ÁLÜGÜDAHANI BURÍ TUAGU BÍBÜLIA
Gayarati san ferudunawa lan wafigoun?
Gayarati wagundaaragüdüni Bungiu
Arufudahatu Bíbülia gafigoun hamá sun gürigia. Súngubei wagía galagante wamuti figóu lúmagiñe Adán, le wáguchi. Ligía anihein lubéi dan wadügün katei wuribati ani lárigiñe aba wasakürihan. Hilati Hesukrístu, le Liráü Bungiu, lun lafayeihan luagu wafigoun. Adügati lounwen lun wibihin ferudun. Aban óunwenbu idewesei lúmagiñe Bungiu sákürifisiu ligía. (Aliiha huméi Rómana 3:23, 24.)
Añahein gürigia adügaaña figóu wéinamuti ani aba hálügüdagun houngua anhein lachülürüba lubéi dan lun feruduna lániña Bungiu. Buiti füramasei le wadarirubei tidan Bíbülia: “Chibá lumuti lita Hesukrístu sun wafigoun” (1 Huan 1:7). Ítara liña, feruduna lumuti Heowá íbini figóu le wéinamuti lau sun lugundan, asaküriharügadiwa ligía tídangiñe sun wanigi. (Aliiha huméi Isaíasi 1:18.)
Ka lunbei wadügüni lun feruduna lániwa Bungiu?
Ánhawa busén lun feruduna lániwa Bungiu, lunti wasubudiruni: gunfuranda wamani ligaburi ladügüni katei, ladundehan luma lilurudun (Huan 17:3). Aranseti Heowá lun feruduna lániña ha asakürihabaña luagu hafigoun ani áfaagua hagía lun hasansirun. (Aliiha huméi Adügaü 3:19.)
Gayarati wagundaaragüdüni Bungiu. Subuditi lun débili wamá. Buiti Heowá ani gudemehabuti giñe. Ma ínchaha lumutün katei le lun hasigirun afurendeira ka lan lunbei hadügüni lun lagundaarun Bungiu hau? (Aliiha huméi Sálumu 103:13, 14.)