Janiweri

Wai Timoti mi yoosful tu Jehoava? Da mi bikaaz hihn mi ga byootiful Kristyan kwalitiz. (Fil. 2:​19-22) Fahn di way how di apasl Paal mi diskraib Timoti, wi ku si dat hihn mi hombl ahn laayal. Hihn mi werk haad, an adaz kuda mi pen pan ahn. Ih mi kay bowt di bradaz ahn sistaz wahn lat. Dat mi mek Paal lov Timoti, an ih neva hezitayt fi chros ahn fi tek kayr a sohn haad asainments. Saym way soh, Jehoava wahn lov wee, ahn wi wahn ku du moa fi di kangrigayshan wen wi werk pahn di kwalitiz weh Jehoava lov. (Ps. 25:9; 138:6) Soh pray ahn tink bowt weh paat a yu persnaliti yu ku du beta eena. Den pik wahn spesifik kwaliti fi werk pan. Maybi yu need fi laan how fi shoa moa kompashan er how fi ga wahn schranga dizaiya fi help yu bradaz ahn sistaz. Er maybi yu ku werk haada fi mek pees wid adaz ahn bee moa wilin fi fergiv dehn. Yu ku aks wahn kloas fren fi gi yu sohn sojeshan pahn how yu ku du beta.—Prov. 27:6. w22.04 23 ¶4-5

Jehoava waahn mek wi bee hapi. Wee noa dat bikaaz jai da paat a di froot weh di hoali spirit bayr eena wi. (Gal. 5:22) Sins wi feel moa hapinis wen wi giv tu adaz dan wen wi geh tingz fahn dehn, wi feel wahn lata jai wen wi werk haad eena di minischri ahn wen wi help wi bradaz ahn sistaz eena eni way wi kud. (Aks 20:35) Eena di skripcha teks fi tudeh, di apasl Paal menshan too tingz weh ku help wi ga lata jai. Fers, wi goal shuda bee fi gi Jehoava wi bes. If wi di giv ahn wi bes, wi shuda bee hapi. (Mach. 22:​36-38) Sekant, wi noh fi kompyaa wiself wid adaz. Wi shuda aalwayz gi tanks tu Jehoava fi wateva wi helt, chraynin, er skilz alow wi fi du. Pahn di ada han, if adaz di du moa dan wi eena di minischri, wi shuda feel hapi dat dehn di yooz dehn skilz fi prayz Jehoava. w22.04 10 ¶1-2

Babilan di Grayt wahn geh dischrai sodn-wan, ahn dat wahn shak di werl. (Rev. 18:​8-10) Wen Babilan di Grayt geh dischrai, ih wahn reeli afek di hoal werl an ih wahn kaaz lata sofarin, bot Gaad peepl wahn ga at lees too reezn fi bee hapi. Fers, faals rilijan da wan a Jehoava Gaad enimi fahn way bak, an ih noh wahn egzis nohmoh. Ahn sekant, da soon taim fi mek Gaad sayv wi fahn dis wikid werl! Danyel mi prafesai dat wi wahn ga “lata chroo nalij.” Ahn wi ga wahn lat fi chroo! Now wi andastan som a di prafesi dehn bowt di taim weh wi di liv eena. (Dan. 12:​4, 9, 10) Dehnya prafesi soh karek dat dehn mek wi ga eevn moa rispek fi Jehoava ahn fi ih Werd di Baibl. (Isa. 46:10; 55:11) Soh, mek wi kantinyu fi schrentn wi fayt. How wi ku du dat? Wi haftu stodi di Baibl gud ahn help adaz fi bee Jehoava fren. Wi Gaad wahn protek evribadi weh chros eena ahn fi evriting, an ih wahn gi dehn “pees weh wahn laas.”—Isa. 26:3. w22.07 6-7 ¶16-17

Di buk a Revilayshan shoa wi dat Gaad Kingdom di rool eena hevn ahn dat Saytan geh chroa owta hevn. (Rev. 12:​1-9) Bikaaz a dat, pees deh eena hevn bot Saytan di kaaz wahn lata prablemz fi wee. Wai? Bikaaz hihn beks bad ahn hihn redi fi atak enibadi weh serv Jehoava rait ya pahn ert. (Rev. 12:​12, 15, 17) Weh wahn help wi fi stay faytful tu Jehoava eevn doa Saytan di atak wi? (Rev. 13:10) Wan ting weh wahn help wi da fi noa weh wahn hapm eena di fyoocha. Fi egzampl, eena di buk a Revilayshan, di apasl Jan tel wi bowt som a di blesinz weh wi wahn soon geh fi injai. Wan a dehndeh blesin da dat Gaad wahn dischrai aala ih enimi dehn. Eena di fers vers a di buk a Revilayshan, ih tel wi dat di infamayshan weh wi wahn reed da weh di apasl Jan mi get eena “sohn vizhan.” Dat meenz dat ih reprizent sohnting.—Rev. 1:1. w22.05 8 ¶1-3

