Kantinyu Pen Pahn Jehoava fi Gaidans

1. Wat da sohn tingz weh wi need fi liv? (Machyu 5:3)

AZ HYOOMANZ, wi need sertn tingz fi kip wi alaiv ahn fi injai laif. An if wi shaat a eni a dehndeh tingz, ih ku mek wi laif haad. Dat da jos di way how Jehoava mek wi. Fi egzampl, wi need food, kloaz, ahn sohnweh fi liv. Wi aalso need fi geh fi noa Jehoava ahn pen pan ahn. (Reed Machyu 5:3.) If wi waahn bee hapi, wi need fi noa dat wi need hihn ahn kip di goh tu hihn fi gaidans.

2. How wee da laik wahn poa persn?

² Wen di Baibl taak bowt sohnbadi weh “noa seh dehn need Gaad,” di ekspreshan weh ih yooz eena di orijinal langwij meenz sombadi weh spirichwali poa. Imajin wahn persn weh soh poa dat ih di liv pan di schreet. Ih doti op ahn peepl skaan ahn. Ih maaga bikaaz ih noh ga food fi eet. Ih deh owt eena di weda noh mata if ih hat er koal. Dis persn noa dat ih laif noh wahn geh no beta widowt help. Rait soh, wahn persn weh spirichwali poa wahn eega fi beg Jehoava fi help, ahn dehn wahn tek advantij a aala di spirichwal food ahn gaidans weh Jehoava di aafa tu di peepl weh ih lov.

3. Weh wi wahn taak bowt eena dis aatikl?

³ Eena dis aatikl, wi wahn taak bowt weh wi ku laan fahn wahn laydi fahn Foneesha weh mi reeli waahn Jeezas help ahn. Shee mi shoa chree kwalitiz weh wi ku kapi if wi waahn Jehoava kantinyu help wi. Afta dat wi wahn taak bowt Peeta, Paal, ahn King Dayvid, ahn wi wahn si weh wi ku laan fahn fi dehn egzampl.

CHREE IMPOATANT KWALITIZ WEH WI NEED

4. Weh wahn laydi mi waahn Jeezas du far ahn?

⁴ Wahn day, wahn laydi fahn Foneesha get dong pan ih nee ahn beg Jeezas fi help ih daata, bikaaz “di deemonz mi-di kaaz ih daata fi sofa.” (Mach. 15:​21-28) Mek wi si weh wi ku laan fahn di way dis laydi mi beg Jeezas fi help.

5. Weh Jeezas mi du fi di laydi fahn Foneesha, ahn wai? (Koment pahn di picha.)

⁵ Wen di laydi fahn Foneesha aks Jeezas fi help, hihn tel ahn: “Ih noh rait fi tek weh di bred fahn di chiljren ahn giv it tu di lee daag dehn.” If da-mi sombadi els, dehn wuda mi jos geh beks ahn waak weh bikaaz dehn tink Jeezas di insolt dehn. Bot dis laydi neva du dat. Shee mi stay kaaz shee mi hombl. Shee neva giv op, an ih mi kantinyu aks Jeezas fi help. Shee mi du dis bikaaz ih mi ga fayt eena Jeezas. Bikaaz a fi shee fayt, Jeezas mi tek di deemon fahn owta ih daata, eevn doa hihn mi seh dat hihn onli mi dehdeh fi help “di peepl a Izrel weh da laik sheep weh laas.”

6. How wi ku kapi di laydi fahn Foneesha?

⁶ If wi waahn benifit fahn Jehoava gaidans, wi need fi bee hombl ahn kantinyu aks Gaad fi help wi. Wi aalso need fi ga schrang fayt eena Jeezas ahn chros di peepl weh hihn di yooz fi gi wi dairekshan. (Mach. 24:​45-47) Wen wi aks fi help, ahn wi hombl ahn ga fayt, Jehoava ahn Jeezas hapi fi help wi ahn gaid wi. (Kompyaa Jaymz 1:​5-7.) Now wi wahn luk pahn how Jehoava gaid wi ahn gi wi weh wi need fi bee hapi, ahn how wee ku kapi Peeta, Paal, ahn Dayvid egzampl.

