ATURIAHANI 42
“Fuleseiwatiña ha harumabei hóuseragun houngua” ligibugiñe lagu Heowá
“Fuleseiwatiña ha harumabei hóuseragun houngua, falá haméi larufudahan Aburemei” (SAL. 119:1).
UREMU 124 Úaragua wamá súnwandan
LE LUNBEI WATURIAHANIa
Fiu hádangiñe wábirigu dandu wügüriña kei würiña ha daüwaaña o ha adaürǘbaña reiti guentó ladüga hafiñen luma ladüga úaragua hamá lun larúeihan Heowá le íñutimabei (ariha huméi párafu 1 luma 2).
1, 2. a) Ka hadügübei fiu gumadimatiña houn lubúeingu Heowá ani ida liña hóunabun wábirigu? b) Ka uagu gayara lubéi gunda wamá íbini wéibaahoun? (Ayanuha humá giñe tuagu iyawaü to luáguboun tidáü garüdia).
UGUÑE WEYU, máhawati lun wadasin le lánina apurichihani lidan lóugiñe 30 ageiraü lidan sun ubóu. Lidan fiu lídangiñe ageiraü burí le da hamutiña gumadimatiña wábirigu furisunrugun. Ka uagu? Lun Heowá madügüntiña ni kata wuribati. Aliiharügü hamutu ani aturiaha hamóun Bíbülia; ayanuhatiña houn amu luagu hafiñen ani abasiiha hagía adamuridagua hama kristiánugu ha hapanaagu. Ani máhatiña giñe hádaragun houngua lidoun luáguti ubóu le, kei burí lidan polítika luma katei líbeina lira. Ani íbini weiri lan héibaahoun, úaraguamemetiñab lun Heowá, madüraagun lumuti lira hamadagua luma Heowá ani gúndaatiña lau le hadügübei.
2 Chóuruti ariha humaaru lan hayawa fiu hádangiñe Gefentiña ganigitiña ha ani ariha humuti gúndaañu haña lan súnwandan. Gúndaatiña ladüga subudi hamani luagu gunda lan Heowá hau ladüga úaragua hamá (1 Kro. 29:17a). Ariñagati Hesusu: “Fuleseiwatiña ha asufurirubaña éibaahouni luagu hadügüni lugundan Bungiu […]. Gúndaañu humá ladüga heresibiruba aban óunwenbu fáyeiti” (Mat. 5:10-12).
ABAN HÉNPULU WOUN
Ruti Féduru luma Huan aban lubuidun hénpulu houn kristiánugu ha lánina wadaani lun gayara lan hageindagun luagu hafiñen ligibugiñe lúrudu. (Ariha huméi párafu 3 luma 4).
3. Según Adügaü 4:19, 20, ka hadügübei apostolugu dan le héibaahounbei, ani ka uagu hadügei?
3 Hásügürüña wíbirigu lídangiñe aban sügǘ liibe le hásügürübei apostolugu lidan furumiñeti sígulu dan le héibaahounbei ladüga hapurichihan luagu Hesusu. Ariñagatiña liñun-agei lúrudu huríu houn “lun madimurehan hamá, marufudahan hagíame lidan liri Hesusu” (Adü. 4:18; 5:27, 28, 40). Ka hadügübei apostolugu? (Aliiha huméi Adügaü 4:19, 20). Subudi hamuti meha aban lan lúrudu íñutimati ariñagubei houn lun hapurichihan houn gürigia ani lun hayanuhan luagu Kristu (Adü. 10:42). Ligíati, aba layanuhan Féduru luma Huan lidan hiri sun apostolugu, ani aba hariñagun houn gumadimatiña ha, maganbadibaña lan houn, lunba lan Bungiu gaganbadi hamá ani chouru hamuti houn hasigiramémeba lan ayanuha luagu Hesusu. Ítara liña kamá hamuga hálügüdüñanu aguseragüdütiña hagía: “Saminatün san íñutima lan hilurudun luéi lilurudun Bungiu?” “Odi saminatün mosu lan gaganbadi hamá gürigia hun lubaragiñe gaganbadi hamá lun Bungiu?
