Ariñahani le lunbei lakutihóun lidan adamuridaguni Habagari Kristiánugu luma Heseriwidun
4-10 LIDAN UNSU-HATI
ARUFUDAHANI GEBEGITI TÍDANGIÑETI BÍBÜLIA | 1 HUAN 1-5
“Mínsiñedala ligaburi ubóu hun ni burí katei le lídanbei”
w05-S 1/1 páh. 10 pár. 13
Falá waméi hénpulu le líchugubei Hesusu
13 Másiñati añahein lan asaminarutiña mama lan sun katei le lídanbei ubóu le lun wuribabei lan. Íbini ítara, gayaraati ménrengun lan ladügün ubóu luma katei buíduburiti larihín le lídanbei lun ladireirun wasaminan luéi weseriwidun lun Heowá. Úati giñe ni kata lídangiñe le lídanbei ubóu le adügǘti lun líderaguniwa ayarafada lun Bungiu. Ligíati, ánhawa asandira ínsiñeni luagu katei le lídanbei ubóu, íbini genege lan woun buidu lan, gayaraabei ladügün damichi woun (1 Timotéu 6:9, 10). Le linarün katei, wuribati liibe-agei katei le lídanbei ubóu le ani gayaraati lagadeiruni wagaburi. Kéiburi ánhawa aríagua pelikula o programa tidan bigibigitu le ñein lubéi larihúatima anarimeni, línsiñegu umegeguni o magíaguni, gayaraabei lachülürün dan lun wánharun lun katei burí le luma wábürühan lidoun. Dan geyegu waña lan hau gürigia ha etenirubaña lun habuiduragüdüni habagari o hadügün iseri bísinisi, le chóurutimabei wasaminaruba lan kei hagía (Matéu 6:24; 1 Korintuna 15:33).
Samina humá ka lan igaburi lunbei harufuduni keisi gürigia
18 Ábanya katei le lunbei líderaguniwa lun wadisedun luéi “katei le líchugubei ubóu”, wasaminarun luagun dimurei le lariñagubei Huan: “Ani ubóu, agumucheina liña lau burí sun luriban hayumahan gürigia; ánheinti le adügüti lugundan Bungiu, labagariduba lun sun dan” (1 Huan 2:17). Arihúati ubóu le lani Satanási kamá hamuga inarüniti ani laduraruba lan, gama lumoun, lachülürüba dan lun lábürühan. Mígira wamá lun leyeeduniwa: úati ni kata lídangiñe le gayarabei wibihini ya ubouagu lunti ladurarun.
Darí wamá pérüla lánina lichú aau
Gayarati wafiñerun luagu lugumadin Heowá
14 Buin liña fánreinti le lánina Abürüdǘni Güriegu Kristiánu lau saragu adundehani lun laritaguagüdüniwa lunti lan hínsiñehabu wamá. Ariñagati Hesusu anihán lan libiaman gumadi le súdinitimabei: “Hínsiñe hamá bíbirigu bun kei bínsiñegua bungua” (Mat. 22:39). Wati Santiagu, le lamulen Hesusu tuéigiñe lúguchu, lun gumadi ligía “liñu-agei lúrudu” (Sant. 2:8). Abürühati apostolu Huan: “Niduheñu, mámatia iseri gumadi le nabürühabei hun, ligiaméme le meha heresibirubei lúmagiñe furumiñeti dan. [...] Gama lumoun guentó nabürühaña hun luagu aban iseri gumadi” (1 Huan 2:7, 8). Ka labusenrubei lariñagun lau “binadu gumadi”? Layanuhaña luagu gumadi lun hínsiñehabu wamá houn amu gürigia. Binaduhali ladüga ru laali lan meha Hesusu “lúmagiñe furumiñeti dan”. Ani ‘iseriti’ ladüga mosu lan harufudun aban óunwenbu ínsiñeni darí lun hadügün sákürifisiu luagu hafulesein amu, lugundun líderagubaña meha ínsiñeni ligía lun hawanduni katei burí le meha lunbei liabin houn. Wagía, keisi lánigu Kristu disipulu, ma gúndaatiwa ladüga laritaguagüdüniwa woun súdini lan hínsiñedun wíbirigu woun lun mebelurun lan igaburi le lídanbei ubóu le tidoun wanigi?
