Ariñahani le lunbei lakutihóun lidan adamuridaguni Habagari Kristiánugu luma Heseriwidun
5-11 LIDAN UNSU-HATI
ARUFUDAHANI GEBEGITI TÍDANGIÑETI BÍBÜLIA | HUAN 20, 21
“Hínsiñetina san bun sügǘ lau línsiñe katei burí le bun?”
(Huan 21:1-3).
(Huan 21:15-19, TNM ).
nwtsty abürüdǘni lau lanwoun ariñahani luagu Hn 21:15, 17
Aba lariñagun Hesusu lun Simón Féduru: Ayanuhati Hesusu luma Féduru murusun dan lárigiñe leyeedagun Féduru lau ǘrüwa wéiyaasu. Ǘrüwañein wéiyaasu lálügüdüni Hesusu gabügürügua ka lan lasandirubei luagu ani aba lírudagun Féduru (Hn 21:17). Lidan abahüdaguni le lídanbei Huan 21:15-17 yúsuati bián dimurei güriegu: agapáu, luma filéu. Lidan garifuna sügügüdawati bián dimurei le kei ínsiñeni. Lidan ǘrüwa wéiyaasu dan le lálügüdünbalin Hesusu Féduru: “Hínsiñetina san bun?”. Ariñagati Féduru anha tídangiñe sun lanigi ǘrüwagubei wéiyaasu. Sagü lariñagun Féduru hínsiñe lan Hesusu lun, larufudahaña meha Hesusu lun lunti lan línchahani ínsiñeni ligía lun lóunigiruni hamadagu lani disipulugu luma Heowá (Hn 21:16, 17; 1 Fe 5:1-3). Ruti Hesusu chansi lun Féduru ǘrüwa wéiyaasu lun larufuduni hínsiñe lan lun ru ligía aban dasi lun lun lóunigiruniña lánigu mudún. Lau lira, lafuranguagüdei Hesusu feruduna laali lan ladüga leyeedagun lau ǘrüwa wéiyaasu.
Hínsiñetina san bun sügǘ lau línsiñe katei burí le bun?: Gayaraati ámuñegueinarügü lan le mini lubéi dimurei güriegu le ásügürawagüdübei kei “sügǘ lau línsiñe katei burí le bun”. Sügügüda hamuti fiu sásaamu kei “hínsiñetina san bun sügǘ lau nínsiñe houn amu disipulugu?” o “hínsiñetina san bun sügǘ lau nínsiñe houn ha?”. Íbini ítara, chóuruti anihán lan létima mini lubéi: “Hínsiñetina san bun sügǘ lau línsiñe katei burí le bun?”, lau lira, layanuhaña meha hawagu úduraü o luagu bísinisi ligía. Genegeti, anihán lan meha le labusenrubei Hesusu lariñagun lun Féduru: “Hínsiñetina san bun sügǘ lau laluahóun irisini o línsiñe umegeguni bun? Anhein ítara liña lubéi, góunigibaña nánigu”. Buiti meha álügüdahani lira lugundun úarati luma le lifisiutebei Féduru. Íbini aban lan meha hádangiñe furumiñetiña lani Hesusu disipulugu ligía (Hn 1:35-42), mígirun lágili meha bísinisi lánina esenihani lun lafalaruni Hesusu. Ligía aba lubéi lagunbirahani Hesusu Féduru, fiu hati lárigiñe, lun lígiruni lani bísinisi luma lun lanaahan gürigia lun lun lánigume (Mt 4:18-20; Lk 5:1-11). Murusun dan lárigiñe lounwen Hesusu, ábaya lidin Féduru eseniha, ábati houdin ha híbiri apostolugu luma (Hn 21:2, 3). Ligía genege lubéi ladügüña lan meha Hesusu lun líchugun Féduru fe lunti lan lanúadiruni kaba lan ladüga. Líchugubei meha san bísinisi lánina esenihani furumiñe, le arufudúbei hau saragu úduraü ha ñéinbaña, o lóunigirubaña meha lani Hesusu disipulugu? (Hn 21:4-8).
