Joolai

Wen sohnbadi geh disfeloship, dat da wan way how Jehoava shoa ih lov. Dis kaina disiplin help di wan weh stap serv Jehoava an evribadi els. Som eena di kangrigayshan mait seh dat di eldaz neva mek di rait disizhan fi disfeloship sohnbadi. Bot, memba, di wan dehn eena di kangrigayshan weh seh dehndeh tingz mait noh waahn menshan negitiv tingz bowt di persn weh du rang. Wi need fi andastan dat wi noh ga aala di faks. Soh chros dat di eldaz eena di judishal komiti mi alow di Baibl fi gaid dehn soh dat dehn ku “joj fi Jehoava.” (2 Chron. 19:6) Wen yu werk lang wid di disizhan weh di eldaz mek, yu ku akchwali help di wan weh geh disfeloship fi kohn bak tu Jehoava. Sista Elizabeth seh: “Ih mi veri haad fi noh taak tu mi son weh da-mi wahn adolt. Bot afta hihn mi kohn bak tu Jehoava, hihn ihself mi seh dat ih mi gud dat ih mi geh disfeloship. Laytaraan, hihn mi seh dat hihn mi laan wahn lata gud lesn.” w21.09 28-29 ¶11-12

Tink bowt da wido. Shee mi praabli waahn gi Jehoava moa, bot shee mi du weh ih kud. Shee mi gi Jehoava ih bes! Ahn Jeezas mi noa dat fi shee kanchribyooshan mi preshos tu fi hihn Faada. Soh den dis da wahn impoatant lesn fi wee: Jehoava pleez wid wi wen wi giv ahn wi bes, wen wi serv ahn wid aala wi haat an aala wi soal. (Mach. 22:37; Kol. 3:23) Jehoava hapi wen ih si wi di du aal weh wi kud! Soh wen wi spen wi taim an enerji pahn wi wership, inkloodin di minischri ahn di meetin dehn, Jehoava wahn pleez wid wi. How yu ku yooz di lesn weh yu laan fahn di pasij bowt di poa wido? Chrai tink bowt spesifik peepl weh wuda feel inkorij if yu rimain dehn how Jehoava hapi wid weh dehn ku du. Maybi da wahn oalda sista weh praabli feel gilti er yoosles bikaaz ih noh ga di helt er enerji fi du weh ih yoostu du eena di minischri. w21.04 6 ¶17, 19-20

Jehoava noa wen da di bes taim fi bring dis wikid werl tu wahn en. Bikaaz a fi hihn payshens, milyanz a peepl geh di chaans fi noa hihn, ahn now dehn ga di apachooniti fi bee paat a di grayt krowd weh wership hihn. Aala dehn hapi dat Jehoava mi indyoar lang inof soh dat dehn kuda mi baan, laan fi lov hihn, ahn dedikayt dehn laif tu ahn. Wi wahn geh fi si dat Jehoava mek di rait disizhan fi bee payshent wen milyanz a peepl indyoar tu di en! Eevn doa Saytan kaaz lata sofarin, Jehoava da stil “di hapi Gaad.” (1 Tim. 1:11) Wee ku bee hapi tu wail wi di wayt fi mek Jehoava klayr op ih naym, shoa dat hihn ga di rait fi rool, en aal wikidnis, ahn fi geh rid a aala di prablemz weh wi di goh chroo rait now. Mek wi kip di indyoar bikaaz wi noa dat wi hevnli Faada di du di saym ting. w21.07 13 ¶18-19

Lata peepl eena di fers senchri neva put fayt eena Jeezas. Dehn mi jos si ahn az di son a wahn poa kyaapenta. Aalso, hihn da-mi fahn Nazaret, wahn siti weh wahn lata peepl mi tink neva impoatant. Eevn Natanyel, hoo mi kohn fi bee wan a Jeezas disaipl, mi seh: “Eniting gud ku kohn fahn Nazaret?” Hihn mosi mi tink bowt di prafesi da Micah 5:2, weh mi seh dat di Mesaiya mi wahn baan da Betlihem, noh Nazaret. Aizaiya mi prafesai dat Jeezas enimiz neva mi wahn pay atenshan “tu di deetaylz a [di Mesaiya] jenarayshan.” (Isa. 53:8) If di peepl mi tek di taim fi get di karek infamayshan, den dehn mi wahn fain owt dat Jeezas mi did baan da Betlihem ahn dat hihn da-mi wan a King Dayvid disendant. (Look 2:4-7) Soh di plays weh Jeezas mi baan mi mach op wid di prafesi weh deh da Micah 5:2. Soh den, wat da-mi di prablem? Di peepl mi hori fi jomp tu wahn kankloozhan. Dehn neva get aala di faks. Ahn sayka dat, dehn mi rijek Jeezas. w21.05 2-3 ¶4-6

