TÍTULU LE LUÁGUBEI TIDÁÜ | HUUTI SAN LOUSERÚNIWA LAU ARUMANI?

Gagibuguatiwa sun wagía luma liwiye igaburi

“Anihein dan íderagua lánibu bariñagun murusun iyeeni lun báfuridun lídangiñe siñati” (Samantha, Suru Áfürika).

Ítara liña giñe san hisaminan? Sun wagía dariguahañaadiwa woungua, lóugiñe aban wéiyaasu, lidan siñati o sügǘ hénrenguti. Gama lumoun, dan le wadariragun woungua lidan aban sügǘ le ídanti wasandira líderagubadiwa lan wóuserun lau liwiye igaburi, ñein larihúa ka lan hawuyeri gürigia wagía. Anhein hádangiñetiwa lubéi gürigia ha busenbaña herederun buidu hama amu, másiñati waricharaguagüdüni luriban wóuserun lau wasaminarun súdinitima lan wabihini le wabusenrubei sügǘ lau ligaburi wibihini. Dánmeti lasubudirúniwa inarüni, mósume wóuyuahan lau sun wuribati le lanügübei woun. Ariha wamá fiu lídangiñe.

ADÜGATI WEYEEHAN LUN MAFIÑERÚNIWA LAN WAWAGU

Lun buidu lan hanaagun gürigia hámagua, mosu hafiñerun hawougua, ítararügübei derebugu lan hamadagua, chouru ligíame hasandiragun houngua. Lun lira, mégeiwati lásügürün dan. Mosu hásügürün saragu dan adimureha hámagua lau sun taruman hanigi, masaminarunga hawouguounrügü. Leti hírubei, buídurügü lan lariñawagún ábanrügü iyeeni, o aban katei líbeina lira, lun leferidirun afiñeni ligía. Lárigiñe lira, gürewei yáalime hafiñerun hawougua.

Eyeedañaha laadün san somu hiduhe o humada? Anhein ítara liña lubéi, másiñati weiri lan íruni le hasandirubei, o sandí humá garabagua waali lan huagun, gunfurandawati lira. Furanguti adüga lan louserúniwa lau liwiye igaburi lun lagadeirun lubuidun hanaagun gürigia hámagua.

GALUGURAHATI LOUSERÚNIWA LAU LIWIYE IGABURI

Arufudati aturiahani le ladügübei Robert Innes, máisturu lidan luáguti seinsu le arufudahabei tidan Luban Furendei Íñuti to uburuguboun Kalifórnia, “galugurahadi lan louserúniwa lau liwiye igaburi”. Ítara liña kei aban sandi: éibutima wásügürün dan luma aban gürigia yeeti, chóurutimati weyeehaba lan.

Kaba íderaguawa lun malugurúniwa wamá lau igaburi le? Tíderagubadiwa Bíbülia. Amisuraha wamutün akutiha fiu lídangiñe adundehani le tídanbei.

Hénpulu lánina louserúniwa lau liwiye igaburi

Lariñawagún iyeeni

KA MINI LUBÉI? Lariñawagún aban katei le mama ligía lun gürigia le unbei yu lan lasubudiruni inarüni. Lariñawagúña giñe iyeeni dan le lasansirún somu ariñahani lun hayuridagun amu, mariñawagún lan sun katei houn amu lun hamañounrúniwa, lichugún o lagidarún lídangiñe le ariñawagúbei lun hasaminarun amu aban katei le mama ligía.

LE TARUFUDAHABEI BÍBÜLIA: “Mínsiñetiña ha wuribabaña [o wíyebaña] igaburi lun Bungiu, ánheinti hama ha buídubaña, gamadaguati lungua” (Ariñawagúni 3:32). “Ligía hebé lubéi heyeehan; adimureha huméi inarüni” (Éfesuna 4:25).

Lichugún luriban iri

KA MINI LUBÉI? Lariñawagún marasualugu luagu aban gürigia lun lawiyedúniwa liri.

LE TARUFUDAHABEI BÍBÜLIA: “Ha salufuribaña agubuhatiña wuribu, ha marasualugubaña, gáganiguagüdatiña” (Ariñawagúni 16:28). “Anhein mabúa watu, léñeguchuba, anhein ua marasualugu, lagumuchaguba wuribu” (Ariñawagúni 26:20).

Íwerugua

KA MINI LUBÉI? Leyeeduniña gürigia amu lun ladügün lun hederegeruni haseinsun o hamegen lun.

LE TARUFUDAHABEI BÍBÜLIA: “Mamudiragua huméi le wéiribei ugudemen” (2 Lúrudu 24:14, 15). “Ha adügütiña wuribani houn gudemetiña, hanabaguñein Habungiute; ánhaña ha gudemehabubaña houn gudemetiña, rútiña inebesei lun Habungiute” (Ariñawagúni 14:31).

Íweruhani

KA MINI LUBÉI? Lárügüdüniwa hamegen amu mamuriahanga üma hama.

LE TARUFUDAHABEI BÍBÜLIA: “Le meha híwerubei, hebé líweruhan, luadigimarida lau arumani lun lagüriagun lungua, lun giñe gayara lan líderaguniña ha gudemebaña” (Éfesuna 4:28). “Ni [...] híwerutiña, ni igaaduatiña, ni bacharuatiña, ni marasualugutiña, ni ha anügübalin hálagu amu lau ibibuni [...] siñabei hebelurun lidoun larúeihan Bungiu” (1 Korintuna 6:9, 10).