Jehoava enimiz wahn geh beks bad bikaaz fi hihn peepl stay faytful tu ahn. Dis wahn kaaz wahn groop a nayshanz fi atak Gaad peepl aal oava di ert. Dis da weh di Baibl seh wahn bee di atak a Gag a Maygag. (Ezek. 38:​14-15) Weh Jehoava wahn du wen dehn atak fi hihn peepl? Hihn tel wi: “Ah wahn geh beks bad.” (Ezek. 38:​18, 21-23) Revilayshan chapta 19 tel wi weh wahn hapm neks. Jehoava sen ih Son fi protek Ih peepl ahn fi dischrai dehn enimiz. Di faytful aynjelz ahn di 144,000, weh mek op di hevnli aamiz, wahn jain Jeezas an atak dehn enimiz. (Rev. 17:14; 19:​11-15) How dis waar wahn en? Aala di peepl ahn di aaganaizayshan dehn weh goh gens Jehoava wahn geh dischrai!—Rev. 19:​19-21. w22.05 17 ¶9-10

Lee bit afta Adam ahn Eev sin, Jehoava mi yooz wahn prafesi fi gi dehn disendant dehn hoap. Wi ku fain weh hihn seh da Jenisiz 3:15: “Ah wahn mek yoo ahn di wuman bee enimiz. Ahn fi shee disendant wahn bee yu disendant dehn enimi tu. Yoo wahn bait fi shee disendant pan ih heel ahn fi shee disendant wahn mash yu hed.” Dis prafesi deh eena di fers buk a di Baibl. Bot wan way er di ada, aala di ada Baibl buk dehn kohn bak tu dis prafesi. Jos laik how wahn staypl jain tugeda aala di payj eena wahn eksasaiz buk, da rait soh Jenisiz 3:15 mek di infamayshan eena evri Baibl buk kohn tugeda az wan mesij. Da mesij da dat Gaad wahn sen wahn Sayvya weh wahn dischrai Saytan an aala ih wikid falowaz. Dis wahn bee wahn wandaful blesin fi evribadi weh lov Jehoava! If wi stodi di Baibl wi wahn si how di prafesi kohn chroo ahn how wee benifit fan it. w22.07 14 ¶1-3

Aks Jehoava fi gi yu di wizdom weh yu need fi help yu chiljren ga schrang lov fi hihn. (Jay. 1:5) Hihn da di bes Persn weh yu ku geh advais fram. Dehn ga wahn lata reezn wai. Mek wi kansida too reezn. Fers, Jehoava ga di moas ekspeeryens az wahn payrent. (Ps. 36:9) Ahn sekant, yu ku aalwayz benifit fahn di waiz advais weh hihn giv. (Isa. 48:17) Chroo fi hihn Werd an ih aaganaizayshan, Jehoava gi payrents wahn lata infamayshan fahn di Baibl weh ku help dehn rayz dehn chiljren fi lov hihn. (Mach. 24:45) Fi egzampl, yoo ku fain wahn lata praktikal advais eena di aatikl seeriz weh naym “Help fi di Famili.” Fi wahn lata yaaz, dis seeriz yoostu deh eena di Awayk! magazeen weh wi print, bot now yu ku fain it pahn wi websait. Pahn tap a dat, dehn ga wahn lata veedyo pahn jw.org weh ku help payrents fi aplai Baibl prinsiplz wen dehn di rayz dehn pikni.—Prov. 2:​4, 5. w22.05 27 ¶4-5

Jehoava da di graytis Persn weh fergiv eena di yoonivers. Fers, bikaaz hihn redi fi fergiv. Sekant, hihn noa evriting bowt wi ahn hihn da di bes Persn fi noa if wi reeli ripentant. Ahn terd, wen Jehoava fergiv wi, hihn noh bring it op agen. Da laik if wi neva sin non ataal. Sayka dat, wi ku ga wahn kleen kanshans ahn Jehoava wahn pleez wid wi. Af koars, az lang az wi noh perfek, wi wahn kantinyu sin. Bot wi ku geh komfert fahn di Insight on the Scriptures, Volume 2, payj 771. Ih seh: “Jehoava aalwayz shoa mersi ahn hihn noa dat ih servant dehn week, soh dehn noh need fi feel sad aal di taim bikaaz a imperfekshan ahn bikaaz a di mistayks weh dehn mek. (Ps 103:​8-14) Az lang az dehn di du dehn bes fi liv di way how Gaad waahn, dehn ku bee hapi. (Fil 4:​4-6; 1Jn 3:​19-22).” w22.06 7 ¶18-19

