Jehoava Ku Help Yu Wen Yu Feel Sad er Diskorij

1-2. How di apasl Paal mi feel sohntaim, ahn wai wee ku andastan weh ih seh bowt how ih feel? (Roamanz 7:​21-24)

WEN yu tink bowt di apasl Paal, yu praabli tink bowt how ih mi chravl aal oava di plays fi preech, ih da-mi wahn gud teecha, an ih mi rait lata buks a di Baibl. Paal da-mi wahn brayv ahn faytful man fi chroo. Bot sohntaim, jos laik wee, Paal mi feel sad, diskorij, ahn schres owt, an ih mi wori bowt lata tingz.

² Reed Roamanz 7:​21-24. Wen Paal mi rait ih leta tu di Roamanz, ih mi taak bowt feelinz weh wee ku andastan bikaaz sohntaim wee feel di saym way laik hihn. Paal da-mi wahn faytful Kristyan an ih mi waahn obay Jehoava, bot bikaaz ih neva perfek, ih neva aalwayz eezi fi du weh rait. Wen Paal wuda tink bowt tingz weh ih mi du bifoa ih ton Kristyan, ih mi feel bad bowt dehn. Ahn Paal mi ga wahn prablem weh mi mek ih feel foschraytid bikaaz ih kudn du notn bowt it.

3. Weh wi wahn taak bowt eena dis aatikl? (Koment pahn di futnoat.)

³ Eevn doa Paal mi feel sad er diskorij sohntaim,a ih neva mek dat kanchroal ih laif. Eena dis aatikl, wi wahn taak bowt wai Paal mi feel “mizarabl” sohntaim, weh ih mi du wen ih mi feel sad er diskorij, ahn weh wee ku du wen wi feel da way.

TINGZ WEH MEK PAAL FEEL DONG

4. Weh mi mek Paal feel dong sohntaim?

⁴ Tingz weh ih mi du eena di paas. Bifoa Paal mi ton Kristyan, ih mi du lata bad tingz weh ih mi sari fa laytaraan. Fi egzampl, hihn mi dehdeh wen dehn kil Steeven, an ih mi tink dat mi rait. (Aks 7:58; 8:1) Ih mi werk haad fi persikyoot lata Kristyanz, an ih mi mek dehn sofa wahn lat.—Aks 8:3; 26:​9-11.

5. How Paal mi feel bowt di tingz weh ih mi du eena di paas?

⁵ Afta Paal mi ton Kristyan, sohntaim ih mi feel gilti oava tingz weh ih mi du eena di paas. Ahn di moa taim mi paas, di wers ih praabli mi feel bowt how bad ih mi chreet Jehoava peepl. Fi egzampl, rong 55 C.E. wen ih mi rait wahn leta tu di kangrigayshan da Korint, ih mi seh: “Ai noh eevn dizerv fi mek dehn kaal mi wahn apasl, bikaaz Ah mi persikyoot di kangrigayshan a Gaad.” (1 Kor. 15:9) Bowt faiv yaaz layta, wen ih mi rait wahn leta tu di bradaz ahn sistaz da Efisos, hihn mi seh dat “aala di ada hoali peepl moa impoatant” dan hihn. (Ifee. 3:8) Wen Paal mi rait wahn leta tu Timoti, ih mi seh dat ih yoostu insolt Gaad, ih yoostu persikyoot ih peepl, an ih yoostu bee wahn ignarant man. (1 Tim. 1:13) Paal yoostu vizit lata kangrigayshan fi inkorij ih bradaz ahn sistaz. Sohntaim, wen ih vizit wahn kangrigayshan, ih wuda meet sohnbadi weh ih mi persikyoot er di famili a sohnbadi weh ih mi persikyoot. Yu ku imajin how Paal mosi mi feel wen tingz laik dat mi hapm?

6. Wat els mi mek Paal sofa? (Koment pahn di futnoat.)

⁶ Wahn prikl eena ih badi. Paal mi ga wahn prablem weh ih kudn fiks. Ih neva seh egzakli wat da-mi di prablem. Ih kuda mi bee wahn helt prablem er sohn ada kaina prablem weh ih mi-di wori bowt.b Bot hihn mi seh dat da-mi ‘laik wahn prikl eena ih badi.ʼ (2 Kor. 12:7) Soh eevn doa wi noh noa wat da-mi di prablem, wi doo noa dat ih mi mek Paal sofa wahn lat.

