Lubafu óunweni

Wéiriti igarigu le lanügübei óunweni, ani hibe-agei gürigia mínsiñeti houn hayanuhan luagu. Gama lumoun, súnwandan lachülürün oura lun lasuseredun woun.

Úati ni kata gayarati laranseruniwa lubá weferidiruniña wagübürigu, wámari o somu wasaani. Gayarati lasuseredun sódini o lau lámarun. Gama lumoun, meberesenga ida liña lan lasuseredun, súnwandan gari lan ani hanarimeti lani efekütu.

Féridi lumuti Antonio lúguchi, áfararügü tumuti aban karü dan le léibuguña lan laru laru üma, abahüdahati Antonio: “Ítara liña kamá hamuga ñǘdünrügüti aban gürigia adouraguoun buban ani aba lagidaruni geléin buéi. Maweiyasunhadibu ebelura. Haritaguarügaadibu tuagun. Ítarahali iseri bibagari. Marichati barihini ani mabusenruntibu bawinwandun ítara, gama lumoun, úati amu katei lunti badügüni”.

Dorothy, aban máistara to arufudahaboun tidan aban ligilisi sagü dimaasu, 47 meha irumu tau dan le lóunwenbei tani weiriei. Íbini mafiñen tan lidan lan óunweni lagumucha sun katei, machourun tumuti meha ani aba táluahan óunabagülei lun sun álügüdahani le lídanbei tisaminan. Aba tálügüdüni tábuti ligilisi to ídanboun tidin: “Ka asuseredubei woun dan le wóunwegun?”, aba lariñagun tun: “Úati asubudiruti óunabagülei le. Mosu wagurabahan lun warihini”.

Inarüni san katei le? Mosu san wagurabahan, o anihein somu manera lun wasubudiruni anhein lidan lubéi óunweni lagumucha sun katei?