Saytan noh onli yooz di govament dehn weh deh gens wi fi mek wi feel frayd, bot hihn ga ada tingz weh ih yooz. Som peepl frayd fi weh dehn famili wahn tink wen dehn fain owt dat dehn waahn geh fi bee wahn Witnis. Sohntaim dis kaina fyaa wers dan if dehn wuda beet dehn op er chreet dehn bad. Bikaaz dehn lov dehn famili membaz wahn lat ahn waahn mek dehn geh fi noa ahn lov Jehoava tu, dehn feel sad wen dehn hyaa dehn famili taak bad bowt Jehoava ahn fi hihn peepl. Bot sohntaim, dehndeh saym famili membaz weh mi deh gens dehn eena di biginin wuda staat serv Jehoava laytaraan. Weh wi wahn du if wi famili membaz noh waahn ga notn fi du wid wi bikaaz wi waahn serv Jehoava? Wee ku geh wahn lata komfert fahn di byootiful werdz weh dehn eena Psalm 27:10. Wen wi memba humoch Jehoava lov wi, wi noh wahn frayd fi weh wahn hapm, eevn if wi famili noh waahn ga notn fi du wid wi. Ahn wi kanfident dat Jehoava wahn bles wi bikaaz wi noh giv op. Jehoava da di onli wan weh wahn gi wi evriting weh wi need fi liv, hihn wahn help wi fi stay kaam ahn bee hapi, an ih wahn help wi fi stay kloas tu hihn. w22.06 16-17 ¶11-13

Wen Jeezas mi deh pahn ert, peepl mi seh dat hihn da-mi wahn jronkad, ih eet tu moch, ih mi werk fi di Devl, ih neva kip di Sabat, an ih neva ga no rispek fi Gaad. (Mach. 11:19; 26:65; Look 11:15; Jan 9:16) Bot stilyet, Jeezas neva geh beks an ih neva ansa bak eena wahn bad way. Wen adaz taak tu wi eena wahn bad way, wi waahn fala Jeezas egzampl ahn noh ansa dehn bak eena wahn bad way eeda. (1 Peet. 2:​22, 23) Af koars, ih noh aalwayz eezi fi bee kain wen adaz taak tu wi eena wahn bad way. (Jay. 3:2) Weh ku help wi? Wen yu di preech ahn sohnbadi taak tu yu eena wahn way weh noh kain, chrai noh geh beks. Wahn brada weh naym Sam seh: “Ai chrai tink humoch di persn need fi laan bowt Gaad ahn dat ih ku chaynj.” Sohntaim di persn weh wi taak tu mait bee beks bikaaz wi vizit dehn da wahn bad taim. Wen wi taak tu sohnbadi weh beks, wi ku seh wahn shaat pryaa, ahn wi ku aks Jehoava fi help wi taak eena wahn way weh kain ahn weh shoa rispek. w22.04 6 ¶8-9

Wahn impoatant way how payrents ku help dehn pikni geh kloas tu Jehoava da wen dehn stodi di Baibl wid dehn. (2 Tim. 3:​14-17) Bot di Baibl tel wi wahn nada way how yong peepl ku laan bowt Jehoava. Eena di buk a Proverbs, wi ku reed bowt wahn pa di tel ih son fi neva ferget bowt Jehoava kwalitiz weh ih si eena kriyayshan. (Prov. 3:​19-21) Fi shoar az wahn payrent yu laik spen taim wid yu pikni owtsaid. Yooz da taim fi teech dehn bowt Jehoava kwalitiz fahn “di ting dehn weh hihn mek.” (Roam. 1:20) How Jeezas mi yooz kriyayshan fi teech ih disaipl dehn bowt Jehoava? Wahn taim wen Jeezas mi deh wid dehn, ih mi tel dehn fi luk pahn di berd ahn di lili dehn. (Look 12:​24, 27-30) Hihn mi teech ih disaiplz wahn impoatant lesn bowt how Jehoava kain ahn jenaros. Soh dehn mi laan dat Jehoava mi wahn tek kayr a dehn jos laik how ih tek kayr a di berd dehn ahn di flowaz. w23.03 20-21 ¶1-4

Wi tank Jehoava bikaaz wi ku pray tu ahn eena di naym a fi hihn Son. Jehoava yooz Jeezas fi gi wi weh wi aks ahn fa. Ahn hihn lisn tu wi pryaaz an ansa dehn wen wi pray eena Jeezas naym, an ih fergiv wi sin dehn bikaaz a Jeezas ransom sakrifais. (Roam. 5:1) Di Baibl seh dat Jeezas da wi “hai prees” weh “di sidong pahn di rait han said a di chroan a di grayt Gaad eena hevn.” (Heeb. 8:1) Jeezas da wi “helpa wid di Faada.” (1 Jan 2:1) Wi tank Jehoava dat hihn gi wi wahn Hai Prees weh andastan wi weeknis dehn ahn weh “taak tu Gaad fi wee”! (Roam. 8:34; Heeb. 4:15) Widowt Jeezas sakrifais, wi mi wahn kyaahn pray tu Jehoava. Wi kyaahn stap tank Jehoava fi dis preshos gif weh ih gi wi—dis gif weh da fi hihn dyaa Son! w22.07 23 ¶10-12

