Ariñahani le lunbei lakutihóun lidan adamuridaguni Habagari Kristiánugu luma Heseriwidun
7-13 LIDAN DIISI-HATI
ARUFUDAHANI GEBEGITI TÍDANGIÑETI BÍBÜLIA | SANTIAGU 3-5
“Arufuda waméi lichú aau le lúmagiñebei Bungiu”
cl-S páh. 221, 222 pár. 9, 10
Adundeha lumuti san “lichú aau le lúmagiñebei Bungiu” wabagari?
9 “Furumiñe anihein aban ibagari harumati hawagu”. Yúsuati dimurei güriegu “ibagari harumati” lun layanuhóun luagu arumani dandu múnadagiñe kei bóugudigiñe. Arufudatu Bíbülia buin tiña lan anigi lidan larufudúniwa lichú aau, ligía siñabei lubéi líchugun Bungiu lichú aau woun anhein dáseiñu tiña lubéi wanigi lau luriban saminaü, luriban ayumahani o mabuidun lan lébuna wadügüni katei (Ariñawagúni 2:10; Matéu 15:19, 20). Ánheinti dan le haruma tan wanigi darí le ñein lumuti siñaali lan ladüga figóu, díseñu liña wakipuragun woungua luéi wuribani ani adüga wamuti le buídubei (Sálumu 37:27; Ariñawagúni 3:7). Ma ligía gadüna lubéi lun liridúniwa “ibagari harumati” furumiñe, lubaragiñe liridún le líbiri igaburi le harufudubei “ha gámabalin lichú aau le lúmagiñebei Bungiu”? Lugundun, ida luba hamugagia warufuduni le líbiri igaburi anhein wiye lubéi wanügüni wabagari luma ligaburi wáhuduragun lun Bungiu?
10 “Gálumatiña”. Ínchaha lumutiwa lichú aau le lúmagiñebei Bungiu lun wáfaagun lun ñein lan darangilaü, le ábanbei lídangiñe igaburi le líchugubei lani Bungiu sífiri sandu (Galasiana 5:22). Ligía wáfaagunbei lun madügün wamá lun leferidirun “darangilaü le óundarubaliwa súngubei” keisi lumutuniña Heowá (Éfesuna 4:3). Ani dan le anihein lan turobuli waganagua, adüga wamuti sun wayaraati lunya ñein lan darangilaü. Ka uagu súdini lubéi lun wóuserun ítara? Ladüga ariñaga tan Bíbülia: “Abagarida humá lidan úarani luma darangilaü. Ítara luba húmabei lan Bungiu lau lidarangilaü luma línsiñehabu” (2 Korintuna 13:11). Wámabei lubeiti Lubungiute darangilaü sunme darangiluméme lan wanügüni wabagari. Adügati ligaburi wóuseruniña wábirigu lidan afiñeni lun labuidurun o lagadeirun ligaburi wanaagun woungua luma Heowá. Ida liña warufuduni adüga wamani sun wayaraati lun ñein lan darangilaü? Ariha wamá aban hénpulu.
cl-S páh. 223 pár. 12
Adundeha lumuti san “lichú aau le lúmagiñebei Bungiu” wabagari?
12 “Areidatiña”. Ka mini lubéi dimurei le? Según hariñaguni sásaamu, hénrenguti lásügüragüdüniwa dimurei güriegu le ayusurúbei lidan Santiagu 3:17. Anuhein Bíbülia to ídantu lásügüragüdüwa dimurei le kei “gamadóuti”, “gaguraasunti” o “gunfurandati”. Ánheinti lidan abürüdǘni le tídanbei Traducción del Nuevo Mundo, arufudúati “gánharaditi” lan mini lubéi dimurei le áfuachubei ñein. Ida liña warufuduni adundeha lániwa igaburi lídangiñeti lichú aau le lúmagiñebei Bungiu le?
cl-S páh. 224, 225 pár. 14, 15
Adundeha lumuti san “lichú aau le lúmagiñebei Bungiu” wabagari?
