MWBR20 05 Laif ahn Minischri Meetin Werkbuk Risaach Infamayshan
MAY 4-10
CHREZHAZ FAHN DI WERD A GAAD | GENESIS 36-37
“Joazef Sofa Bikaaz a Ih Jelos Breda Dehn”
(Genesis 37:3, 4) Now Izrel mi lov Joazef moa dan aala ih ada son dehn, bikaaz hihn da-mi di son weh ih mi gat eena ih oal ayj, ahn hihn mi geh wahn speshal roab mek far ahn. 4 Wen ih breda dehn mi si dat dehn pa mi lov Joazef moa, dehn staat tu hayt Joazef, ahn dehn kudn taak tu ahn eena wahn peesful way.
w14 8/1 12-13
“Pleez Lisn tu Weh Ah Jreem”
Di Baibl tel wi: “Wen ih breda dehn mi si dat dehn pa mi lov Joazef moa, dehn staat tu hayt Joazef, ahn dehn kudn taak tu ahn eena wahn peesful way.” (Genesis 37:4) Wi ku andastan wai Joazef breda dehn mi jelos, bot ih neva waiz fi mek dehn giv een tu fi dehn imperfek imoashan. (Proverbs 14:30; 27:4) Yu eva geh soh jelos bikaaz sohnbadi mi geh di atenshan er aana weh yoo mi waahnt? Noh ferget weh mi hapm tu Joazef breda dehn! Bikaaz dehn mi soh jelos, dehn du tingz weh dehn mi sari fa laytaraan. Fi dehn egzampl rimain wi dat di bes ting fi du da fi rijais lang wid enibadi weh di rijais.—Roamanz 12:15.
Joazef kuda mi tel dat ih breda dehn mi hayt ahn. Soh yu tink ih gaahn haid ih speshal roab weneva ih breda dehn mi deh rong? Hihn mi praabli waahn du dat. Bot di roab weh Jaykop mi giv tu Joazef da-mi wahn sain dat ih pleez wid Joazef, ahn dat ih lov ahn. Ahn Joazef mi waahn ih pa kantinyu fi chros ahn, soh hihn mi mek shoar ih wayr di roab. Fi hihn egzampl ku teech wi sohnting. Eevn doa wi noa dat Jehoava noh shoa fayvritizm, sohntaim hihn shoa moa lov tuwaadz ih laayal servants. Dat da wai hihn aks dehn fi bee difrent fahn di peepl eena dis korop an imoaral werl. Yes, jos laik Joazef speshal roab, di way wahn chroo Kristyan kandok ihself difrent fahn di peepl rong dehn. Ahn dat ku mek adaz jelos dehn er eevn hayt dehn. (1 Peeta 4:4) Bot jos laik how Joazef neva haid fi hihn speshal roab, wahn chroo Kristyan noh fi haid di fak dat dehn da wan a Gaad servant eeda.—Look 11:33.
(Genesis 37:5-9) Laytaraan Joazef mi ga wahn jreem an ih mi tel ih breda dehn bowt it, ahn dehn mi hayt ahn eevn moa far it. 6 Hihn mi tel dehn: “Pleez lisn tu weh Ah jreem. 7 Wee mi deh eena di midl a di feel di bondl op di grayn, ahn den mai bondl a grayn mi get op ahn stan op schrayt ahn fi unu bondl a grayn dehn mi gaahn rong it eena wahn serkl ahn bow dong tu mai wan.” 8 Ih breda dehn tel ahn: “Yoo reeli di chrai mek yuself king oava wee ahn rool oava wee?” Soh dehn mi fain wahn neks reezn fi hayt ahn, bikaaz a ih jreem ahn weh ih mi seh. 9 Afta dat hihn mi ga wahn neks jreem, an ih tel ih breda dehn bowt it: “Ah mi ga wahn neks jreem. Dis taim di son ahn di moon an 11 staar mi-di bow dong tu mee.”
(Genesis 37:11) An ih breda dehn mi geh jelos a hihn, bot ih pa neva ferget weh ih mi seh.
w14 8/1 13 ¶2-4
“Pleez Lisn tu Weh Ah Jreem”
Joazef jreem dehn da-mi laik sohn prafesi, ahn dehn mi kohn fahn Jehoava Gaad. Jehoava mi waahn Joazef shayr di meenin a dehnya jreem. Eena wahn sens, Joazef mi fi du di sayhn ting weh aala di prafit dehn mi du wen dehn mi diliva Gaad mesij ahn jojment tu fi Hihn disobeedyant peepl.
Eena wahn rispekful ahn kain way, Joazef tel ih breda dehn: “Pleez lisn tu weh Ah jreem.” Fi hihn breda dehn mi andastan di jreem, ahn dehn neva laik di meenin a da jreem ataal. Dehn tel Joazef: “Yoo reeli wahn mek yuself king oava wee ahn rool oava wee?” Soh now “dehn mi fain wahn neks reezn fi hayt ahn, bikaaz a ih jreem ahn weh ih mi seh.” Wen Joazef mi tel ih pa an ih breda dehn di sekant jreem weh ih mi gat, dehn geh eevn moa beks wid ahn. Di akonk tel wi: “Ih pa mi skoal ahn an ih tel ahn: ‘Da weh da jreem sopoas tu meen? Yoo reeli tink mee ahn yu ma ahn yu breda dehn wahn bow dong pahn di grong fronta yoo?’” Bot Jaykop kudn stap tink bowt di jreem weh Joazef mi gat. Yu tink ih pasabl dat Jehoava mi-di kamyoonikayt wid Joazef?—Genesis 37:6, 8, 10, 11.
Dis da neva di fers ner di laas taim wan a Jehoava servant geh di asainment fi diliva wahn mesij weh adaz mi wahn ignoar er eevn hayt dehn fa. Jeezas da-mi di bes egzampl a sombadi weh mi diliva dehnya kaina mesij; hihn mi tel ih falowaz: “If dehn mi haraas mee, dehn wahn haraas unu tu.” (Jan 15:20) Weda wi yong er oal, wi ku laan wahn lat fahn di fayt ahn korij weh Joazef mi shoa.
(Genesis 37:23, 24) Soh az soon az Joazef mi reech ih breda dehn, dehn mi tek aaf ih roab, di speshal roab weh ih yoostu wayr; 24 ahn dehn kehr ahn an chroa ahn eena di wel. Joorin da taim, di wel mi jrai; no waata neva deh eena it.
(Genesis 37:28) Ahn wen di biznizman dehn fahn Midiya mi-di paas bai, Joazef breda dehn tek ahn owta di wel ahn sel ahn tu di Ishmelait dehn fi 20 pees a silva. Den di Ishmelait dehn kehr Joazef da Eejip.
Saach fi Spirichwal Chrezhaz
(Genesis 36:1) Dis da di hischri a Eesaa, hoo da aalso Eedom.
it-1 678
Eedom
(Eedom) [Red], Eedomait (Eedomait).
