4 | Rutu Bíbülia adundehani huuti

Le mini lubéi

Íbini mama lan aban líburu lánina árani Bíbülia, rutu adundehani le huuti houn ha asufurirubaña ladüga somu lisandi ichügü. Ariha huméi burí hénpulu le asigirubei.

Ida lubati líderaguniwa katei le?

“Ha magadiñebaña, memegeiruntiña surusia; ha sándibaña, hagía emegeirubaña surusia” (MATÉU 9:12).

Afuranguagüdatu Bíbülia ñeinbei lan dan mégeibadiwa lan lun woudin aríaaha surusia. Ibihaaña saragu gürigia ha láubaña lisandi ichügü hóuchaadagun lárigiñe habihin ariñahani le chóuruti luma lídehan aban subudihabúti luagu sandi le.

Huuti “lánhingichun úgubu” (1 TIMOTÉU 4:8).

Dan le wéchudun ayusurei wadaani luma were lun wadügün katei le buiti lun wátuadi, gayaraati wibihin awalidaguni lídangiñe lisandi ichügü. Kéiburi gabügürügua lan wadügün ehersísiu, weigin éigini le buiti lun wátuadi luma warumugun buidu.

“Árani buiti anigi gúndaatu, ánheinti íruni gidati lídangiñe erei” (ARIÑAWAGÚNI 17:22).

Dan burí le waliihan bérusu tídangiñe Bíbülia le ruti dǘgüdaguaü woun, áfaagua wagía lun wadügün katei le gayara wamuti adüga, gúndaatimati wasandiragun woungua. Ánhawa etenira lun katei buiti le lídanbei ibagari, aguraba wagíame buídubei lan léibugun sun katei, ménrenguntimabei woun lun wagagibudagun luma lisandi ichügü.

“Hámañein ǘnabugubutiña lichú aau” (ARIÑAWAGÚNI 11:2).

Gayaraati hemegeiruba lan ídemuei hámagiñe amu, ligíati, anha humá lun lau sun hugundan. Chóuruti busén hamá humadagu hama hiduheñu lun híderagunün, lau sun lira háfuga ibidiñe lan houn ida luba lan hadügüni. Ariñaga huméi houn furangu ka lan hemegeirubei, óusera humaña buidu ani mabulieida huméi heteingiruniña luagu le hadügübei huagu.

Ida liña líderaguniña adundehani le tídanbei Bíbülia ha láubaña lisandi ichügü?

“Wuribati meha nasandiragun nungua, ábati nidin ariha surusia. Afuranguagüda tumuti surusia nun ka lan suserebei nun ani íderagua lumutina lira lun nánharun lun nisandi. Afuranguagüda tumuti giñe nun kaba lan árani gayara nibihini lun nisandi (Nicole,a to asufuriruboun lanarime lasansihan ligaburi tasandiragun tungua).

“Íderagua lumutina naliihanu Bíbülia sagü weyu tuma nani weiriou. Ítara liña nagumeserun sagü binaafin lau saminaü buiti le ínchahabalina lun nadügüni le buídubei. Rúhadina fe súnwandan lan nadarirun aban bérusu le achülürüti tidoun nanigi, dántima le wuriba lan nasandiragun nungua (Peter, le laubei sandi le lánina lanarime íruni).

“Furumiñe, nibusigarítina yebe nabahüdahani niturobulin houn amu. Lau sun lira, anuhein meha aban numada to gunfurandabalina ani óusera tumutina lau saragu ínsiñeni, íderagua tumutinati asandiragua nungua buidu luma lun níchugun fe mámañadina lan nábuguarügü (Ji-yoo, to sándiboun lau márügüdaguni unguaü luagu éigini).

“Íderagua táadina Bíbülia gunfurandei lau sun lan mosu lan nawadigimaridun mosu lan giñe nemeraagun. Íderagua láadina giñe adundehani le tídanbei lun nadarirun awalidaguni lun liibe katei lun nichügü” (Timothy, le asufurirubei idiheri le adügübei lun merede lan ladügün ítaga katei).