4. Kei larufuduni Adügaü 5:27-29, ka hénpulu híchugubei apostolugu houn sun kristiánugu inarünitiña, ani ida luba wáyeihaniña?
4 Rútiña apostolugu aban lubuidun hénpulu le hafalarubei sun kristiánugu inarünitiña lúmagiñe dan ligía: “Lunti waganbuni Bungiu lun wadügüni le lariñagubei lubaragiñe le hariñagubei wügüriña” (aliiha huméi Adügaü 5:27-29). Lárigiñe habuleseiruniña gumadimatiña apostolugu ladüga úaragua hamá, aba háfuridun apostolugu tídangiñe luban liñun-agei lúrudu huríu “gúndaañu lau larihiniña Bungiu keisi gürigia gadünamatiña lun hasufurirun busiganu luagu liri Hesusu” ani aba hasigirun apurichiha (Adü. 5:40-42).
5. Kaba álügüdahani wóunaba?
5 Hénpulu le hígirubei apostolugu adügati lun wadügün fiu álügüdahani. Ida liña lúaradun le hanúadirubei apostolugu hadügün lun gaganbadi hamá lun Bungiu lubaragiñe gaganbadi hamá houn wügüriña luma lun gaganbadi hama lun gumadi le tídanbei Bíbülia le ariñagubei mosu lan gaganbadi wamá houn gumadimatiña ubouaguna? (Rom. 13:1). Ida luba gayara lan wagunfulirun “hama gumadimatiña luma hama lúrudugu”, ítara kei lariñaguni apostolu Pábulu, ani lun úaragua wamá lun Bungiu ladüga ligía gumadimati le íñutimabei? (Titu 3:1).
“GUMADIMATIÑA”
6. a) Kátaña san “gumadimatiña” ha iridúbaña lidan Rómana 13:1, ani ida luba wóuseruniña? b) Ka inarünibei hawagu sun gumadimatiña ubouaguna ha?
6 (Aliiha huméi Rómana 13:1). Lidan bérusu le, dimurei “gumadimatiña” mini lan gumadimatiña ubouaguna ha gabafubaña hawagu amu gürigia. Wagía kristiánugu lunti gaganbadi wamá houn gumadimatiña ha. Ídehatiña lun ñein lan darangilaü, adügatiña giñe lun hagunfulirun gürigia lau lúrudu ani anihein dan sefu hamutiña lumutuniña Heowá (Aruf. 12:16). Ligía lunti lubéi wafayeiruni seinsu le lamuriahabei ageiraü ani ru wameime inebesei le hamuriahabei gumadimatiña wama (Rom. 13:7). Gabafu habéi gumadimatiña ha ladüga lígirun Heowá lun hagumadihan. Ígira lumuti Hesusu inarüni le furangu dan le lálügüdagunbalin Pilatu, le gumadimati rómana. Dan le lariñagunbei Pilatu lun Hesusu gabafu lan lun lesefuruni libagari o lun láfaruni hilagubei, aba lariñagun Hesusu lun: “Úati hamuga ni murusun ubafu buma nuagu lun hamuga michu lani Bungiu bun” (Huan 19:11). Ítara kei Pilatu, sun gumadimatiña hama polítiku ha lídanbaña wadaani gébehati habafu.
7. Lidan ka katei lunti maganbadi wamá houn gumadimatiña ubouaguna, ani ka lunbei hasubudiruni gumadimatiña ha?
7 Wagía kristiánugu lunti gaganbadi wamá houn gumadimatiña dan le madüraagun lani lúrudu ligía lilurudun Heowá. Gama lumoun, dan le hamuriahan gumadimatiña wama lun wadügün aban katei le mínsiñeti lun Heowá, o dan le hamahadun wadügüni le lamuriahabei Bungiu wámagiñe, maganbaditiwa houn. Kéiburi dan le hadügüdarun hawagu nibureintiña lun hasudarahan.c Gayaraati maha hamá lun wakipurunu wabibülian tuma burí wani agumeiraguagüdüni, ni lun wapurichihan luma wadamuridagun. Hararamun ban gumadimatiña ligibugiñe Bungiu ladüga hayusuruni habafu lun héibaahaniña lani Kristu disipulugu. Aríagu liña Heowá lun sun le hadaagubei! (Apur. 5:8).