Di Baibl gat een sohn gud egzampl a peepl weh mi geh blesinz fahn Jehoava bikaaz dehn mi aksep kongsl. Kansida Joab egzampl. Eevn doa hihn mi lov Jehoava an ih mi waahn pleez ahn, hihn neva perfek. Joab mi deh anda wahn lata presha an ih mi seh tingz weh neva rait. Ahn bikaaz a dat, hihn mi geh kongsl weh kohn fahn Jehoava ahn fahn Ilaihyu. Weh Joab mi du? Hihn mi seh: “Yes, Ai mi taak, bot Ah mi seh tingz weh Ah neva andastan . . . Ah tek bak weh Ah mi seh, an Ah doo rigret it. Dat da wai Ah sidong pahn dos an ashiz.” (Job 42:3-6, 12-17) Hihn mi proov dat hihn mi hombl wen ih mi aksep di kongsl weh Ilaihyu mi giv ahn, eevn doa Ilaihyu mi yonga dan hihn. (Job 32:6, 7) Saym way soh, if wi hombl, ih wahn help wi fi aplai di kongsl weh dehn gi wi, eevn if wi feel laik wi neva dizerv di kongsl er if di persn weh di gi wi kongsl yonga dan wi. Aala wi need fi werk haad fi ga di kwaliti dehn weh di froot a di hoali spirit bayr ahn fi teech ahn preech di gud nyooz beta. w22.02 11 ¶8; 12 ¶12

Evribadi eena di kangrigayshan ga di rispansabiliti fi mek ih bee wahn lovin ahn peesful plays wehpaat nobadi feel loanli. Weh wi du ahn weh wi seh ku inkorij adaz wahn lat! Weh yoo ku du fi help bradaz ahn sistaz weh noh ga no famili eena di chroot? How yoo ku help dehn feel di lov weh di bradaz ahn sistaz eena di kangrigayshan ga fi dehn? Chrai fi bee frenz wid peepl weh jos di staat kohn da meetin. Wi ku bee kain tu dehn ahn welkom dehn tu di kangrigayshan. (Roam. 15:7) Bot wi waahn du moa dan jos hayl dehn; wi waahn mek wi frenship groa. Soh bee kain tu dehn ahn shoa dehn dat yu reeli kay bowt dehn ahn dat yu waahn andastan weh dehn di goh chroo. Bot noh intafyaa eena dehn bizniz. Ih mait bee haad fi mek dehn tel yu how dehn feel, soh noh chrai foas dehn fi ansa yu. Rada, bee kain tu dehn ahn bee kyaaful wid di kaina kweschanz weh yu aks dehn. Ahn bee payshent ahn lisn tu dehn wen dehn ansa yu. Fi egzampl, yu ku aks dehn how dehn geh fi noa bowt di chroot. w21.06 11 ¶13-14

Wi tankful fi di privilij fi serv Jehoava tugeda wid wi bradaz ahn sistaz az “wan flak” anda “wan shepad”! Di Organized to Do Jehovahʼs Will buk, payj 165, seh: “Bikaaz yu injai da yooniti, yu ga di rispansabiliti fi help mantayn it.” Soh wi need fi “laan fi si wi bradaz ahn sistaz di way Jehoava si dehn.” Aala dehnya “lee wan,” inkloodin wee, preshos tu Jehoava. Da soh yoo si yu bradaz ahn sistaz? Jehoava si an apreeshiayt evriting weh yoo du fi help dehn. (Mach. 10:42) Wi lov wi bradaz ahn sistaz, soh wi “mek op wi main noh fi du notn weh ku kaaz wi brada fi stombl er schray weh fahn di fayt.” (Roam. 14:13) Wi kansida wi bradaz ahn sistaz fi bee moa impoatant dan wee, ahn wi waahn fergiv dehn fahn wi haat. Mek wi noh alow notn weh adaz du fi stombl wi. Rada, mek wi chooz fi “du aal weh wi kud fi mek pees ahn fi bil op wan anada.”—Roam. 14:19. w21.06 24 ¶16-17

If wi tek di taim fi stodi ahn fala di kongsl weh wi geh fahn di Baibl ahn fahn Jehoava aaganaizayshan, lee bit bai lee bit wi wahn geh fi bee moa laik Jeezas. Wi wahn aalso geh fi noa Jehoava beta. Jeezas mi yooz wahn iloschrayshan fi eksplayn how di Kingdom mesij weh wi preech da laik wahn smaal lee seed weh groa lee bit bai lee bit eena di haat a dehn wan wid di rait haat kandishan. Ih mi seh: “Di seed dehn sprowt op ahn groa taal. Ahn yet, hihn [di wan weh plaant it] noh eevn noa how ih mi hapm. Lee bit bai lee bit, di grayn groa fahn di grong pan ih oan. Fers, ih sprowt, den di shoot kom owt, den di grayn geh raip.” (Maak 4:27, 28) Jeezas mi-di help di peepl andastan dat jos laik how ih tek taim fi mek wahn plaant groa, saym way soh ih tek taim fi mek sombadi weh bileev eena di Kingdom mesij mek chaynjiz eena ih laif. Fi egzampl, az wi Baibl styoodent dehn staat jraa kloasa tu Jehoava, wi wahn staat tu noatis di gud chaynjiz weh dehn di mek eena dehn laif. (Ifee. 4:22-24) Bot wi need fi aalwayz memba dat Jehoava da di Wan weh mek da lee seed groa. w21.08 8-9 ¶4-5