it-1-S páh. 635 pár. 8
Ferudun
Gayaraati wafurieidun lun Bungiu lun feruduna lani hafigoun amu íbini hawagu sun lílana aban damuriguaü. Ligía ladügübei Moisesi hawagu ísüraelina, gúfese lumuti hafigoun, amuriaheina ferudun ani aganba lumuti Heowá lafurieidun (1 Lu 14:19, 20). Furíeiti giñe Salomón lun Heowá dan le hederegerunbarun ténpulu lun ani amuriahati luma lun feruduna lani hafigoun lubúeingu sagü hachararun ani lárigiñe, aba hígiruni wuribati le hadügübei (1 Ur 8:30, 33-40, 46-52). Furíeiti Ésüdürasi hawagu huríu ha agiribudubaña hageiroun ani gúfese lumuti hachara hagibugiñe saragu gürigia. Adügati furíei ligía, le áfuridubei tídangiñe sun lanigi, lun hadügün lílana uburugu aransehani lun feruduna lániña Heowá (Ésüd 9:13–10:4, 10-19, 44). Ínchaha lumuti giñe Santiagu gürigia le sándibei lidan lumadagua luma Heowá agúara houn wéiyaaña lidan afiñeni lun hafurieidun luagu, ani “anhein giñe afigouhaali lubéi, ferudunawabei lifigoun” (Snt 5:14-16). Lau sun lira, anihein aban “figóu lánina óunweni”, lememe lafigouhan gürigia luagu sífiri sandu, aban katei le ladügübei gürigia chuñu lau luagu wuriba lan ani aniha adügei, siñati ferudunawa lan figóu le. Moun lumuti lafurieidun kristiánu luagu le adügübalin luwuyeri figóu le (1 Hn 5:16; Mt 12:31; Ebü 10:26, 27; arihualá ESPÍRITU; PECADO).
11-17 LIDAN UNSU-HATI
ARUFUDAHANI GEBEGITI TÍDANGIÑETI BÍBÜLIA | 2 HUAN 1 DARÍ HÚDASI
“Mosu wáfaagun lun lídanmeme wamá inarüni”
w04-S 15/9 páh. 11, 12 pár. 8, 9
“Here humá lídanñu aban luma Wabureme”
8 Subudi wamuti le labusenrubei Mafia lugundun arufuda tumuti Bíbülia ka lántima layusurubei lun lábürühan hawagun gürigia (2 Korintuna 2:11). Adügati meha Mafia lun lasufurirun Hobu lau leferidiruni lúmati, hounwen gürigia ha hínsiñebaña lun, ebedaaguni hámagiñe liduheñu, sandi luma dimurei le abuleseihati hámagiñe umadagu wuribatiña, adügati katei burí le lun lírudagun wügüri úaraguati ligía saragu luma lun lasaminarun ígira laali lan meha Bungiu (Hobu 10:1, 2). Uguñe weyu, lau sun másiña lan mama lan lidurun Satanási lénrengunga le wásügürübei, sügütiña saragu kristiánugu lídangiñe lénrengunga, ani gayaraati ladügün Mafia somu katei lun libihini wuribati le lasaminarubei ladügün.
9 Lidan lagumuhóun dan le, gíbetimahali katei adügüti lun lidan lan denchaü wamadagua luma Bungiu. Wawinwanduña lidan aban ubóu le ídanbei súdinitima lan laluahóun umegeguni sügǘ lau letenirun gürigia lun lumadagua luma Bungiu. Adügaali le tídanbei bigibigitu, Internet, radiu, o periodiku, lun larihíniwa magíaguni kei aban katei le íchugubei ugundani lubaragiñe aban lan katei le anügübei igarigu. Ani hiibe-agei gürigia áluaha hamuti “hagundan guánarügü lubaragiñe hamuga háluahani Bungiu” (2 Timotéu 3:1-5). Ánhawa madügün saragu áfaaguni luagu wafiñen, gayaraabei ladügün saminaü burí lira lun larabahan wamadagua luma Bungiu (Húdasi 3).
