Gayarati san hafiñerun luagu burí milaguru le tídanbei Bíbülia?
ANHEIN hamuga abahüdagua aban humada aban sügǘ hun le adügüti lun taweiridun hanigi, kaba hamuga adüga lun gayarabei lan hafiñerun lun? Mámarügübei luagu ligaburi labahüdaguni hun, hafiñerubei giñe anhein buidu lubéi ladimurehóun luagu humada ligía, ma ítara liña? Anhein lúmagiñe lubéi hasubudiruni súnwandan lariñaguni inarüni hun ani mariñagungili ni aban iyeeni hun lau lichú lau, gébunabei hafiñeruni le labahüdagubei humada ligía hun.
Ligía giñe asuseredubei lau milaguru burí le uágubei tabahüdagua Bíbülia. Íbini meha úagili lan nasirua lan ni aban wádangiñe dan le lasuseredunbei, gayarati wasubudiruni anhein gayara lubéi wafiñerun anhein inarüni lubéi o iyeeni lan. Ida? Ariha wamá seingü katei le arufudubalin gayara lan wafiñerun susere lan meha milaguru le uágubei tabahüdagua Bíbülia.
Hagibugiñe saragu gürigia ladügǘwa milaguru burí le adügǘbei. Anirein meha dan ariha hamuti milu o íbini míñunu gürigia milaguru burí le adügǘbei (Áfuriduni 14:21-31; 19:16-19). Hagibugiñe meha saragu gürigia ladügǘwa, mama aramudañu.
Sensiyuti meha milaguru burí le. Madügǘnti meha lidan burí aríawasei lau burí luenden leiti. Libe-agei milaguru le uágubei tadimureha Bíbülia adügǘwati meha ladüga somu katei sódiniti o ladüga lamuriahóuniwa (Márükosu 5:25-29; Lúkasi 7:11-16). Maransehóuati lubá ladügǘniwa milaguru burí le.
Madügǘnti burí milaguru ligía lun lagañeirúniwa irisini o lun láluahoun uéiriguni. Lubaragiñe lira, gürigia meha ha adügübaña milaguru adüga hamuti lun híchugun uéiriguni lun Bungiu (Huan 11:1-4, 15, 40). Siádiwati meha furumiñeguarügü gürigia le áluguti lagañeirun seinsu lídangiñe meha milaguru burí le adügǘbei (2 Urúeigu 5:15, 16, 20, 25-27; Adügaü 8:18-23).
Ámuñegueinarügüti meha burí milaguru ligía, ligíati siñá lubéi hámagiñe lan meha gürigia liabin. Fiú hénpulu, adügǘwati lun lagalumadun barana luma garabali, saliguagüdawati duna diweinme, adügǘwati lun láhuyun huya luma lun máhuyun lan, areidaguagüdawatiña sánditiña, adügǘwati lun harihin gürigia ha marihinbaña. Sun burí milaguru le luma saragu amu arufudati luagu anihein lan aban ubafu wéiritimati luéi habafu gürigia lidan, le gabafubei luagu ámuñegueinarügü burí katei (1 Urúeigu 17:1-7; 18:41-45; Matéu 8:24-27; Lúkasi 17:11-19; Huan 2:1-11; 9:1-7).
Ni áganiñu ha arihibalin lasuseredun milaguru mariñaguntiña iyeeni lan. Dan le láguyuguagüdünbalin Hesusu Lásaru le lumada, masigenerun hamuti lílana relihión ha meha láganiñu Hesusu luagu hilaali lan meha Lásaru. Lugundun gádürühali meha weyu lau lidan umúahaü (Huan 11:45-48; 12:9-11). Íbini saragu sígulu lárigiñe, masigenerun hamuti gürigia ha abürühabarun líburu to gíriboun Talmud luagu gabafu lan meha Hesusu lun ladügün milaguru. Halíagiñe lan meha libihei ubafu lun ladügüni burí milaguru ligía ligía hasigenerubei huríu hagía. Ligiaméme asuseredubei dan le hanügǘnbei lánigu Hesusu disipulu ligibugiñoun lúrudu, málügüdün hamutiña anhein inarüni lubéi adüga hamá aban milaguru, anihán álügüdahani le hadügübei houn: “Ka au ubafu, o ka idan iri hareidaguagüdei wügüri le?” (Adügaü 4:1-13).
Ligíati, gayarati san hafiñerun luagu burí milaguru le uágubei tadimureha Bíbülia? Anhein gabaroun wamá seingü katei le akutiha wamaalibei, furanguti gayara lan wafiñerun luagu sunsuinagubei. Gama lumoun aniheingua amu burí resun lun wafiñerun luagu. Libe-agei dan, ariñaga tumuti Lererun Bungiu ídabuga lan ani halía lan lasusereda luma kátaña lan meha ñeinbaña dan le lasuseredunbei. Íbini gürigia ha adimurehabaña wuriba tuagu Bíbülia wéiritu hanigi dan le harihini inarüniti lan dátosu le tíchugubei. Le linarün katei, gúnfulihali saragu san profesía le tídanbei Bíbülia ítara kei labürüdǘniwa tidan. Ani íderaguaali giñe eweridihani le tídanbei Lererun Bungiu saragu gürigia ha ámuñegueinarügüti harumudiri, meberesenga anhein risi habéi o gudeme hamá lun buidu lan hanaagun houngua hama amu. Úati amu eweridihani buítimati luéi le tíchugubei Bíbülia.
Anhein machourun humagili lubéi anhein gayara lubéi hafiñerun tuagu Bíbülia, amisuraha wamutün lun hakutihanu hungua buidu buidu. Eibume hasubudirunu afiñetimabadün tuagu (Huan 17:17). Dánmeti afiñeedün luagu burí milaguru le asuseredubei lidan tidaani Bíbülia, gíbetimabei resun huma lun hafiñerun luagu lagunfuliruba lan füramasei burí le tídanbei Bíbülia lubá ámuñegü.
[Iyawaü to lídanboun páhina 5]
Masigenerun hamuti láganiñu Hesusu hilaali lan meha Lásaru