Wai Wi Need di Ransom

1-2. Wai wi need sohnbadi fi sayv wi? (Roamanz 7:​22-24) (Koment pahn di picha.)

IMAJIN yu deh eena dis sichuwayshan. Wahn bildin jrap dong ahn yoo deh eensaid. Yu chrap andaneet ahn yu kyaahn get owt. Aal yu ku du da hala ahn hoap sohnbadi kohn sayv yu.

² Aala wi deh eena wahn sichuwayshan laik dat. Afta Adam mi ton gens Jehoava, ih neva perfek agen. Ahn soh ih pikni dehn noh perfek needa. Aala wi chrap eena da sinful kandishan, ahn wi kyaahn get owt pahn wi oan. Wi need sohnbadi fi set wi free. Di apasl Paal seh dat sin tek wi prizna. (Reed Roamanz 7:​22-24.) Laik aala Adam pikni, Paal da-mi wahn sina, ahn sayka dat ih mi wahn ded. (Roam. 6:23) Soh hihn mi waahn noa hoo ku sayv ahn. Wee deh eena di saym sichuwayshan laik hihn. Wee need sohnbadi fi sayv wi fahn sin ahn det.

3. How di ransom sayv wi?

³ Afta Paal mi taak bowt di bad sichuwayshan weh ih mi deh eena, ih mi gi wi hoap. Afta ih mi aks: “Hoo wahn reskyu mee fahn dis badi weh wahn mek Ah ded?” ih mi ansa ih oan kweschan wen ih seh: “Ah tank Gaad bikaaz hihn yooz Jeezas Krais wi Laad fi reskyu mi!” (Roam. 7:25) Paal mi-di taak bowt Jeezas ransom sakrifais.a Dat da how Jehoava sayv wi. Sayka da ransom, (1) Jehoava ku fergiv wi sinz, (2) wi ga hoap fi bee perfek eena di fyoocha, ahn (3) wi ku bee gud frenz wid Jehoava. Eena dis aatikl, wi wahn laan moa bowt how di ransom sayv wi. Di moa wi tink bowt dat, di moa wi wahn lov Jehoava, “di Gaad weh gi wi hoap.” (Roam. 15:13) Ahn wi wahn bee eevn moa tankful dat Jeezas “set wi free.”—Kol. 1:14.

BIKAAZ A DI RANSOM, WI KU GEH FERGIVNIS FI WI SINZ

4-5. Wai aala wi need di ransom? (Ikleeziyasteez 7:20)

⁴ Wi need di ransom soh dat Jehoava ku fergiv wi sinz. Evri wan a wi sin; ih ku bee sohnting wi seh er sohnting wi du. (Reed Ikleeziyasteez 7:20.) Som sinz wers dan adaz. Fi egzampl, akaadn tu di Laa weh Gaad gi Moaziz, peepl weh mi komit adolchri ahn merda mi fi ded fi dehn sin. (Lev. 20:10; Nom. 35:​30, 31) Bot eevn soh, wahn smaal sin da stil wahn sin. Fi egzampl, Dayvid mi seh: “Ah wahn bee kyaaful wid weh Ah du soh dat Ah noh sin wid mi tong.” (Saa. 39:1) Dat meenz eevn weh wi seh ku bee wahn sin.—Jay. 3:2.

⁵ Yu eva wish yu kuda tek bak sohnting weh yu seh er du eena di paas? Aala wi seh ahn du tingz weh wi wish wi kuda chaynj. Di Baibl seh: “If wi seh, ‘Wi noh ga no sin,ʼ den wi onli di fool op wiself ahn di chroot noh deh eena wi haat.”—1 Jan 1:8.

6-7. Wat da di reezn wai Jehoava ku fergiv wi sinz? (Koment pahn di picha.)

⁶ Bikaaz a jostis, Jehoava kyaahn jos fergiv wi rait soh. Jehoava mi need fi du sohnting weh wuda alow ahn fi fergiv wi widowt goh gens ih raichos standadz. Di ransom da di reezn wai Jehoava ku fergiv wi. (Ifee. 1:7) Bot jos bikaaz Jehoava ku fergiv wi sinz, dat noh meenz hihn noh kay if wi sin. Jehoava hayt it wen wi sin.—Aiz. 59:2.