Wahn persn weh foakos “pahn weh [ih] aiy si” hapi wid weh ih gat ahn weh ih ku du akaadn tu ih serkomstans. Pahn di ada han, wahn persn weh kip aan “di chays afta weh [ih] waahn” wahn neva bee hapi. Weh wi ku laan fahn dis? Fi mek wi ku ga jai, wi shuda foakos pahn weh wi gat ahn noh pahn di tingz weh wi noh gat. Yu tink ih pasabl fi mek wi bee hapi wid di tingz weh wi gat? Lata peepl tink ih noh pasabl bikaaz wi laik laan how fi du nyoo tingz. Bot ih akchwali pasabl. Wee ku reeli injai di tingz weh wi gat ahn bee hapi. How wi ku du dat? If wi reed di iloschrayshan a di talents weh Jeezas mi taak bowt da Machyu 25:14-30 wi wahn laan how fi ga jai an aalso how fi ga moa jai wid di tingz weh wi gat now. w21.08 21 ¶5-6

Jehoava kay wahn lat bowt dehn wan weh feel “dong ahn hoaples.” Aala wi, noh jos di eldaz, ku help inkorij wi dyaa bradaz ahn sistaz. Wan way how wi ku inkorij dehn da wen wi shoa dehn dat wi reeli kay bowt dehn. Jehoava waahn mek wi shoa dehn dat hihn reeli kay bowt dehn. (Prov. 19:17) Wi ku aalso help wi bradaz ahn sistaz wen wi hombl ahn wen wi noh boas bowt weh wi ku du. Wi noh waahn jraa atenshan tu wiself bikaaz dat ku mek adaz staat jelos wi. Insteda dat, wi waahn yooz wi gif ahn wi nalij fi inkorij wan anada. (1 Peet. 4:10, 11) Wi ku laan wahn lat bowt how fi chreet adaz wen wi luk pahn di way how Jeezas mi chreet ih falowaz. Hihn da-mi di graytis man fi eva liv pahn ert. Bot hihn mi stil “kain ahn hombl.” (Mach. 11:28-30) Wen hihn mi teech di peepl, hihn mi taak tu dehn eena wahn way weh eezi fi andastan. An ih mi yooz iloschrayshanz weh mi toch dehn haat.—Look 10:21. w21.07 23 ¶11-12

Mek di taim fi geh fi noa wi oalda bradaz ahn sistaz. Da chroo, dehn mait kyaahn si tu gud ahn dehn mait waak sloa, bot dehn stil waahn kip bizi, ahn dehn ga wahn “gud naym” wid Jehoava. (Eccl. 7:1) Memba wai Jehoava chrezha dehn. Kantinyu fi shoa dehn aana. Kapi Ilaisha egzampl. Hihn mi insis fi stay kloas tu Ilaija pan di laas day weh dehn mi deh tugeda. Chree taimz Ilaisha mi seh: “Ai noh wahn lef yu.” (2 Ki. 2:2, 4, 6) Yu ku shoa dat yu reeli waahn geh fi noa wi oalda bradaz ahn sistaz wen yu aks dehn kweschanz eena wahn kain way. (Prov. 1:5; 20:5; 1 Tim. 5:1, 2) Yu ku aks kweschanz laik dehnya: “Weh mi kanvins yu dat yu mi fain di chroot?” “How di tingz weh mi hapm eena yu laif mi help yu fi jraa kloasa tu Jehoava?” “Weh help yu fi stay hapi eena yu servis tu Jehoava?” (1 Tim. 6:6-8) Den lisn gud az dehn tel yu dehn stoari. w21.09 5 ¶14; 7 ¶15

Wen yu obay di koman fi preech ahn mek disaiplz, yu di shoa dat yu lov Gaad. (1 Jan 5:3) Tink bowt dis: Bikaaz yu lov Jehoava yu preech tu peepl. Ih mi eezi fi mek yoo obay da koman? Praabli nat. Yu mosi mi nervos wen yu mi gaahn preech fi di fers taim, noh chroo? Bot yoo mi noa dat dis da di werk weh Jeezas koman wi fi du ahn yoo mi obay da koman. An afta yu mi preech fi sohn taim, ih mi praabli geh eeziya fi yu. Bot how yoo feel fi kandok wahn Baibl stodi? Yu geh nervos jos di tink bowt it? Maybi. Bot if yu pray tu Jehoava fi ga di korij fi aafa wahn Baibl stodi, hihn ku help yu ga di dizaiya fi mek disaiplz. w21.07 3 ¶7

