LESN 52
Jehoava Grayt Aami
Di king a Siriya, Ben-haydad, mi atak Izrel wahn lata taim. Bot eech taim, di prafit Ilaisha mi waan di king a Izrel an ih tel ahn fi eskayp. Soh Ben-haydad mi disaid fi kidnap Ilaisha. Hihn mi fain owt dat Ilaisha mi deh da di siti a Doatan, an ih sen di aami a Siriya fi kech ahn deh.
Di aami mi reech Doatan eena di nait. Di neks maanin, Ilaisha servant gaan owtsaid an ih si wahn aami wid aal dehn haas ahn waar chariyat di sorong di siti. Hihn mi soh fraitn dat ih hala: ‘Ilaisha, weh wi wahn du now?ʼ Ilaisha tel ahn: ‘Wee ga moa pahn fi wee said dan weh dehn gat.ʼ Rait away, Jehoava mek Ilaisha servant si how lata haas ahn waar chariyat weh mi ga faiya aal rong dehn mi-di sorong di mongtin dehn.
Wen di soaljaz fahn Siriya mi-di chrai kech Ilaisha, hihn mi pray: ‘Jehoava, pleez blain dehnya peepl.ʼ Eevn doa di soalja dehn kuda stil si, dehn mi kanfyooz ahn dehn neva noa wehpaat dehn mi deh. Ilaisha tel dehn: ‘Unu deh eena di rang siti. Fala mi, Ai wahn kehr unu tu di man weh unu di luk fa.ʼ Dehn fala Ilaisha way op tu Samayrya, wehpaat di king a Izrel mi liv.
Di soalja dehn fahn Siriya mi riyalaiz wehpaat dehn deh, bot ih mi don tu layt. Di king a Izrel mi aks Ilaisha: ‘Ah shuda kil dehn?ʼ Memba how di soalja dehn mi chrai hert Ilaisha bifoa? Yu tink hihn mi tek dat az wahn apachooniti fi chrai hert dehn? No. Soh Ilaisha ansa di king: ‘Noh kil dehn. Gi dehn sohn food ahn sen dehn bak tu di king.ʼ Soh di king a Izrel mi ga wahn big bankwit fi dehn an ih sen dehn bak hoam.
“Wi chros dat noh mata weh wi aks Gaad fa, wans wi aks akaadn tu fi hihn wil, ih hyaa wi.”—1 Jan 5:14