Dan le hagabarahóun

“Ítagaraü yebe nounwen dan lariñagunbei nani weiriei nun lígiraadina lan tuagu aban hiñaru to nibureintimagiru nuéi. Aban meha lueirin marichaü lira. Lárigiñe sun le nadügübei luagu” (María, Esüpáña).

“Dan le tígirunbadina númari sódini, aba nasandirun kamá hamuga hilati somu katei múnadagiñe nibiti. Ñein meha lagumucha sun le wasaminarubei wadügün úara, sun le wayumahabei luma wemenigin. Dan le meha nasaminarun nárügüdaguña lan nungua, ábaya nasandirun lanarime íruni” (Bill, Esüpáña).

MAMA murusun igarigu le lanügübei agabarahani. Inarüni añahein lan gürigia ha feruduna hamutiña ha asakürihabaña luagu hadügüni lira ani áfaagua hagía lunya buidu lan hanaagun houngua.a Meberesenga ánhaña eredera hámagua o hígiragun, súnwandan weiri lan igarigu le hasandirubei ha agabarahóubaña. Kaba íderaguaün agagibudagua luma sügǘ híruti le?

BÉRUSU BURÍ TÍDANGIÑETI LERERUN BUNGIU LE GAYARAABEI LÍDERAGUNÜN

Lau sun weiri lan íruni le hasandirubei tidan hanigi, gíbeeña gürigia ha súfuri hamaalibei lirun sügǘ le, adarirutiña gurasu tidan Lererun Bungiu. Dan le haliihanu, aba híchugun fe ariha lani Bungiu háguira ani gunfuranda lani hagarigu (Malakíasi 2:13-16).

“Labadinagua idiheri le agibedagubei nisaminanrugu, rútibu dǘgüdaguaü nun luma ugundani” (Sálumu 94:19).

Ariñagati Bill: “Dan meha le naliihani bérusu le, aba meha nasaminarun luagun Heowá arufuda ínsiñehabuni nun lun líchugun awalidaguni nun lídangiñe nigarigu, ítara kei aban úguchili le gudemehabuti”.

“Gúnfulitibu hama ha gúnfulibaña, úaragua buguya hama ha úaraguabaña” (Sálumu 18:25).

“Lau sun meha ua lan úaragua lan nani weiriei —tiña Carmen, to lagabarahaboun tani weiriei luagu saragu hati—, subudi numuti meha úaraguabei lan Heowá nun súnwandan ani maweiyasunbei lan acharara nun”.

“Madiherida humá luagu ni kata, ariñagarügü huméi sun katei lun Bungiu súnwandan dan le hafurieidun [...]. Ábameti líchuguni Bungiu lidarangilan hun, le wéiritimabei luéi sun subudi; lun lóunigirunu hanigi luma sun hisaminan” (Filipuna 4:6, 7).

“Aliiha numuti meha bérusu le, aliihaya —tiña Sasha—. Eibu meha laganwoundun nafurieidun lun Bungiu, ábatima meha nasandiruni darangilaü le líchugubei lidan nibagari”.

Sun gürigia ha írida wamaañabaña, sandiguatiña meha houngua siñá lan houn ani samina hagía hígirun lun lábürühan harüna, keiti aba lan hafiñerun luagu Heowá ani aba haturiahanu Lererun, ibihatiña erei lun hasigirun habaruaguóun. Ariñagati Bill: “Lidan dan le ídanbei nasaminara günringua lan sun katei, aba líchugun nafiñen isuuni lun nibagari. Anihein meha Bungiu nubadu íbini meha násügürüña lan ʻlídangiñe fulasu le búrigatimabei’” (Sálumu 23:4).

a Anhein busén hubéi lanwoun ariñahani luáguti ferudunawa lan agabarahani, ariha huméi arütíkulu burí le gíribei “Cuando el cónyuge es infiel” tidan ¡Despertad! to lánina 22 lidan gádürü-hati páhina 3-5; 5-9; 9-12, irumu 1999.

Le adüga hamaalibei saragu gürigia

Hararamagun asaminara luagu burí bérusu tídangiñeti Lererun Bungiu le ruti gurasu

“Furumiñe, aba naliihanu liliburun Hobu, lárigiñe aba naliihani burí Sálumu —liña Bill—, ani makü numuti burí fánreinti le genegeguabei luma násügürün. Ábati níchugun fe añahein lan meha hádangiñe gürigia ha uágubaña tabahüdagua Bíbülia asandiruti igarigu luma idiheri lememe nasandirubei”.

Háluahan gurasu lidan músika

“Dan meha lagidarun nidabagu áriebu, ábaha naganbahan músika —tiña Carmen—. Ruti meha lira darangilaü nun”. Ariñagati Daniel: “Aba nafurendeirun áfara gidara, ñein níchiga fe íderagua lánina músika asandiragua nungua darangilu”.

Habahüdaguni ida liña lan hasandiragun houngua

“Lau sun meha mechun nan ariñagei houn amu ida liña lan nasandiragun nungua, sagü meha weyu náluahaniña umadagu buítiña ha númabaña —liña labahüdagun Daniel—. Ábaha nawaragun hama dandu dan le nayanuhan hama kei dan nabürühan houn. Íderagua lumutina lira saragu”. Ariñagatu Sasha: “Wéiriti ídemuei le híchugubei niduheñu nun. Íderagua tumutina meha núguchu estodi. Aranseñu tiña meha lun taganbunina dan le busén nan nayanuhan. Adügati meha giñe núguchi lun chouru lan nasandiragun nungua, íderagua lumutina lun nárügüdagun nungua lau nidaani”.

Hayumuragun sun oura

“Sun meha dan nau afurieida —tiña Carmen—. Sanditina meha númañein lan Bungiu, aganbana luma íderaguana. Lidan sun dan hénrenguti ligía, ábatima nayarafadun lun Bungiu”.