⁷ Akaadn tu di Laa weh Gaad gi Moaziz, di Izrelait dehn mi haftu sakrifais animalz fi geh fergivnis fi dehn sinz. (Lev. 4:​27-31; 17:11) Dehndeh sakrifais mi shoa dat peepl mi need wahn beta sakrifais. Dat da-mi di sakrifais weh Jeezas mek, ahn da sakrifais bring blesinz fi evribadi. Fi hihn sakrifais da di reezn wai Jehoava ku fergiv wi sin dehn. Paal mi andastan how peepl mi wahn benifit fahn Jeezas sakrifais. Wen ih mi rait ih leta tu di bradaz ahn sistaz da Korint, ih mi lis aaf di bad tingz weh dehn yoostu du, ahn den ih mi tel dehn: “Gaad wash unu kleen, ahn set unu wan said fi ihself, an ih aksep unu az raichos peepl eena di naym a di Laad Jeezas Krais ahn wid di hoali spirit.”—1 Kor. 6:​9-11.

8. Weh yu ku tink bowt bifoa yu goh da di Memoaryal dis yaa?

⁸ Bifoa yu goh da di Memoaryal dis yaa, tek taim fi tink bowt how yu benifit bikaaz Jehoava fergiv yu. Fi egzampl, bikaaz a di ransom, yu noh haftu feel gilti fi sinz weh yu don ripent fa. Yoo fain it haad fi aksep dat Jehoava don fergiv yu fi sinz weh yu komit eena di paas? Maybi yu tink dat Jehoava ku fergiv yu, bot yoo kyaahn fergiv yuself. If da soh yoo feel, memba dat Jehoava da di wan weh fergiv, ahn hihn giv ih Son di rispansabiliti fi joj peepl. Jehoava noh gi yoo ner eni ada persn di rait fi disaid hoo ih wahn fergiv er noh fergiv. Di Baibl seh: “If wi di waak eena di lait jos laik how Gaad ihself liv eena di lait, den . . . di blod a Jeezas ih Son mek wi kleen fahn aal sin.” (1 Jan 1:​6, 7) Dat jos az chroo az eni ada Baibl teechin, soh wi ku chros it. Di ransom gi Jehoava gud reezn fi fergiv wi fi wi sinz, ahn di Baibl seh dat hihn “aalwayz redi fi fergiv.”—Saa. 86:5.

BIKAAZ A DI RANSOM, WI KU BEE PERFEK EENA DI FYOOCHA

9. Weh di Baibl meen wen ih taak bowt sin? (Saam 51:5)

⁹ Eena di Baibl, sin ku meen sohnting bad weh wi du er ih ku meen di sinful kandishan weh wi inherit fahn Adam. (Reed Saam 51:5.) Bikaaz wi inherit sin, sohntaim wi seh er du bad tingz ahn wi badi noh werk di way Jehoava dizain it. Soh wi geh sik, wi geh oal, ahn wi ded. Dat da wai eevn wahn nyoobaan baybi ku geh sik ahn ded eevn doa ih noh du notn rang. Da di saym reezn wai gud peepl ahn bad peepl sofa ahn ded. Non a Adam pikni perfek, soh aala wi sofa fahn da saym sinful kandishan.

10. How Adam an Eev mosi mi feel afta dehn sin?

¹⁰ Tink bowt how Adam an Eev mosi mi feel afta dehn sin ahn dehn neva perfek agen. Az soon az dehn brok Gaad laa, dehn kanshans staat tu bada dehn ahn dehn staat tu feel bad eensaid. (Roam. 2:15) Dehn mi noa sohnting rang, ahn dat da wai dehn mi feel laik dehn haftu kova op dehnself ahn haid fahn Jehoava. (Jen. 3:​7, 8) Fi di fers taim, Adam an Eev mi feel gilti, frayd, ahn shaym. Ahn dehn mi wahn feel laik dat fi di res a dehn laif.—Jen. 3:​16-19.