luagu lǘrüwan wéiyaasu: Ǘrüwañein wéiyaasu leyeedagun Féduru lau Hesusu, guentoti, líchuguñein meha Hesusu chansi lun Féduru lun larufuduni ínsiñeni le lasandirubei luagu, ǘrüwa wéiyaasu. Lidan ǘrüwagubei, ariñagati Hesusu lun lun larufuduni ínsiñeni le lasandirubei luagu lau líchuguni katei le lánina lumadagua luma Bungiu furumiñe. Nadagimeinti Féduru úara hama amu kristiánugu gúnfulitiña éredagüdei luma óunigirei hamadagua disipulugu luma Heowá lun hasigirun abuiduragüdei umadaguaü ligía lau sun meha kristiánugu hamá ha anuadirúaaña (Lk 22:32).
Darí wamá pérüla lánina lichú aau
(Huan 20:17, TNM ).
nwtsty abürüdǘni lau lanwoun ariñahani luagu Hn 20:17
Madibiraguabá nuagu: Gayaraati mini lan dimurei güriegu háptomai “aguura” o “árügüda”. Anuhein Bíbülia le ídounti lásügürawagüda dimurei le lariñagubei Hesusu kei: “Maguurabá nuagu”. Úati meha ni kata wuribati luagu taguuruni María Mágüdalena Hesusu lugundun ígirati lun hóuburuni amu würiña lugudi dan le harihinbalin lárigiñe láguyugun (Mt 28:9). Genegeti samina tan meha María Mágüdalena léibuga lan Hesusu sielun oura ligía, ani kei meha weiri lubéi tabusenrun terederun lubadu Tabureme aba tárügüdün luagu lau sun tere lun mígirun tani lun lidin. Ligíati, lun lachoururuni Hesusu tun María mídinbei lan sielun oura ligía, aba lariñagun tun lun madibiragun tan luagu luma lun tidin ariñaga houn lani disipulugu águyuguaali lan.
(Huan 20:28).
nwtsty abürüdǘni lau lanwoun ariñahani luagu Hn 20:28
Nabureme, Nubungiute!: Lidan amu dimurei: “Le Naburemebei ani le Nubungiutebei (ho theós)”. Añahein sásaamu afiñetiña ariñawagúa lan dimurei burí lira ladüga taweiridun lanigi gürigia ligibugiñe Hesusu, ani le lan linarün katei lun lan Bungiu, le Lúguchi lariñawagúa. Según le lariñagubei furumiñeti abürüdǘni güriegu, añahein ariñagatiña lun lan Hesusu lariñawagúa dimurei burí le. Anhein hamuga ítara liña lubéi, lunti yebe lúaradun dimurei “Nabureme, Nubungiute” luma sun le bürüwañubei tidan Bíbülia. Arufudaaru meha Bíbülia amuriaha lan Hesusu tuma María lun tíchuguni ñunsu le houn lani disipulugu: “Néibuga [...] le ñeinhin lubéi Núguchi, le giñe Húguchi, Nubungiute le giñe Hubungiute”, ligía úa lubéi resun lun lasaminarúniwa afiñe lan meha Tomasi Hesusu lan Búngiubei le suntigabafu (Hn 20:17). Aganba laali meha Tomasi Hesusu ariñaga lidan furíei lun “Lúguchi” ligía lan “Bungiu ábanrügüti, le inarüniti” (Hn 17:1-3). Ligíati, másiñati ariñaga lan Tomasi “nubungiute” lun Hesusu ladüga resun burí le: lau sun meha ariha lani Tomasi Hesusu kei aban “bungiu”, marihin lumuti kei Bungiu le suntigabafu. O kei aubei larufudúa lidan Abürüdǘni Ebüréu, másiñati ayanuha lan Tomasi lun Hesusu ítara kei meha hayanuhan amu burí lubúeingu Bungiu hama ánheligu ha anügübaña ñunsu lúmagiñeti Heowá. Chóuruti subudi lani meha Tomasi abahüdaguni le ídanbei layanuha aban gürigia luma aban ánheli kamá hamuga meha layanuhaña luma Heowá o anihein meha dan lememe abürüdübarun Bíbülia adügübalin (konpararualá luma Agu 16:7-11, 13; 18:1-5, 22-33; 32:24-30; Ali 6:11-15; 13:20-22). Ligía másiña lubéi aba lan lariñagun Tomasi lun Hesusu “nubungiute” lugundun subudi lani lóunagüle lan Bungiu le inarüniti ligía ani ayanuha lan lidan liri.
