Inarüni san gayara lan lasuseredun milaguru? Ǘrüwa resun le uágubei mafiñen hamá fiú gürigia

FURUMIÑETI RESUN: Kóntürati lun sun lúrudu le abugurubalin katei ubouagu. Lúrudu naturáliti le burí wasubudirubei, aturiahani le hadügübei gürigia ha aturiahatiña siensiasi lébunabei según le harihibei lidan ubóu le geyegubei wau. Gama lumoun, masubudirun wamuti sun katei luáguti ubóu le geyegubei wau ani lóuguati gunfuranda wamani lúrudu burí naturáliti le (Hob 38:4). Gayarati layusuruni aban aturiahati siensiasi sun libagari lun laturiahan aban lídangiñe lúrudu naturáliti, gama lumoun gayarati lachülürün aban weyu lun ladarirun aban katei le múaranti luma sun le furendei láalibei luagu lúrudu ligía le adügüti lunya lagumeserun aturiahei súngubei lúmagiñe lagumeseha. Aban hénpulu, buídurügüti lun ladarirúniwa aban sísüne wuriti lun lasansirúniwa saminaü luagu sun lan sísüne harutiña.

Aban sásaamu lidan laturiahóun ínsiñehabuni lun lichú aau gíriti John Locke (1632-1704) abahüdaguati aban sügǘ le arufudubalin ménrengun lan léiguadun aban gürigia lidoun aban saminaü charati dan le ua lan sun ariñahani luagu aban katei luma. Abahüdaguati luagu lurúeite Siam (fulasu le subudiwabei uguñe weyu kei Finlandia) luma aban wügüri súdiniti lóunahan lurúeite Olanda. Dan le labahüdagunbalin wügüri ligía lun lurúeite Siam ida liña lan ageiraü Olanda, ariñagati anihein lan dan gayara lan léibugun aban lefan ligibuagu duna. Aba lasaminarun urúei leyeehaña lan, ani le linarün aban katei ladimurehaña meha wügüri ligía luagu aban katei le ibidiñewabei lidan ageiraü Siam: lidan lanarime lidiliga aba lederaagun duna saragu darí lun gayara lan lawanduni lihürü aban lefan. Kei marihinñaha lágili lan urúei katei le, aba lasaminarun luagu siñá lan lasuseredun lira.

Ariha humá fiú lídangiñe katei le adügǘwaalibei uguñe weyu le meha uágubei hasaminara gürigia ma meme binarü siñabei lan lasuseredun:

● Gayarati táfayahan aban awión hau hóugiñe widü-san gürigia lúmagiñe Newayoru darí Singapur lau aban ufureseni libe le tani waporu to áfayahaboun 900 kilometuru luagu oura mararamagunga ni aban wéiyaasu.

● Gayarati hayanuhan bián gürigia ha awinwandubaña lidan ámuñegueinarügü kontinente hámagua ani ariha haméi hagibu tuéigiñe konputadora o luéigiñe gágamuru.

● Gayarati lareidahóun saragu milu uremu lidan aban katei le ñǘraüti sügǘ lau aban lagei machi.

● Gayarati hásügüragüdün surusiagu ha íbaahabaña gürigia anigi o amu burí lumegegun úgubu luéigiñe lúgubu aban gürigia lidoun lúgubu amu.

Lárigiñe wakutihani hénpulu burí le, kati wasaminarubei? Anhein gayaraagua habéi gürigia houngua lun hadügün katei burí wéinamuti le meha saminawabei fiuraü irumu lubaragiñe le luagu siñá lan ladügǘniwa, chóuruti gayara lan ladügün Bungiu le adügübalin sun ubóu katei burí le gayarati laweiridagüdünu wanigi íbini úagili lan gunfuranda wamani sunsuinagubei o siñá lan wadügün aban libe (Agumesehani 18:14; Matéu 19:26).a

LIBIAMAN RESUN: Yúsuati milaguru lun hebelurun gürigia lidoun relihión. Mariñaguntu Bíbülia woun lun wafiñerun luagu sun milaguru. Lubaragiñe lira, ariñagatu saragu wéiyaasu súdini lan lun duari wamá lidan katei le, wéridi tumutiwa: “Ladügaba Mafia liabin lágani Kristu ligia; lachülürüba lau saragu ubafu, ladügüba burí seini luma milaguru yeeti. Layusuruba sun luwuyeri wuribani lun leyeehaniña [gürigia]” (2 Tesalónikana 2:9, 10).

Ariñagati giñe Hesukrístu gíbebaña lan gürigia ariñagutiña lánigu hamá disipulu íbini mítaran lan. Darí lun hariñaguba lan fiú hádangiñe: “Wabureme, Wabureme, apurichihatiwa méhatia luagu biri, sagá wagía sífirigu wuribatiña lidan biri, adüga wagía saragu milaguru lidan biri” (Matéu 7:22). Gama lumoun ariñagati Hesusu luagu máhabei lan houn keisi lánigu (Matéu 7:23). Lau lira, arufudati Hesusu mama lan lúmagiñe Bungiu liabin sun milaguru.

Magurabunti giñe Bungiu lun milagururügübei lan lébuna hafiñen lubúeingu. Lunti giñe ñein lan resun derebuguti lébuname hafiñen (Ebüréu 11:1).