Darí wamá pérüla lánina lichú aau
wp17.1-S páh. 12 pár. 1
Subudi lumuti gúndaagüda laali lan meha Bungiu
Ka katei lariñagubei Enoku lidan profesía? Ariñaga lumuti le: “Ariha numuti Nabureme liabin hama saragu milu hádangiñe lani ánheligu lun laguseragüdüniña sun ha wuribabaña luagu sun wuribani le adüga hamaalibei, luma luagu burí anabahani le ariñaga hamaalibei luagu” (Húdasi 14, 15). Másiñati chawá lani hisaminan ayanuha lan Enoku kamá adüga laali Bungiu le ariñawagúbei lidan profesía. Adüga hamuti saragu profeta ligiaméme. Lau lariñaguni ítara, larufuduña meha chouru lan lagunfuliruba lan profesía ligía darí lun gayara lan layanuhóun luagu kamá gúnfulihali (Isaíasi 46:10).
wp17.1-S páh. 12 pár. 3
Subudi lumuti gúndaagüda laali lan meha Bungiu
Adügati wasaminarun luagu afiñeni le larufudubei Enoku lun wálügüdagun woungua anhein ariha wabalin ubóu kei larihini Heowá. Húugili ñunsu le lapurichihabei Enoku; súdiniti uguñe weyu kei lidan lidaani. Gúnfuliti eweridihani le líchugubei Enoku dan le ladügünbei Heowá lun lagumeserun Guran ani gumuti hau gürigia wuribatiña ha meha lidaaniwagubaña Noé. Larufudarügüñein meha sügǘ lira aban günringuaü wéiritimati le lunbei liabin (Matéu 24:38, 39; 2 Féduru 2:4-6). Uguñe weyu, aranseeli giñe Bungiu hama lani ánheligu lun hábürühan hawagu lílana ubóu wuribati le luma lun laguseragüdüniña lau le yuubei houn. Ariha waméi lisudinin ñunsu le líchugubei Enoku ani ariñaga waméi houn amu gürigia le lunbei lasuseredun. Másiñati ñeinbei lan dan wasandirun wábuguarügüñadiwa lan ladüga míderagun hamaniwa waduheñu hama wamadagu. Lau sun lira, ítara kei mígirun lani Heowá Enoku, mígirun lubaña giñe Heowá ha eseriwidubaña lun lau úaraguni.
w08-S 15/12 páh. 29 pár. 9
Puntu méiniti tídangiñetu ligaradan Huan luma Húdasi
Ka lunbei wadügüni lun werederun “lidan línsiñehabu Bungiu”? Lunti wadügüni ǘrüwa katei le: 1) deregüdagumeme wamá lidan wafiñen lau waturiahanu Lererun Bungiu estodi luma lau wapurichihani uganu lau ubebeni; 2) wafurieidun lábugiñe lubafu sífiri sandu 3) wafiñerun luagu sákürifisiu le ladügübei Hesukrístu, le adügübei lun gayara lan libihíniwa ibagari magumuchaditi (Huan 3:16, 36).
18-24 LIDAN UNSU-HATI
ARUFUDAHANI GEBEGITI TÍDANGIÑETI BÍBÜLIA | ARUFUDÚNI 1-3
“Subudi numuti sun le hadügübei”
Ka luwuyeri igaburi harufudubei?