7. How Paal mi feel bikaaz ih neva perfek? (Roamanz 7:​18, 19)

⁷ Ih neva perfek. Paal mi werk haad fi du weh rait, bot ih mi stil mek mistayks, an ih mi feel diskorij sayka dat. (Reed Roamanz 7:​18, 19.) Ih mi seh dat sohntaim ih neva du weh ih mi waahn du, an ada taimz ih mi du sohnting weh ih neva sopoas tu du. Ih mi seh dat ih aalwayz mi-di fait fi du weh rait insteda du weh ih sinful badi waahn. (1 Kor. 9:27) Stilyet, noh mata how haad ih mi fait fi du gud, ih mi stil mek mistayk. Yu ku imajin how foschraytid ih mosi mi feel wen ih mi seh er du sohnting rang afta ih mi werk soh haad fi chaynj?

WEH PAAL MI DU WEN IH MI FEEL DISKORIJ

8. Weh mi help Paal fi kantinyu du beta?

⁸ Wen wi reed di leta dehn weh Paal rait, ih playn fi si dat hihn mi spen wahn lata taim di tink bowt how Gaad spirit ku help wi fi fait gens rang dizaiyaz ahn fi laan fi shoa gud kwalitiz. (Roam. 8:13; Gal. 5:​16, 17) Hihn mi taak bowt weh kaina tingz wi noh fi du if wi waahn pleez Jehoava. (Gal. 5:​19-21, 26) Paal mi noa dat ih need fi werk haad fi kantinyu du beta. Soh hihn mi stodi di Baibl fi fain gud advais weh wuda help ahn noa weh chaynjiz ih mi need fi mek ahn how ih kuda mek dehn. Ahn wi ku bee shoar dat wen Paal mi tel adaz weh dehn need fi du fi pleez Gaad, hihn mi du dehndeh tingz tu.

9-10. Weh mi help Paal wen ih mi feel diskorij? (Ifeezhanz 1:7) (Koment pahn di picha.)

⁹ Eevn doa Paal mi feel diskorij sohntaim, ih mi stil ga tingz eena ih laif weh mek ih feel hapi. Fi egzampl, ih mi hapi wen ih hyaa gud tingz bowt kangrigayshanz weh mi deh faar away. (2 Kor. 7:​6, 7) Ih mi hapi fi ga gud frenz monks ih bradaz ahn sistaz. (2 Tim. 1:4) An ih mi hapi fi serv Gaad “wid wahn kleen kanshans,” kaaz ih mi shoar dat Jehoava mi pleez wid ahn. (2 Tim. 1:3) Eevn wen Paal mi deh eena prizn da Roam, ih mi tel ih bradaz ahn sistaz fi “rijais aal di taim bikaaz a di Laad.” (Fil. 4:4) Dat noh song laik sohnbadi weh aalwayz di tink bowt ih prablemz ahn mistayks, noh chroo? Wi ku bee shoar dat enitaim Paal mi staat tink bowt tingz weh mek ih feel diskorij, ih wuda hori fain sohnting gud fi tink bowt weh wuda mek ih feel hapi agen.

¹⁰ Sohnting els weh mi help Paal fi bee hapi da di ransom. Da gif mi help Paal fi noa dat Jehoava lov ahn, bikaaz hihn mi seeʼt az wahn persnal gif fahn Jehoava tu hihn. (Gal. 2:20; reed Ifeezhanz 1:7.) Sayka dat, ih mi noa dat bikaaz Jeezas mi ded far ahn, Jehoava mi wahn fergiv aala ih sinz. (Roam. 7:​24, 25) Soh eevn doa Paal mi mek lata mistayk eena ih paas an ih mi wahn kantinyu mek mistayk, ih kuda mi kip aan di “wership di livin Gaad” wid jai.—Heeb. 9:​12-14.