KAPI PEETA EGZAMPL—KANTINYU STODI GAAD WERD

7. Weh Jeezas mi tel Peeta fi du, ahn wat els Peeta mi need fi du? Pleez eksplayn yu ansa. (Heebrooz 5:14–6:1)

⁷ Peeta da-mi di fers Joo fi noa dat Jeezas da-mi di Mesaiya ahn dat Jehoava mi-di yooz Jeezas fi teech peepl bowt evalastin laif. (Jan 6:​66-68) Bifoa Jeezas mi gaahn da hevn, hihn mi tel Peeta fi ‘feed ih lee sheep dehn,ʼ ahn dat da egzakli weh Peeta mi du. (Jan 21:17) Peeta mi teech di bradaz ahn sistaz eena di kangrigayshan ahn Jehoava mi eevn yooz ahn fi rait too letaz weh da paat a di Baibl. Bot Peeta mi need fi bil op ihself spirichwali ahn stodi Gaad Werd. Sohnting weh hihn mi stodi da di leta dehn weh Paal mi rait weh da-mi don paat a di Baibl. Hihn mi seh dat dehndeh tingz mi haad fi andastan. (2 Peet. 3:​15, 16) Bot hihn neva mek dat stap ahn. Ih mi kantinyu stodi it bikaaz ih mi ga fayt dat Jehoava mi wahn help ahn fi andastan an aplai di tingz weh ih mi-di laan eena Paal leta dehn.—Reed Heebrooz 5:14–6:1.

8. Weh Peeta mi du wen Jehoava mi giv ahn nyoo dairekshan?

⁸ Wahn day, wen Peeta mi deh da Japa, ih mi geh wahn vizhan. Eena di vizhan, wahn aynjel tel ahn fi eet di food weh Jehoava mi tel di Jooz dehn noh fi eet. At fers, Peeta mi feel laik weh di aynjel mi-di tel ahn fi du neva song rait, soh ih tel ahn: “No, Laad, Ah wuda neva du dat, kaaz Ai neva eet eniting weh noh kleen.” (Aks 10:​9-15) Bot di aynjel tel ahn: “Gaad don seh dehnya tingz hoali, soh stap seh dehnya tingz noh kleen.” (Aks 10:​9-15) Noh lang afta dat, chree man kohn vizit Peeta ahn tel ahn dat Kerneelyos mi waahn si ahn. If Peeta neva geh dis vizhan, ih neva mi wahn goh da Kerneelyos hows, bikaaz Kerneelyos da neva wahn Joo. Ahn di Jooish leedaz mi teech peepl dat ih rang fi goh eena wahn persn hows if dehn da noh Joo. Bot afta Peeta si di vizhan, ih shoa dat ih mi ga fayt eena Jehoava wen ih mi chaynj di way ih tink an obay weh Jehoava mi-di tel ahn fi du. (Aks 10:​28, 29) Peeta mi andastan dat Jehoava mi waahn evribadi geh wahn chaans fi hyaa di gud nyooz. (Prav. 4:18) Soh hihn preech tu Kerneelyos an evribadi els weh mi dehdeh, ahn dehn staat tu shoa fayt eena Jeezas. Jehoava mi poar owt ih hoali spirit pahn dehn sayhn peepl ahn dehn en op di geh baptaiz.—Aks 10:​44-48.

9. Eena weh too wayz wi benifit wen wi stodi tingz weh haad fi andastan?

⁹ Wi need fi stodi Gaad Werd wahn lat, jos laik Peeta. Ih tek taim fi stodi ahn du deep risaach, soh wi waahn set inof taim fi du it. Sohntaim, di tingz weh wi stodi wahn bee eezi fi andastan ahn sohntaim ih wahn bee haad. Bot eevn wen yu bok op tu tingz weh haad fi andastan, noh giv op. Kantinyu ahn laan fi injai stodi dehndeh tingz. Wen wi du dis, ih benifit wi eena too wayz: Fers, wi wahn laan tingz bowt Jehoava weh wahn mek wi ga moa lov ahn rispek far ahn. Ahn sekant, wen wi laan sohnting nyoo an amayzin bowt Jehoava, wi wahn kyaahn wayt fi tel evribadi bowt it. (Roam. 11:33; Rev. 4:11) Peeta mi kwik fi fiks di way how ih tink wen ih geh nyoo dairekshan, ahn wee waahn kapi fi hihn egzampl. Wen wi geh nyoo dairekshan er wahn nyoo andastandin, wi waahn bee kwik fi ajos di way wi tink, jos laik Peeta. Wen wi du dat, Jehoava wahn ku kantinyu gaid wi, ahn wee wahn ku kantinyu bee faytful ahn serv Jehoava.