14 “Gaganbaditiña”. Lau dimurei le lásügürawagüdüwa aban dimurei le máfuachunbei lidan amu fulasu lidan Abürüdǘni Güriegu luéidigia lidan bérusu le. Ariñagati aban abürühati tuagu Bíbülia “gabügürügua lan layusurún dimurei le lun layanuhóun luagu igaburi le lunbei hafurendeiruni milidaru”. Adügati dimurei le lun lasaminarúniwa luagu aban gürigia le “ménrenguti linchahóuniwa adügei katei” luma aban le “adügübalin sun le ariñawagúbei lun”. Ligíati, dan le lichú lan aau le lúmagiñebei Bungiu adundehabalin aban gürigia, falá lumuti gürigia ligía gumadi burí le tídanbei Bíbülia lau sun lugundan. Masubudirúnwati kei aban gürigia le máhabei lasansiruni lisaminan dan le arufudúaali lan lun mítaran lan katei kei lasaminaruni. Lubaragiñe lira, másuhanti lun lasansirun dan le arufudúaali lan lun tau Bíbülia furangu mabuidun lan ligaburi lóuserun o lisaminan. Subudiwatiwa san kei gürigia ha óuserubaña ítara?
“Gudemehabutiña [ani] adüga hamuti le buídubei”
15 “Gudemehabutiña, adüga hamuti le buídubei”. Kei gudemehabu habéi gürigia ha arufudubalin lichú aau le lúmagiñebei Bungiu, lunti buinñu hamá lau igaburi le. Teni wamá giñe iridúa lan gudemehabu úara luma ladügǘniwa “le buídubei”, aban katei le gayaraabei wagurabuni dan le gabaroun wamani anihein lan dan tarufuduni Bíbülia gudemehabu kei igaburi le larufudubei aban gürigia lau líderagun amu ladüga berese lan lau. Ínchaha lumutiwa gudemehabu adüga saragu katei buiti hawagu amu. Ariñagatu aban líburu gudemehabu lan “íruni le lasandirubei gürigia dan larihiniña amu asufurira ani ligía ínchahabalin lun líderaguniña”. Ligíati, úati meberesenhabu lan gürigia le arufudubalin lichú aau le lúmagiñebei Bungiu, úati giñe furunde lan, meredeti igaburi le lídanrügü lisaminan, lubaragiñe lira, óuserati lau ínsiñehabu, gamadóuni luma gunfurandaü. Ida liña warufuduni buin waña lan lau gudemehabu?
cl-S páh. 226 pár. 18, 19
Adundeha lumuti san “lichú aau le lúmagiñebei Bungiu” wabagari?
18 “Aban labu hanügügiña sun gürigia”. Úati lúgaaru lun lasandirúniwa iyereehabúni hawagu lílana amu rasa lidan lichú aau le lúmagiñebei Bungiu, ni lun wéiriya lan ínsiñeni le lasandirubei gürigia luagu lageira. Ligíati, anhein lichú lubéi aau le lúmagiñebei Bungiu adundehabalin ligaburi wóuserun, wáfaaguba lun wagidaruni igaburi lánina hímeiwa lan aban gürigia luéi amu tídangiñe wanigi (Santiagu 2:9). Mámarügüñanu gürigia ha íñubei hafurendein, ha buídubei hadaani o ha agunfulirubaña lau somu buligasion lidan damuriguaü wóusera buidu, móuserun wagía ni aban íbiri kei ni kata, ka lan yebe lueirin lugudemen. Anhein hínsiñe habéi lun Heowá, lunti giñe hínsiñe hamá woun.
19 “Furangutiña [o ‘úati biangua lan hagibu’, TNM]”. Gayaraati meha layanuhóuña lan luagu “gürigia le lídanbei aban aríawasei” lau dimurei güriegu le ásügürawagüdübei ya kei “úati biangua lan hagibu”. Lidan meha binadu dan, yúsutiña meha güriegu hama rómana ha íchugubaña aríawasei óunwenbu burí lidáü hagibu. Ligía yusua lubéi dimurei güriegu “biangua tigibu” lun layanuhóun luagu marasualuguti le afamurubei lidan ligaburi lóuserun. Lunti larihíniwa igaburi le lánina úa lan biangua lan wagibu, mámarügü lidan ligaburi wóuseruniña kristiánugu wáledigu, lunti giñe larihíniwa lidan le wasandirubei hawagu.