11. Wai Paal egzampl inkorijin fi wee?

¹¹ Sohntaim wi mait feel laik wee ga di saym fait weh Paal mi gat. Wi haftu werk haad fi chrai noh tink bowt, du, er seh eniting weh Jehoava noh laik. Wi mait feel mizarabl er foschraytid bikaaz wi kyaahn aalwayz pleez Jehoava. Wahn 26-yaa-oal sista weh naym Elizac seh: “Paal egzampl reeli inkorij mi wahn lat. Ih help mi fi noa dat Ai da noh di onli persn weh haftu werk soh haad fi mek dehndeh kaina chaynjiz. An ih rimain mi dat Jehoava noa weh ih peepl di goh chroo.” Weh wee ku du fi pleez Jehoava ahn bee hapi, eevn doa wi wahn feel diskorij sohntaim?

WEH WEE KU DU WEN WI FEEL DISKORIJ

12. How wahn gud spirichwal skejul ku help wi fi bee hapiya?

¹² Kip wahn gud spirichwal skejul. Dat wahn help wi fi jraa kloasa tu Jehoava ahn fi bee hapi. Da laik wen wi eet helti food, eksasaiz regyula, ahn geh inof sleep, wi wahn feel beta. Rait soh, wen wi reed di Baibl evri day, preech, pripyaa fi wi meetin dehn, goh da meetin, ahn tek paat eena di meetin, wi wahn feel beta tu. If wi kip di du dehndeh tingz, dehn wahn help wi fi tink bowt tingz weh wahn mek wi feel hapi, insteda tink bowt tingz weh mek wi feel diskorij.—Roam. 12:​11, 12.

13-14. How som a wi bradaz ahn sistaz feel wen dehn kip wahn gud spirichwal skejul?

¹³ Wahn brada weh naym John mi fain owt dat ih ga kyansa wen ih mi 39 yaaz oal. Rong da taim, ih son mi onli chree yaaz oal. John mi feel frayd, an ih mi wori wahn lat. Ih kudn bileev dat ih kuda geh soh sik wen ih mi stil soh yong. Weh mi inkorij ahn an help ahn fi noh aalwayz bee sad? Ih seh: “Eevn doa Ah mi taiyad, Ah mi mek shoar mi famili kip op wid wi spirichwal skejul. Wi gaahn da aala wi meetin dehn, wi preech evri week, ahn wi mi du famili wership regyula eevn wen dat neva eezi fi du.” Wen John luk bak pahn evriting, ih seh: “Wen yu fain yuself eena wahn tof sichuwayshan, at fers yu wahn feel shak. Bot Ah laan dat afta wahn lee wail, yu wahn feel how Jehoava gi yu di schrent weh yu need an ih wahn shoa yu humoch ih lov yu. Jehoava ku help yu fi bee schrang, jos laik how ih mi help mee.”

¹⁴ Sista Eliza seh: “Enitaim Ah goh da meetin ahn du mi persnal stodi, ih rimain mi dat Jehoava lisn tu mi ahn dat ih reeli lov mi. Dat mek Ah feel hapi.” Wahn serkit oavaseeya fahn Africa weh naym Nolan seh weh help hihn an ih waif, Diane: “Wi kip di pray, stodi di Baibl, goh da meetin, ahn preech, eevn wen wi feel diskorij. Den Jehoava aalwayz help wi fi feel hapiya. Wen wi feel diskorij, wi chrai memba dat Jehoava wahn help wi ahn bles wi. Wi noh noa how ih wahn du dat, bot wi noa ih wahn du it.”

15. Wat els wi ku du wen wi feel sad er diskorij? Yooz di egzampl eena di paragraaf.

¹⁵ If wi stil feel sad er diskorij, wi ga ada tingz wi ku du weh ku help wi. Tink bowt it laik dis: If yu hert yu bak, yu mait need fi du moa dan jos waak evri day fi geh rid a di payn. Yu mait haftu du risaach fi chrai andastan weh kaaz di payn er yu mait haftu goh da dakta. Da di saym ting wid wi feelinz. Wi mait haftu du ekschra risaach eena di Baibl er wi poblikayshan dehn, er wi mait need fi taak tu wahn brada er sista weh ku gi wi gud advais bowt wi sichuwayshan. Ahn wi ga ada tingz weh ku help wi tu.