8 Lun máyeihan wamani igaburi le, haritagua waméi ariñaga tan Bíbülia añahein lan “sedü waruguma lidan lúhabu [Hesusu] le lóunwenren”. Mini hamá “waruguma” ha, kristiánugu anuadirúaaña ha arihibaña lau damuriguaü, hama sun íbirigu ha anügübalin ubaraü lidan damuriguaü. Gayarati lalidihaniña Hesusu “waruguma” ha lúhaburugubaña lidan igaburi le buídutimabei lun (Aruf. 1:16, 20). Ligíati, kei lichügüdina damuriguaü kristiánu, gabafuti lun lalidihaniña ha anügübalin ubaraü lidan damuriguaü. Ariñagatu Bíbülia “ítara liña [lan] lagu kei watu gemeti”, mini lan lira, aríagu liña lan lun sun le asuseredubei; ligíati, anhein megei lubéi aban wéiyaali lidan afiñeni somu ebechúni, Hesusuba ariha lau leresibiruni ebechúni ligía lidan dan luma igaburi le buídutimabei (Aruf. 1:14). Lídanme awanha lan agurabaha lun lasuseredun le, sigitiwa arufuda inebesei houn wügüriña ha anuadirúbaña lau sífiri sandu lun hanügüni ubaraü lidan damuriguaü, lugundun abürühati Pábulu: “Gaganbadi humá houn ha arufudahabaña hun, deregegua humá hungua houn; lugundun hagía óunigirubarun huani, ani kei hasubudiruni, gasu haguserun ligibugiñe Bungiu luagu hóunigirunün. Houcha humá lun medereragüdün humani hawadigimari, lugundun mabuidunbei hamuga giñe lira hun” (Ebü. 13:17).
Góunigi lumutiwa Heowá lun wasalbarun
11 Lidan arufudúni le adarirubei lidan kapítulu 2 luma 3 tidan líburu Arufudúni, aba líchuguni Hesukrístu larihin, lárigiñe láguyugun, luagun sedü damuriguaü le meha lídanbei Liraüraü Asia lun lasubudiruni ka lan asuseredubei ñein. Arufudati arufudúni le, mámarügüñein lan turóbuli wéinamuti lariha, teniti giñe Kristu lun burí katei le ñǘraütimati. Darí lun lariñaguni hiri fiú gürigia, ani ruti gurasu houn súngubei luma adundehani le lemegeirubei kada damuriguaü. Ka wafurendeirubei lídangiñe katei le? Gúnfuliti arufudúni le, lúmagiñe irumu 1914. Sedü damuriguaü to arihiboun lidan arufudúni le, mini tan kristiánugu anuadirútiña, ani huuti adundehani le líchugubei houn, lun sun burí damuriguaü le ñein habéi lubúeingu Bungiu lidan sun ubóu uguñe weyu. Gayarati wasaminarun yusu lumuti lan Heowá Liráü lun ladundehaniña lumutuniña. Ka lunbei wadügüni lun wasagarun buiti lídangiñe adundehani le líchugubei?
w01-S 15/1 páh. 20 pár. 20
Touba touba wamá lóundarun Heowá
20 Lun touba touba wamá lóundarun Heowá to awanseruboun, mosu wánharun lun dasi le líchugubei Bungiu lun Hesukrístu keisi lichügüdina damuriguaü (Éfesuna 5:22, 23). Súdiniti giñe lun wetenirun lun le lariñagubei Isaíasi 55:4: “Ru numuti kei gefenti houn gürigia, kei ábuti luma arufudahati houn néchanigu”. Furanguti buidu lan ladügüni Hesusu lidasin keisi ichügüdinaü. Subudi lumutiña giñe lánigu mudún luma le hadügübei. Ligía dan le lubéi lechekürübalin sedü damuriguaü le lídanbei Liraüraü Asia, ariñagati seingü wéiyaasu: “Subudi numuti sun le hadügübei” (Arufudúni 2:2, 19; 3:1, 8, 15). Subudi lumuti Hesusu le wemegeirubei ítara kei Heowá, le Lúguchi. Lubaragiñe ladügüni furíei le líchugubei keisi hénpulu, ariñagati: “Lubaragiñe hafurieidun lun Bungiu subudi laali ka lan habusenrubei” (Matéu 6:8-13).