Eedom da-mi wahn neks naym er wahn niknaym fi Eesaa, hoo da-mi Jaykop twin breda. (Ge 36:1) Hihn mi geh dis naym bikaaz hihn mi sel ih rait az fersbaan fi wahn bowl a red schoo beenz. (Ge 25:30-34) Ih aalso inchrestin dat wen Eesaa mi baan, fi hihn skin da-mi wahn reeli red kala. (Ge 25:25) Ahn da saym kala mi kaman eena paats a di lan wehpaat hihn an ih disendant dehn mi liv laytaraan.
(Genesis 37:29-32) Laytaraan wen Rooben gaahn bak tu di wel an ih si dat Joazef neva mi deh eena di wel, ih tayr ih kloaz apaat. 30 Wen ih mi gaahn bak wid ih breda dehn, ih seh: “Di lee bwai gaan! Ahn weh—weh Ai wahn du now?” 31 Soh dehn kil wahn goat ahn dehn tek Joazef roab ahn dip it eena di blod. 32 An afta dat dehn sen sombadi fi kehr di speshal roab tu dehn pa ahn fi tel ahn: “Dis da weh wi mi fain. Pleez chek if dis da yu son roab er nat.”
it-1 561-562
Kyaa
Weneva wahn shepad mi seh dat hihn mi wahn gyaad er tek kyaa a wahn flak er herd, hihn mi-di shoa dat hihn leegali aksep di rispansabiliti fi kyaa fi dehndeh animal. Hihn mi-di proov tu di oana dat ih mi wahn feed dehn, ahn dat nobadi mi wahn teef dehn; dehn mi wahn bee sayf, er els hihn mi wahn haftu pay di prais. Bot if sohnting mi hapm tu di animal dehn weh mi owta di persn kanchroal, laik if wahn wail animal mi atak dehndeh animal, den di laa mi wahn ekskyooz da persn. Bot fi mek di persn bee kompleetli free fahn dis rispansabiliti, hihn mi wahn haftu shoa evidens tu di oana. Fi egzampl, hihn mi wahn haftu shoa di oana di ded badi a di animal weh di wail animal mi atak ahn kil. Den afta di oana egzamin di evidens, hihn mi wahn haftu mek shoar dat di persn weh mi tek kyaa a di animalz mi inosent.
Di saym prinsipl mi aplai tu eni prapati weh wahn oana mi lef sohnbadi fi tek kayr a, eevn eena wahn famili. Fi egzampl, di laa mi seh dat di oaldis breda da-mi di wan weh fi protek ahn kyaa fi ih yonga breda ahn sista dehn. Soh wi ku andastan wai Rooben, hoo da-mi di oaldis son, mi-di wori soh moch bowt Joazef wen ih ada breda dehn mi-di plan fi kil ahn. Wi ku reed bowt dis da Genesis 37:18-30. “Hihn mi seh: ‘Mek wi noh kil ahn.’ . . . ‘Noh shed no blod. . . . noh hert ahn.’ Hihn mi-di plan fi reskyu ahn fahn dehn ahn fi kehr ahn bak tu ih pa.” Soh now wen Rooben kudn fain Joazef, hihn staat tu wori soh moch dat “ih tayr ih kloaz apaat” ahn seh: “Di lee bwai gaan! Ahn weh—weh Ai wahn du now?” Rooben mi noa dat hihn mi rispansabl fi Joazef. Soh fi ron weh fahn dis rispansabiliti, fi hihn breda dehn soak Joazef roab eena goat blod fi mek ih luk laik wahn wail animal mi kil ahn. Den dehn kehr di evidens tu Jaykop, hoo da-mi dehn pa ahn dehn joj. Soh Jaykop neva hoal Rooben rispansabl fi weh mi hapm tu Joazef, bikaaz di evidens mi mek ih luk laik wahn wail animal atak Joazef ahn kil ahn.—Ge 37:31-33.
Baibl Reedin
(Genesis 36:1-19) Dis da di hischri a Eesaa, hoo da aalso Eedom. 2 Eesaa mi geh marid tu sohn uman fahn Kaynan: Ayda di daata a Eelon di Hitait; an Oholibayma di daata a Ayna, di grandaata a Zibyon di Haivait; 3 ahn Basemat, Ishmayel daata, di sista a Nebayot. 4 An Ayda gi bert tu Elifaz fi Eesaa, ahn Basemat gi bert tu Roowel, 5 an Oholibayma gi bert tu Jeeyush, Jaylam, ahn Koara. Dehnya da Eesaa son, weh ih waif dehn mi giv bert tu eena di lan a Kaynan. 6 Afta dat Eesaa kehr ih waif dehn, ih son ahn daata dehn, evribadi eena ih hows, aala ih animalz, an aala di richiz weh ih mi gyada op eena di lan a Kaynan ahn gaahn da wahn nada lan faar fahn ih breda Jaykop. 7 Bikaaz dehn mi oan wahn lata tingz, dat da wai dehn kudn liv tugeda enimoa. Pahn tap a dat, dehn lan neva big inof fi hoal aala dehn animalz. 8 Soh Eesaa gaahn liv da Seeyir, wahn ayrya weh ga lata mongtin. Eesaa da Eedom. 9 Ahn dis da di hischri a Eesaa, hoo da di faada a Eedom weh deh eena Seeyir, wahn ayrya weh ga lata mongtin. 10 Dehnya da di naym a aala Eesaa son: Elifaz di son a Ayda, Eesaa waif; Roowel di son a Basemat, Eesaa waif. 11 Elifaz son dehn da-mi Teeman, Oamar, Zeefo, Gaytam, ahn Keenaz. 12 Timna da-mi wan a Elifaz waif, an Elifaz da Eesaa son. Den shee gi bert tu Amalek fi Elifaz. Dehn da-mi Ayda son, hoo da Eesaa waif. 13 Dehnya da Roowel son: Nayhat, Zeera, Shama, ahn Miza. Dehn da-mi Basemat son, ahn shee da Eesaa waif. 14 Oholibayma son dehn da-mi Jeeyush, Jaylam, ahn Koara, hoo shee mi gi bert tu fi Eesaa; Oholibayma da di daata a Ayna, di grandaata a Zibyon, Eesaa waif. 15 Dehnya da di cheef eena Eesaa son dehn chraib: Di son dehn a Elifaz, hoo da Eesaa fersbaan: Cheef Teeman, Cheef Oamar, Cheef Zeefo, Cheef Keenaz, 16 Cheef Koara, Cheef Gaytam, ahn Cheef Amalek. Dehn da-mi di cheef dehn eena Elifaz chraib eena di lan a Eedom. Ahn dehn da di son dehn a Ayda. 17 Dehnya da di son dehn a Roowel, hoo da Eesaa son: Cheef Nayhat, Cheef Zeera, Cheef Shama, ahn Cheef Miza. Dehn da di cheef dehn eena Roowel chraib eena di lan a Eedom. Dehn da di son dehn a Basemat, hoo da Eesaa waif. 18 Den dehnya da di son dehn a Oholibayma, hoo da Eesaa waif: Cheef Jeeyush, Cheef Jaylam, ahn Cheef Koara. Dehnya da di cheef dehn eena Oholibayma chraib, shee da di daata a Ayna, hoo da Eesaa waif. 19 Dehnya da aala Eesaa son an aala di cheef eena dehn chraib. Hihn da Eedom.
