Ka lunbei wadügüni lun wawinwandun lidan iseri ubóu?

Lidan burí ariñahani le lubaragiñebei le, furendeitiwa madiseeli lan dan lun lagumuchun Bungiu hau gürigia salufuritiña luma lau sun haturobulin. Ka uéigiñe chouru wabalin katei le? Ladüga füramase tumuti Lererun Bungiu:

“Ani ubóu, agumucheina liña” (1 HUAN 2:17).

Chouru wamuti luagu móunwegunbaña lan sun gürigia, ladüga ariñagati ligiaméme bérusu woun:

“Ánheinti le adügüti lugundan Bungiu, labagariduba lun sun dan”.

Ligíati, lun wasalbarun mosu gaganbadi wamá lun Bungiu. Ani lun gaganbadi wamá lun, furumiñe mosu wasubudiruni.

LUN WASALBARUN MOSU WASUBUDIRUNI BUNGIU

Ariñagati Hesusu: “Anihán lébunabei ibagari le magumuchaditi, lun hasubudirunibu buguya le Bungiu ábanrügüti” (Huan 17:3). Lun wasalbarun lídangiñe lagumuchagüle ubóu le luma lun wawinwandun lun súnwandan, mégeitiwa wasubudiruni Bungiu. Lidan amu dimurei, úati buídurügü lan wasubudiruni anihein lan Bungiu o wafurendeirun fiu katei luagu. Mégeitiwa lun lumadagu wamá. Dan le busén wamá lun gamadagua wamá luma aban gürigia, lunti wásügürün dan luma. Ligiaméme asuseredubei luma Bungiu. Ariha wamá fiu arufudahani tídangiñe Lererun le lunbei líderaguniwa afurendeira ida luba lan wadügün luma wakipurun aban lubuidun umadaguaü luma Bungiu.

ALIHA WAMÓUN LERERUN BUNGIU SAGÜ WEYU

Lun wawinwandun, mosu weigin sagü weyu. Lau sun lira, ariñagati Hesusu: “Mámarügübei tau fein habagarida gürigia; habagariduba giñe lau sun dimurei le lariñagubei Bungiu” (Matéu 4:4).

Uguñe weyu darí wamuti le lariñagubei Heowá tidan Bíbülia. Eibu waturiahanu líburu sagüráutu to, furendeitiwa luagu le ladügübei Bungiu lidan binadu dan, le ladügübei guentó luma le lunbei ladügüni ámuñegü.

AMURIAHA WAMÁ ÍDEMUEI LUMA BUNGIU

Ka gayaraabei hadügüni anhein busén hubéi gaganbadi humá lun Bungiu ani hénrenguti hun hígiruni katei burí le uágubei lariñaga wuriba lan? Lidan kesi le, líderagubadün hasubudiruni Bungiu buidu.

Ariha waméi le asuseredubei tun aban würi to unboun wagúara Sakura. Tabagariduña meha lidan magíaguni, dan tagumeserunbei aturiahoun Lererun Bungiu aba tafurendeirun ariñaga lan Bungiu: “Anuraha humá lubeiti luéi ahoruhani!” (1 Korintuna 6:18). Aba tamuriahan Sakura erei luma Bungiu ani ibihatu lun tasansiruni ligaburi tabagaridun. Lau sun lira, mosu tasigirun ageindagua lunya mábürühan tan lidoun óuchawaguni. Ariñagatu: “Dan le liabin liwiye saminaü lidoun nisaminan, aba nadaarunu nanigi lun Heowá lidan furíei, ladüga subudi nani siñá lan nageindagun luma katei le nábuguarügü. Yarafagüdatima láadina furíei lun Heowá”. Kei Sakura, hasubudiruñein míñunu gürigia Bungiu, ani líchuguñein erei le hemegeirubei houn lun hadügün asansiruni lun habagaridun kei labusenruni (Filipuna 4:13).

Éibutima wasubudiruni Bungiu, éibutimaame lasubudiruniwa ani larihibadiwa kei lumadagu ha buítiña (Galasiana 4:9; Sálumu 25:14). Ítarati, wasalbaruba lídangiñe lagumuchagüle ubóu le, ani gayaraabei wabagaridun lidan iseri ubóu le lunbei lanügüni Bungiu. Ida lubameti iseri ubóu le? Layanuhóuba luagu le lidan le aban fánreinti.