Gayarati san lafiñerúniwa luagu relihión lidan luáguti seinsu?

Estela,a to meha gabasihadiboun hama tirahüñü tidoun aban ligilisi, aba tariñagun lun le alidihabei ñein busén tan gunfurandatanu Bíbülia, keiti mariñagun lubéi tun líderaguboun lan aba mabasihánharu lan tidoun ligilisi. Ariñagatu: “Aba habürühan nun tídangiñe ligilisi ariñaga nun anhein lan siñá lubéi nadamuridagun buídurügüti lan nóunahani budagia houn. Aba níchugun fe niseinsunrügüñein lan habusenra”.

Ariñagatu Ánhelina, to gúnfuliboun luma tani relihión lúmagiñe furumiñeti dan: “Tidan ligilisi to meha ídounboun nabasiha sügügüdawati meha lagei seinsu ǘrüwa wéiyaasu dan le aniha lan kultu, ani agurabúati meha wíchugun seinsu sagü lásügürün. Sun meha dan hau amuriaha seinsu. Ábati nasaminarun: ‘Úati lani Bungiu sífiri hawagu’”.

Dǘgüdawati san hawagu tílana ligilisi to hasubudiruboun, furangu lan yebe o lábugiñegua, lun híchugun seinsu? Úarati san katei le luma le tarufudahabei Bíbülia?

KA TARUFUDAHABEI BÍBÜLIA?

Ariñagati Hesusu, le meha agumeserubalin hani kristiánugu relihión: “Mafayeihantün [...], maguburaha humá giñe” (Matéu 10:8). Moun lumuti lalugurahóun uganu gebegiti le tídanbei Bíbülia, ani lunti hamuga giñe gayara lan haganbuni sun gürigia.

Ida liña meha hafayeiruni furumiñetiña kristiánugu le lagastarubei damuriguaü?

Ruti meha “kada aban [...] keisi lasandiruni tidan lanigi; mama lau magundani ni ladüga lariñawagún [houn] lun híchugun, lugundun hínsiñehabuti Bungiu lun le íchugubei lau ugundani” (2 Korintuna 9:7). Adaaguati meha apostolu Pábulu kianpu lun lafayeiruni sun le lagastarubei lidan lani ministeriu (Adügaü 18:2, 3). Ligía guánarügü ariñagubei: “Nadagimeintiwa meha wéyuagu áriebu lun mámabadiwa lan ihürügu lun ni aban hídangiñe, sun awanha lan apurichihei luganute Bungiu hun” (1 Tesalónikana 2:9).

KA HADÜGÜBEI GEFENTIÑA LUAGU HEOWÁ?

Mama fulasu hanarimeguti luenden Luban Hadamuridagun Gefentiña luagu Heowá. Ida liña lafayeirúniwa le agastarúbei? Másügüragüdüntiña gefentiña luagu Heowá lagei seinsu ani móunahan hagía sóbüre lun hamuriahan seinsu. Lubaragiñe lira, lau duari, gayarati híchugun gürigia ha eteingirubalin arufudahani le heresibirubei tídangiñe Bíbülia budagia tidoun gafu to burí tídanboun Luban Hadamuridagun Gefentiña luagu Heowá.

Inarüni mégeiwa lan seinsu lun imprimírua tan luma lun tafanreinhóuniwa garüdia to. Gama lumoun, marihinbadün awisahani tidan luagu somu ebegidinaü ni awisahani lun lamuriahóun seinsu. Tasubudiragüdüni inarüni le tídanbei Bíbülia ligíarügüñein tisuuni garüdia to.

Ka hasaminarubei? Úarati san aransehani le dandu luma le larufudahabei Hesusu kei luma hénpulu le híchugubei furumiñetiña kristiánugu?