MAY 11-17
CHREZHAZ FAHN DI WERD A GAAD | GENESIS 38-39
“Jehoava Mi Aalwayz Deh Wid Joazef”
(Genesis 39:1) Now dehn mi kehr Joazef da Eejip, ahn wahn Eejipshan weh naym Potifa, wahn koat ofishal fi Fayro ahn di cheef a di gyaad dehn, mi bai hihn fahn di Ishmelaits weh mi kehr ahn deh.
w14 11/1 12 ¶4-5
“How Ah Ku Du Sohnting Soh Bad?”
“Now dehn mi kehr Joazef da Eejip, ahn wahn Eejipshan weh naym Potifa, wahn koat ofishal fi Fayro ahn di cheef a di gyaad dehn, mi bai hihn fahn di Ishmelaits weh mi kehr ahn deh.” (Genesis 39:1) Dis da di sekant taim dehn di sel Joazef. Dehn neva eevn mi-di chreet hihn laik wahn hyooman! Soh wi ku jos imajin how shaym Joazef mosi mi feel. Bot now az dehn hed tuwaadz Joazef nyoo hoam, wi praabli picha Joazef di fala ih nyoo maasta dong di bizi schreet dehn weh ful op wid lata lee shap.
Dis plays da-mi notn laik fi hihn hoam. Joazef famili mi aalwayz deh pahn di moov, ahn dehn mi liv eena tent tu. An az dehn moov fahn wan plays tu di neks, dehn tek kayr a dehn flak a sheep. Rait ya soh, di rich Eejipshan dehn, laik Potifa, mi liv eena sohn fansi hows weh mi paynt wid sohn brait kala. Sohn peepl weh stodi hischri mi seh dat di Eejipshan dehn bak den mi reeli laik ga lata byootiful gyaadn wid plaants pahn di waal, sohn big chree weh gi shayd, ahn sohn nais lee pool fi groa papairos, loatos flowaz, an ada plaants weh groa eena di waata. Som a di gyaadn mi sorong di hows dehn. Ahn di hows dehn mi gat wahn varanda soh dat dehn kuda mi injai di nais breez, ahn sohn hai windo soh dat fresh ayaa ku paas chroo, ahn dehn mi ga wahn lata room, eevn wahn big dainin room ahn wahn plays fi mek aala di servant dehn stay.
(Genesis 39:12-14) Den shee grab ahn fahn ih kloaz ahn seh: “Kohn sleep wid mi!” Bot hihn lef ih kloaz eena fi shee han an ih ron owtsaid. 13 Az soon az shee si dat ih lef ih kloaz eena ih han ahn ron owtsaid, 14 shee staat tu baal owt tu di servant dehn ahn tel dehn: “Luk! Hihn bring dis Heebroo man ya, fi mek ih bring shaym pahn wi. Hihn kohn chrai sleep wid mi, bot Ai staat tu baal owt pahn di tap a mi vais.
(Genesis 39:20) Soh Joazef maasta kehr ahn an giv ahn oava tu di prizn, di plays weh di king mi put di priznaz weh dehn ares, ahn hihn mi stay deh eena di prizn.
w14 11/1 14-15
“How Ah Ku Du Sohnting Soh Bad?”
Wi bayli noa eniting bowt how di prizn dehn da Eejip mi stan bak den. Bot sohn peepl weh stodi hischri mi fain owt how di prizn dehn yoostu luk. Di prizn dehn da-mi laik sohn big kyasl wid lata prizn sel ahn dehn mi aalso ga sohn deep ahn daak andagrong room. Laytaraan, Joazef mi yooz wahn werd weh akchwali meen “di pit” fi diskraib di plays. Dis gi di aidyaa dat da mi laik wahn plays weh mi daak daak wid no way owt. (Genesis 40:15, futnoat) Pahn tap a evriting weh Joazef mi haftu goh chroo, dehn mi taacha ahn eevn moa wen dehn chayn op ih fut ahn put wahn aiyan kala rong ih nek. (Psalm 105:17, 18) Sohntaim, di Eejipshan dehn mi chayn op di priznaz elbo bihain dehn bak, ahn som a dehn mi gat aiyan kala rong dehn nek. Wi ku onli imajin humoch Joazef mi haftu indyoar. Ahn hihn neva du notn fi dizerv dis!
Ahn da neva laik hihn mi deh eena prizn fi wahn lee wail. Di akonk seh dat Joazef mi “stay deh eena di prizn.” Hihn spen yaaz eena da terabl plays! Ahn Joazef neva noa wen ih mi wahn kom owt, kaaz di fers dayz ton intu weeks, ahn den monts. Da how Joazef mi stap ihself fahn geh dipres ahn looz hoap?
Di akonk gi wi di ansa: “Jehoava mi deh wid Joazef an ih mi kip aan di shoa laayal lov tu ahn.” (Genesis 39:21) No prizn waal, chayn, er daak andagrong room kuda eva stap Jehoava fahn shoa laayal lov tu ih servant dehn. (Roamanz 8:38, 39) Wi praabli picha Joazef di poar owt ih haat tu Jehoava eena pryaa. Ahn den afta dat, ih ekspeeryens wahn kaina pees weh onli ku kohn fahn di “Gaad weh gi wi aal di komfert weh wi need.” (2 Korintyanz 1:3, 4; Filipiyanz 4:6, 7) Wat els Jehoava mi du fi Joazef? Wel Jehoava mi kantinyu fi ‘bles ahn, an mek di cheef aafisa a di prizn pleez wid Joazef.’
(Genesis 39:21-23) Bot Jehoava mi deh wid Joazef an ih mi kip aan di shoa laayal lov tu ahn, an ih bles ahn mek di cheef aafisa a di prizn pleez wid ahn. 22 Soh di cheef aafisa a di prizn mi put Joazef in chaaj a aala di prizna dehn eena di prizn, ahn hihn mi in chaaj a evriting weh mi-di hapm dehsoh. 23 Di cheef aafisa a di prizn neva wori bowt notn weh Joazef mi-di du deh, bikaaz Jehoava mi deh wid Joazef ahn Jehoava mi mek ih ga sokses eena evriting weh ih mi du.
w14 11/1 15 ¶2
“How Ah Ku Du Sohnting Soh Bad?”