Darí wamá pérüla lánina lichú aau
w08-S 15/11 páh. 20 pár. 6
Puntu méiniti tídangiñetu ligaradan Santiagu tuma ligaradan Féduru
4:5. Ka bérusu uágubei layanuha Santiagu ya? Mámatima le lariñagubei ábanrügü bérusu líridubei Santiagu ya. Másiñati lídangiñe lan bérusu kéiburi Agumesehani 6:5; 8:21; Ariñawagúni 21:10 luma Galasiana 5:17 lasagarei Santiagu dimurei burí lúmagiñeti Bungiu le líridubei.
w97-S 15/11 páh. 20 pár. 8
Ínchaha lumutiwa afiñeni lun gaguraasun wamá luma lun wafurieidun estodi
8 Lau sun figóu lan wayanuhan wuriba hawagu kristiánugu wáledi (Santiagu 4:11, 12), añahein íbirigu adüga hamuti, háfuga ladüga samina hamá súdinitima hamá hawéi ha híbiri o busén hamá lun wéirigu lan hanügǘniwa, ani lun lira, aba hadügüraguniña amu (Sálumu 50:20; Ariñawagúni 3:29). Lau dimurei güriegu le ásügürawagüdübei kei “adimureha wuriba”, layanuhóuña luagu katei le adügǘbei lau tigahü anigi, lichugún duru le hanarimeyati o lau magudemehabu luagu somu íbiri o lariñawagún marasualugu luagu. Ka uagu ladimurehóuña lubéi wuriba luagu lilurudun Bungiu luma ladarirúniwa mégeiti luagu dan ladügǘniwa lira? Samina wamá hawagun fariséugu hama arufudahatiña lilurudun Moisesi, hígiruñein meha “lugumadin Bungiu” lau lérügüñein lan hagumadin wügüriña harufudaha (Márükosu 7:1-13). Ítarameme, ánhawa íchiga duru luagu aban íbiri le uáguti míchugun lan Heowá duru, wadimurehaña “wuriba luagu lilurudun” ani wafigouhaña lau wadügün lun lasaminarúniwa anihein lan mégeiti luagu lúrudu ligía. Mama wagunfuliruña lau lúrudu lánina ínsiñeni dan wayanuhan wuriba luagu somu íbiri mébunouga (Rómana 13:8-10).
14-20 LIDAN DIISI-HATI
ARUFUDAHANI GEBEGITI TÍDANGIÑETI BÍBÜLIA | 1 FÉDURU 1, 2
“Lunti habagaridun aban ibagari sánduti”
Lebegi asalbaruni: aban idewesei buiti lúmagiñe Wáguchi
5 Agia wagía, ida liña warufuduni hínsiñe lan liri Heowá woun? Lau le wadügübei. Agurabati Heowá lun sandu wamá (aliiha huméi 1 Féduru 1:15, 16). Ligía lúnrügüñein lubéi wáhuduragua ani gaganbaditiwa lun tídangiñe sun wanigi. Íbini dan le wéibaahoun, áfaaguatiwa lun wawinwandun kei larufudahani Heowá woun. Dan le gaganbadi wamá lun lilurudun, rútiwa uéiriguni lun liri (Matéu 5:14-16). Arufudatiwa giñe buidu lan lilurudun Heowá ani aban lan yeeti Satanási. Inarüni chará wamá ladüga gafigoun wamá. Gama lumoun, dan le wachararun, aba wasakürihan ani aba wáfaagun lun wígirun furumiñeguarügü katei le awiyedubalin liri Heowá (Sálumu 79:9).