8. Ida liña habafu gumadimatiña luéi Suntigabafu, ani ka uagu súdini lubéi katei le?
8 Gabafutiña gumadimatiña gama lumoun, úati sun ubafu hama, mama hagía suntigabafu. Heowá ligía Suntigabafubei. Ariñawagúati tidan Bíbülia saragu wéiyaasu luagu Heowá lan “Suntigabafubei”. (Dan. 7:18, 22, 25, 27).
SUNTIGABAFU
9. Ka larihibei profeta Danieli lidan fiu arufudúni?
9 Arihati profeta Danieli arufudúni le ígirubalin furangu luagu Heowá lan íñugutimabei hawéi sun ha híbiri gumadimatiña. Furumiñe arihati gádürü óunwenbu burí mónsturugu, mini hamá, mónsturugu ha arúeihani ubouaguna ha gabafubaña ubouagu dandu ha lánina dan le sügühalibei kei lánina dan le: Babilónia, Médiana hama Pérüsiana, Güresia luma Roma, lúmati ageiraü le gabafubei uguñe weyu, Reino Unido luma Meriga (Dan. 7:1-3, 17). Lárigiñe, ariha lumuti Danieli Heowá ñun luagu lálana arúeihani sielu (Dan. 7:9, 10). Le larihibei profeta úaraguati le seriwiti kei eweridihani houn gumadimatiña uguñe weyu.
10. Según Danieli 7:13, 14, 27, ka un líchiga Heowá ubafu ya ubouagu ani ka larufudubei le luagu?
10 (Aliiha huméi Danieli 7:13, 14, 27). Arihati Danieli lagidaruni Bungiu ubafu hawéi gumadimatiña ubouaguna ani aba líchuguni houn ha gadünatimabalin ani ha gabafutimatiña. Kati un? Lun aban le ítarabei “kamá liráü wügüri”, lun Hesukrístu, luma houn “lumutuniña Bungiu Suntigabafu”, hagía 144,000 ha lúnbaña harúeihan úara luma “lun sun dan” (Dan. 7:18). Furanguti Heowá lan íñugutimabei, ladüga ligíarügüñein gabafu lun ladügün aban katei ítarati.
11. Ka amu katei labürüdübei Danieli le arufudubalin hóugiñeñein lan sun amu néchanigu Heowá?
11 Le larihibei Danieli lidan arufudúni le, chóurugüda lumuti le ariñaga láalibei furumiñe. Ariñagati profeta Danieli, luagu Wabungiute: “Ligía agidahabaliña urúeigu ligía íchaahaña”. Ani ariñagati giñe “gabafu lan Bungiu Suntigabafu luagu harúeihan gürigia, luagu ru lani agumadihani lun le unti labusenra líchuguni” (Dan. 2:19-21; 4:17). Rúhali san ani gidá ligía Heowá urúeigu lidan somu dan? Anha.
Gidá lumuti Heowá arúeihani luéi Bélisasarü ani aba líchuguni houn médiana hama pérüsiana. (Ariha huméi párafu 12).
12. Írida humá aban hénpulu luagu ida liña lan lagidaruniña Heowá urúeigu lidan dan le sügühalibei. (Ariha huméi dibuhu).
