Peepl Waahn Noa di Chroot

Fi towznz a yaaz, nobadi mi reeli noa di ansa tu da kweschan. Ahn bikaaz a dat, dizeez mi kil milyanz a peepl. Afta wahn wail, doh, saiyentis mi laan di chroot bowt how dizeez spred. Dehn mi fain owt dat moas dizeez kohn fahn jermz laik bakteerya ahn vairos. Bikaaz saiyentis mi laan dis singl chroot bowt dizeez, ih help wahn lata peepl fi noh kech dizeez an ih aalso help fi kyoar sohn dizeez. Sayka dat, milyanz a peepl moa helti ahn dehn liv langa.

How bowt ada impoatant kweschanz? How yoo tink di ansaz tu dehnya kweschan ku help yoo?

• Hoo da Gaad?

• Hoo da Jeezas Krais?

• Wat da di Kingdom a Gaad?

• Weh yu tink wahn hapm eena di fyoocha?

Milyanz a peepl don fain di ansaz tu dehndeh kweschan, ahn dat mek dehn laif beta. Yoo ku benifit fahn di ansaz tu dehndeh kweschan tu.

YU TINK YOO KU FAIN DI CHROOT?

Yu mait di wanda if ih eevn pasabl fi fain di chroot. Aftaraal, ih di geh haada ahn haada fi fain di chroot bowt wahn lata tingz. Wai?

Wahn lata peepl noh chros di govament dehn, di bizniz dehn, er eevn di meedya fi tel dehn di chroot. Peepl fain it haad fi tel wen adaz di tel dehn di chroot er nat. Bikaaz peepl noh chros wan anada, ahn soh moch faals infamayshan deh owt deh, peepl ten fi andastan tingz dehn oan way ahn noh gree pahn wat da reeli di chroot.

Eevn doa wi fays dehndeh chalenjiz, ih stil pasabl fi fain di chroot ahn di ansaz tu di moas impoatant kweschanz eena laif. How wi ku du dat? Wi ku du di sayhn tingz weh wi du fi fain ansaz tu les impoatant kweschanz eena laif.

SAACH FI DI CHROOT

Tu wahn sertn digree, wi saach fi di chroot evri day. Kansida Jesika sichuwayshan. Shee seh: “Mai daata alerjik tu peenots soh bad dat eevn wahn smaal lee amonk a peenots ku kil ahn.” Bikaaz a dis, Jesika need fi mek shoar dat di food weh ih bai wahn bee sayf fi ih daata. Shee seh: “Di fos ting Ah du da reed di laybl pahn di food weh Ah bai ahn chek reeli gud weh aal ih gat een. Den Ah du sohn moa risaach an Ah eevn kantak di kompani weh mek di food fi mek shoar dat ih neva kom in kantak wid peenots. Ah aalso du moa risaach fi fain infamayshan weh Ah ku pen pan fi mek shoar dat Ah ku chros di kompani weh pripyaa ahn pak di food.”

Di kweschanz weh yoo di chrai fi fain ansaz tu eena yu evriday laif mait noh bee az impoatant az di kweschanz weh Jesika ga, bot laik Jesika, yu mait yooz som a dehnya wayz fi fain ansaz:

• Geh di faks.

• Du moa risaach.

• Mek shoar yu ku chros weh di infamayshan kohn fram.

Dehnya saym steps ku help yu fain di ansaz tu som a di moas impoatant kweschanz eena laif. How?

DI BAIBL GAT EEN DI CHROOT

Wen Jesika staat tu saach fi di chroot eena di Baibl, shee du sohnting simila tu weh shee du wen ih du risaach bowt ih daata food alerji dehn. Shee seh: “Weh help mee fi fain di chroot eena di Baibl da fi reed kyaafuli.” Laik Jesika, milyanz a peepl di laan weh di Baibl seh bowt dehnya kweschan:

• Wai wi deh ya?

• Weh hapm tu wahn persn wen ih ded?

• Wai lata sofarin deh?

• Weh Gaad wahn du fi geh rid a aala di sofarin?

• How yu ku ga wahn hapi famili laif?

Yu ku fain ansaz tu dehndeh kweschan ahn moa if yu reed di Baibl ahn du sohn moa risaach onlain da www.pr418.com. Yu ku chros dat di ansaz da di chroot!