16. Weh ku help yu andastan wai yu feel diskorij? (Saam 139:​1-4, 23, 24)

¹⁶ Pray an aks Jehoava fi help yu andastan weh yu reeli need. King Dayvid mi noa dat Jehoava mi noa ahn gud. Soh Dayvid mi aks Jehoava fi help ahn andastan weh ih mi-di wori bowt. (Reed Saam 139:​1-4, 23, 24.) Yoo ku aks Jehoava fi help yu wid dat tu, soh dat yu ku andastan weh di bada yu ahn si weh yu ku du fi feel moa kaam. Yu ku aks yuself kweschanz laik, ‘Weh Ah reeli di wori bowt? Dehn gat eniting weh Ah aalwayz wori bowt? Wen Ah staat tink bowt sohnting weh mek Ah wori er feel diskorij, Ah stay di tink bowt it? Er Ah hori chrai tink bowt sohnting weh mek Ah feel moa hapiya?ʼ

17. Wat da sohn tingz yu ku stodi bowt fi help yu feel moa inkorij? (Koment pahn di picha.)

¹⁷ Stodi wahn tapik weh ku help yu eena yu sichuwayshan. Sohntaim ih gud fi stodi wan a Jehoava kwalitiz weh yu laik. Fi egzampl, di apasl Paal mi tink wahn lat bowt di ransom ahn Jehoava fergivnis, ahn dat mi mek ih feel tankful ahn dat Jehoava lov ahn. Yoo ku du risaach pahn tapiks laik dat tu. Yooz di Risaach Gaid fi Jehoava Witnisiz, Watch Tower Publications Index, er eni ada Baibl risaach mateeryal weh yu ku fain fi luk op moa infamayshan pahn Jehoava mersi, fergivnis, ahn lov. Wans yu fain sohn aatikl weh ku help yu, mek wahn lis a dehn. Put di lis wehpaat yu ku seeʼt, ahn den enitaim yu feel dong, yu ku stodi dehndeh aatikl. Wen yu reed di skripchaz eena di aatiklz weh yu fain, chrai tink bowt difrent wayz how dehn ku help yu feel beta noh mata weh sichuwayshan yu di fays.—Fil. 4:8.

18. Weh kaina stodi proajeks help som a wi bradaz ahn sistaz?

¹⁸ Sista Eliza mi du wahn stodi proajek pahn Joab. Shee seh: “Ah ku andastan how Joab mi feel. Hihn mi gaahn chroo wan chraiyal afta di neks. Bot eevn wen Joab mi-di sofa bad an ih neva eevn noa wai, ih neva stap luk tu Jehoava.” (Joab 42:​1-6) Sista Diane seh: “Mee ahn mi hozban di yooz di Draw Close to Jehovah buk fi du wahn stodi proajek. Wi reeli apreeshiayt how Jehoava di chrayn wi fi bee moa laik hihn. Wen wi feel diskorij bikaaz a mistayks weh wi mek, wi chrai memba dat Jehoava di teech wi ahn help wi fi bee beta peepl. Dat mek wi feel kloasa tu ahn.”—Aiz. 64:8.

JEHOAVA WAHN HELP WI AHN BLES WI

19. How wi mait feel sohntaim, bot weh wi ku bee shoar a?

¹⁹ Eevn if wi kantinyu pray, du persnal stodi, preech, pripyaa fi wi meetin dehn, goh da meetin, ahn tek paat eena di meetin, wi mait stil ga dayz wen wi wori, feel sad, er feel diskorij. Wi mait stil ga bad dayz wen wi feel mizarabl, jos laik how Paal mi feel. Bot wid Jehoava help, wi ku stap foakos pahn tingz weh diskorij wi an insted foakos pahn tingz weh mek wi feel kaam. Wi ku bee shoar dat moas dayz wi wahn bee hapi an injai wi laif bikaaz Jehoava da wi Fren ahn bikaaz hihn pleez wid wi.

20. Weh yoo waahn kantinyu fi du?

²⁰ Mek wi du wi bes fi noh mek wi prablemz, wi mistayks, er tingz weh hapm eena di paas stap wi fahn injai laif. Weneva wi feel sad er diskorij er wi di wori bowt wi sichuwayshan, Jehoava ku help wi fi feel beta. (Saa. 143:10) Wi ku luk faawod tu laif eena Paradais, wen evriting wi tink bowt wahn mek wi feel hapi. Notn noh wahn mek wi wori er schres. Ahn wi wahn wayk op evri day hapi fi kantinyu serv wi lovin Gaad, Jehoava!