Di akonk gi wi di ansa: “Jehoava mi deh wid Joazef an ih mi kip aan di shoa laayal lov tu ahn.” (Genesis 39:21) No prizn waal, chayn, er daak andagrong room kuda eva stap Jehoava fahn shoa laayal lov tu ih servant dehn. (Roamanz 8:38, 39) Wi praabli picha Joazef di poar owt ih haat tu Jehoava eena pryaa. Ahn den afta dat, ih ekspeeryens wahn kaina pees weh onli ku kohn fahn di “Gaad weh gi wi aal di komfert weh wi need.” (2 Korintyanz 1:3, 4; Filipiyanz 4:6, 7) Wat els Jehoava mi du fi Joazef? Wel Jehoava mi kantinyu fi ‘bles ahn, an mek di cheef aafisa a di prizn pleez wid Joazef.’
Saach fi Spirichwal Chrezhaz
(Genesis 38:9, 10) Bot Oanan mi noa dat di chail wudn bee fi hihn. Soh wen ih mi gat sekshwal rilayshanz wid ih breda waif, ih chroa-weh ih sperm soh dat di chail neva mi wahn bee fi fi hihn breda. 10 Weh hihn mi du mi bad eena Jehoava sait, soh Jehoava mi kil ahn tu.
it-2 555
Oanan
(Oanan) [Dis naym kohn fahn wahn werd weh meen “aybl fi ga pikni; ful a enerji”].
Oanan da-mi wan a Jooda son, di sekant wan weh ih mi gat wid di daata a di Kaynanait man weh naym Shoowa. (Ge 38:2-4; 1Ch 2:3) Jehoava mi put Oanan oalda breda, Er, tu det bikaaz ih mi du sohnting bad, bot Er ded widowt ga eni pikni. Soh Jooda tel Oanan fi mek ih du weh dehn yoostu kaal “brada-in-laa marij” wid Er waif, Taymar. Brada-in-laa marij da wen wahn man ded widowt ga chiljren, soh fi hihn breda wahn ga wahn baybi wid ih waif soh dat ih famili naym kud stil egzis. Soh if Oanan wuda mi ga wahn son wid Taymar, di son wuda inherit evriting fahn Er. Bot if da neva wahn bwai mi baan, den evriting wuda goh tu Oanan. Soh wen Oanan mi ga sekshwal rilayshanz wid Taymar, di Baibl seh ih mi “chroa-weh ih sperm” soh shee noh geh pregnant. Dis noh di taak bowt maastabayshan, kaaz di Baibl seh dat ih du it “wail ih mi-di ga sekshwal rilayshanz wid shee.” Soh den, di Baibl reeli di seh dat bifoa dehn mi finish ga sekshwal rilayshanz, Oanan mi du sohnting fi mek shoar ih sperm chroa-weh, insteda get shee pregnant. Soh di ponishment weh ih get fahn Jehoava da neva sayka maastabayshan, bot rada, bikaaz a weh Oanan mi greedi fi weh ih breda mi gat, ih disobay ih pa, ahn bikaaz a dat, Jehoava si dis kaina akshan az wahn sin gens fi hihn araynjment fi marij ahn famili. Soh Jehoava mi put Oanan tu det tu. An Oanan ded widowt ga eni pikni eeda.—Ge 38:6-10; 46:12; Nu 26:19.
(Genesis 38:15-18) Az soon az Jooda si ahn, ih tek ahn fi wahn prastichoot, kaaz shee mi kova op ih fays. 16 Soh ih stap bai di roadsaid ahn tel ahn: “Pleez, mek Ah ga sekshwal rilayshanz wid yu,” bikaaz hihn neva kanshos dat da mi ih daata-in-laa. Bot shee tel ahn: “Weh yu wahn gi mi if Ah mek yu ga sekshwal rilayshanz wid mi?” 17 Soh hihn tel ahn: “Ah wahn sen yu wahn yong goat fahn mi flak.” Bot shee seh: “Weh yu wahn gi mi meenwail soh dat Ah ku bee shoar dat yu wahn sen it fi chroo?” 18 Soh hihn aks ahn: “Weh yu waahn mek Ah gi yu?” ahn shee ansa ahn seh: “Gi mi yu ring ahn yu belt ahn yu waakin stik weh yu gat eena yu han.” Soh hihn gi ahn evriting ahn den ga sekshwal rilayshanz wid ahn, ahn shee mi geh pregnant far ahn.
w04 1/15 30 ¶4-5
Kweschanz Weh Peepl Aks
Jooda mi pramis fi giv ih son Sheela tu Taymar, an ih neva kip ih pramis. Pahn tap a dat, hihn mi gat sekshwal rilayshanz wid wahn uman weh ih mi tink da wahn templ prastichoot. Ahn wahn man onli mi fi gat sekshwal rilayshanz wid wahn uman weh ih mi marid tu. Soh Jooda mi gaahn gens Jehoava perpos. (Genesis 2:24) Bot reeli, Jooda neva ga sekshwal rilayshanz wid wahn prastichoot. Insteda dat, widowt ih eevn noa it, hihn tek di plays a ih son Sheela ahn get Taymar pregnant. Eena da way, Er famili naym kuda mi stil egzis.
Bot weh Taymar mi du neva imoaral, ahn fi shee son dehn neva baan bikaaz a sekshwal imoraliti. Wen Boawaz mi geh marid tu Root eena brada-in-laa marij, di eldaz da Betlihem mi gat gud tingz fi seh bowt Taymar son Peerez. Dehn tel Boawaz: “Wid di disendant dehn weh Jehoava wahn giv yu chroo dis yong uman, yu famili wahn geh fi bee az big az Peerez wan. Hihn da-mi di wan weh Taymar gi bert tu fi Jooda.” (Ruth 4:12) Peerez naym aalso deh eena di lis a Jeezas Krais ansestaz.—Machyu 1:1-3; Look 3:23-33.