Wahn persn weh wi ku chros da sohnbadi weh aalwayz kip ih pramis dehn ahn weh aalwayz seh di chroot. (Ps. 15:4) Bikaaz a dat, adaz noa dat dehn ku pen pahn dehn. Wi waahn mek wi bradaz ahn sistaz feel di saym way bowt wee. Wi kyaahn foas adaz fi chros wi. Wi need fi werk haad fi shoa dehn dat dehn ku chros wi. Chros da laik moni. Ih haad fi mek moni, bot ih eezi fi looz it. Wi noa fi shoar dat wi ku chros Jehoava. “Wi ku chros evriting weh hihn du.” (Ps. 33:4) Ahn hihn waahn wi chrai bee laik hihn. (Ifee. 5:1) Wi onli tankful dat Jehoava bring wi tugeda az wahn spirichwal famili weh soh lovin ahn weh shoa dat adaz ku chros dehn! Aala wi ga di rispansabiliti fi bee di kaina peepl weh wi bradaz ahn sistaz ku chros. Di moa eech wan a wi werk haad fi bee moa lovin, hombl, an aanis ahn fi shoa moa wizdom ahn self-kanchroal, di schranga di kangrigayshan wahn bee, bikaaz evribadi wahn feel laik dehn ku chros dehn bradaz ahn sistaz. Soh mek wi kantinyu chrai bee moa laik wi Gaad, Jehoava, ahn kip di shoa adaz dat dehn ku chros wi. w22.09 8 ¶1-2; 13 ¶17

Eevn doa wi ga wahn big spirichwal famili, sohntaim wi mait stil feel laik nobadi dehdeh fi help wi, ahn wi mait feel dipres ahn laik wi haftu deel wid dehnya feelinz pahn wi oan. Bot Jehoava noh waahn wi feel da way. Tink bowt how ih mi deel wid di prafit Ilaija. Jehoava mi inkorij ahn fi taak bowt how ih feel. Too taimz Ih mi aks ahn: “Weh yu di du ya?” (1 Ki. 19:​9, 13) Eech taim ih aks ahn, Jehoava mi lisn tu Ilaija wen ih tel ahn how ih feel. An Jehoava mi tel ahn dat wahn lata Izrelaits stil mi-di wership Ahn. (1 Ki. 19:​11, 12, 18) Fi shoar Ilaija mi feel beta afta ih mi pray tu Jehoava an afta Jehoava ansa ih pryaa. Jehoava mi giv Ilaija sohn impoatant werk fi du. Ih mi aks ahn fi anoint Hazayel fi bee king oava Siriya, Jeehoo fi bee king oava Izrel, an Ilaisha fi bee wahn prafit. (1 Ki. 19:​15, 16) Wen Jehoava mi giv Ilaija dehnya asainment, Ih mi-di help ahn fi foakos pahn pazitiv tingz. Ahn Gaad mi giv ahn wahn kloas fren, weh da-mi Ilaisha. w22.08 8 ¶3; 9 ¶5

Fi yoo kangrigayshan eva bil er fiks op wahn Kingdom Haal? If yes, fi shoar yu memba di fers meetin unu mi gat eena di nyoo Kingdom Haal. Yu mi soh tankful tu Jehoava ahn soh hapi dat yu mi praabli kyaahn eevn sing di sang bikaaz yu mi aalmoas krai anaal. Wen wi bil wahn nais Kingdom Haal, ih bring prayz tu Jehoava. Bot wen wi bil op wan anada, dat prayz hihn eevn moa. Tu Jehoava, di werk weh wi du fi bil op di peepl weh goh eena dehndeh bildin way moa impoatant dan di bildin dehn. Da dis kaina bildin werk di apasl Paal mi taak bowt eena tudeh skripcha teks. Di apasl Paal da wahn gud egzampl a sohnbadi weh mi noa how fi bil op ih bradaz ahn sistaz. Hihn mi shoa dat ih andastan how dehn feel. Wee ku kapi fi hihn egzampl ahn bil op wi bradaz ahn sistaz tudeh.—1 Kor. 11:1. w22.08 20 ¶1-2