Slayvz eena di paas mi geh wahn permanent maak fi shoa hoo dehn bilangz tu. Sayhn way soh, di govament dehn a dis werl ekspek evribadi tudeh fi ga wahn simbolik maak pahn dehn han er dehn farid fi shoa hoo dehn sopoat. Dehndeh govament waahn mek evribadi shoa bai dehn tinkin ahn bai di tingz weh dehn du dat dehn bilangz tu dehn ahn dat dehn sopoat dehn. Weh wee wahn du? Wi wahn aksep di simbolik maak ahn sopoat di govament dehn a dis werl? Dehn wan weh rifyooz fi aksep di maak wahn fays haad taim ahn dehn wahn deh eena daynja. Di buk a Revilayshan seh: “Nobadi kuda mi bai er sel eniting anles ih mi ga di maak pan ahn.” (Rev. 13:17) Bot Gaad peepl noa weh Gaad wahn du tu dehn wan weh ga di maak laik weh Revilayshan 14:9, 10 taak bowt. Soh insteda aksep da maak, ih wahn bee laik if dehn rait pahn dehn han, “Ai bilang tu Jehoava.” (Isa. 44:5) Now da di taim fi mek shoar dat wi laayalti tu Jehoava schrang. If dat da di kays, den Jehoava wahn hapi fi seh dat wee bilang tu hihn! w21.09 18 ¶15-16

Fi finish di werk weh Gaad gi wi fi du, wi ku geh help fahn ada bradaz ahn sistaz. Di apasl Paal mi shoa Timoti di difrent wayz how hihn mi preech ahn teech, an ih mi inkorij Timoti fi help adaz di saym way. (1 Kor. 4:17) Jos laik Timoti, wee ku laan fahn ada bradaz ahn sistaz eena di kangrigayshan, espeshali di wan dehn weh ga lata ekspeeryens. Aalso, aks Jehoava fi help. Pray tu Jehoava an aks ahn fi help yu evri taim yu goh preech, bikaaz wee kyaahn du notn if wi noh geh help fahn fi hihn powaful hoali spirit. (Ps. 127:1; Look 11:13) Wen yu di pray tu Jehoava fi help, yu ku tel ahn egzakli weh yu wuda waahn ih help yu wid. Fi egzampl, yu ku aks ahn fi help yu preech tu sohnbadi weh waahn laan bowt Hihn ahn weh redi fi lisn. Wi shuda aalso mek taim fi du persnal stodi. Di Baibl seh: “Du weh gud, weh perfek, ahn weh pleez Gaad.” (Roam. 12:2) Wen wi stodi, wi geh fi noa Jehoava beta ahn beta. Ahn wen wi taak tu adaz bowt hihn, dehn wahn si dat wi reeli bileev weh wi di seh. w21.05 18 ¶14-16

Maybi yu di stodi di Baibl wid sohnbadi ahn yu di werk haad fi bee wahn gud teecha. Yu pray wahn lat fi yu styoodent, bot ih noh di yooz weh ih laan eena ih laif, soh yu haftu stap stodi wid ahn. Er maybi yu neva yet stodi wid sohnbadi weh en op di geh baptaiz. Yu tink dis meenz dat Jehoava noh di bles yu minischri? Jehoava pay atenshan tu how haad wi werk an ih si dat wi noh giv op. Jehoava hapi wid wi wen wi eega fi kantinyu preech bikaaz wi lov hihn, eevn wen peepl noh waahn lisn tu wi. Paal mi seh: “Gaad da wahn raichos Gaad, ahn hihn noh wahn ferget di lov weh unu shoa fi ih naym. Hihn si how unu du unu bes fi help owt di hoali wan dehn ahn how unu kantinyu fi du dis, an ih noh wahn ferget dat.” (Heeb. 6:10) Jehoava memba di werk weh wi du fi hihn ahn di lov weh wi shoa, eevn if wi noh ga wahn Baibl styoodent weh geh baptaiz. Soh weh Paal mi rait tu di Korintyanz weh deh eena di skripcha teks fi tudeh inklood yoo tu. w21.10 25 ¶4-6

