IDA LUBA MABURUCHAGUAGÜDÜN WAMÁ IYEREEHABÚNI
2 | Mafayeira humá wuribani luagu wuribani
Ariñagatu Bíbülia:
“Mafayeira humá wuribani luagu wuribani lun ni aban […]. Adüga huméi sun le huáraati lun habagaridun lidan darangilaü hama súngubei. Niduheñu hínsiñetiña nun, máguyugüda huméi wuribani […]. Tariñahare Lererun Bungiu: ‘Au lunbei nafayeiragüdüniña gürigia luagu hariban, liña Aburemei”’ (RÓMANA 12:17-19).
Ka mini lubéi?
Íbini ñeinbei lan dan wagañiduba lan luma somu gürigia le adügübei somu dañu woun, lau sun lira, mabusenrunti Bungiu lun wafayeirun wuribani luagu wuribani. Lubaragiñe lira, ínchaha lumutiwa lun gaguraasun wamá, ladüga füramasehaali lagumuchuba lan lau sun marichaü (Sálumu 37:7, 10).
Houcha humá hadügüni le:
Dan le wafayeihan wuribani luagu wuribani, adügati lira lun mararamun wamani iyereehabúni. Ligíati, dan le ladügün aban gürigia somu katei wuribati le gáribei hun, moun lumuti hadügüni ligiaméme lun. Ragügua humá hungua ani darangilaü humá. Anihein dan buiti lun meberesen wamá lau (Ariñawagúni 19:11). Anihein amu dan buiti lun wararamuni turobuli. Ligíati, anhein adügǘwaali lubéi somu wuribani hun gayaraati hariñaguni houn lúrudugu.
Lun wafayeirun wuribani luagu wuribani manügünti katei buiti
Genegeti san maranserunbei lan turobuli lau darangilaü? O adüga humaali san sun hiyaraati lun haransehani turobuli lau darangilaü? Lau sun lira mafayeihan humá wuribani luagu wuribani adügarügübei lun lawosudun katei. Ráramagua huméi iyereehabúni. Furendei humá afiñera Búngiuba lan aranserei sun katei. Lidan Sálumu 37:3-5 aliihatiwa: “Hemenigibá luagu, ábanme liabin lun líderagunibu”.