Akutiha waméi milaguru létima subudiwabei lídangiñe le uágubei tabahüdagua Bíbülia: láguyugun Hesukrístu lídangiñe óunweni. Fiú irumu lárigiñe lasuseredun, aba hagumeserun fiú kristiánugu ha meha lílana uburugu Korintu álügüdagua houngua anhein inarüni lubéi águyugua lan Hesusu o anhein iyeeni lubéi. Ida liña meha líderaguniña apostolu Pábulu? Ariñagarügüti san houn mosu lan haganwoundagüdüni hafiñen? Uá, mama ligía lariñagubei houn. Aba laritaguagüdüniña luagu le asuseredubei. Aba lariñagun Pábulu luagu Hesusu “aba labunún; aba lásaarun lídangiñe óunweni luagu lǘrüwan weyu keisi tariñaguni Lererun Bungiu luagu le lunbei lasuseredun. Ligía larufudagun lungua lun Séfasi; lárigiñe, houn híbiri apostolugu. Aba giñe larufudagun lungua houn sügǘ hau seingü-san afiñetiña ha óundaraguñubaña lidan aban, ani añaheingua saragu hádangiñe, wínwangiña chülǘ lumoun dan le” (1 Korintuna 15:4-8).

Súdiniti meha san hafiñerun kristiánugu ha luagu milaguru le? Aba lariñagun Pábulu: “Ánheinti másaarun lubéi Kristu lídangiñe óunweni, málati uganu le wapurichihabei luagu asalbaruni, málati giñe afiñeni le huágubei” (1 Korintuna 15:14). Sériuti lanügüni Pábulu katei le. Inarüni san águyugua lan Hesusu o iyeeni? Subudi lumuti meha Pábulu luagu inarüni lan. Wínwangiña meha saragu san gürigia ha arihibalin, ha meha gayarabei habahüdaguni le asuseredubei ani himei hamuti hóunwegun lubaragiñe hariñagun luagu marihin hamani (1 Korintuna 15:17-19).

LǗRÜWAN RESUN: Milaguru ligía burí katei naturáliti le asuseredubei ubouagu le úabei gunfuranda hamani gürigia maleskuelantiña. Añahein sásaamu lidan houchun hafuranguagüdüni milaguru le burí tídanbei Bíbülia, ariñagatiña sügǘ lan burí le naturáliti le ídanbei mádarun lani Bungiu lúhabu milagurubei. Saminatiña adügatiña lan lau lira lun gayaratima lan lafiñerún luagu milaguru le uágubei tabahüdagua Bíbülia. Íbini inarüni lan luagu anihein lan meha milaguru le ídanbei lasusereda katei naturáliti—kéiburi hárabaganali, íñanaü, lagululudagun múa—, lidan sun burí sügǘ le anihein aban katei habulieidun sásaamu ha. Katei san? Dan le ídanbei lasusereda, susereti burí milaguru lidan dan le tariñagubei Lererun Bungiu lasusereduba lan.

Ariha waméi furumiñeti íñanaü le asuseredubei Ehiptu, dan le lasaliragunbei duna Nilu hítaüme. Añahein gürigia ariñagutiña luagu susere lan le, ladüga somu katei funati le laduruuhabei duna Nilu hama burí animaalugu bürüraütiña, miginagutiña ani funabeletiña. Gama lumoun ariñagatu Bíbülia aba lan lasaliragun duna hítaüme, mariñaguntu aba lan lasaliragun baribarabume le funati. Dan le wetenirun lun le waliihabei lidan Áfuriduni 7:14-21, ariha wamuti luagu susere lan milaguru le ouraméme le laguurunbei Aarón luagu duna lau lubadun dan le lariñagunbalin Moisesi lun. Íbini hamuga ladüga lan somu katei naturáliti lasaliragunbei duna hítaüme, ma aban milaguru lasuseredun ouraméme le laguurunbei Aarón luagu duna?

Le asuseredubei dan le hebeluruña lan ísüraelina lidoun Fulasu Füramasewati ligía ábanya hénpulu le arufudubalin súdiniti lan dan le ídanbei lasusereda aban milaguru. Siñati meha hásügürün ladüga anihán lan duna Hordán lidan hémeri, ani lanwoun lira lídanñanu meha lidaani fuludu. Ariñaga tumuti Bíbülia ka lan asuseredubei: “Danti le hebelurunbei fádirigu dúnarugun, aba ladüdürün hagudi lau duna le lárurugubei, aba lerederun léibaagun duna le ñǘbuinbei íñugiñe aba lararamagun lun labuinchagun lidan aban, dise luéi Adamü, uburugu le lubadubei Saretán” (Hosué 3:15, 16). Ladüga san somu hárabaganali o ladüga lagululudagun múa lasuseredunbei katei le? Mariñagun tumuti Bíbülia. Gama lumoun wéirigüda lumutu wanigi ka lan dan ídanbei lasusereda. Susereti ouraméme le lariñagubei Heowá Bungiu lasusereduba lan (Hosué 3:7, 8, 13).

Gayarati san lasuseredun milaguru? Arufudatu Bíbülia gayara lan lasuseredun. Según le tariñagubei woun, mámarügüñein burí katei naturáliti le asuseredubei ubouagu. Gama lumoun, gayarati san wariñagun luagu siñá lan lasuseredun milaguru ladügarügü masuseredun lan sagü weyu?

[Abürüdǘni]