12-18 LIDAN UNSU-HATI
ARUFUDAHANI GEBEGITI TÍDANGIÑETI BÍBÜLIA | ADÜGAÜ 1-3
“Hibihin lílana damuriguaü kristiánu sífiri sandu”
(Adügaü 2:1-8, 14, 37, 38, 41).
w86-S 1/12 páh. 29 pár. 4, 5, 7
Budagia le agundaaragüdübarun anigi
Lídanmeme irumu 33 le ídanbei ladügǘwa iseri damuriguaü kristiánu, busentiña meha 3,000 ha sun líñabei habadiseirun “hafanreinhani le hámati hádangua”, hóundaragun lun héigin luma lun hafurieidun. Ka un hadügei? Lun hederebudagüdüni iseri hafiñen lau “hederegeragun houngua lun hafurendeiruni le harufudahabei apostolugu houn” (Adügaü 2:41, 42).
Ñǘdüntiña huríu hama ha adügagubaña hungua huríume Herusaléun lun herederun ñein lúnrügü hefeduhani fedu le lani Pentekosutesi. Lau sun lira, busentiña meha ha adügagubaña hungua kristiánugume hachawaraguagüdüni dan le haubei Herusalén lun hederebudagüdüni iseri afiñeni le hawagubei. Adügati lira lun ñein lan emegeirúti lau lóufudagun, kéiburi éigini luma halíaba lan heredera. Añahein hádangiñe lóuguati meha haseinsun, ánheinti amu, gíbeti meha hámati darí lun ígiragua lan houn. Ligía aba lubéi hadügün aransehani luágurügü dan ligía lun hafanreinhan ílagu hadan ha mégeihabubaña (Adügaü 2:43-47).
Lau meha hagundan halugurahei hafulasun, afanreinha haméi lebegi. Mafosurúati ni aban lun lalugurahan o lun líchugun somu katei; madügünti giñe lira lun gudeme hamá. Mama meha lariñawagúña alugura hamani rísitiña sun le hámabei lun gudeme hamá. Lubaragiñe lira, adügati gudemehabu le hasandirubei hawagu hapanaagu lidan hafiñen ha mégeihabubaña, lun haluguruni hámati luma lun híchuguni sun le hagañeirubei lídangiñe, lun hídehan lun lasigirun luadigimari Larúeihan Bungiu awansera (konparárü huméi luma 2 Korintuna 8:12-15).
Darí wamá pérüla lánina lichú aau
(Adügaü 3:15).
it-2-S páh. 88 pár. 1
Hesukrístu
“Le íchugubalin ibagari le tímatimaati”. Seremei lugudemehabu Lúguchi, derege lumuti Hesukrístu libagari le úabei mégeiti luagu keisi sákürifisiu, le adügübei lun gayara lan harúeihan lani disipulugu ha anuadirúaaña luma sielu luma lun ñein hamá ubúeingu ha erederutiña lábugiñe Arúeihani ligía ubouagu (Mt 6:10; Hn 3:16; Efe 1:7; Ebü 2:5; arihualá RESCATE). Adügati giñe lira lun ligía lan “Le íchugubalin ibagari le tímatimaati” [“Liráü urúei”, ENP; Ga; NC, 1981; Besson; “Ábuti”, BC] houn sun gürigia (Adü 3:15). Mini lan dimurei güriegu le ayusurúbei ya: “ábuti le anuadirúabei” ani genegeguati dimurei le luma le iridúbei luagu Moisesi (Adü 7:27, 35) dan meha le larihinbei hau ísüraelina.
