IDA LUBA MABURUCHAGUAGÜDÜN WAMANI IYEREEHABÚNI

4 | Áluaha huméi lídehan Bungiu

Ariñagatu Bíbülia:

“Igaburi le líchugubei [s]ífiri: ínsiñehabuni, ugundani, darangilaü, gaguraasuni, areiduni, lubuidun igaburi, úaraguni, ǘnabuguni, ragüguaü unguaü” (GALASIANA 5:22, 23).

Ka mini lubéi?

Lau lídehan Bungiu gayaraati wígiruni iyereehabúni. Gayaraati líderaguniwa sífiri sandu ibihei lubuidun igaburi le meha siñá wabéi ibiha wábuguarügü. Ligíati, lubaragiñe wáfaagun lun wígiruni iyereehabúni, buídutimati wáluahani lídehan Bungiu. Anhein wadüga ítara gayaraati lasuseredun ligiaméme woun le asuseredubei lun apostolu Pábulu. Abürühati: “Lun larihíniwa luagu lúmagiñeti lan Bungiu liabin óunwenbu ubafu le wawagubei” (2 Korintuna 4:7). Ani gayaraabei wariñagun: “Lúmagiñe Nabureme liabin níderawagun” (Sálumu 121:2).

Áfaagua humá lun hadügüni le:

“Aban meha wügüri furundeti au […]. Lau sun lira seremei lun Heowá aban haadina wügüri darangilati” (WALDO).

Amuriaha humá luma Heowá tau sun hanigi lun líchugun sífiri sandu houn luma lun líderagunün abuiduragüdei higaburi (Lúkasi 11:13). Kéiburi, ínsiñehabuni, darangilaü, gaguraasuni, luma ragüguaü unguaü, mégeiwati igaburi le lun lagidarúniwa iyereehabúni. Akutiha huméi le tariñagubei Bíbülia luagu igaburi burí le ani áluaha humá ida luba lan harufuduni lidan hibagari. Súdiniti giñe lun hóundaragun hama gürigia ha áfaaguatiña lun hawinwanduni igaburi le, ani ínchaha hamutiña lun harufudun ínsiñeni “luma lun hadügüni le buídubei” (Ebüréu 10:24).

Sügǘ inarüniti—WALDO

Ígira lumuti iyereehabúni luma wuribani

Hénrenguti meha libagari Waldo dan meha le ñǘraügili darí lun tabuinchun lanigi lau iyereehabúni. Abahüdaguati woun: “Súnwandanha lídanñadina lan meha ageindaguni hama alugurahatiña düroga. Luagu aban weyu aba hafayeirun aban gürigia gáfarahati lun láfarunina hilagubei. Aba límiragunina, lau sun lira aba nanurahan luéi”.

Dan le tagumeserunbei lani Waldo weiriou aturiahoun Bíbülia hama gefentiña luagu Heowá mínsiñeti meha lun. Ariñagati: “Iyereegutiña nun ani aba meha nanabaguniña. Lau sun lira, wéirigüda hamutu nanigi hóunabunina lau darangilaü súnwandan”.

Dan lárigiñe aba giñe latatirun Waldo aturiahoun Bíbülia. Haritaguati: “Hénrenguti meha nun nawinwanduni le nafurendeirubei. Saminatina yebe mígirun nubéi lan luriban nigaburi”. Lau sun lira, adügati le lafurendeirubei tídangiñe Bíbülia lun lasansiruni luriban ligaburi.

Afuranguagüdati: “Luagu aban dan, aban liabin Alejandro íbiri le íchugubei aturiahani nun tídangiñe Bíbülia— amuriaha numa lun naliihani Galasiana 5:22, 23 […]. Sigiti ariñaga lun nalubahani lubuidun igaburi mosu lan nafiñerun luagu sífiri sandu, mama lau nere guánarügü. Adügati lira lun léfegechun nagu”.

Ígira lumuti Waldo iyereehabúni ladüga ígirati lun líderaguni Bungiu. Ariñagati: “Mafiñentiña niduheñu hama meha numadagu luagu sun asansiruni le adüga naalibei lidan nibagari”. Sigiti ariñaga: “Aban meha wügüri furundeti au […].Guentó, seremei lun Heowá aban haadina wügüri darangilati”.