Baibl Reedin
(Genesis 38:1-19) Joorin da taim, Jooda lef ih breda dehn ahn set op ih tent kloas tu wahn man fahn Adolam weh naym Haira. 2 Rait deh Jooda mi si di daata a wahn Kaynanait man weh naym Shoowa. Soh ih gaan an ih mi gat sekshwal rilayshanz wid ahn, 3 an shee geh pregnant. Laytaraan, shee mi giv bert tu wahn son, ahn Jooda naym ahn Er. 4 Shee geh pregnant agen ahn gi bert tu wahn son ahn naym ahn Oanan. 5 Agen shee gi bert tu wahn son ahn naym ahn Sheela. Dehn mi deh da Akzib wen shee gi bert tu ahn. 6 Afta wahn wail Jooda get wahn waif fi Er, hoo da-mi di fersbaan son, ahn fi shee naym da-mi Taymar. 7 Bot Er, Jooda fersbaan son, mi du tingz weh Jehoava hayt; soh Jehoava kil ahn. 8 Bikaaz a dat, Jooda tel Oanan: “Ga sekshwal rilayshanz wid yu breda waif soh dat yu breda famili naym ku stil egzis.” 9 Bot Oanan mi noa dat di chail wudn bee fi hihn. Soh wen ih mi gat sekshwal rilayshanz wid ih breda waif, ih chroa-weh ih sperm soh dat di chail neva mi wahn bee fi fi hihn breda. 10 Weh hihn mi du mi bad eena Jehoava sait, soh Jehoava mi kil ahn tu. 11 Soh Jooda tel Taymar, ih daata-in-laa: “Liv az wahn wido eena yu pa hows til mi son Sheela geh oalda.” Bot Jooda mi-di tel ihself: ‘Hihn mait ded jos laik ih breda dehn.’ Soh Taymar gaahn stay da ih pa hows. 12 Afta sohn taim paas, Jooda waif, hoo da-mi Shoowa daata, ded. Jooda mi moan fi di amonk a dayz ih mi haftu, ahn den ih gaahn da Timna wid ih fren Haira fahn Adolam. An ih gaahn da di wan dehn weh mi chrim di wul fahn aafa fi hihn sheep. 13 Den sohnbadi tel Taymar: “Yu faada-in-laa gwehn da Timna fi chrim di wul fahn aafa ih sheep.” 14 Soh shee tek aaf di kloaz weh wahn wido wayr ahn kova op ihself wid wahn shaal ahn sidong fronta Enayim, weh deh pahn di road weh goh tu Timna, kaaz shee mi noa dat Sheela don groa op ahn Jooda stil neva giv ahn tu hihn az wahn waif. 15 Az soon az Jooda si ahn, ih tek ahn fi wahn prastichoot, kaaz shee mi kova op ih fays. 16 Soh ih stap da di roadsaid ahn tel ahn: “Pleez, mek Ah ga sekshwal rilayshanz wid yu,” bikaaz hihn neva kanshos dat da mi ih daata-in-laa. Bot shee tel ahn: “Weh yu wahn gi mi if Ah mek yu ga sekshwal rilayshanz wid mi?” 17 Soh hihn tel ahn: “Ah wahn sen yu wahn yong goat fahn mi flak.” Bot shee seh: “Weh yu wahn gi mi meenwail soh dat Ah ku bee shoar dat yu wahn sen it fi chroo?” 18 Soh hihn aks ahn: “Weh yu waahn mek Ah gi yu?” ahn shee ansa ahn seh: “Gi mi yu ring ahn yu belt ahn yu waakin stik weh yu gat eena yu han.” Soh hihn gi ahn evriting ahn den ga sekshwal rilayshanz wid ahn, ahn shee mi geh pregnant far ahn. 19 Afta dat shee get op ahn gaan, den ih tek aaf ih shaal ahn put aan bak di kloaz weh wahn wido wuda wayr.
MAY 18-24
CHREZHAZ FAHN DI WERD A GAAD | GENESIS 40-41
“Jehoava Reskyu Joazef”
(Genesis 41:9-13) Den di cheef kopbayra mi taak tu Fayro. Hihn mi seh: “Ai di kanfes mi sin dehn tudeh. 10 Fayro mi geh beks wid ih servants. Soh hihn sen mi da jayl da di hows a di cheef a di gyaad dehn, hihn mi sen mee ahn di cheef bayka. 11 Afta dat, too a wee mi ga wahn jreem da sayhn nait. Di too a wi mi ga wahn jreem weh mi ga ih oan meenin. 12 Ahn lang wid wi, dehn mi ga wahn yong Heebroo man, hihn da-mi wahn servant a di cheef a di gyaad dehn. Wen wee mi tel ahn bowt wi jreem, hihn mi eksplayn weh eech a wi jreem mi meen. 13 An evriting mi hapm jos laik weh hihn mi eksplayn tu wi. Ai mi geh bak mi pozishan, bot dehn mi en op di heng di ada servant.”
w15 2/1 14 ¶4-5
“Gaad Da di Wan Weh Ku Eksplayn Jreem”
Di kopbayra mi ferget bowt Joazef, bot Jehoava neva did ferget bowt ahn. Wan nait, Jehoava mi mek Fayro ga too jreem weh ih neva mi wahn ferget. Eena di fers jreem, Fayro mi si sevn helti, fat kow weh mi-di kom owt fahn di Nail Riva, den afta dat, sevn oagli, maaga kow mi-di fala bihain. Di maaga kow dehn eet aala di helti kow. Den afta dat, Fayro mi ga wahn nada jreem; hihn mi si wahn bonch a gud grayn stem. Bot den hihn mi aalso si sevn moa grayn stem weh neva luk helti, ahn dehnya grayn stem mi eet aala di gud grayn stem. Wen Fayro mi wayk op eena di maanin, dehndeh jreem mi-di bada ahn, soh hihn mi kaal aal di waiz man dehn ahn di prees dehn weh praktis majik fi help ahn andastan weh dehndeh jreem mi meen. Bot non a dehn kuda mi eksplayn Fayro jreem dehn. (Genesis 41:1-8) Wee noh noa if dat meenz dat di jreem dehn mi soh amayzin dat dehn neva noa weh fi seh er if dehn mi kom op wid wahn lata aidyaaz bowt weh di jreem kuda mi meen. Bot eeda way, dehn mi disapoint Fayro. Stil yet, moa dan eva, hihn mi waahn fain di meenin tu di jreem dehn weh ih mi ga.
Fainali, di kopbayra mi rimemba Joazef! Fi hihn kanshans mi-di bada ahn, soh di kopbayra mi tel Fayro bowt wahn amayzin yong man weh mi deh da prizn wid ahn 2 yaaz abak, hoo mi eksplayn fi hihn jreem ahn di jreem a di bayka, ahn bowt how fi dehn jreem mi kohn chroo. Ahn soh Fayro sen fi Joazef rait away.—Genesis 41:9-13.
(Genesis 41:16) Den Joazef ansa seh: “Da noh mee wahn du dat! Gaad wahn bee di wan weh wahn eksplayn yu jreem.”
(Genesis 41:29-32) “Dehn wahn ga sevn yaaz a plenti food eena aala di lan a Eejip. 30 Bot sevn yaaz a famin wahn kom afta dat, an Eejip wahn ferget bowt di lata food weh ih mi ga, ahn sayka di famin, di lan wahn ron owta food. 31 Ahn dehn noh wahn memba di lata food weh mi deh eena di lan bifoa bikaaz a di famin aftawodz, dat da how bad ih wahn bee. 32 Fayro mi geh di jreem too taim bikaaz di chroo Gaad don mek op ih main bowt weh wahn hapm, ahn di chroo Gaad wahn mek shoar ih hapm soon.
w15 2/1 14-15
“Gaad Da di Wan Weh Ku Eksplayn Jreem”
Jehoava lov peepl weh faytful ahn hombl, soh dat da wai hihn mi gi Joazef di ansaz tu dehndeh jreem weh mi kanfyooz di prees ahn di waiz man dehn. Joazef mi seh dat Fayro too jreem mi ga di sayhn meenin. Soh wen hihn du dat, dis da wahn way how Jehoava mi shoa dat wateva Fayro mi si eena di jreem mi wahn hapm fi shoar. Di sevn helti kow ahn di sevn gud grayn stem mi stan fi sevn yaaz a lata food da Eejip, bot di sevn maaga kow ahn di sevn grayn stem weh neva helti stan fi sevn yaaz a famin eena Eejip. Ahn di famin mi wahn bee soh bad dat ih mi wahn kaaz di peepl da Eejip fi ferget di lata food weh dehn mi gat.—Genesis 41:25-32.