Darí wamá pérüla lánina lichú aau
kr-S páh. 226 pár. 10
Lagumuchaguba Larúeihan Bungiu hau áganiñu
10 Hafanreinrawagun mudún hádangiñe gábara. Mósume hásügürün láganigu Larúeihan Bungiu lídangiñe aban katei létima lunbei laganwoundagüdüni hadiheri. Ariñagati Hesusu: “Ábameti narihíniwa, au le Wügüri Garaüwarügüti, niabin lidan dúeri lau óunwenbu ubafu luma uéiriguni” (Mar. 13:26). Larufudubei lueirin milaguru le chülüha lanme dan lun laguseragüdüniña Hesusu gürigia. Ruti amu ariñahani luáguti aguseruni le lidan amu fánreinti lani profesía lánina lagumuhóun dan le. Darí wamuti lidan abahüdaguni le hawaguti mudún hama gábara (aliiha huméi Matéu 25:31-33, 46, TNM). Ítarabaña gürigia ha luéigiñebaña lóubadina Larúeihan Bungiu kei “mudún”. Hiñuragubei hachügü danme híchugun fe madiseeli lanme luéyuri hasalbarun (Luk. 21:28). Luagu amu oubaü, ha ebedaagubaña lun Larúeihan Bungiu ítarabaña kei “gábara”. “Hayahuba” danme híchugun fe “hagünrinchawaguba lan lun súnwandan” (Mat. 24:30; Aruf. 1:7).
w09-S 15/1 páh. 31 pár. 1
Puntu méiniti tídangiñeti líburu Arufudúni (fánreinti 1)
2:7. Katei san lufulasunbei Bungiu lememe Paraísu? Kei houn lan kristiánugu anuadirúaaña lariñawagúa dimurei burí le, luagu sielu layanuhóua lau dimurei paraísu o lufulasun Bungiu, lunmeme liñuarü Heowá. Chóuruti aban lan fulasu le wéiriti lubuidun. Gayaraabei heigin kristiánugu anuadirúaaña ha úaraguatiña lídangiñe “lin tídibu wewe to lánina ibagari”, lidan amu dimurei, hibihuba aban úgubu le móunwedaditi (1 Ko. 15:53).
25 LIDAN UNSU-HATI DARÍ 1 LIDAN DUUSU-HATI
ARUFUDAHANI GEBEGITI TÍDANGIÑETI BÍBÜLIA | ARUFUDÚNI 4-6
“Gádürü gabayu hama ha agalufehabaliña”
wp17.3-S páh. 4 pár. 3
Kátaña san gádürü agalufehatiña ha uágunbaña layanuhóua lidan Arufudúni?
Katei san agalufehati le luágubei gabayu haruti? Anihein ariñahani luáguti katei lan tidan líburu Arufudúni. Ariñawagúati lidan fiu kapítulu lárigiñe le “Lererun [lan] Bungiu” líribei agalufehati le (Arufudúni 19:11-13). “Dimurei” liña laguarún lun Hesukrístu, lugundun ligía ayanuhabei lidan liri Bungiu (Huan 1:1, TNM, 14). Wáwati giñe lun “Harúeite sun urúeigu, Habureme sun aburemeigu” ani ariñawagúati “Gúnfuliti lan ani Inarüni” (Arufudúni 19:11, 16). Chóuruti gabafu lan Hesusu lun ítara lan kei aban urúei gawuribuhati, ani óuserati lau arumani másügürün ligía lagumadihan. Íbini ítara aniheingua burí amu álügüdahani.
wp17.3-S páh. 4 pár. 5
Kátaña san gádürü agalufehatiña ha uágunbaña layanuhóua lidan Arufudúni?
