Ida luba harufudahan houn hisaanigu?
“Sagü meha naganbun tásügürün aban karü aba tádühan nanigi. Anihán meha lǘrüwan wéiyaasu leletidún Jordan ǘmada saragu dan lárigiñe oura le wíridubei lun lun lachülürün. Ábati nasaminarun ‘Hagéi san? Susere funa san somu katei lun? Meberesegunti san awanha lan ya lau lanarime idiheri?’. Dan le lachülürünbei múnadoun, gáñihadina.” (GEORGE)
“Aba naganbuni tagúaragun nisaani ani aba lásiurun lau nura. Dan le narihinbarun, tayahuahaña lau túhabu tábulugu. Aban tamulen, gádürü irumu lau, agayuahabei tuagu.” (NICOLE)
“Natalie, wasaani sisi irumu tau, aba tariñagun woun: ‘Mama níweruhan bagü le, nabudun!’. Arihúati lidan óunwenbu burí tagu dínguti kamá hamuga tinarün tariñagubei. Wéiriti ligari woun maha tan tariñaguni tíweruhan lan darí lun aba lan wayahuahan, lugundun subudi wamuti luagu teyeehaña lan.” (STEPHEN)
SUSEREELI san somu sügǘ libe le hun? Dan le hagagibudagun luma aban turóbuli libe le, álügüdaguatün san hungua ida luba lan hererehan houn hisaanigu, o anhein lunti lubéi hadügüni? Wuribati san lererehóun houn o habeichún isaanigu?
KA MINI LUBÉI EREREHANI O ABEICHÚNI?
Tidan Bíbülia, dimurei ererehóuni luma eweridihani mama ligiaméme luma abeichúni. Yúsuati dimurei burí le lun layanuhóun luagu arufudahani, adundehani luma luagu eweridihani, mama layanuhaña luagu houserún gürigia wuriba o lau furundei (Ariñawagúni 4:1, 2).
Ítara liña híderawagun irahüñü lun buidu lan hóuserun kei lounigirún aban fuluri-agei. Le óunigirubei aban fuluri-agei mosu laranseruni múa, láturaguni fuluri, líchugun múa luagu lugudina, lóunigiruni hawéi animaalu, ani anihein dan mosu latirimuhani lun láhüchün kei aubei labusenra. Subudi lumuti anihein lan saragu katei lunti ladügüni lau duari lun buidu lan laweinamudun linadüri. Ítarameme, gíbeti katei lunti hadügüni agübürigu lun harufudahan houn hasaanigu. Ererehóuni aban lídangiñe, anihein dan mosu lan lererehóun houn lúmagiñe ñǘbürigiña lun hígiruni luriban igaburi ani lun haweiridun lau igaburi buiti. Ítara kei mosu lan latirimuhani le óunigirubalin fuluri-agei fuluri lau duari lun magadeirun lani, lunti giñe hererehan agübürigu houn hasaanigu lau ínsiñeni.
Ru laali Heowá hénpulu houn agübürigu lidan katei le. Ererehani le líchugubei huuti saragu darí lun aba lan línsiñedun houn lubúeingu ha gaganbadibaña (Ariñawagúni 12:1). Aba hárügüdüni ani mígirun hamuti (Ariñawagúni 4:13). Ruti Bungiu ererehani 1) lau ínsiñeni, 2) lau lichú aau luma 3) lau úarani. Anhein busén hubéi lun lóunabun hisaani buidu lun hererehan, áyeiha huméi Heowá ani adüga huméi ǘrüwa katei le.
LAU ÍNSIÑENI
Ladüga hínsiñehabu lan Bungiu ligía lererehanbei ani lau ínsiñeni ladügei. Ariñagatu Bíbülia: “Ladüga wéridi lumutiña Bungiu gürigia ha hínsiñebaña lun, kei ladüga aban úguchili lun liráü le hínsiñetimabei lun” (Ariñawagúni 3:12). Ani úati giñe furunde lan Heowá, lubaragiñe lira ‘gudemehabuti, gaguraasunti ani wéiriti lidan ínsiñeni luma inarüni’ (Áfuriduni 34:6). Madügünti bula, mayusurúnti dimurei le gáriti houn gürigia ani máguyuguagüdünlei hachara súnwandan, lugundun gayarati ladügün dimurei burí ligía saragu dañu (Ariñawagúni 12:18).
Inarüni ua hamá agübürigu ha gayarati háyeihani luguraasun Heowá buidu buidu. Aniheinbei dan hasandirun hagañida lan, ani danme lasuseredun ítara, haritagua huméi dan le lan habeichuni hisaani lau igañi gayarati habuleseiruni ani mibihin hubéi resultóu le habusenrubei. Mítaranti arufudahani.
Luagu amu oubaü, ánhadün árügüdagua hungua ani aba hererehan lun hisaani lau ínsiñeni, buídutimabei resultóu le lunbei hibihini. Ariha waméi ka lan hadügübei George tuma Nicole, biama hádangiñe agübürigu ha uágubaña wayanuha lidan lagumeseha arütíkulu.
