IDA LUBA MABURUCHAGUAGÜDÜN WAMANI IYEREEHABÚNI
3 | Sagá huméi iyereehabúni lídangiñe hisaminan
Ariñagatu Bíbülia:
“Sansi huméi ligaburi hisaminan [...]. Ítara luba hiabin lun hasubudiruni le lugundanbei Bungiu hun [...] le buídubei, le úaraguabei” (RÓMANA 12:2).
Ka mini lubéi?
Bereseti Bungiu lau le wasaminarubei (Heremíasi 17:10). Inarüni mosu lan wóunigiruni le wariñagubei luma le wadügübei, lau sun lira úati buídurügü lan. Kei lidan lan wasaminan luma tidan wanigi lagumesera iyereehabúni, mosu wasagaruni iyereehabúni sunsuinagubei tídangiñe wanigi luma wasaminan. Ítararügübei wasansirun ani gidá wameime iyereehabúni tídangiñe wanigi.
Áfaagua humá hadügüni le:
Furangu humá húmagua ani akutiha huméi le hasandirubei luma le hasaminarubei hawagu amu, dántima lídangiñetiña lan amu fulasu o amu rasa. Álügüdagua humá houngua: “Ida liña san narihiniña? Ítara liña san ligaburi nasaminarun hawagu amu ladüga le nasubudirubei o ladüga le naganbubei hawagu?”. Másügürün humá dan lidan burí páhina lánina Internet, maríagun huguyame pelikula o amu isebáhari le ídanbei anihein lan saragu iyereehabúni luma wuribani.
Gayaraati tíderaguniwa Lererun Bungiu lun wagidaruni iyereehabúni lídangiñe wasaminan luma tídangiñe wanigi.
Mama súnwandan ménrengun lan lun furangu wamá wámagua lidan le wasaminarubei luma le wasandirubei. Lau sun lira íderagua tumutiwa Lererun Bungiu ladüga “furangugüda tumuti sun waritagun luma sun le wabusenrubei, arufudatéi ka lan tídanbei wanigi” (Ebüréu 4:12). Ligíati furendei huméi le tariñagubei Bíbülia ani góubaguagüda huméi tarufudahan luma ligaburi hisaminan. Áfaagua humá lun úaragua lan le hasaminarubei luma le tarufudahabei Bíbülia. Gayaraati tadügün Lererun Bungiu lun tagünrinchaguni “sun aritaguni le múaranbei luma linarün Bungiu” lidan wasaminan luma tidan wanigi, kei iyereehabúni (2 Korintuna 10:4, 5).