(Genesis 41:38-40) Soh Fayro mi tel ih servant dehn: “Dehn ga eni ada man laik dis wan hoo Gaad gi ih spirit tu?” 39 Soh Fayro tel Joazef: “Sins Gaad kaaz yoo fi noa aala dis, den dehn noh ga nobadi weh waiza dan yoo. 40 Ai wahn put yoo in chaaj a mi hows, an aala mai peepl wahn obay yoo. Onli wen Ai deh rong az king den Ai wahn bee grayta dan yoo.”
w15 2/1 15 ¶3
“Gaad Da di Wan Weh Ku Eksplayn Jreem”
Fayro mi kip ih pramis. Joazef mi geh di bes kloaz fi wayr. Fayro mi gi ahn wahn goal nekles, wahn seel ring, wahn raiyal chariyat, an ih gi ahn aala di atariti fi chravl chroo di lan a Eejip soh dat ih ku staat op ih plan fi pripyaa fi di sevn yaaz a famin. (Genesis 41:42-44) Eena jos wan day, Joazef moov fahn wahn prizn tu wahn palis. Jos imajin dat! Hihn wayk op az wahn prizna ahn faal asleep az wahn roola a Eejip; onli Fayro mi grayta dan hihn. Wi ku si klyaa-wan wai Joazef mi ga fayt eena Jehoava! Hihn mi bring jostis fi Joazef! Jehoava mi si aal di bad tingz weh Joazef mi sofa chroo di yaaz an ih tek kayr a dehndeh tingz da di rait taim an eena di rait way. Jehoava neva onli mi waahn help Joazef, bot hihn mi aalso waahn mek shoar dat di nayshan a Izrel mi ga wahn fyoocha. Wahn fyoocha aatikl wahn eksplayn moa bowt dat.
Saach fi Spirichwal Chrezhaz
(Genesis 41:14) Soh Fayro sen fi Joazef, ahn dehn tek ahn owta prizn rait away. Joazef mi shayv ahn chaynj ih kloaz bifoa ih mi gaahn si Fayro.
w15 11/1 9 ¶1-3
Yu Mi Noa?
Wai Joazef mi shayv bifoa ih gaahn si Fayro?
Akaadn tu di akonk eena Genesis, Fayro mi giv owt aadaz fi mek dehn bring Joazef tu ahn rait away soh dat ih ku eksplayn di meenin a ih jreem dehn, bikaaz Fayro jreem dehn mi-di bada ahn. Bai da taim, Joazef mi don deh eena prizn fi wahn lata yaaz. An eevn doa Fayro mi reeli waahn si ahn, Joazef stil tek owt di taim fi shayv. (Genesis 39:20-23; 41:1, 14) Di fak dat dis lee deetayl deh eena di Baibl, shoa dat Joazef mi fameelya wid di Eejipshan kostom dehn.
Da mi sohnting naamal monks moas nayshan bak den, inkloodin di Izrelait dehn, fi mek wahn man groa owt dehn byaad. Bot di Eejipshan dehn mi difrent. Eena McClintock and Strong’s Cyclopedia of Biblical, Theological, and Ecclesiastical Literature, ih seh dat “di Eejipshan dehn da-mi di onli nayshan weh neva alow wahn man fi groa wahn byaad.”
Da mi onli dehn byaad di Eejipshan dehn mi fi shayv? Di magazeen weh naym Biblical Archaeology Review seh dat da mi di ofishal kostom fi mek wahn Eejipshan man pripyaa ihself bifoa ih goh een fi si Fayro, di saym way ih wuda pripyaa ihself bifoa ih enta wahn templ. Soh eena dis kays, Joazef wuda mi haftu shayv aaf aala di hyaa fahn ih hed an ih badi.
(Genesis 41:33) “Soh now, mek Fayro luk fi wahn man weh waiz ahn giv ahn di rispansabiliti fi wach oava Eejip.
w09 11/15 28 ¶14
Gaad Servants Shoa Gud Manaz
14 Payrents weh wership Jehoava eena Baibl taimz mi mek shoar dat dehn chrayn dehn pikni fahn hoam fi shoa gud manaz. Wahn egzampl a dis deh da Genesis 22:7. Rait deh ih tel wi how Aybraham an Aizak mi taak tu wan anada wid rispek. Ahn wahn nada persn hoo mi laan gud manaz fahn ih payrents da-mi Joazef. Wi ku si evidens a dis bai di way how hihn mi taak tu di ada prizna dehn weh mi deh eena jayl wid hihn. (Gen. 40:8, 14) Eevn di way how hihn taak tu Fayro mi shoa dat hihn mi laan how fi taak tu sohnbadi weh ga atariti.—Gen. 41:16, 33, 34.