Wi ku si dat Jeezas mi lovin ahn kain wen ih mi-di deel wid ih disaipl dehn. Hihn mi noa dat dehn difrent ahn dat dehn mi ga difrent gif. Soh dehn kudn handl di saym rispansabiliti ner du di saym amonk a werk eena di minischri. Bot hihn mi hapi dat eech wan a dehn mi du dehn bes. Jeezas iloschrayshan bowt di talents shoa dat hihn mi andastan ih disaipl dehn. Eena da iloschrayshan, di maasta mi gi eech wan a ih slayv dehn werk “akaadn tu weh dehn kuda mi handl.” Wan a di slayv mi geh moa dan weh di ada wan mi get. Bot di maasta mi komen di too a dehn an ih mi tel dehn: “Yu du gud; yoo da wahn gud ahn faytful slayv!” (Mach. 25:14-23) Jeezas aalwayz lovin ahn kain wen ih di deel wid wi. Hihn noa dat aala wi difrent ahn dat wi ga difrent gif, ahn hihn veri hapi wen wi du fi wee bes. Wi fi chrai wi bes fi kapi Jeezas egzampl. w21.07 23 ¶12-14

King Dayvid neva aalwayz shoa mersi. Fi egzampl, wen Naybal, hoo da-mi wahn mizarabl man, mi disrispek Dayvid an ih soalja dehn ahn rifyooz fi gi dehn food, Dayvid mi geh soh beks dat ih mi mek op ih main fi kil Naybal an aal hoo mi liv eena ih hows. Bot Naybal waif, Abigayl, mi kain ahn payshent, ahn shee mi hori gaahn gi Dayvid an ih soalja dehn food. Soh tanks tu Abigayl, Dayvid neva merda Naybal an evribadi els eena ih hows. (1 Sam. 25:9-22, 32-35) Noatis dat wen Dayvid mi giv een tu anga, hihn mi disaid dat Naybal an evribadi els eena ih hows dizerv fi ded. Ahn laytaraan, Dayvid mi seh dat di man eena Naytan iloschrayshan dizerv fi ded tu. Bot wen yu tink bowt it, Dayvid da-mi wahn kain man, soh wai hihn wuda seh dat dis man weh mi teef di sheep dizerv fi ded? Tink bowt weh mi jos hapm eena Dayvid laif. Bikaaz a weh ih mi du, hihn mi ga wahn gilti kanshans. If sohnbadi joj adaz eena wahn rof way laik weh Dayvid mi du, ih akchwali di shoa dat ih noh ga wahn schrang rilayshanship wid Jehoava. w21.10 12 ¶17-18; 13 ¶20

Fahn di skripcha teks fi tudeh, wi laan dat wi ku bee laik Jehoava, di Wan hoo da di bes egzampl a hoalinis. Wi need fi bee hoali eena evriting weh wi du. Wi mait tink dat dis noh pasabl bikaaz wi noh perfek. Di apasl Peeta ihself mi mek sohn mistayk; stilyet, fi hihn egzampl shoa wi dat wee kud bee hoali. Wen peepl tink bowt sohnbadi weh dehn seh ak laik dehn hoali, dehn imajin sohnbadi weh noh smail fi notn, weh wayr sohn lang kloaz, an weh aalwayz luk seeryos. Bot dat da noh how peepl weh hoali stan. Di Baibl seh dat Jehoava, hoo hoali, da “di hapi Gaad.” (1 Tim. 1:11) Ahn di Baibl kaal dehn wan weh wership ahn “hapi.” (Ps. 144:15) Jeezas neva aproov a dehn wan hoo mi wayr sohn speshal kaina kloaz ahn du gud tingz fi adaz jos fi mek adaz ku noatis dehn. (Mach. 6:1; Maak 12:38) Bikaaz a weh chroo Kristyanz laan fahn di Baibl, dehn noa weh ih meenz fi bee hoali. Wee noa dat Jehoava lov wi ahn dat hihn wahn neva aks wi fi du sohnting weh hihn noa wi kyaahn du. w21.12 2 ¶1, 3

Gaad soh kain dat ih gi wi wahn lata gif. Wan a di graytis gif weh hihn gi wi da di apachooniti fi wership hihn. Wi shoa Jehoava dat wi lov ahn wen wi “obay fi hihn komanment dehn.” (1 Jan 5:3) Wan a di komanment dehn weh Jehoava waahn wi obay da di koman weh Jeezas gi wi fi mek disaiplz ahn baptaiz dehn. (Mach. 28:19) Hihn mi aalso koman wi fi lov wan anada. (Jan 13:35) Jehoava wahn welkom dehn wan weh obeedyant intu fi hihn big famili weh deh aal rong di werl. (Ps. 15:1, 2) Shoa dat yu lov adaz. Lov da Jehoava moas impoatant kwaliti. (1 Jan 4:8) Jehoava shoa wi dat ih lov wi bifoa wi mi eevn noa hihn. (1 Jan 4:9, 10) Wee kapi fi hihn egzampl wen wi shoa dat wi lov adaz. (Ifee. 5:1) Wan a di moas impoatant wayz how wi ku shoa dat wi lov peepl da wen wi mek gud yoos a di taim weh lef fi help dehn laan bowt Jehoava. (Mach. 9:36-38) Wen wi help dehn, dehn ku laan weh dehn need fi du fi bee paat a Jehoava famili. w21.08 5-6 ¶13-14