Ídabugati hagumesera gádürü agalufehatiña agalufeha? Gumeseti Hesusu, le furumiñeti, dan leresibirunbei aban ridi (Arufudúni 6:2). Ídabuga liridúniwa kei Urúei sielu? Masuseredunti lira dan lagiribudunbei sielun lárigiñe láguyuguagüdüniwa, lugundun ariñagatu Lererun Bungiu mosu lan meha lagurabahan luagu átiri dan (Ebüréu 10:12, 13). Afuranguagüdati Hesusu houn lánigu ida luba lan hasubudiruni gumuha lan dan ligía, gumese ligía arúeiha sielu. Ariñagati laribaduba lan meha katei lidan sun ubóu danme buga lagumeserun arúeiha. Ñeinbei lan wuribu, ilamaü luma sandi (Matéu 24:3, 7; Lúkasi 21:10, 11). Murusun dan lárigiñe lagumeserun Furumiñeti Wuribu Wéiriti lidan irumu 1914, furanguti larihíniwa chülüha lan meha dan ligía ani gumeseeña lan meha gürigia awinwanda lidan dan le unbei tagúara Bíbülia “lagumuhóun dan” (2 Timotéu 3:1-5).
wp17.3-S páh. 5 pár. 2
Kátaña san gádürü agalufehatiña ha uágunbaña layanuhóua lidan Arufudúni?
Wuribu mini lubéi agalufehati le. Kei aubei larihúa, gidá lumuti darangilaü ani mámarügü lídangiñe fiu néchani gidá lumuti lídangiñe sun Ubóu. Anihein meha wuribu lidan sun ubóu lidan irumu 1914, aban katei le meha masuseredunñahagili lira. Lárigiñe, aba lagumeserun Libiaman Wuribu Wéiriti, le ñein lubéi hóunwegua saragu gürigia sügǘ lau le furumiñeti. Según fiu akutihani, lúmagiñe irumu 1914 hilaaña hóugiñe 100 míñunu gürigia lidan wuribu o ageindaguni tau áruma. Ani añahein saragu amu míñunu ha asufurirubaña damichi wéiriti le adurarubei lun sun habagari.
wp17.3-S páh. 5 pár. 4, 5
Kátaña san gádürü agalufehatiña ha uágunbaña layanuhóua lidan Arufudúni?
“Aba narihin aban gabayu wuriti; ñeinñein aban balansu lúhaburugu le wariñubei luagu. Aba naganbun lariñagun aban umalali hamidanguagiñe kátaña gabagaritiña hagía: Biánrügüla líburu türigu luagu lebegi aban weyu wadagimanu, sisi líburu sewada ligiaméme ebegi; gama lumoun góunigibei garaba tuma diwéin buidu” (Arufudúni 6:5, 6).
Ilamaü mini lubéi agalufehati le. Wéiribei meha ümi le uágubei layanuhóua darí lun “biánrügüla líburu türigu” ani lalugurúba luagu aban denariu, lebegi aban weyu wadagimanu lidan furumiñeti sígulu (Matéu 20:2). Ligiamémeba lebegi “sisi líburu sewada” (o kéiburi yarafa lun 5 líburu, TNM), aban ilaü le ǘnabutimati lebegi luéi türigu. Murusunrügüñein le houn iduheñu ha gíbebei tílana haban! Lárigiñe ínchahouatiña gürigia amurusuhei garaba tuma diwéin, éigini létima ayusurúbei lidan dan ligía.
wp17.3-S páh. 5 pár. 8-10
Kátaña san gádürü agalufehatiña ha uágunbaña layanuhóua lidan Arufudúni?
Ítara liña ligadürün agalufehati kei óunweni le lanügübei sandi le aburuchagubei luma ladüga amu burí katei. Murusun dan lárigiñe irumu 1914, gumuti gripe española lau habagari saragu san míñunu gürigia. Saminawati dagá lan sandi ligía hawagu kéiburi 500 míñunu gürigia, 1 hádangiñe kada 3 gürigia ha ubouagubaña lidan dan ligía.
Lagumeseharügüñein katei gripe española. Saminatiña fiu sásaamu hilá hamá saragu san míñunu gürigia lidan sígulu wein ladüga sandi gíriti viruela. Íbini uguñe weyu, hilagiatiña saragu míñunu gürigia ladüga sida, tunú luma malaria lau sun awanseeli lan árani.
