TÍTULU LE LUÁGUBEI TIDÁÜ: HÍNSIÑETÜN SAN LUN BUNGIU?
Gunfuranda lumutün Bungiu
“Nabureme, ariha báadina buidu ani subudi bumutina.” (SÁLUMU 139:1)
“Ariha lumuti bagu ladügǘn núgubu.” (SÁLUMU 139:16)
KA UAGU MACHOURUN HABALIN FIÚ GÜRIGIA: Gíbetiña gürigia saminatiña ariharügü lániwa Bungiu kei gürigia gafigountiña ha madünatiña lun letenirun houn. Kendra, to meha gasandiboun aban lanarime íruni, sanditu meha duru ladüga siñá lan tagunfulirun buidu lau lilurudun Bungiu. Aba tariñagun: “Ligía aba lubéi mafurieidunhadina lan”.
KA TARUFUDAHABEI BÍBÜLIA: Ariha lumuti Heowá lébuna wachara ani gunfuranda lumutiwa buidu buidu. Ariñagatu Bíbülia: “Subudi lumuti buidu, luagu múa lan wabuñabei”. Ligía mabeichun lubaliwa Bungiu keisi le wadünabei luagu wafigoun; gudemehabuti woun ani feruduna lumutiwa ánhawa asaküriha (Sálumu 103:10, 14).
Samina humá luagun urúei Dawidi, le uágubei layanuhóua lidan furumiñeti arütíkulu. Ariñagati lun Bungiu: “Ariha lumuti bagu ladügǘn núgubu; bürüwañu liña meha sun le tidan biliburun. Arihabána, arihabóun nanigi; hóuchaguabana, subudibéi nisaminan” (Sálumu 139:16, 23). Íbini meha charaali lan, ani wéinamuti fiú lídangiñe lichara, chouru lumuti meha Dawidi luagu larihibei lan Heowá tidan lanigi luagu asakürihaali lan.
Gayarati hachoururuni luagu gunfuranda lanün Heowá. Ariñagatu Bíbülia: “Le ligibugiñebei lagu wügüri ligía larihibei, anhein Bungiu anigi larihiboun” (1 Samueli 16:7). Subudi lumuti buidu ka lan uagu wóusera lidan somu igaburi. Subudi lumuti ka lan wabuñabei, ida liña lan wagüriarúniwa, le geyegubei wau luma wagaburi. Ariha lumuti giñe áfaaguni le hadügübei lun aban humá gürigia le buídutimati lau sun chará humá, ani gebegiti katei le lun.
Guentoti, ida liña layusuruni Bungiu sun le lasubudirubei huagu lun líchugun gurasu hun?