If wahn Kristyan waahn Jehoava si ahn az raichos, ih haftu bee aanis wen ih du bizniz. Wahn raichos persn aalso lov jostis. Ih hayt fi si wen peepl noh geh chreet eena wahn fyaa way. Soh if sohnbadi waahn “bring prayz” tu Jehoava ahn bee raichos, dehn need fi tink bowt how Jehoava wahn luk pahn di disizhanz dehn mek. Di Baibl mek wi noa dat raichosnis kohn fahn Jehoava. Ahn dat da wai di Baibl kaal Hihn “di plays a raichosnis.” (Jer. 50:7) Hihn da di Kriyayta, onli hihn ga di rait fi seh weh rait ahn weh rang. Ahn hihn noa weh rait ahn weh rang faar beta dan wee. (Prov. 14:12; Isa. 55:​8, 9) Ahn bikaaz Gaad mek wee eena fi hihn imij, wee ku du weh rait akaadn tu fi hihn standadz. (Jen. 1:27) Ahn wi lov fi du dat. Di lov weh wi ga fi wi Faada moov wi fi chrai bee laik hihn az bes az wi kud.—Ifee. 5:1. w22.08 27 ¶5-6

Wen wi feel schres owt er diskorij, wi mait feel laik wi need sohnting fi dischrak wi soh dat wi ku stap wori bowt wi prablemz. Dis naamal, bot wi haftu bee kyaaful dat wi noh du sohnting weh Jehoava hayt. (Ifee. 5:​10-12, 15, 16) Eena di apasl Paal leta tu di bradaz da Filipai, hihn mi inkorij dehn fi aalwayz tink bowt “tingz weh raichos, tingz weh pyoar, tingz weh moov peepl fi lov, [ahn] tingz weh gud.” (Fil. 4:8) Eevn doa Paal neva di taak bowt entataynment eena dis vers, weh hihn mi rait ku help wi fi chooz gud entataynment. Chrai dis: Weneva yu si di werd “tingz” kom op eena di vers, yooz di werd “sang,” “moovi,” “buk,” er “veedyo gaym” insted. Dis wahn help yu fi pik gud entataynment weh Gaad aksep. Wi waahn mek shoar dat wi obay Jehoava hai standadz.—Ps. 119:​1-3. w22.10 9 ¶11-12

Bifoa di peepl weh “neva raichos” mi ded, som a dehn mi du sohn terabl tingz. Soh dehn wahn need fi laan di way Gaad waahn dehn liv. Fi mek dehn ku du dat, Gaad Kingdom wahn dairek di bigis teechin proagram pahn ert. Hoo wahn teech di peepl weh neva raichos? Ih wahn bee di big krowd a peepl ahn di raichos wan dehn weh geh rezorek. Di peepl weh neva raichos wahn need fi bee frenz wid Jehoava ahn dedikayt dehn laif tu hihn fi mek dehn ga dehn naym eena di buk a laif. Jeezas Krais ahn di anointid wan dehn wahn wach fahn hevn fi si how di peepl weh noh raichos di rispan tu weh dehn di laan. (Rev. 20:4) An enibadi weh noh waahn aksep di apachooniti weh Gaad gi dehn wahn geh dischrai, noh mata if dehn 100 yaaz oal. (Isa. 65:20) Jehoava ahn Jeezas ku reed peepl haat, ahn dehn wahn mek shoar dat dehn noh alow nobadi fi kaaz prablemz eena di nyoo werl.—Isa. 11:9; 60:18; 65:25. w22.09 17 ¶11-12

Eena dis vers, wen ih taak bowt “peepl weh ga atariti,” ih di taak bowt hyooman roolaz weh ga powa ahn kanchroal oava adaz. Kristyanz haftu obay dehnya roolaz. Bikaaz di roolaz waahn kip di pees, dehn mek shoar dat peepl obay di laa, ahn sohntaim dehn eevn protek Jehoava peepl. (Rev. 12:16) Jehoava koman wi fi pay wi taks ahn fi pay di govament fi eniting els weh dehn chaaj wi fa. Ahn hihn tel wi fi rispek dehn ahn gi dehn di aana weh dehn aks fa. (Roam. 13:7) Bot di govament dehn eena dis werl onli ga atariti bikaaz Jehoava di alow dehn fi rool. Jeezas mi mek dat klyaa wen di Roaman govna, Ponchos Pailat, mi-di kweschan ahn. Wen Pailat mi tel Jeezas dat hihn kuda mi disaid weda fi kil ahn er mek ih liv, Jeezas ansa ahn seh: “Yoo wudn ga eni atariti oava mee anles Gaad gi yu di atariti.” (Jan 19:11) Jos laik how Pailat atariti mi ga limits, tudeh aal hyooman roola ahn palitishan onli ga wahn sertn amonk a atariti. w22.10 14 ¶6