12 Arufuda laali Heowá lau ichouruni hóugiñeñein lan sun gumadimatiña ubouaguna. Ariha wamá ǘrüwa hénpulu. Adüga lumutiña faraón le ehiptuna lumutuniña Heowá lidamunme, ani luagu saragu dan máhati lígiragüdüniña. Gama lumoun, sefu lumutiña Bungiu lumutuniña ani aba ladügün lun lañaradagun faraón lidan barana Funati (Afu. 14:26-28; Sal. 136:15). Adügati Bélisasarü, urúei le babilóniana aban fedu ani adügati “bula lau Bungiu le siélubei” ani “aba heremuhan houn búngiugu ha adügütiña lau golu pülata” lubaragiñe hamuga lun lan Heowá heremuhan (Dan. 5:22, 23). Aba lǘnabudagüdüni Bungiu wügüri íñuguti ligía. “Áriebumeme ligía”, aba láfaruni Heowá Bélisasarü, le harúeite kalüdéana hilagubei, ani aba lichugún larúeihan houn médiana hama pérüsiana (Dan. 5:28, 30, 31). Áfara lumuti urúei Agürípa I, le Palestínabei, apostolu Santiagu hilagubei ani lárigiñe, aba ládaruni apostolu Féduru furisunrugun lau saminaü lun láfaruni. Gama lumoun, adügati Heowá lun masuseredun lan le labusenrubei urúei le. “Aba lasandiragüdüni lani Bungiu ánheli” Agürípa I ani aban lounwen (Adü. 12:1-5, 21-23).
13. Írida huméi ida liña lan lagañeirun Heowá aban óundaruni dayarüti hani gumadimatiña.
13 Arufudaali giñe Heowá luagu lóugiñeñein lan óundaruni dayarüti le hani gumadimatiña. Ageindaguati Heowá hawagu ísüraelina ani íderagua lumutiña agumucha hau 31 urúeigu kananna luma lun hárügüdün saragu lídangiñe fulasu le füramase lubéi houn (Hos. 11:4-6, 20; 12:1, 7, 24). Agayuahati giñe Heowá luagu urúei Ben-adadü luma hawagu 32 urúeigu síriana ha ñǘdünbaña ageindagua hama ísüraelina (1 Uru. 20:1, 26-29)
14, 15. a) Ka lariñagubei urúei Nabukodonosoru luma urúei Daríu luagu liricha Heowá lun larúeihan? b) Ka lariñagubei abürühati Sálumu luagu Heowá luma hawagu linechanigu?
14 Arufuda laali Heowá saragu wéiyaasu ligía lan Suntigabafubei. Dan le lapantahanbei urúei Nabukodonosoru luagu lubafu luma luéirigun lubaragiñe hamuga líchuguni uéiriguni lun Heowá lugundun Heowarügüñein gadüna lun lalawahóun, aba ladügün Heowá lun lálülüdün lau Nabukodonosoru. Lárigiñe lareidagun Nabukodonosoru, aba líchuguni uéiriguni lun Heowá ani aba lasubudiruni Heowá lan Urúeibei lun súnwandan. Ani ariñagati úati lan ni aban lunti lariñaguni lun Heowá kaba lan ladüga (Dan. 4:30, 33-35). Lárigiñe lóuchawagun lúaragun Danieli aba lesefuruni Heowá lídangiñe fusu le ñein habéi liñún, aba líchuguni Daríu gumadi le: Lunti “inebewa lan Lubungiute Danieli lidan sun fulasu le lábugiñebei narúeihan. Ladüga ligía Bungiu le wínwanbei ani anihein súnwandan. Magünrinchawagunbei larúeihan, magumuchun ligíame lubafu” (Dan. 6:7-10, 19-22, 26, 27).
15 Ariñagati abürühati Sálumu: “Günringua lumuti Aburemei sun le hasaminarubei gibe tubungiutegu hadügün”. Ariñagati giñe: “Fuleseiwatiña néchanigu ha Búngiubei Habungiute, gürigia ha anúadira láañabaña kei lánigu” (Sal. 33:10, 12). Anihein resun buiti wama lun úaragua wamá lun Heowá!
LAGUMUHÓUN WURIBU
Ni kata óundaruni hani néchanigu ubouaguna houn lisudaranigu Heowá ha siélubaña! (Ariha huméi párafu 16 luma 17).