“Dan le lachülürünbei Jordan múnadoun, mama murusun heniu le wawagubei, gama lumoun, aganba wamuti le lariñagubei lau darangilaü. Kei le létihali lubéi oura ligía, aba desidírü wamá wayanuhan binaafin. Furíeitiwa úara ani aba woudin arumuga. Larugan binaafin, darangilu háadiwa ani gayarahali waransehani katei lau darangilaü lun wachülürün tidoun lanigi wasaani. Ánhati lun lidurun ani sigí lumuti lúrudu le wíchugubei lun. Seremei aba lan wíchugun fe luagu mabuidun lan hadügün gürigia katei dan le gáñiñanu lan. Dan le waganbun furumiñe, buídutimati léibugun katei.” (George)
“Aba nagañidun saragu dan le lagayuahabei nisaani tuagu litu, lubaragiñe nígiraguagüdün nungua lun igañi, aba narügüdagun nungua aba nóunahani lisounburugun lun níchugun dan lun lásügürün nigañi. Dan le ladilirun nichügü, aba nafuranguagüdüni lun wuriba lan furundei ani bulesei lanu litu. Buiti lidin nun lau nadügüni ítara, lugundun amuriahati ferudun tuma ani hóuburaloun.” (Nicole.)
Ítara liña, lun wibihin resultóu buiti, erereha wamá lau ínsiñeni, íbini anhein mosu lubéi wabeichuni wasaani.
LAU LICHÚ AAU
Súnwandan lererehan Heowá woun ‘keisi wadüna’ (Heremíasi 30:11; 46:28). Téniti lun sun le asuseredubei, íbini anhein úa lubéi furangu lan. Ida luba san háyeihani agübürigu? Ariñagati Stephen, le buga uágubei wayanuha: “Íbini weiri lan igarigu wawagu ani úati gunfuranda wamani ka lan uagu teyeedawa Natalie, saminatiwa luagu tirumudiri luma katei le furendei táalibei”.
Robert, le tani Nicole weiriei, hóuchati giñe gunfuranda lani sun le asuseredubei. Sagü hóuserun lisaanigu wuriba, aba lálügüdagun lungua: “Furumiñe san lasuseredun le o héchuduña adügei? Buchá san hawagu? Wuribati san hasandiragun houngua? Ladüga funa san anihein lan amu turóbuli hawagu?”.
Agübürigu ha arufudubaña lichú aau marihin hamutiña hasaanigu kamá gürigia wéinamuhaña ha óuserutiña kei irahüñü. Gunfuranda lumuti apostolu Pábulu katei le dan le lariñagun: “Dan meha le irahügidina, kei meha irahüñü nadimureha, kei meha irahüñü nasaminara” (1 Korintuna 13:11). Ariñagati Robert: “Naritaguni katei le meha nadügübei dan le ñǘraügidina íderagua lumutina lun nakipuruni katei lidan lilugaaru, ani lun magañidun nan saragu”.
Buiti lun magurabahan humá saragu hámagiñe hisaanigu, gama lumoun, moun lumuti hámuruduni hagu luéi luriban igaburi le hawagubei. Anhein gabaroun humá le hayaraabei hisaanigu adüga, le hásiñarubei adüga luma amu burí katei, gayarabei harufudahan houn keisi lubudubu.
LAU ÚARANI
Ariñagati Malakíasi 3:6: “Au Aburemeibei. Masansiragungidina”. Afiñetiña lubúeingu Heowá luagu inarüni le, ani ruti ichouruni hou. Chóuruti giñe hasandiragun isaanigu houngua dan le hererehan hagübürigu houn lau úarani, lidan amu dimurei, lau ínsiñeni súnwandan. Anhein hasansira agübürigu halurudun según ligaburi hasandiragun houngua weyu ligía, aba hayuridagun hasaanigu.
Haritagua huméi ariñaga lan Hesusu: “Ariñagarügü humá ‘anha’ o ‘uá’”. Gayarati layusurún dimurei burí le lidan luáguti hagüriahóun isaanigu (Matéu 5:37). Ualá füramase humá katei le lunbei magunfulirun humani. Ánhadün ariñaga lun hisaani habeichubei lan ladüga lóuserun wuriba, gúnfuli huméi.
Buiti lun hayanuhan agübürigu hámagua lun hererehan lau úarani houn hasaanigu. Ariñagati Robert: “Anihein dan hayabin nisaanigu amuriaha üma numa lun hadügün somu katei, ani aba níchuguni houn. Ani mariñagun hamuti nun ariñaga hamaali lan buga tun háguchu ani míchuguntu üma houn. Dan le níchugun fe, aba nasansiruni le nariñagubei lun núaradun tuma”. Anhein ámuñegueinarügü lubéi hasaminan agübürigu luagu somu katei, buítimati háfaagun lun húaradun lun desidírü hamani kaba lan hadüga, gama lumoun, mama hagibugiñe hasaanigu.
SÚDINITI EREREHANI
Anhein háyeiha Heowá ani aba hererehan houn hisaanigu lau ínsiñeni, lau lichú aau luma úarani, gayarati hachoururuni luagu buídubei lan houn hisaanigu. Gayarati líderaguniña hínsiñehabu luma hadundehan lun danme lan haweinamudun lun derebugu hamá, lun hagunfulirun buidu lau hani buligasion luma lun hóuserun lau lichú aau. Ariñaga taali Bíbülia: “Arufudahabá buiti lun irahü dan le ñǘraügili; íbini danme le wéiyaali mabulieidun lubéi” (Ariñawagúni 22:6).