Jeezas deep lov fi Jehoava mi moov ahn fi mek wahn lata sakrifais fi ih Faada ahn fi wee tu. (Jan 14:31) Jeezas mi shoa humoch hihn lov peepl bai di way how ih mi liv ih laif pahn ert. Evri day, hihn mi shoa lov ahn kompashan fi peepl, eevn wen som a dehn mi deh gens ahn. Wahn impoatant way Jeezas mi shoa dat ih lov peepl da wen ih mi teech dehn bowt Gaad Kingdom. (Look 4:43, 44) Jeezas mi aalso shoa dat ih neva selfish ahn dat ih mi lov Gaad ahn peepl wen ih mi wilin fi sofa wahn terabl det. Eena da way, hihn mi mek it pasabl fi aala wi geh evalastin laif. Wi mi dedikayt wi laif tu Jehoava ahn geh baptaiz bikaaz wi lov wi hevnli Faada. Soh, jos laik Jeezas, wi shuda shoa Jehoava dat wi lov ahn bai di way how wi chreet peepl. Di apasl Jan mi rait: “Kaaz if ih noh lov ih bradaz weh ih ku si, den ih kyaahn lov Gaad weh ih neva si yet.”—1 Jan 4:20. w22.03 10 ¶8-9

Eevn doa wi injai di pray tu Jehoava ahn stodi di Baibl, ih noh aalwayz eezi. Aala wi bizi, ahn dat ku mek it haad fi mek wi fain taim fi wership Jehoava. Wi jab, wi famili, ahn di ada tingz weh wi haftu du ku tek soh moch a wi taim dat wi feel dat wi tu bizi fi pray, stodi, er meditayt. Dehn ga sohnting els weh ku tek op moas a wi taim. If wi noh kyaaful, wi ku geh bizi di du tingz weh noh mait bee rang, bot ih ku tek op soh moch a wi taim dat ih ku mek it haad fi mek wi jraa kloasa tu Jehoava. Fi egzampl, ih impoatant fi mek wi spen taim di rilaks er di du fon tingz. Bot if wi spen tu moch taim di du dat, wi noh wahn ga inof taim fi wership Jehoava. Wi need fi memba wat da di moas impoatant ting eena wi laif.—Prov. 25:27; 1 Tim. 4:8. w22.01 26 ¶2-3

Wen Jehoava mi koman di Izrelait dehn fi lov dehn nayba, hihn neva meen dat dehn onli fi shoa lov tu dehn wan weh da fahn di sayhn rays er nayshan az dehn. Hihn mi aalso tel dehn fi lov di farinaz weh mi liv monks dehn. Wi ku fain dat da Leviticus 19:33, 34. Jehoava mi waahn di Izrelait dehn fi chreet wahn farina laik if ih “da rait fahn deh,” ahn fi “lov ahn” saym laik how dehn lov dehnself. Fi egzampl, di laa mi seh dat di Izrelait dehn shuda mek di farinaz ahn di poa peepl pik op grayn ahn froots weh di werkaz lef bihain eena di feel. (Lev. 19:9, 10) Di prinsipl a da laa stil aplai tu Kristyanz tudeh. (Look 10:30-37) Eena weh way? Peepl fahn aal oava moov fi goh liv da difrent konchri; som a dehn mait liv rait rong yoo. Ih impoatant fi mek wi chreet dehnya man, uman, ahn chiljren wid rispek. w21.12 12 ¶16

Di moa wi pen pahn Jehoava fi gaid wi now, di moa kanfident wi wahn bee dat hihn wahn ku sayv wi eena di fyoocha. Wi need fi ga fayt ahn wi need fi bee wilin fi pen pahn Jehoava wen wi aks wi baas fi taim aaf soh dat wi ku goh da wi asembli ahn kanvenshan dehn. Er wen wi aks wi baas fi chaynj wi skejul soh dat wi ku goh da aala wi meetin dehn ahn spen moa taim eena di minischri. Sopoaz wi baas noh gi wi di taim aaf ahn wi en op di looz wi jab? Yoo tink dat wi wahn chros dat Jehoava wahn neva lef wi er abandan wi, ahn dat hihn wahn aalwayz gi wi di tingz weh wi need fi liv? (Heeb. 13:5) Wahn lata bradaz ahn sistaz weh deh eena ful-taim servis si dat Jehoava neva abandan dehn ahn dat hihn mi help dehn wen dehn mi need hihn di moas. Jehoava faytful fi chroo! Wid Jehoava pahn wi said, wi noh wahn frayd fi weh wahn hapm eena di fyoocha. Fi wee Gaad wahn neva abandan wi az lang az wi put di Kingdom fers eena wi laif. w22.01 7 ¶16-17

