King Dayvid Sin

Wen Saal ded, Dayvid ton king. Hihn mi 30 yaaz oal. Afta hihn da-mi king fi wahn lata yaaz, wahn nait hihn mi si wahn priti laydi fahn di roof a ih palis. Dayvid mi fain owt dat fi shee naym da-mi Bat-sheeba ahn dat shee mi marid tu wahn soalja weh naym Yuraiya. Dayvid mi mek Bat-sheeba kohn da ih palis. Dehn mi ga seks, ahn shee mi en op di geh pregnant. Dayvid mi chrai haid weh ih mi du. Hihn tel di leeda a ih aami fi put Yuraiya way da front wehpaat dehn di fait di haadis ahn ron lef ahn deh. Afta dehn mi kil Yuraiya eena waar, Dayvid mi marid Bat-sheeba.

Bot Jehoava mi si aala di bad tingz weh mi hapm. Weh hihn mi du bowt it? Jehoava mi sen di prafit Naytan tu Dayvid. Naytan tel ahn: ‘Wahn rich man mi ga lata sheep, ahn wahn poa man mi onli ga wan smaal sheep weh ih mi lov wahn lat. Di rich man mi tek di poa man onli sheep.ʼ Dayvid mi beks an ih seh: ‘Da rich man dizerv fi ded!ʼ Naytan mi tel Dayvid: ‘Yoo da di rich man!ʼ Dat mi brok Dayvid haat, an ih kanfes tu Naytan: ‘Ai sin gens Jehoava.ʼ Dis sin mi bring wahn lata chrobl fi Dayvid an ih famili. Jehoava mi ponish Dayvid, bot ih mi alow ahn fi liv bikaaz ih mi tel di chroot an ih mi hombl.

Dayvid mi waahn bil wahn templ fi Jehoava, bot Jehoava mi chooz Dayvid son Salaman fi bil di templ insted. Dayvid mi staat tu geh tingz redi fi Salaman an ih tel ahn: ‘Jehoava templ need fi bee wandaful. Salaman stil yong, bot Ah wahn help ahn get tingz redi.ʼ Dayvid mi doanayt wahn lata ih oan moni fi di bildin werk. Hihn mi fain sohn man weh mi noa how fi bil gud. Hihn mi kalek goal ahn silva, an ih mek dehn bring seedawud fahn Taiya ahn Saidan. Wen Dayvid mi wahn soon ded, ih giv ih son Salaman di planz fi bil di templ, an ih tel ahn: ‘Jehoava mi mek Ah rait dong dehnya tingz fi yu. Noh bee frayd. Bee schrang ahn du di werk.ʼ