Jehoava hoali spirit mi mek King Dayvid rait bowt weh laif mi wahn bee laik wen wahn waiz ahn faytful king rool. (Ps. 37:​10, 11, 29) Yoozhwali, wen wi di taak tu peepl bowt Paradais, wi wuda reed Psalm 37:11. An ih mek sens fi mek wi du dat, sins Jeezas ihself mi koat dis skripcha eena ih Sermon Pahn di Mongt. Da way deh hihn mi shoa dat dis pramis mi wahn kohn chroo eena di fyoocha tu. (Mach. 5:5) Bot weh Dayvid mi rait aalso mi-di rifaa tu weh laif mi wahn bee laik joorin Salaman roolaship. Joorin da taim, Gaad peepl mi ga pees an evriting weh dehn mi need eena di lan weh mi “ful op a milk ahn honi.” Gaad mi seh: “If unu kantinyu fi fala mi inschrokshan dehn . . . , Ai wahn mek unu ga pees eena di lan, ahn nobadi wahn mek unu feel frayd wen unu goh sleep.” (Lev. 20:24; 26:​3, 6) Dehndeh pramis mi kohn chroo wail Salaman mi rool az king a Izrel. (1 Chron. 22:9; 29:​26-28) Psalm 37:​10, 11, 29 mi kohn chroo eena di paas an ih wahn kohn chroo eena di fyoocha tu. w22.12 10 ¶8

Az chroo Kristyanz, wi need fi fala dairekshan fahn di aaganaizayshan. Di Baibl gat een dis gud advais: “Fala waiz gaidans wen yu goh da waar, ahn tingz gwehn gud fi yu wen yu geh advais fahn lata peepl.” (Prov. 24:​6, ftn.) Tink bowt how dis prinsipl ku help wi ga sokses wen wi preech ahn wen wi teech peepl. Insteda preech ahn teech di way wee waahn, wi chrai fala di sojeshan dehn weh wi get. Da wi meetin dehn wi geh gud chraynin wen wi si wi bradaz gi taak ahn demonschrayshan weh bays pahn di Baibl. Pahn tap a dat, Jehoava aaganaizayshan gi wi sohn gud toolz, laik wi poblikayshan ahn veedyo dehn, weh help peepl fi andastan di Baibl beta. Wi soh tankful fi di gud advais weh deh eena Gaad Werd! Weh wi laif wuda bee laik widowt dehnya gud advais? Soh mek it wahn goal fi aalwayz fala di gud advais weh Jehoava gi wi.—Prov. 3:​13-17. w22.10 23 ¶18-19

Wen wi eet food ahn daijes it, wi badi geh schranga. Saym way soh, wen wi stodi Gaad Werd ahn meditayt pan it, wi fayt geh schranga. Wen ih kohn tu Gaad Werd, Jehoava waahn mek wi reeli andastan weh ih seh. Wi ku du dat wen wi pray, reed, ahn meditayt. Fers, wi need fi pray soh dat Gaad Werd ku toch wi haat. Sekant, wi reed di Baibl. Ahn den wi stap ahn tink bowt it. Dat da weh ih reeli meenz fi meditayt. Weh wahn hapm if wi du dat? Di moa wi meditayt, di moa wi wahn andastan Gaad Werd, ahn dat wahn schrentn wi fayt. Wai ih impoatant fi reed di Baibl ahn meditayt pan it? Bikaaz dat wahn help wi fi ga di korij fi preech di Kingdom mesij now ahn fi preech di jojment mesij eena di fyoocha. Pahn tap a dat, wen wi meditayt pahn Jehoava wandaful kwalitiz, wi frenship wid hihn wahn groa. w22.11 6-7 ¶16-17

Jeezas mi seh dat eevn peepl owtsaida di Kristyan kangrigayshan mi wahn rekonaiz fi hihn chroo falowaz bai di chroo lov weh dehn shoa fi eech ada. Di lov weh deh monks Jehoava peepl da sohnting reeli speshal. Bot af koars, Jehoava Witnisiz noh perfek. (1 Jan 1:8) Soh di moa wi spen taim wid wi bradaz ahn sistaz eena di kangrigayshan, di moa wi wahn ku si dehn mistayks. (Roam. 3:23) Ih sad fi si dat som peepl alow di mistayks weh adaz mek fi stap dehn fahn serv Jehoava. How Jeezas mi shoa lov tu ih disaipl dehn? Ahn how wee ku kapi Jeezas egzampl tudeh?ʼ Eevn Jehoava Witnisiz shuda tink bowt di ansaz tu dehndeh kweschanz. Dis wahn help wi fi lov eech ada eevn moa, espeshali wen wi haftu deel wid eech ada mistayks.—Ifee. 5:2. w23.03 26-27 ¶2-4