Baibl Reedin
(Genesis 40:1-23) Afta dehnya tingz, Fayro cheef kopbayra ahn di cheef bayka mi sin gens fi dehn laad, hoo da di king a Eejip. 2 Soh Fayro mi geh beks wid ih too aafisa dehn, hoo da di cheef kopbayra ahn di cheef bayka. 3 Soh hihn sen dehn da jayl da di hows a di cheef a di gyaad dehn, di plays wehpaat Joazef mi deh eena prizn. 4 Den di cheef a di gyaad asain Joazef fi tek kyaa a dehn, ahn dehn mi stay eena jayl fi sohn taim. 5 Den Fayro kopbayra ahn di bayka weh mi deh eena jayl, mi ga wahn jreem da sayhn nait, too jreem wid dehn oan meenin. 6 Di neks maanin wen Joazef mi gaahn si dehn, dehn mi luk dipres. 7 Soh hihn aks dehn: “Wai unu luk soh dipres tudeh?” 8 Den dehn ansa seh: “Wi mi ga wahn jreem, bot dehn noh ga nobadi weh ku eksplayn weh ih meen.” Den Joazef tel dehn: “Gaad da di wan weh ku eksplayn jreem.” Tel mi bowt unu jreem. 9 Soh di cheef kopbayra mi tel Joazef weh hapm eena ih jreem. Hihn mi seh: “Eena mai jreem, dehn mi ga wahn vain fronta mi. 10 Ahn rait pahn di vain, dehn mi ga chree lee stem, ahn sohn flowaz staat tu sprowt pahn di stem dehn, den ih projoos wahn bonch a raip grayps. 11 Den Ai mi-di hoal Fayro kop, an Ai tek di grayps ahn skweez it eena Fayro kop, ahn den Ah han di kop tu ahn.” 12 Den Joazef tel ahn: “Dis da weh yu jreem meen: Di chree smaal stem meen chree dayz. 13 Chree dayz fahn now, Fayro wahn tek yoo owta jayl, den hihn wahn giv yu bak yu pozishan, ahn yu wahn kantinyu fi bee Fayro kopbayra. 14 Soh yu mos rimemba mi wen tingz goh gud fi yu. Pleez shoa mi laayal lov ahn menshan mi tu Fayro, soh dat Ai ku get owta dis plays. 15 Dehn mi tek mi weh fahn di lan a di Heebrooz, an Ai neva du eniting ya fi mek dehn put mi eena prizn.” 16 Wen di cheef bayka mi si dat Joazef mi seh sohnting gud, hihn tel ahn seh: “Ai mi deh eena mai jreem tu, ahn dehn mi ga chree baaskit weh ga wait bred eena it, an ih mi deh tap a mi hed, 17 an eena di tap baaskit dehn mi ga wahn lata gud tingz fi Fayro, ahn sohn berd mi-di eet fahn owta di baaskit weh mi deh pahn tap a mi hed.” 18 Den Joazef tel di cheef bayka, “Dis da di meenin a yu jreem: Di chree baaskit meen chree dayz. 19 Chree dayz fahn now, Fayro wahn chap aaf yu hed ahn den ih wahn heng yu pahn wahn stayk, ahn di berd dehn wahn eet di flesh fahn aafa yu badi.” 20 Now di terd day da-mi Fayro bertday, ahn hihn mi chroa wahn paati fi aala ih servant dehn, den hihn bring owt di cheef kopbayra ahn di cheef bayka fahn owta jayl, fronta aala ih servant dehn. 21 Den ih gi di kopbayra bak ih pozishan, soh hihn mi kantinyu fi han di kop tu Fayro. 22 Bot Fayro mi heng di cheef bayka jos laik weh Joazef mi seh mi wahn hapm. 23 Bot, di cheef kopbayra neva rimemba Joazef.
MAY 25-31
CHREZHAZ FAHN DI WERD A GAAD | GENESIS 42-43
“Joazef Mi Shoa Lata Self-Kanchroal”
(Genesis 42:5-7) Soh Izrel son dehn gaahn bai lang wid sohn ada peepl, bikaaz di famin mi reech aal di way tu di lan a Kaynan. 6 Joazef da-mi di wan weh mi ga atariti oava di lan a Eejip, ahn hihn da-mi di wan weh mi-di sel food tu aal di peepl weh mi deh pahn di ert. Soh Joazef breda dehn gaan op tu ahn an bow dong fronta ahn. 7 Wen Joazef mi si ih breda dehn, hihn mi rekonaiz dehn rait away, bot ih mi haid ih aidentiti fahn dehn. Soh hihn mi taak rof wid dehn, an ih tel dehn seh: “Wehpaat unu kohn fram?” Den dehn ansa seh: “Wi kohn fahn di lan a Kaynan fi bai food.”
w15 5/1 13 ¶5
“Da Mee Ga Gaad Pozishan?”
How bowt Joazef? Hihn mi rekonaiz ih breda dehn rait away! Pahn tap a dat, wen hihn mi si dehn di bow dong fronta hihn, hihn staat tu rimemba weh mi hapm wen ih mi yonga. Di Baibl tel wi dat “Joazef mi rimemba di jreem dehn” weh Jehoava mi gi ahn wen ih mi yonga. Di jreem mi prafesai bowt wahn taim wen ih breda dehn mi wahn bow dong fronta ahn, an dat da egzakli weh ih breda dehn mi-di du! (Genesis 37:2, 5-9; 42:7, 9) Da weh Joazef mi wahn du? Yu tink hihn mi wahn welkom dehn bak, er yu tink ih wuda get rivenj?
w15 5/1 14 ¶1
“Da mee Ga Gaad Pozishan?”
Moa dan laikli, yu wudn fain yuself eena da pozishan weh Joazef mi deh eena. Bot nowadayz, ih kaman fi si haychrid ahn divizhan eena wahn famili. Wen wi goh chroo dehndeh kaina prablemz, wi ten fi mek disizhanz bays pahn how wi feel. Bot di waiz ting fi du da kapi Joazef egzampl ahn chrai fi si how Jehoava wuda waahn wi handl dehndeh sichuwayshan. (Proverbs 14:12) Soh rimemba, jos laik how ih impoatant fi mek pees wid wi famili dehn, ih eevn moa impoatant fi mek pees wid Jehoava an ih Son.—Machyu 10:37.
(Genesis 42:14-17) Bot Joazef mi tel dehn: “Da jos laik weh Ah mi seh—‘Unu da spai!’ 15 Bikaaz a dat Ai wahn tes unu: Az shoar az Fayro di liv, unu noh wahn lef dis plays til unu yongis breda kohn ya. 16 Mek wan a unu goh ahn bring di yongis breda ya wail di res a unu stay ya. Den eena dis way, yu wahn geh tes owt fi si if weh unu di seh da chroo er nat. An if da noh chroo, den az shoar az Fayro di liv, unu da spai.” 17 Afta ih seh dat, ih put dehn eena prizn fi chree dayz.
w15 5/1 14 ¶2
“Da Mee Ga Gaad Pozishan?”
Joazef mi yooz sohn difrent tes fi si weh kaina peepl ih breda dehn. Hihn mi staat aaf di taak tu dehn eena wahn rof way, chroo wahn chranslayta, di akyooz dehn dat dehn da spai. Fi difen dehnself, dehn mi tel Joazef bowt fi dehn famili, ahn dehn aalso menshan dat dehn mi ga wahn yonga breda weh mi stil deh hoam. Dat da-mi wahn impoatant deetayl! Joazef mi chrai haid how hapi hihn mi hapi fan ih breda dehn. Hihn praabli staat tu wanda if ih brada kuda mi akchwali stil bee alaiv. Now hihn mi noa egzakli how fi tes dehn owt. Hihn mi seh: “Bays pahn dis unu wahn geh tes owt,” den hihn mi tel dehn dat hihn haftu si fi dehn yongis breda. Az taim mi paas, hihn mi agree fi mek dehn goh hoam fi dehn yongis breda, bot onli if wan a dehn mi agree fi stay da Eejip az wahn prizna.—Genesis 42:9-20.