Ida luba wanúadahan isebáhari buiti
6 Ariñagati Pábulu houn kristiánugu rómana: “Míchaagua humá hungua lun figóu” (lidan amu dimurei, “ni aban lídangiñe lumegegun húgubu”, La Palabra de Dios para Todos). Ariñagati giñe houn ‘áfara huméi igaburi lánina figóu le hídanbei’ (Rómana 6:12-14; 8:13). Lubaragiñe lira, ayanuhaali luagu fiú lumegegun úgubu luma ida liña lan layusurún lun le wuribabei. Lidan layanuhan hawagu gürigia gafigountiña ariñagati: “Buin liña hayuma lau íñarawaguni”. “Fureseti hagudi lun houdin áfaraha”. “Maritagungubéitiña luagu linebenwa Bungiu” (Rómana 3:13-18). Lun hamuga layusuruni kristiánu aban lídangiñe lumegegun lúgubu lun ladügün figóu libe lira lawiyeduñein hamuga sun lúgubu. Kéiburi anhein aríagua tagübüri iyawaü to ñein lumuti agamariduni o lanarime wuribani subudiñulei wuriba lan, ‘layusuruñein lagu lun figóu’ ani lawiyeduñein sun lúgubu. Siñaali hamuga ladagaragüdüni lúgubu keisi sákürifisiu le auti lagundaara Bungiu, lugundun mámaali lan aban eseriwiduni sánduti o harumati (2 Lúrudu 15:21; 1 Féduru 1:14-16; 2 Féduru 3:11). Wéiribei liserun lafayeihan ladüga lanúadahan isebáhari le wuribati.
Darí wamá pérüla lánina lichú aau
w08-S 15/11 páh. 21 pár. 10
Puntu méiniti tídangiñetu ligaradan Santiagu tuma ligaradan Féduru
1:10-12. Wéiriti meha hayumahan ánheligu gunfuranda hamani lilulin-agei inarüni lúmagiñeti Bungiu le habürüdübei profetagu ha meha awinwandubaña lidan binadu dan hawagu kristiánugu anuadirúaaña ha lílanabaña damuriguaü. Gama lumoun, úati gunfurandawa lan inarüni burí ligía darí lárigiñe lagumeseruni Heowá damuriguaü kristiánu (Efe. 3:10). Áyeiha wamaña ánheligu lau wakutihani “lilulin-agei laritagun Bungiu” (1 Ko. 2:10).
“Néibuguba lidan binarün”
11 Luriban saminaü luma luriban igaburi. Sun ha abagaridubaña úaragua luma inarüni, lunti sandu hamá (Isa. 35:8; aliiha huméi 1 Féduru 1:14-16). Dan le wafurendeirunbalin inarüni, sun wagía mosu meha wadügün asansiruni. Añahein fiu, mosu meha hadügün saragu asansiruni. Meberesenga le meha lunbei wadügüni, moun lumuti wígiruni laruman wabagari luagu iwiyei le ubouagubei. Kábati íderaguawa? Wararamagun asaminara luagu lueirin lebegi asalbaruni le lafayeirubei Heowá lun sandu wamá: lita Hesukrístu, le Liráü (1 Fe. 1:18, 19). Lun sándumeme wamá ligibugiñe Heowá, lunti wakipuruni lebegi sákürifisiu le ladügübei Hesusu tidan wanigi luma lidan wasaminan súnwandan.
21-27 LIDAN DIISI-HATI
ARUFUDAHANI GEBEGITI TÍDANGIÑETI BÍBÜLIA | 1 FÉDURU 3-5
“Yarafaali lagumuchun ubóu”
‘Deregegua humá hungua lun afurieidúni’
“DAN le layarafadun larugadun ligía oura le hénrengutimabei lun herederun gürigia agagudúañu”, ítara liña lariñaguni aban wügüri le meha nadagimeinbei áriebu. Chóuruti ligiaméme lan hasaminanbei saragu gürigia ha mósubei herederun marumugunga sun áriebu. Sun kristiánugu uguñe weyu lídanñadiwa aban sügǘ libe lira, lugundun limigifen áriebu lidan ubóu le lábugiñebei lubafu Satanási lídanñein oura le búritimabei, ani málühali agumucha (Rom. 13:12). Wéiribei peliguru ánhawa eredera arumuga lidan dan awanseeli le! Súdiniti lun ‘aranseñu wamá’ ani sigí wameime adundehani tídangiñeti Bíbülia lun ‘deregeguañu wamá woungua lun afurieidúni’ (1 Fe. 4:7).
