Gabagariya lan tisaani würi to hilaali tani weiriei

Dan le máhuyun lubéi huya, ariñagati Heowá lun Elíasi: “Beiba Sarepüta. Tíchuguba aban würi to hilaali tani weiriei éigini bun ñein”. Dan lachülürün Elíasi lubenari uburugu, arihati aban würi gudemetu to hilaali tani weiriei abudaha watu. Aba lamuriahan aban weru duna tuma. Dan yebe tidin anügei lun, aba lagúarun Elíasi tun ariñageina: “Adügabá fulesei nun, barüba giñe murusun fein nun”. Ábati tariñagun lun: “Úatu ni aban fein numa lun níchugunu bun. Murusunrügüñoun fulúaru numa luma murusun agülei lun nadügün éigini nungua luma lun nisaani”. Lariñaga Elíasi tun: “Füramaseti Heowá ánhabu lan adüga murusun fein nun, magumuchunboun lan fulúaru buéi ni agülei darimeya láhuyun huya”.

Ábati tebelurun würi tuguya túbiñoun, aba tadügün fein lun lani Heowá profeta. Ani kei füramase lani Heowá, géigintu tuguya luma tisaani sun dan le máhuyun lubéi huya. Meredeti tagei fulúaru ni lagei agülei málouga.

Lárigiñe, aba lasuseredun aban katei híruti. Aba lasandirun tisaani würi tuguya, ábati lounwen. Ayumuraguatu lun Elíasi lun líderagunu. Ábati lanügüni Elíasi irahü tuéi lúguchu lidoun rumu le íñubei tun muna. Aba larounragüdüni tidan gabana, furíei ligía: “Heowá, adügabá fulesei nun, adügabá lunya labagaridun irahü le”. Subuditi bun ka lan uagu wéiribei lubéi meha lubuidun ladügüni Heowá lira? Ladüga úagili meha ni aban gürigia abagariduti lárigiñe lounwen. Ani mama meha ísüraelina würi to ni tisaani.

Ábaya labagaridun irahü, ábati lagumeserun awaragua! Aba lariñagun Elíasi tun würi to hilaali tani weiriei: “Arihabá! Wínwanti bisaani”. Ábati tagundaarun saragu, tariñagati lun Elíasi: “Guenlé chóurutima naali luagu seriwi ban lun Bungiu. Subudi numuti lira ladüga lérügüñein lariñagubei Heowá bariñaga, ani gúnfuliti súnwandan”.