(Adügaü 3:19).
cl-S páh. 265 pár. 14
Aban Bungiu le gíchigaditi ferudun
14 Arihúati giñe ligaburi líchugun Heowá ferudun, lidan Adügaü 3:19: “Asaküriha humá; giribu huguyame lun Bungiu, chibawa láamuga hifigoun”. Gayaraati lásügürawagüdüniwa dimurei güriegu le ámubei larihín lidan bérusu kei “lagidaruni lau lásügüragüdüni lúhabu luéigiñe”, “agidara” o “agünrinchagua”. Añahein sásaamu saminatiña, gayara lan lasaminarúniwa ítara liña lan kei lagidarún fiu dimurei le bürüwañubei lau abürühagülei. Ida luba hamuga lagidarúniwa lira? Kei meha lau lubéi garubun, badibaditi luma duna ladügǘwa liibe-agei abürühagülei, gayaraati meha lagidarún létüra lau tásügürawagüdün aban pisi mudusi to dǘdütu luéigiñe anhein másügürüngili lubéi bandi dan lúmagiñe labürühóun. Ítara liña larihín lubuidun igaburi le lánina gudemehabu le luágubei Heowá. Dan le feruduna lani wafigoun ítara liña kamá lagidaruñein lan sunsuinagubei tau aban mudusi.
19-25 LIDAN UNSU-HATI
ARUFUDAHANI GEBEGITI TÍDANGIÑETI BÍBÜLIA | ADÜGAÜ 4, 5
“Sigitiña apurichiha tuagu Lererun Bungiu manufudeuga”
w08-S 1/9 páh. 15, rekuáduru
Lúmagiñe dimurei le ariñawagúbei darí abürüdǘni sagüráuti: Abürüdǘni hama furumiñetiña kristiánugu
Míbeti meha san hasubudin apostolugu?
Ariñagatu Bíbülia: “Dan harihinbalin gumadimatiña [ha Herusalénbaña] luagu adimureha lan Féduru luma Huan manufudeuga ni murusun, ani subudi haméi luagu mama hamá gürigia aturiahatiña saragu, luagu gürigia hamá ha furumiñeguarügü, aba taweiridun hanigi” (Adügaü 4:13). Míbeti meha san hasubudin apostolugu? Afuranguagüda lumuti aban abürüdǘni lídangiñe le tariñagubei Bíbülia katei ítara: “Manarimeti lichourun yusua lan dimurei burí le ítara kei aubei labürüdǘwa ítara liña kamá hamuga míberügü liña lisubudin Féduru, mabürüdadi lan o maliiradi lan, [gayaraati lariñawagún ligiaméme luagu Huan]. Larufudarügüñein meha lira lueirin hanaagun alidihatiña houngua hawéi apostolugu” (The New Interpreter’s Bible).
w08-S 15/5 páh. 30 pár. 6
Puntu méiniti tídangiñeti liliburun Adügaü
4:13 Mabürüdaditi meha san Féduru luma Huan ani maliiradi hagía? Uá, mítaranti. Ariñawagúati mama hamá gürigia ha “aturiahatiña saragu” ladüga meha midin hamá leskuela le ñein lubéi larufudahóua katei le lánina relihión.
it-1-S páh. 160 pár. 7
Apostolu
Le asuseredubei lidan damuriguaü kristiánu. Adügati habihini apostolugu lani Bungiu sífiri sandu lidan Pentekosutesi lun lederebugudun hafiñen. Lidan furumiñeti seingü kapítulu le tídanbei liliburun Adügaü arihúati lanarime ganigi luma ubebeni le harufudubei apostolugu dan le hayanuhanbei luagu uganu buiti luma luagu láguyugun Hesusu, lau sun da hamaniña gumadimatiña furisunrugun, bulesei hamaña, ariñaga hagía houn ánhaña lan asigira adügei le uéibaña heweridiraña háfaragubaña lan hilagubei. Lidan meha dan ligía adügati ligaburi hadundehani apostolugu damuriguaü kristiánu lau lídehan sífiri sandu lun laganwoundun hanumerun lílana damuriguaü saragu (Adü 2:41; 4:4). Dan le hagumeserunbei, apurichihatiña Herusalén furumiñe, lárigiñe, aba hapurichihan Samaria, lau lásügürün dan, aba hapurichihani sun ubóu le subudiwabei lidoun dan ligía (Adü 5:42; 6:7; 8:5-17, 25; 1:8).