KAPI PAAL EGZAMPL— DIVELOP KWALITIZ WEH WAHN MEK JEHOAVA HAPI

10. Akaadn tu Koloashanz 3:​8-10, weh wi need fi du fi mek Jehoava hapi?

¹⁰ If wi waahn bee hapi ahn mek Jehoava gaid wi, wi need fi ga wahn persnaliti weh hihn wahn hapi wid. Jehoava shoa wi eena di Baibl weh wi need fi du fi geh da persnaliti. (Reed Koloashanz 3:​8-10.) Bot ih noh eezi fi du dis. Fi divelop di kaina kwalitiz weh wahn mek Jehoava hapi tek lata taim ahn haad werk. Tek Paal, fi egzampl; hihn mi werk haad fi mek Gaad hapi fahn ih yong. (Gal. 1:14; Fil. 3:​4, 5) Bot hihn neva andastan how fi wership Jehoava eena di rait way, an ih neva ga fayt. Pahn tap a dat, Paal da-mi wahn veri prowd persn an ih neva riyalaiz dat Jeezas da-mi di Mesaiya, soh di way how hihn mi bihayv neva mek Jehoava hapi ataal.—1 Tim. 1:13.

11. Weh chaynj Paal mi haftu mek? Pleez eksplayn yu ansa.

¹¹ Bifoa Paal da-mi wahn Kristyan, ih mi ga wahn reeli bad tempa. Ih tempa mi soh bad dat ih mi “chretn fi merda” Jeezas disaipl dehn. (Aks 9:1) Bot afta Paal geh fi bee wahn Kristyan, ih werk haad fi noh geh beks soh eezi, an ih en op di bee wahn payshent ahn kain persn. (Ifee. 4:​22, 31) Bot eevn doa Paal mi geh rid a di oal persn, ih mi stil slip op sohntaim. Wahn taim Paal mi geh beks wid Baarnabas ahn wahn “big aagyument mi brok owt.” (Aks 15:​37-39) Wen dat mi hapm, Paal neva di bihayv eena wahn way weh mi mek Jehoava hapi, bot hihn neva giv op. Hihn mi kantinyu werk haad soh hihn ku bee di kaina persn weh wahn mek Jehoava feel hapi.—1 Kor. 9:27.

12. Weh mi help Paal fi kantinyu geh rid a bad kwalitiz?

¹² Paal kuda mi put aan di nyoo persn ahn chaynj di way ih ak bikaaz ih mi hombl an ih neva pen pahn ihself. (Fil. 4:13) Hihn mi pen pahn “di schrent a Gaad,” jos laik Peeta. (1 Peet. 4:11) Bot sohntaim, Paal wuda mek wahn mistayk ahn dat wuda diskorij ahn. Wen ih staat feel laik dat, ih tink bowt evriting weh Jehoava don du far, ahn dis giv ahn di schrent fi kantinyu werk haad ahn mek chaynjiz weh wahn mek Jehoava hapi.—Roam. 7:​21-25.

13. How wi ku kapi Paal egzampl?

¹³ Eevn if wi di serv Jehoava fi yaaz, wi need fi werk haad fi kapi Jehoava kwalitiz an aplai weh ih di teech wi. Wi noh perfek, soh wi wahn mek mistayk. Wi mait looz wi tempa er seh sohnting weh noh nais tu sombadi, ahn wen dat hapm, insteda giv op ahn tink dat wi kyaahn mek Jehoava hapi, wi waahn kantinyu chrai fi mek chaynjiz. (Roam. 12:​1, 2; Ifee. 4:24) If wee waahn kip di mek chaynjiz ahn divelop byootiful kwalitiz laik Jehoava, wi need fi memba sohnting impoatant. Di onli way fi divelop dehndeh gud kwalitiz da fi geh fi noa Jehoava reeli gud an alow ahn fi teech wi.

KAPI DAYVID EGZAMPL—ALOW JEHOAVA FI PROTEK YU

14-15. How Jehoava protek ih peepl? (Saam 27:5) (Koment pahn di picha.)