11. How wi feel bikaaz wi noh perfek?

¹¹ Laik how wi noh perfek, sohntaim wi feel gilti, shaym, ahn frayd. Aala wi payn ahn sofarin da sayka wi sinful kandishan. Noh mata how haad wi chrai fi mek tingz beta, wi onli ku du soh moch. Dis da bikaaz di Baibl seh dat wi “en op di liv wahn laif weh yoosles.” (Roam. 8:20) Wi si dat eena wi persnal laif, ahn wi seeʼt fi aal peepl in jenaral. Fi egzampl, lata peepl chrai haad fi tek kayr a di ert, fi geh rid a kraim, fi mek shoar evribadi ga weh dehn need fi liv, ahn fi put wahn en tu waar. Bot noh mata how haad dehn chrai, dehn kyaahn fiks aala di prablemz. How di ransom ku sayv wi?

12. Weh hoap di ransom gi wi?

¹² Bikaaz a di ransom, wi ku ‘geh set free soh dat wi noh haftu bee slayv tu koropshan.ʼ (Roam. 8:21) Wen wi deh eena Paradais ahn wi perfek, wi noh wahn sofa fahn aala di fizikal, mental, an imoashanal prablemz weh wi ga rait now. Ahn wi noh wahn ga no reezn fi feel gilti, frayd, er shaym. Pahn tap a dat, evriting weh wi du fi tek kayr a di ert ahn fi liv eena pees noh wahn bee yoosles. Yu noa wai? Bikaaz Jeezas Krais, di wan weh pay di ransom, wahn bee King, ahn hihn da di “Prins a Pees.” (Aiz. 9:​6, 7) Soh hihn wahn help wi fi fiks aala di prablemz weh wi kyaahn fiks bai wiself.

13. Wat els yu ku tink bowt bifoa yu goh da di Memoaryal dis yaa?

¹³ Di ransom gi wi hoap fi di fyoocha, bot ih gi wi komfert now, tu. Tink bowt weh dat meenz fi yoo. Imajin wen yu wahn ku wayk op evri day ahn feel gud. Yu noh wahn haftu frayd dat yoo er peepl weh yu lov wahn goh widowt food, wahn geh sik, er wahn ded. Aala wi di luk faawod tu di taim wen dehndeh tingz hapm. An if wi “hoal aan tait tu di hoap,” ih wahn gi wi komfert, bikaaz da hoap “da laik wahn anka eena wi laif, ih schrang an ih kyaahn fayl.” (Heeb. 6:​18, 19) Jos laik how wahn anka hoal wahn boat stedi, da rait soh wi hoap ku help wi kip wi fayt schrang ahn noh giv op wen wi goh chroo chraiyalz. Yu ku bee shoar dat Jehoava “wahn bles di wan dehn weh di chrai dehn bes fi du ih wil.”—Heeb. 11:6.

BIKAAZ A DI RANSOM, WI KU BEE JEHOAVA FREN

14. Afta Adam an Eev mi sin, weh hapm tu peepl rilayshanship wid Jehoava, ahn wai?

¹⁴ Jehoava perfek. Di Baibl seh dat Jehoava “tu pyoar fi luk pahn eniting weh eevl,” ahn dat ih “kyaahn talarayt wikidnis.” (Hab. 1:13) Dat meenz ih kyaahn ga notn fi du wid enibadi weh noh perfek. Soh afta Adam an Eev mi sin, needa dehn ner dehn pikni kuda mi ga wahn kloas rilayshanship wid Jehoava. Akchwali, di Baibl seh dat aala wi deh faar fahn Gaad. (Roam. 8:​7, 8; Kol. 1:21) Soh bikaaz aala Adam disendant dehn da-mi sinaz, dehn kudn du notn fi fiks dehn rilayshanship wid Jehoava. Bot Jehoava gi wi di ransom fi set wi free fahn sin. Sayka dat, wi ku bee Jehoava fren.