Weh ku tes wi chros eena di eldaz? Sopoas wahn persn weh geh disfeloship da wahn kloas fren er wahn relitiv. Wi mait wori dat di eldaz dehn neva kansida aala di faks. Er wi mait wanda if di eldaz mi joj di mata di way how Jehoava wuda joj it. Weh ku help wi fi kip di prapa atichood tuwaadz di disizhan dehn weh di eldaz mek? Ih gud fi mek wi memba dat wen sohnbadi geh disfeloship da wahn araynjment fahn Jehoava an ih benifit di kangrigayshan ahn di persn weh komit di sin. If di eldaz alow sohnbadi weh noh ripent fan ih sin fi stay eena di kangrigayshan, ih ku afek adaz eena di kangrigayshan an ih ku mek dehn komit wahn sin tu. (Gal. 5:9) Pahn tap a dat, di persn mait noh riyalaiz how bad ih mi sin, an ih mait noh si di reezn fi chaynj ih tinkin an ih akshanz soh dat ih ku geh bak Jehoava blesin. (Eccl. 8:11) Wee ku bee shoar dat di eldaz tek dehn rispansabiliti seeryos wen dehn di disaid weda er nat wahn persn fi geh disfeloship. w22.02 5-6 ¶13-14

If at fers wahn persn noh waahn aksep kongsl weh kohn fahn di Baibl, wahn elda reeli need fi bee payshent ahn kain wid dehn. Wahn elda need fi bee kyaaful fi noh geh beks if di persn noh aksep di kongsl. Soh wen wahn elda di du ih persnal pryaa, hihn ku aks Jehoava fi help di persn weh geh kongsl, fi help ahn andastan di reezn wai ih geh kongsl, ahn fi help ahn aplai di kongsl eena ih laif. Di brada weh geh kongsl mait need taim fi tink bowt weh dehn mi tel ahn. If di elda taak eena wahn payshent ahn kain way, ih wahn bee eeziya fi mek di persn lisn tu di kongsl. Af koars, di kongsl shuda aalwayz bays pahn Gaad Werd. Wen wi kongsl sohnbadi, wi waahn ih benifit dehn ahn wi aalso waahn ih “mek dehn haat hapi.”—Prov. 27:9. w22.02 18 ¶17; 19 ¶19

Wen wi pray tu Jehoava fi help wi deel wid wahn prablem er sohnting weh wi di schrogl wid, wi mait feel laik Jehoava di tek lang fi ansa wi pryaaz. Wai Jehoava noh ansa wi pryaaz rait away? Wen wi pray tu Jehoava, wi shoa dat wi ga fayt eena hihn. (Heeb. 11:6) Aalso, wen wi pray an aks Jehoava fi help wi du tingz weh pleez ahn, hihn waahn si dat wi di du wi bes fi du weh hihn waahn. (1 Jan 3:22) Soh wen wi aks Jehoava fi help wi stap du sohnting weh hihn noh laik, wi need fi bee payshent ahn du aal weh wi kud fi mek di chaynjiz weh wi need fi mek. Jeezas help wi fi andastan dat Jehoava mait noh ansa aala wi pryaaz rait away. Hihn mi seh: “Kip aan di aks, an unu wahn geh weh unu di aks fa; kip aan di saach, an unu wahn fain weh unu di saach fa; kip aan di nak, ahn di doa wahn oapm fi unu; bikaaz evribadi weh aks wahn get, an evribadi weh saach wahn fain, an evribadi weh nak pahn di doa, ih wahn oapm fi dehn.”—Mach. 7:7, 8. w21.08 8 ¶1; 10 ¶9-10

Fi ga fayt eena yu Kriyayta, yu need fi kantinyu stodi Gaad Werd. (Josh. 1:8) Tink bowt di prafesi dehn eena di Baibl weh kohn chroo, ahn how di Baibl ga di saym mesij eevn doa difrent man mi rait it. Wen yu du dat, yu fayt eena di lovin ahn waiz Kriyayta wahn geh schranga ahn yu wahn chros dat di Baibl da fahn Hihn. (2 Tim. 3:14; 2 Peet. 1:21) Wen yu stodi Gaad Werd, noatis how di advais ku help yu. Fi egzampl, fahn lang agoa di Baibl mi waan dat di lov a moni noh gud an ih bring “lata payn.” (1 Tim. 6:9, 10; Prov. 28:20; Mach. 6:24) Soh di waanin weh wi geh fahn di Baibl bowt di lov a moni da veri gud advais! Yoo ku tink bowt eni ada advais fahn di Baibl weh don help yoo persnali? Wen wi tink bowt aal di gud advais weh deh eena di Baibl, wi wahn si dat wi lovin Kriyayta noa weh gud fi wee ahn wi wahn aalwayz chros eena fi hihn advais. (Jay. 1:5) If wi du dis, wi wahn bee reeli hapi.—Isa. 48:17, 18. w21.08 17-18 ¶12-13

