Anihagua san inebehabu hadan iduheñu?
KA UAGU LUNTI LUBÉI ÑEIN LAN INEBESEI HADAN IDUHEÑU?
Dan le lau lan inebesei hóuseragua tílana muna houngua, chóuruti lasandiragun kada aban hádangiñe lungua.
Ariñagatu aban líburu gíritu Siete reglas de oro para vivir en pareja dan le lan inebegua hamá maríeitiña hámagua, óuseragua hamá hámagua lau ínsiñehabuni “mámarügü lau lanarime burí katei, arufuda hamuti giñe lau hadügün lirahüñü burí katei buiti aban luagu le aban” (según ligaburi tásügüragüdüni Sonia Tapia Sánchez).
Aniheinhali aturiahani le arufuduti dan le lan hafurendeirun isaanigu óuseraña amu lau inebesei, masandiragun hamá houngua kamá mebegitiña ni kata, buídutima lan hanaagun houngua hama hagübürigu ani hénrengutimati ladagarun lisandi ichügü hawagu.
KA GAYARAABEI HADÜGÜNI?
Ayanuha humá luagu katei le hama tílana huban. Furumiñe, chouru huméi anhein gunfuranda habalin súngubei kátima lan mini lubéi larufudún inebehabu. Libiaman, bürǘ huméi ka lan lunbei ladügüni kada aban hídangiñe luma ka burí lan usa mabuidunbei. Lǘrüwan, ayanuha humá húmagua luagu le lunbei ladügüni kada aban hídangiñe lun harufudun inebesei húmagua.
Ru huméi hénpulu. Gayaraati hálügüdagun hungua: “Héchutina san ayanuha wuriba luagu le hadügübei ha híbiri tílana muna? Adügatina san bula hau dan le hariñaguni ka lan hasaminanbei? Dürügua numutiña san dan le hayanuhaña lan ani ru nuguya mebereseni lau le hariñagubei?”. Mabulieida huméi huguya lan lunbei harufudun inebehabu houn amu furumiñe.
Adundehani: Masaminara humá mosu lan hagañeiruni ha híbiri inebesei le lunbei harufuduni houn, lubaragiñe lira, ariha huméi kei aban katei le lunbei harufuduni houn tílana huban.
Inebeguaméme humá húmagua íbini múaran humá lidan le hasaminarubei. Áfaagua humá lun mariñagun humá dimurei kéiburi “Buguya, súnwandan…” o “Batatirañoun…”. Adügarügüti dimurei burí ítarati lun laganwoundun turobuli lugundun adügati lun hasandiragun ha híbiri houngua wuriba.
LE WADÜGÜBEI WAGÍA GEFENTIÑA LUAGU HEOWÁ
Ínchaha wamutiña gürigia lun harufudun inebesei hámagua hábiñe. Gabügürüguati layanuhóun luagu katei le tidan burí agumeiraguagüdüni to wadügüboun kéiburi líburu, garüdia luma burí bidéu ani furumiñeguarügü gürigia gayaraati ladariruni ariñahani burí le mafayeihanga luagu.
HOUN MARÍEITIÑA: Lidan fánreinti le gíribei “Ayuda para las familias”, arufudahóuati houn maríeitiña lun. . .
. . . hafurendeirun aganbagua hámagua.
. . . merederun hamá mererunga hámagua.
. . . masigenehan hamá hámagua.
(Heiba lidoun páhina jw.org, ábameti habürüdün lidan áluahagülei “Ayuda para las familias”).
HOUN AGÜBÜRIGU: Ídehati fánreinti le gíribei “Ayuda para las familias” lun hafurendeirun agübürigu ida luba lan harufudahan houn hasaanigu lun. . .
. . . gaganbadi hamá.
. . . hídehan lau fisiu múnada.
. . . geteingiradi hamá.
(Heiba lidoun páhina jw.org, ábameti habürüdün lidan áluahagülei “La educación de los hijos” o “Hijos adolescentes”).
Aliiha huméi giñe lanwoun ariñahani le gíribei “Los padres preguntan” le tídanbei líburu Lo que los jóvenes preguntan. Respuestas prácticas (bolumen 1) (Heiba lidoun páhina jw.org, ábameti habürüdün lidan áluahagülei “Los padres preguntan”).
HOUN NIBUREINTIÑA: Lidan fánreinti le gíribei “Adolescentes y jóvenes adultos” le lídanbei páhina jw.org, dariwati ariñahani, bidéu luma burí dasi hounti nibureintiña le lunbei líderaguniña lun hafurendeirun. . .
. . . anaagua buidu houngua hama hagübürigu luma hama hábirigu.
. . . ayanuha lau inebesei houn hagübürigu luagu burí gumadi le híchugubei houn múnada.
. . . ka lan lunbei hadügüni lun hafiñerun hagübürigu hawagu.
(Heiba lidoun páhina jw.org, ábameti habürüdün lidan áluahagülei “Adolescentes y jóvenes adultos”).
Lun gayara lan háluahan ariñahani lidan páhina jw.org, mama mosu hafayeihan ni kata ni habürüdagun hungua. Mamuriahóunbei giñe huma lun híchugun ariñahani huougua.