Darí wamá pérüla lánina lichú aau
(Adügaü 4:11).
it-2-S páh. 662 pár. 4
Dübü le tímatimaati
Arufudati Sálumu 118:22 ñǘbuinhali lan dübü le unbei híchiga ábunagutiña mebereseni “lun ligíaba lan dübü le tímatimaati” (ebü. ro’sch pin·náh). Ariñaga lumuti Hesusu profesía lira ani gúnfuliti luagu guánarügü kei “dübü le tímatimaati” (gr. ke·fa·lḗ gō·ní·as, dübü tímatimaati). (Mt 21:42; Mr 12:10, 11; Lk 20:17). Ítara kei dübü le ewendedagüdübarun muna, ítara liña aba lan dübü súdiniti Hesukrístu lun damuriguaü hani kristiánu anuadirúaaña, aransehani le ladügübei Bungiu lun áhuduraguni inarüniti. Ariñagati Féduru gúnfuli lan le lariñagubei Sálumu 118:22 luagu Kristu, arufudei ítara Kristu lan “dübü” le unbei híchiga gürigia mebereseni, íbini ítara ligía lanúadirubei Bungiu lun ligía lan “dübü le tímatimaati” (Adü 4:8-12; arihualá giñe 1 Fe 2:4-7).
(Adügaü 5:1).
w13-S 1/3 páh. 15 pár. 4
Eyeehati Féduru luma Ananíasi. Ka larufudahabei lira woun?
Aba lalugurun Ananíasi tuma lani weiriou aban fulasu lun híchugun seinsu houn iseri hábirigu. Dan lederegerunbalin Ananíasi seinsu houn apostolugu, aba lariñagun ligíarügüñein lan seinsu ichugúti lun luagu fulasu; ani iyeeni meha lira, rédeiti lau murusun lídangiñe. Lau lídehan Bungiu, aba líchugun Féduru fe luagu le hadügübei ani aba lariñagun lun: “Bungiu bálugubei bayeeragun, mama wügüriña”. Lidan ouraméme ligía, aba lábürühan Ananíasi hilagubei. Kei burí ǘrüwa oura lárigiñe, aba tebelurun lúmari Ananíasi. Ibidiñoun ni kata tun luagu le asuseredubei lun túmari, aba tariñaguni ligiaméme iyeeni, ábürühatu giñe hilagubei.
26 LIDAN UNSU-HATI DARÍ 2 LIDAN DUUSU-HATI
ARUFUDAHANI GEBEGITI TÍDANGIÑETI BÍBÜLIA | ADÜGAÜ 6-8
“Lagagibudagun iseri damuriguaü kristiánu luma lénrengunga”
(Adügaü 6:1).
bt-S páh. 41 pár. 17
“Lunti waganbuni Bungiu”
17 Hagagibudaguba meha lílana iseri damuriguaü luma aban katei le denchatimati, aban turobuli le múnadagiñeti. Ka uagu wayanuha? Haritagua waméi redei hamá saragu hádangiñe ha abadiseirubaña luagu fiu dan Herusalén lun hederebudagüdüni hafiñen. Ani rúhaña meha disipulugu ha lílana uburugu ligía budagia lau sun hagundan lun ñein lan éigini luma amu burí katei hama (Adü. 2:44-46; 4:34-37). Kei meha ítara liña lubéi katei, aba lasuseredun aban katei hénrenguti: lau sun meha resibi hamá würiña ebüréuna ha hilaañabaña úmarigu “éigini dan le lafanreinhóuniwa, sagü weyu”, mibihintiña meha würiña güriegu ha hilaañabaña úmarigu ni kata (Adü. 6:1). Genegeti, houserúña lan meha wuriba ladüga aban katei le gayaraabei lanügün saragu fánreinguaü.