If yoo di geh oalda, memba dat Jehoava noh ferget weh aal yu don du far ahn. Yu mi werk haad fi sopoat di preechin werk. Yu mi bayr op anda lata chraiyalz, eevn dehn wan weh mi mek yu feel sad. Yu mi obay ahn difen Jehoava raichos standadz, yu mi faytful eena yu asainments, ahn yu mi chrayn adaz. Yu mi du yu bes fi kip op wid di chaynjiz eena Jehoava aaganaizayshan. Yu mi sopoat an inkorij adaz weh mi-di du moa eena dehn servis tu Jehoava. Jehoava lov yu wahn lat bikaaz yu laayal tu hihn. Hihn pramis dat “hihn wahn neva abandan dehn wan weh laayal tu hihn”! (Ps. 37:28) Hihn pramis yu: “Til [yu] hyaa gray Ai wahn stil di kehr [yu].” (Isa. 46:4) Soh noh feel er tink dat bikaaz yu di geh oal, yu noh impoatant eena Jehoava aaganaizayshan nohmoh. Yoo veri preshos! w21.09 3 ¶4

Jehoava shoa mersi bikaaz hihn waiz. Di Baibl seh dat “di wizdom weh kohn fahn hevn . . . ful a mersi, an ih du lata gud.” (Jay. 3:17) Jos laik wahn payrent weh lov ih pikni, Jehoava noa dat wen ih shoa wi mersi, wee benifit. (Isa. 49:15) Bikaaz a di mersi weh Jehoava shoa, wi ga wahn hoap fi di fyoocha eevn doa wi noh perfek. Soh bikaaz Jehoava veri waiz, hihn aalwayz shoa mersi wen hihn fain reezn fi du it. Bot Jehoava aalso noa wen fi hoal bak fahn shoa mersi. Bikaaz Jehoava waiz, hihn noh wahn shoa mersi if dat meenz dat ih wahn di talarayt rangdooin. Weh wi shuda du if sohnbadi eena di kangrigayshan chooz fi liv wahn kaina laif weh goh gens Jehoava standadz? Jehoava mi tel Paal fi tel di kangrigayshan dat dehn need fi “stap spen taim wid” sohnbadi laik dat. (1 Kor. 5:11) Enibadi weh komit wahn seeryos sin ahn rifyooz fi ripent wahn geh disfeloship fahn di kangrigayshan. Ih impoatant fi mek di eldaz du dis bikaaz ih protek di bradaz an sistaz eena di kangrigayshan an ih kip Jehoava naym kleen. w21.10 9-10 ¶7-8

Wi wership Jehoava wen wi sopoat di Kingdom werk wid wi doanayshan dehn. Jehoava mi ekspek di Izrelait dehn fi bring wahn gif far ahn wen dehn mi aten di festival. (Deut. 16:16) Dehn mi fi bring wahn gif bays pahn weh dehn kuda mi afoad. Wen dehn mi du dis, dehn shoa dat dehn mi tankful fi evriting weh Jehoava mi du fi dehn. How wee ku shoa dat wi lov Jehoava ahn dat wi tankful fi evriting weh ih du fi wi? Wan way wi du dis da wen wi sopoat di loakal kangrigayshan ahn di werlwaid werk wid wi doanayshanz bays pahn humoch wi ku giv. Di apasl Paal mi put it dis way: “Gaad pleez wid wahn gif weh kohn fahn di haat, bikaaz ih waahn peepl giv akaadn tu weh dehn ku afoad, noh weh dehn kyaahn afoad.” (2 Kor. 8:4, 12) Jehoava veri hapi wid wateva wi ku gi hihn, eevn if da noh moch.—Maak 12:42-44. w22.03 24 ¶13

Eldaz kyaahn tek weh aal di prablemz weh Jehoava peepl fays. Bot, Jehoava waahn mek eldaz du aal weh dehn kud fi inkorij ahn protek fi hihn peepl. How eldaz weh bizi ku fain taim fi gi di bradaz ahn sistaz di help weh dehn need? Fala di egzampl a di apasl Paal. Paal mi aalwayz redi fi komen an inkorij adaz. Ih gud fi mek eldaz fala fi hihn egzampl ahn bee lovin ahn kain tu di bradaz ahn sistaz. (1 Tes. 2:7) Paal mi tel di bradaz ahn sistaz dat hihn mi lov dehn ahn dat Jehoava mi lov dehn tu. (2 Kor. 2:4; Ifee. 2:4, 5) Paal mi chreet dehn wan eena di kangrigayshan laik ih frenz ahn hihn mi spen taim wid dehn. Hihn mi shoa dat hihn chros dehn wen ih mi tel dehn bowt ih oan imperfekshan ahn weh ih mi-di wori bowt. (2 Kor. 7:5; 1 Tim. 1:15) Bot, Paal neva foakos pahn fi hihn oan prablemz. Insteda dat, hihn mi waahn help ih bradaz ahn sistaz. w22.03 28 ¶9-10