Ka lunbei hadügüni lun harihini hungua hínsiñehabu lan Bungiu?
Adüga lumuti Bungiu hágubu gürigia lau iarani lun gayara lan lareidagun lúnguarügü. Dan le líbaagun, láfiyurun o límiruni gürabu aban gürigia le masanditi “aba lagumeserun aban lubuidun aransehani lun lareidagun buleseiti meberesenga anhein weiri lubéi o ñüraü lan” (Johns Hopkins Medicine). Fureseti lagumeserun hágubu gürigia areidagua lúmagiñe lararamun leseñeinhan darí ladouragun wounu lunya ítara lan kei meha lubéi.
SAMINA HUMÉI LE: Anhein adüga lubalin Bungiu hágubu gürigia lau lubuidun iarani le, ma chóurugüda lumuti lira woun gayara lan lagidaruni íruni le wasandirubei? Chouru lumuti meha abürühati Sálumu luagu gayara lan lagaranihan Bungiu houn ha “sándibaña anigi, güragualei biti le hawagubei” (Sálumu 147:3). Ánheinti susere lubéi somu katei híruti hun le siñati habulieiduni, ka uagu gayara lubéi hachoururuni gayara lan lagüraguni Heowá “biti le hawagubei” dandu uguñe kei ámuñegü?
LE TARUFUDAHABEI BÍBÜLIA WOUN LUAGU LÍNSIÑEHABU BUNGIU
Füramaseti Bungiu: “Manufudedabá, ladüga anahein buma; manufudedaba au Bubungiutebei. Rútina erei bun, íderagua numutibu, ágüdaha numutibu lau núhabu le gagañeiradibei” (Isaíasi 41:10). Ídehati wasubudiruni hínsiñe wamá lun Heowá lun here wamá dan le wagagibudagun luma turobuli luma lun darangilu wamá. Ariñagati giñe Isaíasi: “Ruti [Bungiu] erei lun le buchaalibei uagu, ru ligía lanwoun lere le uánimabei” (Isaíasi 40:28, 29). Wati apostolu Pábulu lun katei lira lidarangilan Bungiu “le wéiritimabei luéi sun subudi” (Filipuna 4:4-7, 9).
Ídehatu Bíbülia lun wéredagüdüni wafiñen luagu le füramase láalibei Bungiu. Kéiburi lidan Arufudúni 21:4, 5, ariñaga lumuti le lunbei ladügüni Bungiu luma ka lan uagu gayara lubéi wafiñerun luagu.
“Laragahabei sun [w]águira”. Lagidarubei Heowá sun katei le adügübei lun wasufurirun luma lun wadiheridun, íbini genege lan masudinin lan katei le.
Bungiu le siélubei, ligía Urúeibei Suntigabafu le adügübalin sun katei, layusurubei lubafu luma liricha lun larúeihan lun masufurirun wamá luma lun líderaguniwa danme le wemegeiruni.
Chóurugüda lumuti Heowá woun luagu “inarüniti” lan le lariñagubei ani “gayaraati [lan] lafiñerúniwa luagu”. Heowarügüñein Bungiu inarüniti, ani yusu lumuti liri lun lachoururagüdüni woun luagu lagunfulirubei lan le füramase lubéi.
“Laragahabei sun háguira; úaalime óunweni ni ayahuni ni íruni ni igarigu, ladüga sügüha furumiñeti burí katei. Ábati lariñagun Bungiu: Arihabá, adüga numuti sun katei iserime. Ariñagati giñe: Babürüha, ladüga inarüniti dimurei burí le, ani gayaraati lafiñerúniwa luagu” (Arufudúni 21:4, 5).
Íderagua tumutiwa Bíbülia luma le adüga láalibei Bungiu lun wasubudiruni. Agunbiraha lumutiwa le adüga láalibei Bungiu, mariñagunga ni kata, lun lumadagu wamá, ánhounti Bíbülia furanguti tariñaguni: “Yarafa humá lun Bungiu, ábame giñe layarafadun hun” (Santiagu 4:8). Ariñagati giñe Adügaü 17:27 “madise lan Bungiu luéi kada aban wádangiñe”.
Éibutima hadireirun dan lun hasubudiruni Bungiu, chóurutima hubéi berese lan Bungiu hau (1 Féduru 5:7). Kaba buiti hibiha ánhadün afiñera luagu Bungiu?
Samina humá luagu le asuseredubei lun Toru, aban wügüri Hapónna. Íbini agüriaha tani lúguchu kei kristiánu, aba hádangiñeti lan yakuza, sétanu le adügübei katei wuribati Hapón. Abahüdaguati: “Saminatina meha iyereegu nan lun Bungiu ani labeichuñadina lan dan le lounwen aban hádangiñe gürigia ha geyegubaña nau, hátima hínsiñebaña nun”. Subudi lumuti meha Toru adüga lan sun anarimeni le meha geyegubei lau lun “aban lan gürigia furundeti ani wuribati”. Dan le layanuhan luagu le meha labuserunbei, ariñagati: “Busentina meha nounwen dan le nibureingidina adüga nuguya lun weiri lan laganbahóun nuagu ladüga náfarun aban gürigia hilagubei le wuribatimati nuéi”.
Lau sun lira, dan le laturiahabarün Toru Bíbülia úara tuma Hannah, to lani weiriou, adügati Toru asansiruni wéiriti lidan libagari luma lidan ligaburi laríawagun. Ariñagatu Hannah: “Wéiritu nanigi lau narihini asansiruni le ladügübei nani weiriei”. Guentó, chouru laali Toru katei burí le: “Anirein Bungiu ani bereseti lau kada aban wádangiñe. Mabusenrunti lun hóunwegun gürigia ani feruduna lumutiña ha asakürihabaña tídangiñe sun hanigi. Gayaraati wayanuhan lun luagu katei burí le wásiñarubei abahüdagua houn amu, le uágubei wasaminara úabei lan gunfuranda lani ni aban. Málühali dan lun lagumuchun Bungiu lau turobuli, igarigu luma asufuriruni. Guentó, íderagua lumutiwa Bungiu lau burí katei wéiriguti le magurabun wamuti. Bereseti saragu wau ani óunigira lumutiwa dan le weiri lan íruni le wasandirubei” (Sálumu 136:23).
Ítara kei le asuseredubei lun Toru, ruti wasubudirun luagu málühali lan dan lun lagumuchun Bungiu lau katei le adügübei lun wayahun lau igarigu, aban lubuidun emenigini woun ani adügati lun buídutima lan wabagari. Ítara liña, íbini buin liña lan ubóu lau wuribani, gayaraati hibihin katei buiti lídangiñe línsiñehabu Bungiu.