15. How di ransom help wi fi ga wahn kloas rilayshanship wid Jehoava?

¹⁵ How di ransom help wi fi ga wahn kloas rilayshanship wid Jehoava? Di Baibl seh dat Jeezas da “wahn sakrifais fi fi wee sinz soh dat wi ku ga pees wid Gaad.” (1 Jan 2:2) Bikaaz Jeezas ded fi wi, notn di stap Jehoava fahn alow wi fi bee ih fren. Hihn ku bee wi fren widowt goh gens fi hihn perfek standadz. (Roam. 3:​23-26) Bot how bowt faytful peepl weh mi ded bifoa Jeezas? Gaad mi stil aksep dehn az raichos bikaaz a di ransom. (Jen. 15:​1, 6) How hihn kuda mi du dat if Jeezas neva pay di ransom yet? Jehoava kuda mi du dat bikaaz hihn mi soh shoar dat Jeezas mi wahn pay di ransom. (Aiz. 46:10) Soh bikaaz a di ransom, peepl ku ga wahn gud rilayshanship wid Gaad.

16. Wat els yu ku tink bowt bifoa yu goh da di Memoaryal dis yaa? (Koment pahn di picha.)

¹⁶ How ih mek yu feel dat yu ku ga wahn gud rilayshanship wid Jehoava? Maybi yu kaal Jehoava yu “Faada,” laik weh Jeezas mi teech wi fi du. (Mach. 6:9) Sohntaim, yu mait eevn kaal Jehoava yu “Fren.” Bot wen wi kaal Jehoava wi “Faada” er wi “Fren,” wi stil need fi bee hombl ahn shoa rispek. Wai? Bikaaz wi da sinaz, ahn wee neva du notn fi dizerv da frenship wid Jehoava. Wi wudn eevn ga wahn rilayshanship wid Jehoava if da neva fi di ransom. Chroo “di blod weh Krais mi poar owt pahn di taacha stayk,” Jehoava mek it pasabl fi “bring bak tu ihself evriting weh deh pahn di ert an evriting weh deh da hevn.” (Kol. 1:​19, 20) Ahn dat da wai wi ku ga wahn kloas frenship wid Jehoava eevn doa wi da sinaz.

DI RANSOM SHOA WI JEHOAVA MERSI

17. How di ransom shoa wi dat Jehoava da wahn mersiful Gaad? (Ifeezhanz 2:​4, 5)

¹⁷ Di ransom shoa wi dat Jehoava “ga soh moch mersi.” Ih “gi wi laif . . . wen wi mi ded sayka wi sin dehn.” (Reed Ifeezhanz 2:​4, 5.) Peepl weh ga “di rait haat kandishan fi get evalastin laif” di beg fi help, bikaaz dehn noa dat dehn chrap eena dehn sinful kandishan ahn dehn need sohnbadi fi sayv dehn. (Aks 13:48) Jehoava help dehn wen ih mek shoar dat dehn laan di gud nyooz soh dat dehn ku geh fi noa hihn an ih Son, Jeezas. (Jan 17:3) Wen Adam an Eev mi sin, Saytan mosi mi tink dat hihn mes op Gaad planz, bot hihn mi kompleetli rang.

18. Wail wi di tink bowt di ransom, wat els wi need fi memba?

¹⁸ Wi benifit fahn di ransom eena lata difrent wayz, bot wi noh onli waahn tink bowt how wee benifit. Wi need fi memba dat di mayn reezn wai Jehoava provaid di ransom da fi proov dat evriting weh Saytan seh eena di gyaadn da Eedn da lai. (Jen. 3:​1-5, 15) Jehoava yooz di ransom fi klayr ih naym. Di ransom aalso shoa wi dat Jehoava da wahn lovin Gaad, bikaaz ih yooz it fi set wi free fahn sin ahn det. An eevn doa wee da sinaz, Jehoava soh kain dat ih alow wi fi help proov dat weh Saytan seh bowt ahn da lai. (Prav. 27:11) How yu ku shoa dat yu apreeshiayt di ransom? Wi wahn taak bowt dat eena di neks aatikl.