bt-S páh. 42 pár. 18
“Lunti waganbuni Bungiu”
18 Aba hóuserun apostolugu kei ha adundehabaña o kei musu úaraguati le meha arihibei lau iseri damuriguaü, ariñagatiña mabuidun lan hígiruni hapurichihani Lererun Bungiu lun hagíaba lan afanreinha éigini (Adü. 6:2). Ligía aba lubéi hariñagun houn disipulugu mosu lan buga hanúadirun sedü wügüriña ha chútiña au, ha buinñu umutiña lau sífiri sandu lun hetenirun lun “wadagimanu” ligía, amuriaha hagía hama lun hariñaguni hasaminan libügürü ida luba lan meha laransehóun turobuli ligía (Adü. 6:3). Mégeiwatiña meha wügüriña ha gayaraati lafiñerúniwa hawagu, lugundun mámarügübei meha lau éigini hariha, mosu meha giñe harihin lau le óundarawagubei, lagañeihóun sun le mégeiwabei luma labahüdǘniwa seinsu. Lídanñein meha güriegu sun hiri ha anuadirúbaña lun wadagimanu burí ligía ani másiñati buídutimabei lan meha lira houn würiña ha ouserúabaña wuriba. Lau lídehan furíei, akutiha hamuti apostolugu le ariñawagúbei houn ani lárigiñe aba hanúadirun sedü íbirigu lun hetenirun lun katei ligía.
(Adügaü 7:58–8:1).
Darí wamá pérüla lánina lichú aau
(Adügaü 6:15).
bt-S páh. 45 pár. 2
Esütéban, aban wügüri buin umuti lau afiñeni luma lau sífiri sandu
2 Le buídutimabei lídangiñe sun katei, marufudun lan Esütéban ni murusun anufudei lau ligibu. Íbini gumadimatiña ariha hamuti furangu ítara liña lan meha ligibu “kamá ligibu aban ánheli” (Adü. 6:15). Adügati lira lun larihíniwa ganigi luma darangilaü le hawagubei ha lóunahabaña Heowá íchiga ñunsu siélugiñe. Furanguti meha larihíniwa darangilaü le lasandirubei Esütéban darí lun harihini gumadimatiña ha buínbaña lau iyereehabúni. Kati adügübei lun hanarime lan darangilaü le lasandirubei?
bt-S páh. 58 pár. 16
“Apurichiha lumuti uganu buiti luagu Hesusu”
16 Gachansintiwa lun wapurichihan ítara kei meha lapurichihan Felipe. Moun lumuti wapurichihan lidan ábanrügü igaburi. Gayaraati wayusurun furumiñeguarügü dan lun wapurichihan, kéiburi dan le waweiyasuhan. Ani gabügürüguati larihíniwa mama lan ítaraguarügü lagumesera aban ayanuhani luma somu gürigia le haruma tanigi. Moun lumuti taweiridun wanigi luagu le lugundun ariñagatu Bíbülia adundeha hamani ánheligu apurichihani lun gayara lan lachülürün uganu le íchugubei ugundani “houn sun néchanigu, rasa, luwuyerigu dimurei luma sun fulasu” (Aruf. 14:6). Hesusuméme ariñagubalin hídehaba lan ánheligu lidan apurichihani. Dan le layanuhanbei luagu hénpulu le luáguti ilaü buiti luma híduru wuribati, ariñagati lidan lanme lidaani alubahani —lagumuchagüle ubóu le— halubahaba lan “ánheligu”. Lun hagunfulirun lau hadasin, mosu meha harumadahani Arúeihani lau hasagaruniña “sun ha afigougüdübaña amu, hama ha adügübaña wuribati”, ani mosu giñe hóundaraguniña ha lúntiña galagante hamani arúeihani sielu hama “saragu gürigia” ha lílana “amu mudún” ha lúnbaña lachawahaniña Heowá tidoun lóundarun (Mat. 13:37-41; Aruf. 7:9; Huan 6:44, 65; 10:16).