Lagumuchuba iyereehabúni lun súnwandan!
Lau sun gayara lan wagidaruni iyereehabúni tídangiñe wanigi, siñati weredehani le hasaminarubei luma le hadügübei amu. Íbini añahein lan saragu gürigia maduruntiña, hásügürüña maduruntiña luéigiñe marichaü. Ida luba laransehoun turobuli le?
Heowarügüñein gayara lagidaruni iyereehabúni lun súnwandan, ani ariñagatu Bíbülia ladügübei lan (Ariñawagúni 20:22).
LAGIDARUBEI BUNGIU LÉBUNA IYEREEHABÚNI
1. SATANÁSI, LE MAFIA. Satanási, aban ánheli le ebedaagubei luagu Bungiu, ligía gadurunbei lau sun iyereehabúni le warihibei uguñe weyu. Lagünrinchawaguba Satanási hama sun ha afalarubalin (Sálumu 37:38; Rómana 16:20).
2. UBÓU LE LAGUMADIRUBEI SATANÁSI. Lagumuchaguba Bungiu hau sun ha gadurunbaña lau haburuchaguagüdüni iyereehabúni, kéiburi polítiku hama alidihatiña relihión. Lagumuchaguba giñe Bungiu hau sun alugurahatiña hama ha agidarubalin hamegen gürigia hawéi (2 Féduru 3:13).
3. FIGÓU LE WÁDANBEI. Afuranguagüdatu Bíbülia galagante hamani gürigia figóu, ani ligía ínchahabaliwa lun wasaminarun, lun wasandirun ani lun wadügün katei wuribati (Rómana 5:12). Ani iyereehabúni aban lídangiñe figóu le wádanbei. Lau sun lira, lau lídehan Bungiu gayaraabei wagidaruni sun iyereehabúni tídangiñe wanigi ani lagumuchuba lun súnwandan (Isaíasi 54:13).
FÜRAMASETU BÍBÜLIA WAWINWANDUBA LAN LIDAN ABAN UBÓU SIN IYEREEHABÚNI
1. ÚABEI MARICHAÜ. Lábugiñe haalime Larúeiha Bungiu sun ubóu, aban arúeihani richaguati ani laduraruba lun súnwandan (Danieli 2:44). Lasaminarúniwa wuriba hawagun amu, hagidaruni wuribani luma machouruni le hasandirubei hawagun amu tídangiñe hanigi lagidarubei Bungiu sun lira ani úaalime asufuriruni kei guentó (Lúkasi 18:7).
2. WAWINWANDUBA SÚNGUBEI LIDAN DARANGILAÜ. Masufurirun hañame gürigia ladüga wuribu luma anarimeni (Sálumu 46:9). Ábanbei fulasu chóuruti Ubóu, le ñeinba lubéi hawinwanda gürigia ha hínsiñebei darangilaü houn (Sálumu 72:7).
3. WAWINWANDUBA LIDAN DARANGILAÜ. Harufuduba gürigia ínsiñeni le inarüniti houn amu (Matéu 22:39). Úabei ni kata le adügübei lun wasufurirun, ni luriban saminaü o luriban aritaguni (Isaíasi 65:17). Danme lagumuchun iyereehabúni sunsuinagubei, sun gürigia “habagariduba lidan darangilaü le dayarüti” (Sálumu 37:11).
Hínsiñeti hamuga san hun habagaridun lidan aban ubóu ítara? Íbini guentó, añahein hóugiñe míñunu gefentiña luagu Heowá, hafurendeiruña ida luba lan hígiruni iyereehabúni. Ida liña hadügüni? Lau hafalaruni adundehani tídangiñeti Bíbülia (Sálumu 37:8). Íbini ámuñegueinarügü lan hageira luma burí hechu ítara haña kei iduheñu, úaraguatiña ani hínsiñehabutiña (Isaíasi 2:2-4).
Harufudahaba gefentiña luagu Heowá houn lau sun hagundan, le hafurendeirubei ida luba lan hígiruni marichaü luma lun móuserun humá amu gürigia wuriba. Líderagubadün le hafurendeirubei lun hagidaruni iyereehabúni murusun murusun ani lun habuinchun lau ínsiñeni. Hafurendeiruba ida luba lan hóuseruniña amu buidu, íbini ha óuserubalün wuriba o ha arufudubaña iyereehabúni houn. Kei resultóu gúndaatimabadün guentó, ani buídutimabei hanaagun houngua hama amu. Ani le súdinitimabei: hasubudirubei ida luba gunda lan hibagari danme le lagidaruni Larúeihan Bungiu iyereehabúni lun súnwandan (Sálumu 37:29).