Ida luba wíderaguniña ha asufurirubaña lisandi ichügü?

Le mini lubéi

Mama mosu taweiridun wanigi lau ibidiñe lan woun kaba lan wadüga dan le lasufuriruña lan somu wamada lisandi ichügü. Íbini ítara, gayaraati warufuduni lun hínsiñe lan woun lau wíderaguni lidan lagagibudagun luma lisandi.

Ka gayaraabei wadügüni lun wíderaguniña?

“Kada aban hídangiñe lunti aranseñu lan lun laganbun” (SANTIAGU 1:19).

Lau aranseñu humá lun haganbuni humada dan le busén lan layanuhan ligía ábanbei lídangiñe igaburi le buídutimabei lun híderaguni. Masaminara humá mosu lan hóunabuni sun álügüdahani le ladügübei hun. Létima lunbei líderaguni, líchugun fe luagu haganbuñein lan ani berese humá lau tídangiñe sun hanigi. Áfaagua humá lun gunfuranda humani ka lan uagu lasandiragua lungua ítara ani míchiga humá lidurun, machuragun humeime. Haritagua huméi gayara lan lariñagun humada dimurei le yebe mabusenrun lubéi lariñagun ani aba lanme lasandiragun lungua wuriba lárigiñe lariñaguni (Hobu 6:2, 3).

“Lun híchugun gurasu houn ha maguraasunbaña” (1 TESALÓNIKANA 5:14).

Másiñati nidiheri lan humada o lageindaguña lan luma saminaü luagu mebegi lan ni kata. Ligíati, subudigüda huméi lun humada luagu weiri lan hebereserun lau. Ítara, gayaraabei híchugun gurasu lun, íbini ibidiñe lan hun kaba lan hariñaga.

“Aban umadaü, súnwandan buidu lan” (ARIÑAWAGÚNI 17:17).

Ru humá ídemuei lun. Lubaragiñe hasaminarun subudi humani ka lan lemegeirubei humada, álügüda huméi ka lan gayaraabei hadügüni luagu. Másiñati hénrengubei lan lun lafuranguagüdüni hun ka lan lemegeirubei. Anhein ítara liña lubéi, írida humá fiu katei lun lídangiñe le gayaraabei hadügüni úara, kéiburi hidin éibuga. Gayaraati giñe hariñagun lun gayara lan hidin agañeiha lun mágidurugu, híderaguni arumadaha o hadügün amu dasi lun (Galasiana 6:2).

“Gaguraasun humá” (1 TESALÓNIKANA 5:14).

Ñeinbei dan mabusenrun lan humada ladimurehan. Íbini ítara, haritaguagüda huméi lun luagu aranseñu hiña lan lun haganbuni danme le busén lan layanuhan. Ladüga lisandi humada, gayaraati ladügün o lariñagun somu katei le gáriti hun o ladüraaguni somu aransehani le adüga humaalibei o lagañidun. Danme le híderaguni, gaguraasun humá lubá ani gunfuranda humeime (Ariñawagúni 18:24).

Gayaraati lanügün ídemuei le híchugubei saragu buiti

“Áfaaguatina lun aban nan umadaü to aranseñuboun lun tídehan. Lau sun inarüni lan siñá lan naransehani sun titurobulin numada, gayaraati naganbunu dan le tabusenrun tayanuhan. Anihein dan ligíarügüñein lan temegeira lun tasandiragun tungua buidu” (Farrah,a anuhein aban tumada to asufuriruboun anufudei, lanarime íruni luma sandi lánina márügüdagun tan tungua luagu éigini).

“Anuhein aban numada wéiriti tugundan ani hínsiñetina nun. Aban weyu, aba tagunbirahanina túbiñoun ani aba tábougun aban éigini semeeti nun. Keiti weiri lubéi lubuidun nasandiragun nungua tuma weyu ligía, aba nabahüdaguni sun le nasandirubei tidan nanigi tun. Ragüguaadina nungua dan le nagiribudunbei núbiñoun weyu ligía!” (Ha-na, to asufuriruboun lanarime íruni).

“Mégeiwati gaguraasuni. Dan le tadügün nani weiriou aban katei le aubei magundan nan, hóuchatina naritaguni mama lan tidurun, ladüga lan tisandi. Íderagua lumutina le lun magañidun nan luma lun gunfuranda nanu” (Jacob, le maríeibei tuma aban würi to asufuriruboun lanarime íruni).

“Ru tumuti nani weiriou sun ídemuei luma dǘgüdaguaü le nemegeirubei nun. Dan le lagibedagun katei lun nichügü, mafosurun tumutina lun nadügün aban katei le mabusenrun nubéi nadügün. Ani anihein dan redei tan fugiabu madügünga le hamuga tabusenrubei tadügün. Wéiriti tíchigadi ani aranseñutiña lun tadügün sákürifisiu nuagu. Wéiriti tebegi nun!” (Enrico, le asufurirubei sandi le lánina lueirin idiheri).