IDA LUBA MABURUCHAGUAGÜDÜN WAMANI IYEREEHABÚNI

1 | Ua lan himei humá aban gürigia luéi aban

Ariñagatu Bíbülia:

“Úati lan himei lan Bungiu aban gürigia luéi aban, lubaragiñe lira, resibirügü lumutiña sun ha inebehabubaña lun ani adüga haméi le buídubei, lídangiñe hamá yebe furumiñeguarügü néchani” (ADÜGAÜ 10:34, 35).

Ka mini lubéi?

Úati himei lan Heowáa aban gürigia luéi le aban ladügarügü fulasu le ñéingiñe lubéi liabin, lirasan, likolorun o lechun. Lubaragiñe lira ariha lumuti le súdinitimabei, kéiburi le wasaminarubei luma le wasandirubei. Afuranguagüdatu Bíbülia: “le ligibugiñebei lagu wügüri ligía larihibei, anhein Bungiu anigi larihiboun” (1 Samueli 16:7).

Houcha humá hadügüni le:

Íbini siñati lan warihini le tídanbei hanigi amu, gayaraati ua lan himei wamá aban gürigia luéi aban ítara kei ladügüni Heowá. Áfaagua humá lun ábana ábana lan harihiniña gürigia mama kei aban sétanu. Anhein rúhadün lubéi fe, mínsiñe hamá somu gürigia hun, ladügarügü lídangiñetiña lan amu rasa o lídangiñe hamá amu ageiraü, amuriaha huma luma Bungiu lun líchugun erei hun lun hagidaruni iyereehabúni tídangiñe hanigi (Sálumu 139:23, 24). Chouru huméi líderagubadün lan Bungiu lun hibihini (1 Féduru 3:12).

a Heowá líribei Bungiu (Sálumu 83:18).

“Mañuurun gíidina meha lau darangilaü luma aban gürigia haruti […]. Guentó au aban hádangiñe íbirigu ha ítarabaña kei iduheñu ha lídangiñetiña sun ubóu” (TITUS).

Sügǘ inarüniti—TITUS

Anurahati luéi iyereehabúni

Lídanñein meha aban sétanu hani wuribatiña Titus ani iyereeguti meha lúrudu le óuserubaña amu rasa lau marichaü lun. Abahüdaguati: “ñǘdüntiwa meha le ñein lubéi máhawa lan houn wuritiña —kéiburi haban chülüdügütiña tuma burí átagülei—lúnrügü wageindagun”. Abahüdaguati gumadi lumuti lan meha iyereehabúni. Ariñagati: “Sagü meha nageindagun hama somu gürigia, meberesenga anhein würi o wügüri lan, au meha le agumeserubei ageindagua”.

Danti le lagumeserunbei Titus aturiahoun Bíbülia hama gefentiña luagu Heowá, gumeseti libagari asansira. Dan laliihanu Bíbülia adügatu lun amu lan ligaburi lasandiragun lungua. Hingí tumutu lanigi dan le lafurendeirun luagu füramasei le lánina aban iseri Ubóu ámuñegü: le ñein lubéi “úaalime óunweni ni ayahuni ni íruni ni igarigu” (Arufudúni 21: 3, 4).

Dan le lagumeserubei Titus aturiahoun Bíbülia, güreweiti meha lun lígiruni iyereehabúni luáriua. Ariñagati: “Hénrenguti meha nun lun nasansiruni ligaburi nasaminarun luma ligaburi nóuserun”. Íderagua lumuti le lafurendeirubei lidan Adügaü 10:34, 35, le ariñagubei ua lan himei lan Bungiu aban gürigia luéi aban.

Kati asuseredubei lun? Abahüdaguati Titus: “Dan le narihini ínsiñeni le harufudubei gefentiña luagu Heowá hámagua meberesenga ka lan harasanbei o hikolorun, chóurugüda lumuti nun hagía lan lílana relihión le inarünibei. Íbini lubaragiñebei nabadiseirun agunbiraha lumutina aban íbiri haruti lúbiñe. Ítara liña kamá hamuga aban uénedü, lubaragiñe weyu ligía mañuurun gíidina meha lau darangilaü luma aban gürigia haruti, ni lun neigin luma. Guentó, au aban hádangiñe íbirigu ha ítarabaña kei iduheñu ha lídangiñetiña sun ubóu”.