¹⁴ Fi injai laif wi aalso need Jehoava protekshan. How Jehoava protek wi? Ahn weh wi need fi du soh dat hihn wahn protek wi?

¹⁵ King Dayvid mi shoar dat Jehoava mi wahn protek ahn wen tingz geh haad. (Reed Saam 27:5.) Tudeh, Jehoava protek ih peepl fahn eniting er enibadi weh ku dischrai dehn fayt. Soh no wepan weh dehn bring gens wi wahn ga sokses. (Saa. 34:7; Aiz. 54:17) Saytan, di deemonz, an ada peepl weh persikyoot wi schrang, bot Jehoava schranga. Soh eevn if dehn kil wi, Jehoava wahn bring wi bak tu laif. (1 Kor. 15:​55-57; Rev. 21:​3, 4) Wen wi feel schres owt, Jehoava help wi soh dat wi ku kantinyu serv ahn. (Prav. 12:25; Mach. 6:​27-29) Ahn wen tingz geh haad, wi ga wi bradaz ahn sistaz weh Jehoava gi wi. Dehn wahn ku inkorij ahn sopoat wi joorin da taim. Pahn tap a dat, hihn gi wi di eldaz weh ku teech wi ahn help wi kip wi fayt schrang. (Aiz. 32:​1, 2) Ahn wen wi goh da meetin, wi laan bowt ada wayz Jehoava ku help ahn protek wi.—Heeb. 10:​24, 25.

16. How Jehoava mi protek Dayvid?

¹⁶ Wen Dayvid mi obay Jehoava, ih mi mek waiz disizhanz an ih neva haftu sofa. Dat da wan way how Jehoava mi protek ahn. (Kompyaa Praverbz 5:​1, 2.) Bot wen Dayvid neva obay Jehoava, ih en op di sofa. Ahn Jehoava neva protek ahn fahn di kansikwens. (2 Sam. 12:​9, 10) Dehn gat ada taimz wen Dayvid mi sofa bikaaz peepl mi chreet ahn bad. Wen dat mi hapm, hihn mi pray tu Jehoava ahn tel ahn bowt evriting weh mi-di bada ahn, an Jehoava mi protek ahn. How Jehoava mi protek ahn? Jehoava mi mek Dayvid noa dat ih lov ahn. Ih mi komfert ahn an pramis ahn dat ih wahn tek kayr a ahn.—Saa. 23:​1-6.

17. How wi ku kapi Dayvid egzampl?

¹⁷ Wi ku kapi Dayvid egzampl wen wi pray tu Jehoava ahn goh tu hihn fi gaid wi bifoa wi mek wahn disizhan. Wi aalso need fi memba dat wen wi noh obay Jehoava, hihn noh wahn protek wi fahn di bad tingz weh wahn hapm bikaaz a di disizhan weh wi mek. (Gal. 6:​7, 8) Bot sohntaim wi wahn obay Jehoava ahn stil sofa. Wen dat hapm, wi waahn poar owt wi haat tu Jehoava an aks ahn fi help. Den hihn wahn komfert wi ahn rimain wi dat ih lov wi.—Fil. 4:​6, 7.

KANTINYU PEN PAHN JEHOAVA FI GAID YU

18. Weh chalenj wi fays, ahn weh wi ku du if wi waahn Jehoava kantinyu gaid wi? (Koment pahn di picha dehn.)

¹⁸ Wi yaateks fi 2026 seh: “Di wan dehn hoo noa seh dehn need Gaad wahn bee hapi.” Ih reeli impoatant fi mek wi pen pahn Jehoava dehnya dayz, bikaaz wahn lata peepl noh aksep dat dehn need Gaad eena dehn laif. Lata dehn bileev eena Gaad, bot dehn waahn du dehn oan ting. An adaz goh tu ada peepl fi gaid dehn. Non a dat mek dehn hapi. Wi need fi bee kyaaful ahn noh kapi weh dehn di du. Soh weh wee mos du fi kantinyu pen pahn Jehoava? Wi need fi kantinyu stodi Jehoava Werd, kantinyu laan how fi shoa kwalitiz weh wahn mek hihn hapi, an obay Jehoava an alow ahn fi protek wi.