Gayarati san lafiñerúniwa luagu relihión lidan luáguti wuribu?

Abahüdahati Alberto, le meha eseriwidubei yarafa lun diisi irumu kei milidaru: “Biní lumutiwa fádiri lau lariñagun woun: ‘Anihein Bungiu huma’. Ábati nasaminarun: ‘Ida liñati néibuga lan áfaraha dan le ariñaga tan Bíbülia: “Máfarahaba”?’”.

Seriwiti meha Ray kei súdara tidan waporu milidaru lidan Libiaman Wuribu Wéiriti. Lidan aban ókaasion, aba lariñagun Ray lun fádiri: “Dinaadün tidoun waporu to afurieida hawagu súdaragu lun hagañeiruni wuribu. Gama lumoun, máfunagia ligiaméme hadügübei wáganiñu?”. Lun lóunabuni, aba lariñagun fádiri lun siñati lan gunfurandawa lan lémeri Aburemei.

Anhein ua lubéi gufuruma humá lau óunabagülei le, madiherida humá, mámarügüñadün huguya.

KA TARUFUDAHABEI BÍBÜLIA?

Ariñagati Hesusu anihán lan aban lídangiñe gumadi le súdinitimabei: “Hínsiñela bíbiri bun kei bínsiñegua bungua” (Márükosu 12:31). Ariñagati funagia luáguba lan linasiñun aban gürigia línsiñeda woun? Uá, mariñagun lumuti lira. Ariñagati houn lani disipulugu: “Anhaün hínsiñegua húmagua, hasubudirubei sun gürigia luagu nani humá disipulugu” (Huan 13:34, 35). Wéiribei buga ínsiñeni le lunbei harufuduni darí lun furangubei lan larihín mítaran hamá kei ha híbiri gürigia. Máhabaña buga háfarahan ani aranseñu haba giñe lun híchuguni habagari hawagu amu.

Ani ligía meha hadügübei. Ariñagatu aban líburu: “Chóurugüda hamuti furumiñetiña tábutigu ligilisi, kéiburi Tertulianu luma Orígenes hámaya amu, luagu magidarun hamani kristiánugu habagari gürigia háledi hawéi, adügati meha lira, lun hamahadun heseriwidun kei súdara rómana” (The Encyclopedia of Religion).

KA GAYARABEI LARIÑAWAGÚN HAWAGU GEFENTIÑA LUAGU HEOWÁ?

Añahein gefentiña luagu Heowá lidan libe-agei ageiraü. Dan le ñein lan aban wuribu, meberesenga halía lan, adüga hamuti gefentiña luagu Heowá ha lídanbaña ageiraü burí le awuribuhabei sun hayaraati lun harufuduni ínsiñeni le hádanbei.

Aban hénpulu, danbei le hageindagun hutu hama tutsi ha lídanbaña ageiraü Ruanda hámagua lidan irumu 1994, mádaraguntiña gefentiña luagu Heowá houngua ni murusun lidoun wuribu. Aramuda hamutiña lílana aban türibu lílana le aban, íbini ru hamani habagari lidoun denchaü. Ariñagatiña fiú milidaru tídangiñetiña Interahamwe houn bián gefentiña luagu Heowá hutu ha hárügüdübaña ladüga haramudun hádangiñe hábirigu ha tutsi: “Lasusereduña le hun ladüga híderaguniña tutsi”. Ábati háfaraguniña biángubei hagía hilagubei (Huan 15:13).

Ka hasaminarubei? Úarati san hóuserun gürigia ha ha magurabunbaña habihin ni kata luagu le hadügübei luma le lariñagubei Hesusu luagu ínsiñeni?