Akutiha huméi katei buidu

Le turobulibei

Liibe-agei dan, iyeeni le waganbubei hawagu amu adügübei lun wasandirun iyereehabúni hawagu. Kei hénpulu:

Añahein iyubudirigu charatiña lau hasaminarun siñagua hamá würiña houngua lun hadügün wadagimanu le ñein lumuti mégeiwa lan erei, iyarani luma lichú aau.
Labadinagua burí irumu 500 luma 1500 lárigiñe lidaani Kristu, iridahóuatiña meha huríu ha Yuropabaña luagu ru hamá péisini lidoun burí lidunari welu, o fusu, lun hasandirun lílana fulasu. Ariñawagúati giñe iyeeni hawagu lidan hadaani nasi lau hiridahóun luagu hádangiñeti lan lásügürünbei ageiraü Yámani lídangiñe lidere dan. Lidan biángubei kesi le, súfuri hamuti huríu hayereehabu amu. Ani añahagua hádangiñe asufurirei marichaü le uguñe weyu.
Gíbetiña gürigia saminatiña hiru lan habagari gürigia danimatiña ani magundan hamá.

Yusu hamuti sun ha afiñerubalin iyeeni burí lira ligaburi saminaü le lun haricharaguagüdüni luriban hasaminarun hawagun amu. Ani dan le masaminarun hamá amu gürigia kei hagía, aba hasaminarun ladügarügü liña lan libidiñe ni kata houn.

Adundehani tídangiñeti Bíbülia

“Ha huálibaña ichügü, áluahatiña subudi” (ARIÑAWAGÚNI 15:14).

Ka mini lubéi le? Wabulieidaguba anhein ibidiñe lubéi sun inarüni woun. Ánhawa ñüdün lau le hariñagubei gürigia, lubaragiñe wakutihani woungua kátima lan inarünibei, wasaminaruba wuriba hawagun amu.

Ínchaha tumutiña san Bíbülia gürigia asandira iyereehabúni hawagu amu?

Añahein ariñagutiña ínchaha tániña Bíbülia gürigia lun hasaminarun wuriba hawagun amu. Kátima san tariñagubei Bíbülia?

Lídangiñe ábanmeme gürigia wayabin súngubei. “Lídangiñe ábanrügü wügüri ladügaña [Bungiu] sun néchanigu” (Adügaü 17:26).
Aban labu lanügüniña Bungiu sun gürigia. “Úati [...] himei lan Bungiu aban gürigia luéi aban, lubaragiñe lira, resibirügü lumutiña sun ha inebehabubaña lun ani adüga haméi le buídubei, lídangiñe hamá yebe furumiñeguarügü néchani” (Adügaü 10:34, 35).
Lúntima le tídanbei wanigi letenira Heowá, mama lun ligaburi wariawagún. “Le ligibugiñebei lagu wügüri ligía larihibei, anhein Bungiu anigi larihiboun” (1 Samueli 16:7).a

a Ariñagatu Bíbülia Heowá lan líribei Bungiu.

Ida liña lídehan wakutihani katei buidu?

Dan le subudi wamaniña gürigia buidu, mafiñerun wamuti iyeeni le ariñawagúbei woun hawagu. Danti le wíchugun fe iyeeni lan katei burí wuribati le ariñawagúbei woun hawagu ítaga gürigia, aba giñe lebelurun machouruni woun luagu le ariñawagúaalibei woun hawagu amu.

Sügǘ inarüniti:Yobika (Yuropa)

Lúmagiñe meha liñüraü Yobika, le iridúbei lidan arütíkulu le lubaragiñebei le, laganbuña layanuhóun wuriba hawagu ítaga gürigia, dandu hadan lubesinanigu, kei lidan ñunsu luma tidan bigibigitu. Ariñagati: “Hanarimeti meha luriban nasaminarun hawagun gürigia hagía darí lun iyereegu hamá nun. Ani saminatina meha garicha nan lun nasandiragun nungua ítara.

”Dan méhati le nasudarahanbei, tokati nun nawinwandun hama súdaragu ha hádangiñetiña gürigia hagía. Lau lásügürün dan, aba nasubudiruniña buidu. Ma meha lubuidun násügürüni hama! Ábati lasansirun ligaburi narihiniña. Keiti gayaraaya lan nasandiruni ligiaméme, ábagubei maganbahanhaadina lan ñunsu le ayanuhati wuriba hawagu, marihin au pelikula o programa le ídanti ladügǘwa bula hau. Subudi numuti gayara lan ladügün wasaminarun wuriba hawagun amu lun wasandirun igañi luma iyereehabúni tidan wanigi”.

Le gayaraabei hadügüni

Masaminara humá aban lan habu sun gürigia. Mama ladüga anihein lan somu igaburi wuribati luagu aban hádangiñe ítaga gürigia lun wasaminaruba lan ítara haña lan súngubei.
Gabaroun huméi ibidiñe lan sun katei hawagu ha híbiri hun.
Áluaha humá ariñahani lidan fulasu chóuruti.