(Genesis 42:21, 22) Ahn dehn mi tel wan anada: “Wi di geh ponish bikaaz a wi breda, bikaaz wi mi si humoch ih mi-di sofa wen ih mi bayg wi fi ga mersi, bot wi neva lisn tu ahn. Dat da wai wee di sofa now.” 22 Den Rooben ansa dehn: “Ai neva tel unu, ‘Noh sin gens di lee bwai’? Bot unu neva lisn tu mi. Now wi haftu ansa tu Gaad fi fi hihn blod weh wi shed.”
it-2 108 ¶4
Joazef
Bikaaz a weh mi-di hapm tu Joazef breda dehn, dehn staat tu seh dat dehn mi-di geh ponish sayka weh dehn mi sel dehn breda intu slayvri yaaz erliya. Dehn staat tu taak bowt dehn gilti feelinz fronta dehn breda Joazef, hoo dehn stil neva rekonaiz. Wen Joazef mi hyaa how dehn mi sari fi evriting weh dehn mi du, hihn kudn hoal bak how hihn mi-di feel, soh hihn mi lef fahn fronta dehn ahn gaahn krai. Wen ih gaahn bak tu dehn, hihn mi kip Simiyan wid ahn til fi hihn breda dehn mi kohn bak fahn Kaynan wid dehn yongis breda.—Ge 42:21-24.
Saach fi Spirichwal Chrezhaz
(Genesis 42:22) Den Rooben ansa dehn: “Ai neva tel unu, ‘Noh sin gens di lee bwai’? Bot unu neva lisn tu mi. Now wi haftu ansa tu Gaad fi fi hihn blod weh wi shed.”
(Genesis 42:37) Bot Rooben tel ih pa: “Yu ku kil mai oan too son if Ai noh bring ahn bak tu yu. Giv ahn tu mee mek Ai tek kayr a ahn, an Ai pramis Ah wahn bring ahn bak tu yu.”
it-2 795
Rooben
Som a Rooben gud kwalitiz mi shoa wen hihn mi kanvins ih nain breda dehn fi chroa Joazef eena wahn jrai op wel insteda kil ahn. Rooben mi-di plan fi reskyu Joazef fahn di wel widowt ih breda dehn noa. (Ge 37:18-30) Moa dan 20 yaaz afta dat mi hapm, Joazef breda dehn mi-di seh dat di reezn wai dehn mi-di geh ponish da-mi bikaaz a weh dehn mi du tu Joazef, ahn Rooben mi rimain dehn dat hihn neva ga notn fi du wid dehn plan fi kil Joazef. (Ge 42:9-14, 21, 22) An agen, wen Jaykop mi rifyooz fi mek Benjamin goh wid ih res a breda dehn da Eejip agen, da Rooben mi aafa op ih son dehn az wahn sakrifais wen ih seh: “Yu ku kil mai oan too son if Ai noh bring [Benjamin] bak tu yu.”—Ge 42:37.
(Genesis 43:32) Dehn mi serv hihn bai dehnself, ahn hihn ahn di Eejipshan dehn mi eet bai dehnself, sayka weh di Eejipshan kudn sidong lang wid dehn fi eet wahn meel, bikaaz dat da-mi sohnting weh di Eejipshan dehn mi hayt.
w04 1/15 29 ¶1
Sohn Mayn Points Fahn di Buk a Genesis—II
43:32—Wai di Eejipshan dehn neva eet wid di Heebrooz? Maybi di Eejipshan dehn mi tink dat fi dehn rilijan ahn dehn rays mi beta dan di Heebrooz. Ahn dehn mi eevn hayt shepadz. (Genesis 46:34) Wai? Wel, ih ku bee dat di Eejipshan dehn mi kansida shepadz az di loawis peepl. Er ih ku bee dat sins onli wahn lee bit a lan mi deh fi plaant ahn groa food, di Eejipshan dehn mi hayt enibadi weh mi-di luk fi wahn pees a lan fi tek kayr a dehn sheep.
Baibl Reedin
(Genesis 42:1-20) Wen Jaykop mi laan dat dehn mi ga food da Eejip, hihn mi tel ih son dehn: “Wai unu jos di stan op rong di luk pahn wan anada?” 2 Den hihn seh: “Ah hyaa dat dehn ga food da Eejip. Goh oava deh ahn bai sohn food fi mek aala wi eet, soh dat wi noh ded.” 3 Soh ten a Joazef breda gaahn da Eejip fi bai food. 4 Bot Jaykop neva sen Benjamin, hoo da Joazef breda, lang wid dehn, bikaaz hihn mi seh: “Maybi sohnting goh hapm tu ahn den ih ded.” 5 Soh Izrel son dehn gaahn bai lang wid sohn ada peepl, bikaaz di famin mi reech aal di way tu di lan a Kaynan. 6 Joazef da-mi di wan weh mi ga atariti oava di lan a Eejip, ahn hihn da-mi di wan weh mi-di sel food tu aal di peepl weh mi deh pahn di ert. Soh Joazef breda dehn gaan op tu ahn an bow dong fronta ahn. 7 Wen Joazef mi si ih breda dehn, hihn mi rekonaiz dehn rait away, bot ih mi haid ih aidentiti fahn dehn. Soh hihn mi taak rof wid dehn, an ih tel dehn seh: “Wehpaat unu kohn fram?” Den dehn ansa seh: “Wi kohn fahn di lan a Kaynan fi bai food. 8 Soh Joazef mi rekonaiz dat dehn da-mi fi hihn breda, bot dehn neva rekonaiz dat da mi Joazef. 9 Soh hihn mi rimemba weh mi hapm eena ih jreem, soh hihn tel dehn: “Unu da spai! Unu kohn fi chek owt di lan fi fain wichpaat a di lan week!” 10 Den dehn tel ahn seh: “No, mi laad, wi jos kohn fi bai food. 11 Aala wee da son tu wan man. Wee da gud peepl. Wi noh kohn ya fi spai owt yu lan.” 12 Bot Joazef tel dehn seh: “Ai noh tink soh ataal! Unu kohn fi si wichpaat a di lan da week paats!” 13 Den dehn ansa seh: “Wee da yu servants, ahn wee da 12 breda. Aala wee da son tu wan man fahn di lan a Kaynan, ahn wi yongis breda deh wid wi pa rait now, bot di ada breda noh deh wid wi nohmoh.” 14 Bot Joazef mi tel dehn: “Da jos laik weh Ah mi seh—‘Unu da spai!’ 15 Bikaaz a dat Ai wahn tes unu: Az shoar az Fayro di liv, unu noh wahn lef dis plays til unu yongis breda kohn ya. 16 Mek wan a unu goh ahn bring unu yongis breda ya wail di res a unu stay ya. Den eena dis way, unu wahn geh tes owt fi si if weh unu di seh da chroo er nat. An if da noh chroo, den az shoar az Fayro di liv, unu da spai.” 17 Afta ih seh dat, ih put dehn eena prizn fi chree dayz. 18 Den pahn di terd day Joazef mi seh: “Du dis ahn liv, bikaaz Ah fyaa Gaad. 19 If unu da gud peepl, mek wan a unu stay ya az wahn prizna den di res a unu ku goh owt ahn geh food fi kehr bak tu yu famili weh di staav. 20 Den bring bak yu yongis breda tu mi, soh dat Ah ku bileev weh unu mi tel mi, den unu noh wahn ded.” Ahn dat da egzakli weh dehn mi du.