 ¶15-16

“Eena jos wahn kopl minits, di shap ahn di oal bildin dehn mi staat tu jrap dong.” “Evribadi mi-di panik . . . Sohn peepl seh dat ih mi laas fi bowt too minits. Bot tu mee, ih mi feel laik ih mi laas way langa dan dat.” Dehndeh da koments fahn sohn peepl hoo mi gaahn chroo wahn ertkwayk da Nepal eena 2015. Wee akchwali di goh chroo sohnting simila rait now. Jehoava di shayk aala di nayshan dehn a dis werl. Di prafit Hagai mi seh: “Dis da weh Jehoava di Komanda a di hevnli aami seh, ‘Soon Ai wahn shayk op di hevnz ahn di ert . . . wan moa taim.ʼ” (Hag. 2:6) Da prafesi fahn Hagai difrent fahn wahn reel ertkwayk. Wahn reel ertkwayk onli kaaz dischrokshan. Dis prafesi onli kaaz gud tingz fi hapm. Dis da weh Jehoava seh: “Ai wahn shayk aala di nayshan dehn, ahn di preshos tingz fahn owta aala di nayshan dehn wahn kom een; an Ai wahn ful op dis hows wid mai gloari.” w21.09 14 ¶1-3

Wen yu waahn mek fren wid sohnbadi, yu haftu taak tu dehn aal di taim ahn tel dehn weh yu tink ahn how yu feel. Da di saym ting wid wi frenship wid Jehoava. Wen wi pray ahn tel Jehoava how wi feel, weh wi tink, ahn bowt di tingz weh mek wi wori, wi di shoa dat wi chros hihn ahn dat wi noa dat hihn lov wi. (Ps. 94:17-19; 1 Jan 5:14, 15) Spen taim wid laayal frenz; dehn da wahn gif fahn Jehoava. (Jay. 1:17) Wi hevnli Faada mi shoa wi dat ih inchrestid eena eech wan a wi wen ih gi wi wahn spirichwal famili a bradaz ahn sistaz weh “shoa lov aala di taim.” (Prov. 17:17) Wen di apasl Paal mi rait ih leta tu di Koloashanz, ih mi menshan sertn Kristyanz weh mi sopoat ahn. Hihn mi seh dat dehn mi reeli “gi [hihn] lata komfert.” (Kol. 4:10, 11) Eevn Krais Jeezas mi need an apreeshiayt di sopoat weh ih mi get fan ih frenz, weda da mi fahn aynjelz er hyoomanz. (Look 22:43) Wen wi taak tu wahn machoar fren bowt wi prablemz ahn woriz, dat noh meenz dat wi fayt week. In fak, dat ku bee wahn protekshan fi wi! w21.04 24-25 ¶14-16

Weh yu shuda du if wahn brada er sista du sohnting weh reeli hert yu? Chrai haad fi mek pees. Pray tu Jehoava ahn tel ahn how yu feel. Aks ahn fi bles di persn weh hert yu, ahn fi help yu si di gud kwalitiz weh hihn si eena dehn. (Look 6:28) If yu kyaahn ferget weh dehn du tu yu, den tink bowt weh wuda bee di bes way fi taak tu dehn bowt it. Ih aalwayz gud fi tink dat dehn neva meen fi hert yu. (Mach. 5:23, 24) Wen yu goh taak tu dehn, chrai bee pazitiv. An if dehn noh waahn mek pees, “kantinyu fi put op wid” dehn ahn noh giv op. (Kol. 3:13) Moas impoatant, noh hoal malis, kaaz dat ku damij yu rilayshanship wid Jehoava. Noh mek notn stombl yu. Wen yu du dat, yu proov dat yu lov Jehoava moa dan eniting els.—Ps. 119:165. w21.06 23 ¶15