w99-S 15/4 páh. 22 pár. 3
Akutiha waméi igaburi le gayaraabei lagadeiruni wamadagua luma Heowá ani gidá waméi wawariua
Lagumuhóun, gabaroun waméi adundehani le líchugubei apostolu Féduru lau ínsiñehabuni: “Yarafaali lagumuchun ubóu, ligía lunti lubéi aranseñu humá, ragügua huguyame hungua, deregegua huguyame hungua lun afurieidúni. Lóugiñe sun katei, ñeinlá saragu ínsiñeni hidan houn híbirigu; lugundun daruguati ínsiñeni lau saragu figóu” (1 Féduru 4:7, 8). Ménrengunti werederun asaminara saragu luagu burí charati —le lan yebe wadügübei o le hadügübei amu—, wareidahani tidan wanigi luma wígirun lun leberesehaniwa o ladügün lun wachugeragun. Subudi lumuti Satanási buidu hechu hamá gürigia adügei lira. Kei busén lubéi lun wábürühan tidoun lisadaran, yusu lumuti luriban igaburi le lun ñein lan fánreinguaü wadan. Ligía súdini lubéi warufudun saragu ínsiñeni wóuniwagua lau wadouragun lau burí figóu lau lóufudagun, míchugun wamaamuga “lúgaaru lun Mafia” (Éfesuna 4:25-27).
Wéiriti lisudinin weresibiruniña amu buidu
2 Laganagua katei le lariñagubei Féduru houn kristiánugu ariñagati giñe: “Resibigua humá hungua” (1 Fe. 4:9). Dan le layusurún dimurei “resibigua humá hungua” lidan güriegu, layanuhóuña luagu “larufudúniwa ínsiñehabuni luma areini houn gürigia ha ibidiñetiña woun”. Gama lumoun, ariha waméi dan le lan lariñagunbei Féduru houn kristiánugu líledi lun heresibiruniña amu buidu, ariñagati houn “resibigua humá hungua”, mini lan lira mosu lan heresibiruniña gürigia ha subudibaña houn ani ha harihubaña súnwandan. Kaba meha buiti lanüga lira houn?
3 Líderagubaña meha lun lídantima hamá aban. Samina wamá wawouguoun. Ma inarüni mabulieidun wamani lubuidun dan le wásügürübei dan le lamisurahanbaliwa somu íbiri lúbiñoun? Agia dan le wagía lan agunbirahabei somu íbiri wábiñoun, ma inarüni ídeha lan lira lun buídutima lan wanaagun woungua luma? Ídehati buidu lan weresibiruniña amu lun wasubudiruniña wíbirigu buidu. Lidan meha dan le ídanbei lawinwanda Féduru, súdiniti meha houn kristiánugu lun lídantima hamá aban eibu lásügürün dan. Ligiaméme asuseredubei woun lidan “lagumuhóun dan” le (2 Tim. 3:1).
Darí wamá pérüla lánina lichú aau
Manügünti inarüni gálumaü, “wuribu” lanügübei
14 Óusera wamá buidu. Íbini líderagubadiwa lan wayanuhan lau darangilaü lun wakipuruni darangilaü hama waduheñu, wéiritimabei líderaguniwa wakipurun aban igaburi buiti (aliiha huméi 1 Féduru 3:1, 2, 16). Ánhawa íchiga aban hénpulu buiti, gayaraati wadügün lun harihini gunda hamá gefentiña luagu Heowá lidan hamarieidun, góunigi hamutiña hasaanigu ani wínwantiña aban ibagari harumati ani le buiti. Íbini anhein machülürün dan lun gefén hamá waduheñu luagu Heowá, gayaraabei wagundaarun ladüga úaragua wamá lun Heowá.
w08-S 15/11 páh. 21 pár. 8
Puntu méiniti tídangiñetu ligaradan Santiagu tuma ligaradan Féduru
4:6. Kátaña san “hilaaña” ha únbaña lapurichihóua uganu buiti? Layanuhóuña hawagu ha meha hilañubaña “lidan wuribani luma figóu” lubaragiñebei haganbuni uganu buiti, lidan amu dimurei, ha meha ítarabaña kei hilaaña lidan hamadagua luma Bungiu (Efe. 2:1). Danti hánharunbei lun uganu buiti, ítara liña kéigubeirügü wínwanhaña lan lidan hamadagua luma.