Wi di geh kloasa tu di en a dis sistem a tingz, soh wi ku ekspek fi fays prablemz weh kohn fahn eensaida di kangrigayshan. Ih ku bee haad fi stay laayal tu Jehoava wen wi di goh chroo dehndeh prablemz. Soh wi haftu kantinyu bee sensabl. If wahn brada er sista hert yu er chreet yu bad, noh geh beks. If yu geh disiplin, noh feel shaym. Aksep di kongsl ahn mek di chaynjiz weh yu need fi mek. Ahn wen Jehoava aaganaizayshan mek chaynjiz weh afek yu laif, bee wilin fi sopoat di chaynjiz ahn fala di dairekshan. Kantinyu chros eena Jehoava an ih aaganaizayshan eevn wen yu laayalti geh tes. Stay kaam, tink schrayt, ahn si tingz di way Jehoava si tingz. Pray tu Jehoava fi help, ahn kantinyu spen taim wid di bradaz ahn sistaz eena di kangrigayshan. Den, noh mata weh yu fays, Saytan wahn neva bee aybl fi separayt yu fahn Jehoava an Ih aaganaizayshan.—Jay. 4:7. w22.11 24-25 ¶14-16

Eldaz help dehn bradaz fi pripyaa bifoa wahn dizaasta hapm. Dehn mek shoar dat evribadi eena di kangrigayshan noa weh dehn need fi du fi stay sayf ahn fi kantak di eldaz. Weh yoo ku du? If wahn dizaasta hapm kloas tu wehpaat yoo liv, aks di eldaz how yoo ku help. Maybi yu ku mek dehn wan weh mi haftu lef dehn hows stay wid yu fi wahn lee wail. Er maybi yu ku invait sohn valantyaaz fi stay wid yu wail dehn di help owt wid di dizaasta rileef werk. Maybi yu ku goh diliva food er ada tingz weh di poblisha dehn mait need. Bot how yoo ku stil help if wahn dizaasta hapm eena wahn ayrya weh faar fahn wehpaat yoo liv? Yu ku pray fi dehn. (2 Kor. 1:​8-11) Yu ku sopoat di rileef werk wen yu doanayt moni tu di werlwaid werk. (2 Kor. 8:​2-5) If yu aybl fi chravl tu di ayrya wehpaat di dizaasta hapm, aks di eldaz weh yoo ku du fi help owt. If dehn invait yu fi goh help, yu wahn praabli geh sohn chraynin soh dat yu ku help eena di bes way pasabl. w22.12 24 ¶8; 25 ¶11-12

Paal mi rait dehnya werdz tu bradaz ahn sistaz weh mi liv da Korint. Som a dehn yoostu komit adolchri, som a dehn yoostu bee homosekshwal, ahn som a dehn yoostu bee jronkad. (1 Kor. 6:​9-11) Yu tink dehn neva haftu fait eni rang dizaiya afta dehn mi geh baptaiz? Da chroo, dehn da-mi anointid Kristyanz, bot dehn mi stil imperfek. Soh fi shoar dehn mi haftu fait dehnya rang dizaiyaz now an agen. Dat shuda bee inkorijin fi wee. Wai? Bikaaz ih shoa wi dat adaz don fays dehnya saym tingz weh wee di schrogl wid, ahn dehn mi win di fait. Soh wee ku “ga schrang fayt,” bikaaz wi noa dat wi bradaz di sofa “di saym kaina tingz laik [wee].”—1 Peet. 5:9. w23.01 12 ¶15

Jeezas mi aks Jehoava fi protek ih disaipl dehn. (Jan 17:11) How dis ku help wi fi ga korij? Wi ku ga korij bikaaz Jehoava schranga dan aala wi enimi dehn. (1 Jan 4:4) Jehoava si evriting weh hapm tu wi. Wi ku bee shoar dat if wi pen pahn Jehoava, hihn wahn help wi ga korij. Yoo eva feel shaym fi seh dat yoo da wan a Jehoava Witnisiz? Yoo frayd fi bee wahn poblisha er geh baptaiz bikaaz yu di wori bowt weh adaz mait tink bowt yu? Noh mek dehndeh tingz stap yu fahn du weh rait. Bayg Jehoava fi help an aks ahn fi gi yu di korij fi du weh hihn waahn. Wen yu si dat ih ansa yu pryaaz, yu fayt wahn geh schranga ahn yu wahn ga korij.—Isa. 41:​10, 13. w23.01 29 ¶12; 30 ¶14

