TÍTULU LE LUÁGUBEI TIDÁÜ: LIDAN SAN ÓUNWENI LAGUMUCHA SUN KATEI?
Láfaagun wügüri lun lagañeiruni óunweni
GUMADAN WÉIRIGUTI QIN SHI HUANG
ASAGARAHATI PONCE DE LEÓN
Óunweni ligía ágani wuribatimati le wabusenrubei wagañeirun. Dan le lounwen somu waduhe, háfuga mabusenruntiwa wánharun luagu ligía lan asuseredubei. Anhein nibureingidiwa lubéi, aba wasaminarun móunwenbadiwa lan, aban iyeeni le hasaminarubei saragu.
Fiúrügüñanu gürigia asaminarutiña saragu luagu óunweni kei binadu lurúeitegu Ehiptu. Yusu hamutiha libe-agei dan lidan habagari —luma habagari saragu milu nadagimeintiña— áfaagua lun hagañeiruni óunweni. Óunwenbu burí ábunaguni lenege wübü le hadügübei lau dübü ligía arufudubalin lanarime háfaagun... luma heferidirun.
Saminatiña meha giñe urúeigu cheiní luagu hadarirubei lan manera lun móunwedadi hamá: lau hadariruni árani le nege lunbei lakipuruniña wínwanñu. Urúei le gíribei Qin Shi Huang amuriahati meha hama lánigu gabiñarahatiña lun lan hadarirun aban “árani” le lunti lagidaruni óunweni. Saragu lídangiñe amigisihani ligía gaganati meha mercurio. Genegeti aban lan lídangiñe “árani” ligía áfarubalin.
Lidan sígulu XVI, éibuga lumuti Juan Ponce de León, le esüpáñana, sun louba ageiraü le gíribei Puerto Rico (Potu Rísiti) áluaha árani lun maweiyadun lan. Íbini darí lani ageiraü le gíribei Florida (Meriga) lidan sun láluahan ligía, hilati fiú irumu lárigiñe lidan aban wuribu hama merigana ha erederubaña lidan fulasu ligía, ani madari lumuti árani le láluahabei.
Lurúeitegu Ehiptu, lurúeitegu amu burí ageiraü hama akutihatiña áfaaguatiña lun hagañeiruni óunweni. Ani íbini magundan wamá lau ligaburi háluahani, gunfuranda wamuti ka lan uagu hadügei, lugundun sun gürigia busentiwa wasigirun awinwanda.
GAYARATI SAN LAGAÑEIRÚNIWA ÓUNWENI?
Ka san uagu mabusenrun habéi gürigia hóunwegun? Afuranguagüda tumuti Bíbülia ka lan uagu dan le tariñagun luagu Bungiu le Adügübadiwa, Heowá: “Buiti ladügüni sun katei lidan lidaani; ru lumuti giñe súnwandan tidoun hanigi gürigia” (Apurichihati 3:11, Reina-Valera Actualizada).a Ligía busén wabéi wawinwandun ligibuagu lubuidun ubóu le lun súnwandan, mámarügü luagu gádürü-wein irumu (Sálumu 90:10). Ligía wayumahabei tidan wanigi.
Ka uagu líchigei Bungiu súnwandan tidoun wanigi? Lun san magundan wamá? Uá, maweiyasunti Bungiu adügei le. Füramaseti Bungiu lagünrinchagubei lan óunweni. Adimurehatu Bíbülia saragu wéiyaasu luagu füramasei le ladügübei luagu líchugubei lan ibagari magumuchaditi woun luma luagu lagumuchagun óunweni. (Ariha huméi rekuáduru “Agañeiruni luagu óunweni”.)
Ariñagati Hesukrístu furangu: “Anihán lébunabei ibagari le magumuchaditi, lun hasubudirunibu buguya le Bungiu ábanrügüti, le inarüniti, luma lun hasubudirunina , au Hesukrístu le bóunahabei” (Huan 17:3). Lagañeiruba lubeiti wuribu kóntüra óunweni. Gama lumoun, kei lariñaguni Hesusu, megei wamuti Bungiu lun wagañeiruni.
a Ariñagatu Bíbülia Heowá lan líribei Bungiu.