16. Ka gayaraabei wachoururuni ani ka uagu? (Ariha huméi dibuhu).
16 Ariha wamaali le ladügübei Heowá lidan dan le sügühalibei. Ligíati, ka wagurabubei lun ladügüni yarafa madise? Gayaraati wachoururuni lesefurubaña lan Heowá lubúeingu ha úaraguabaña lun lidan lidaani “saragu asufuriruni” (Mat. 24:21; Dan. 12:1). Ladügübei danme le hagayuahan néchanigu o aban sétanu hani néchanigu, ha únbaña laguarúa Gogu Magoguna, hawagu lubúeingu Heowá ha úaraguabaña. Íbinime ánhaña óundaragua 193 lílana Óundaruni le hani Néchani, magañeirun habéi Heowá hama lisudaranigu ha siélubaña. Füramaseti Heowá: “Ítara luba narufuduni nuéirigun luma sandu nan houn saragu gürigia. Narufudaguba nungua houn, ábame hasubudiruni luagu au lan Aburemeibei” (Ese. 38:14-16, 23; Sal. 46:10).
17. Ka tariñagubei Bíbülia kaba lan asusereda houn urúeigu ubouaguna luma kaba lan asusereda houn ha úaraguabaña lun Heowá?
17 Ladügüba lagayuahan Gogu lun lagumeserun lagumuhóun wuribu le gíribei Arümahedón, le ñeinba lubéi lagünrinchaguaaña Heowá “sun urúeigu ha ubouagubaña” (Aruf. 16:14, 16; 19:19-21). Ánhañati “ha abagaridubaña lidan ísuruni sunsuinagubei, habagariduba súnwandan ubouagu” (Ari. 2:21).
ÚARAGUAMEME WAMÁ
18. Ka anúadira hamaalibei saragu kristiánugu inarünitiña lun hadügüni, ani ka uagu? (Danieli 3:28).
18 Lidan sun dan le sügühalibei, ru hamaali saragu kristiánugu inarünitiña habagari lidan denchaü ladüga hínsiñe lan Heowá houn, Harúeite le garichabei lun Larúeihan. Anúadiraaña úaragua hamá lun Bungiu le Suntigabafu kei hadügüni ǘrüwa ebüréuna ha meha lesefurubaña Bungiu lídangiñe watu gemeti (aliiha huméi Danieli 3:28).
19. Kaba lébuna laguseragüdüniña Heowá lubúeingu, ani ka lunbei wadügüni guentó?
19 Subudi lumuti meha Dawidi, luagu súdini lan lun úaragua wamá lun Bungiu. Abürühati: “Nabureme, buguya aguseragüdübaliña sun néchanigu, aguseragüdabana kei ligaburi niricha; aguseragüdabaña kei ligaburi taruman nanigi” (Sal. 7:8). Ariñagati giñe: “Góunigilana naruman luma madurun nan” (Sal. 25:21). Lau úaragua wamá lun Heowá ani madüraagun waméi úaraguni ligía, ligía ibagari buídutimabei le gayaraabei gabagari wamani. Ítara luba gayara lan wasandiragun woungua kei abürühati sálumu le ariñagubei: “Fuleseiwatiña ha harumabei hóuseragun houngua, falá haméi larufudahan Aburemei” (Sal. 119:1).
UREMU 122 Derebugubá darí lagumuhóun
a Ariñagatu Bíbülia houn kristiánugu lunti lan gaganbadi hamá houn gumadimatiña, lidan amu dimurei, houn ha agumadihabaña lidan ubóu le. Gama lumoun, añahein hádangiñe gumadimatiña ebedaaguatiña lun Heowá luma houn lubúeingu. Ida lubati gaganbadi wamá houn gumadimatiña ubouaguna ani úaragua wagíame ligibugiñe lagu Heowá?
b DIMUREI BURÍ SÚDINITI: Mini lan úaraguni, madüraagun wamani wamadagua luma Heowá luma úaragua wamá lun liricha lun larúeihan súnwandan, íbini dan le wagagibudagun luma óuchawaguni.
c Tídanmeme garüdia to ariha huméi fánreinti “Ka uagu mageindagun wabéi lidan wuribu, kei meha hadügüni ísüraelina?”.