Jeezas mi aks di Farisee dehn di kweschan “Unu neva reed?” fi shoa dat dehn neva ga di rait atichood bowt weh dehn reed eena di Skripchaz. (Mach. 12:​1-7) Di Farisee dehn mi seh dat Jeezas disaiplz mi brok di Sabat laa. Soh Jeezas gi dehn too egzampl fahn di Skripchaz an ih koat wahn vers fahn di buk a Hosea fi shoa dehn dat dehn neva andastan di point a di Sabat laa ahn dat dehn neva mi-di shoa no mersi fi di peepl. Wai di Farisee dehn neva mek weh dehn reed fahn Gaad Werd chaynj dehn atichood? Bikaaz wen dehn yoostu reed di Skripchaz, dehn mi ga wahn prowd atichood ahn dehn mi laik kritisaiz weh deh een deh. Fi dehn atichood neva alow dehn fi andastan weh dehn mi-di reed. (Mach. 23:23; Jan 5:​39, 40) Noatis Machyu 19:​4-6 tu, wehpaat Jeezas mi aks di Farisee dehn di saym kweschan: “Unu neva reed?” Eevn doa dehn mi don reed bowt wen Jehoava mi mek Adam ahn Eev, dehn mi ignoar weh Gaad seh bowt marij. Weh Jeezas seh teech wi dat wi need fi ga di karek atichood wen wi di reed di Baibl. Wi noh waahn bee laik di Farisee dehn. w23.02 12 ¶12-13

Di Laa weh Jehoava mi gi di Izrelaits mi ga advais pahn how fi stay sayf da dehn hows ahn wen dehn deh da werk. (Eks. 21:​28, 29; Deut. 22:8) If sohnbadi kil sombadi els bai aksident, dehn mi en op eena wahn seeryos sichuwayshan. (Deut. 19:​4, 5) Di Laa seh dat if sohnbadi mi hert wahn pregnant laydi bai aksident ahn hert di baybi, da persn mi wahn stil geh ponish. (Eks. 21:​22, 23) Di Baibl mek it klyaa dat Jehoava waahn mek wi du wi bes fi avoid aksidents az moch az pasabl. Wi shoa dat wi tankful fi di gif a laif weh Jehoava gi wi wen wi chrai fi bee sayf da wi hows ahn da werk. If wi ga paizn, eniting weh shaap, er medikayshan weh wi noh yooz nohmoh, wi waahn chroa dehn weh eena wahn sayf way soh dat nobadi geh hert. Wi aalso waahn kip dehnya kaina tingz wehpaat lee pikni kyaahn reech dehn. Chrai bee kyaaful wen yu di lait faiya, bail waata, ahn yooz toolz. Wi noh waahn jos waak weh wen wi di du dehnya tingz. Wi noh waahn jraiv wen wi kyaahn foakos pahn di road bikaaz wi jrink alkohol, wi sleepi, er bikaaz a wahn medikayshan weh wi di tek. Ahn wi noh waahn mek wi foan dischrak wi wail wi di jraiv. w23.02 21-22 ¶7-9

Jehoava da wahn payshent, kain, an andastandin Teecha weh luk fi di gud eena eech wan a ih styoodent dehn. (Ps. 130:3) Ahn hihn neva aks wi fi du moa dan weh wi ku du. Memba dat fi wee brayn da wahn amayzin gif fahn Gaad. (Ps. 139:14) Fi wee Kriyayta waahn mek wi kantinyu laan fareva an ih waahn wi injai it. Soh ih impoatant fi “waahn . . . weh deh eena di werd a Gaad” now. (1 Peet. 2:2) Set sohn goal weh yu ku reech, ahn reed ahn stodi di Baibl evri day. (Jash. 1:8) Wid Jehoava help, yu wahn ku injai di reed ahn laan bowt ahn moa ahn moa. Ih noh inof fi jos ga nalij. Di reezn yu need nalij da soh dat yu ku laan moa bowt Jehoava ahn ga lov far ahn, an fayt eena ahn. (1 Kor. 8:​1-3) Wail yu di laan moa bowt Jehoava, aks ahn fi help yu fi ga moa fayt. (Look 17:5) Hihn hapi fi ansa pryaaz laik dat. w23.03 10 ¶11, 13

Jeezas mi gi ih disaipl dehn lata werk fi du bikaaz hihn mi waahn dehn stay bizi wail dehn mi-di wayt fi mek di en kom. Jeezas koman dehn fi preech di gud nyooz “da Jeroosalem, eena aala Judeeya ahn Samayrya, an aal oava di ert.” (Aks 1:​6-8) Dat da-mi wahn lata werk. Dehn mi yooz dehn taim eena di bes way pasabl wen dehn mi preech tu az moch peepl az dehn kud. If wi kyaaful, wi wahn tink gud bowt how wi yooz wi taim. ‘Tingz weh wi noh ekspekʼ ku afek wi. (Eccl. 9:11) Ahn wi ku ded enitaim. Di bes way fi yooz wi taim da fi du Jehoava wil ahn fi mek wi rilayshanship wid ahn geh schranga. (Jan 14:21) Wi need fi ‘stan op schrang, noh mek notn moov wi, an aalwayz ga plenti fi du eena di werk weh di Laad gi wi fi du.ʼ (1 Kor. 15:58) Soh if wee ded er if di en kom, wi noh wahn luk bak ahn wish dat wi mi du moa fi Jehoava.—Mach. 24:13; Roam. 14:8. w23.02 18 ¶12-14