Ligiaméme asuseredubei: hilatiña gürigia ladüga lan yebe wuribu, ilamaü o sandi le aburuchagubei. Añahagua gürigia óunwegua memeniginga.
Darí wamá pérüla lánina lichú aau
re-S páh. 76 pár. 8
Wéiriti lubuidun lálana larúeihan Heowá sielu
8 Subudi lumuti meha Huan añahein lan meha fádirigu ha iridúbaña lun heseriwidun tidan binadu sanduariu. Ligía másiña lubéi aba lan taweiridun lanigi dan le larihini le uágubei layanuha ya: “Geyegu lau lala urúei ligía arihayatina wein-gádürü lálana arúeihani; ñéinñanu wein-gádürü wéiyaaña mutu ñun luagu, tau hadaüragun harutu luma ridi golu hábulugu” (Arufudúni 4:4). Anha, lubaragiñe ñein hamá fádirigu añahein 24 wéiyaaña lidan lálana arúeihani ani iridúaaña kei urúeigu. Kátaña san wéiyaaña mutu ha? Kristiánugu anuadirúaaña ha lídangiñebaña damuriguaü kristiánu dan le águyuguaaña agunfulira lau dasi le füramase lubéi Bungiu houn sielu. Ida liña wasubudiruni le?
re-S páh. 80 pár. 19
Wéiriti lubuidun lálana larúeihan Heowá sielu
19 Ka san mini habéi kátaña ha? Ídehati aban arufudúni le líridubei amu profeta gíriti Esekiéli lun ladarirún óunabagülei. Ariha lumuti Esekiéli Heowá ñun tuagu aban karü sielu, úara hama kátaña gabagaritiña, genegeguati le larihibei luma le uágubei layanuha Huan (Esekiéli 1:5-11, 22-28). Lárigiñe, ábaya larihin Esekiéli aban karü sielu hama kátaña gabagaritiña. Ánheinti guentó, kerubín laguarún houn kátaña gabagaritiña hagía (Esekiéli 10:9-15). Másiñati sun lan lánigu Bungiu kerubín mini habéi gádürü kátaña gabagaritiña ha larihubaña Huan: ánheligu ha íñugubei habara lidan fánreinti tánina lóundarun Heowá sielu. Maweiriduntu lanigi Huan lau larihin burí kerubín yarafa lun Heowá, lugundun añahein meha biama tigibuagu bágüsi lánina daradu to tídanboun sanduariu to meha lídanboun binadu Ísüraeli, to ayusurúboun lun layanuhóun luagu lálana larúeihan Heowá. Haganaguagiñe meha kerubín burí hagía laganbúa lumalali Heowá lun lasubudiragüdüni lilurudun houn ísüraelina (Áfuriduni 25:22; Sálumu 80:1).
cf-S páh. 36 pár. 5, 6
“Hebé bayahun, ladüga gáñeihali Liñún le lídangiñebei lani Hudá türibu”
5 Liibe-agei dan yúsuati liñún lun layanuhóun luagu ganigi. Dúnguañahaadün san luma aban liñun? Anhein ítara liña lubéi, chóuruti fánreingu hiña lan lau aban ayarawaguni lidan aban fulasu le ñein lubéi harufudahóua animaalugu. Íbini ítara, ruti sügǘ le aban lueirin anufudei. Dan le harihin ligibuagun lanarime animaalu gáñiti le, sun aniha lan ariha huagun, hénrengubei hamuga hasaminarun luagu éibaagua lau anufudei hawéi amu. Ariñagatu Bíbülia liñún lan “animaalu le hanarimetimabei, le manufudebei ni ka uéi” (Ariñawagúni 30:30). Ítara liña ganigi le larufudubei Kristu.
6 Akutiha wama ǘrüwa katei le ídanbei larufuda Hesusu ganigi lan kei aban liñún: lau layanuhan luéigiñe inarüni luma irichaü luma lau lawanduni lidere dan le ichugúbei lun. Warihibei giñe gayara lan wáyeihani súngubei wagía meberesenga anhein ganigi wabéi lúmagiñe wágurahoun o mítaran lan.