Dan le weiri lan hisandi

“Dan níchugunbei fe anihein lan kánserü tidan níhuara luma lidan nani kolon, sanditina kamá hamuga siadiwaadina lun nounwen. Danti le nachülürünbei múnadoun, aba nasaminarun: ‘Úati mégeiti, lau sun magurabun nani yebe lira, mosu náluahan kaba lan nadüga guenlé lun nagagibudagun luma gádantina’” (Linda, 71 irumu).

“Anihein aban sandi nuagu le adügübei lun nasandirun aban óunwenbu gáriti luagu nérübiu le luéigiñebei lubaünan nigibu. Anihein dan, hanarimeti ligari darí lun nírudagun saragu. Gíbeeli wéiyaasu nasandiragun nungua nábugua darí lun saminaadina lan náfaragun nungua” (Elise, 49 irumu).

Aban sánditi ñun luagu haláü balabalati geyegu hau liduheñu

ANHEIN rúhadün lubéi fe anihein lan somu sandi gáfarahati huagu o luagu somu hiduhe, subudi humaali weiri lan idiheri le líchugubei aban ñunsu ítarati. Mámarügü ladüga sandi ligía, ladüga giñe sun le ladügübei lun hasandiruni. Gayaraati laganwoundun anufudei luma idiheri le hasandirubei eibu habasihan lumoun surusia ladüga gürewei lan hadariruni lárani sandi o lebegi luma amu burí katei le ladügübei árani lun lasandiruni sánditi. Gayaraati ladügün idiheri le líchugubei somu sandi wéiriti lun lasandirun gürigia siñá lan lun.

Ka gayaraabei líderagunün lidan aban kesi ítarati? Sanditiña saragu gürigia íderaguatima lániña furíei luma haliihan bérusu burí tídangiñeti Lererun Bungiu lun hadarirun gurasu. Ibihúati giñe gurasu lídangiñe hínsiñehabu luma hídehan dandu iduheñu kei umadagu.

LE ADÜGA HAMAALIBEI SARAGU GÜRIGIA

Ru lumuti Robert, aban wügüri le 58 irumu lau, adundehani le: “Lun hagagibudagun luma hisandi, afiñe humá luagu Bungiu, líderagubadün lun hasigirun hubaruaguóun. Furíei humá lun ani ariñaga huméi lun ida liña lan hasandiragun hungua. Amuriaha humá luma lun líchuguni lani sífiri sandu hun luma lun líderagunün íchiga iderebugu houn hiduheñu luma lun hawanduni hisandi darangilañu”.

Ariñagati giñe: “Wéiriti lisudinin herederun biduheñu burugabu luma híderagunibu asandiragua bungua buidu. Sagü weyu, lagúarun aban hádangiñe nun lun lálügüdünina ida niña lan. Rútiña giñe numadagu ha lídanbaña amu burí fulasu dǘgüdaguaü nun. Ídehati lira lun buidu lan nasandiragun nungua luma lun mábürühan lan narüna”.

Saminatün san hidin ariha somu humada le sánditi? Anhein ítara liña lubéi, gabaroun huméi le tariñagubei Linda: “Busenti aban sánditi lanügüni libagari kei furumiñeguarügü, darí le ñein lumuti liyara, ligíati háfuga mabusenrunbei lan layanuhan luagu lisandi. Ligía buídutimabei lubéi hayanuhan luagu amu katei”.

Gayaraati líderagunün erei le líchugubei Bungiu, gurasu le tíchugubei Lererun luma hínsiñehabu hiduheñu hama humadagu lun híchugun fe anihein lan resun buiti lun hasigirun abagarida íbini weiri lan hisandi.

Bérusu burí le gayaraabei líderagunün

Afiñe humá luagu Bungiu

“Agúahatina lun Nabureme, aba lóunabunina gidaléi sun anufudei nuéi. Fugiabu meha nuguya, wátina lun Nabureme, aba laganbunina” (Sálumu 34:4, 6).

Ariñagatu Linda: “Mamuriahantina luma Bungiu lun lareidaguagüdünina. Le namuriahabei luma lun líderagunina lun here nan lun nagagibudagun luma nisandi”.

Aliiha humóun Lererun Bungiu here humaamuga

“Mariñagunbei ni aban lílana fulasu: ‘Sándiñadina’” (Isaíasi 33:24).

Ráramagua humá asaminara luagu füramasei le adüga láalibei Bungiu lubá ámuñegü. Lídehaba lira lun derebugu lan emenigini le huágubei ani líderagubadün awanda.

Áluaha humá ídemuei hama hiduheñu luma hama humadagu

“Aban umadaü, súnwandan buidu lan, ítara liña kei aban íbiri lidan lidaani idiheri” (Ariñawagúni 17:17).

Ru tumuti Elise adundehani le: “Madiseda humá hawéi gürigia. Ígira humá lun híderagunün humadagu. Ñeinbei dan hasandiragun hungua hábugua, samina huguyame maganbun lani Bungiu hayumuragun, íbini ítara madiseda humá hawéi amu”.