28 LIDAN DIISI-HATI DARÍ 3 LIDAN UNSU-HATI
ARUFUDAHANI GEBEGITI TÍDANGIÑETI BÍBÜLIA | 2 FÉDURU 1-3
“Agurabañu waméi lachülürün luéyuri Heowá”
w06-S 15/12 páh. 27 pár. 11
Líchugubei Heowá haricha houn
11 Ida lubati gunfuranda wamani füramasei le ladügübei Hesusu libügürü líchugubei lan Heowá haricha lánigu houn madarasahanga? Lau sun arufudaha tan Lererun Bungiu weiri lan luguraasun Heowá, ariñagatu giñe “madarasahanbei” lan, lagunfulirubei lasiadihan lidan dan ani lau lóufudagun (Lúkasi 18:7, 8; 2 Féduru 3:9, 10). Dan meha le ladagarunbei Guran lidaaniwagu Noé, gumuguagüda lumutiña Bungiu gürigia wuribatiña lau lóufudagun. Ligiaméme asuseredubei lidaaniwagu Lotu, dan le láfarunbei watu gemeti le ábürühabei siélugiñe saragu wuribatiña. Ariñagati Hesusu: “Ítara luba danme le niabin, au le Wügüri Garaüwarügüti [‘arufudagua nungua’, TNM]” (Lúkasi 17:27-30). Ítara liña, sódiniyabei hagünrinchawagun wuribatiña (1 Tesalónikana 5:2, 3). Ligía gayara lubéi wachoururuni mígirunbei lan Heowá lun lasigirun ubóu le lábugiñebei lubafu Satanási nírügü aban weyu lóugiñe le richabei.
w06-S 15/12 páh. 19 pár. 18
“Yarafaali lanarime luéyuri” Heowá!
18 Gébunati lubeiti línchahaniwa apostolu Féduru lun agurabañu wamani “lachülürün luéyuri Bungiu”! Ka lunbei wadügüni? Wanügün aban ibagari harumati, ábanbei lídangiñe, luma deregeguañu wamá woungua “lun Bungiu sunsuinagubei” (2 Féduru 3:11, 12). Beresegu wamá adügei sun le ídehabei lun agurabañu wamani lachülürün luéyuri Heowá. “Hóufudahani” mini lubéi dimurei güriegu le ásügürawagüdübei kei “agurabañu”. Lau sun siñabei lan wafuresehani dan le mégeigilibei lubá lachülürün luéyuri Heowá, ánhawa akipuragua woungua beresegu lidan weseriwidun lun Bungiu sunme awanha lan agurabaha, furesebei wasandiruni lásügürün dan (1 Korintuna 15:58).
Darí wamá pérüla lánina lichú aau
w08-S 15/11 páh. 22 pár. 2
Puntu méiniti tídangiñetu ligaradan Santiagu tuma ligaradan Féduru
1:19. Ka san un laguarúa “waruguma to lánina binaafin”? Ídabuga láfurida ani ida liña wasubudiruni susereeli lan lira? Lun Hesukrístu laguarúa “waruguma to lánina binaafin” lárigiñebei lagumeserun arúeiha (Aruf. 22:16). Lidan irumu 1914 “láfurida” Hesusu hañúarü sun ha ladügübaña Bungiu keisi Mesíasi ani Urúei, awisaheina gumesemémeeli lan aban iseri dan. Arufuda laali meha lámuñedagun larihín Hesusu liñúarü Féduru ida luba lan uéiriguni luma ubafu le meha lunbei leresibiruni Hesusu keisi urúei ani adügati lun larihíniwa furangu gayara lan lafiñerúniwa luagu dimurei burí lánina profesía le lúmagiñeti Bungiu (Mar. 9:1-3). Ánhawa íchiga arigei lun dimurei burí le, ladügüba lun larugoungadun tau wanigi, ábameti wíchugun fe furiharu lan Waruguma to lánina binaafin.
w08-S 15/11 páh. 22 pár. 4
Puntu méiniti tídangiñetu ligaradan Santiagu tuma ligaradan Féduru
3:17. Ka meha burí katei subudi hamaalibei kristiánugu lúmagiñe lubaramegiua? Layanuhaña meha Féduru luagu subudi luáguti ámuñegü le leresibirubei lúmagiñe Bungiu dandu ligía kei amu abürühatiña Bíbülia. Inarüni masubudiragüdün lani meha sun katei houn, ligía anihein lubéi meha katei luáguti ámuñegü le ibidiñeti houn furumiñetiña kristiánugu. Íbini ítara, ídehati lun hasubudiruni ka lan gayaraabei hagurabuni.