Tugua waméi ilaü lun gayara lan lawéiridun
1. Ka uagu lunti lubéi wáturaguni lila inarüni?
1 Dan wábunun aban lila nadü mosu wáturaguni lun láhüchün. Ligíameme lunbei wadügüni dan le wábununi lila inarüni tidan hanigi gürigia ha unbaña wapurichiha (1 Ko. 3:6). Ligíati, luntiya wabisidahaniña gürigia, ítarati wáturaguñein ilaü le, lau duna le íchugubei ibagari le tídanbei Lererun Bungiu. Ítara gayarabei láhüchün lílagüle, laweiridun ani gin ligíame.
2. Ida luba wíderaguniña gürigia lun busén hamá haganbúniwa leweñegua bisida?
2 Ígira humá aban álügüdahani. Dan le waranseruni le lunbei wariñaguni houn gürigia buiti lun wasaminarun luagun aban álügüdahani le lunbei ladügün lun busén hamá haganbuniwa, luma aban le lunbei wígiruni luba amuya bisida. Adüga huméi álügüdahani ligía lubaragiñe lagumuchun hayanuhan ani ariñaga humá hagiribuduba lan lun hóunabuni. Gíbeeña unti lahuuda hadügün aban álügüdahani tídangiñe líburu Kátima san le adügǘbei lun gayara lan hagiribudun lun hatatirun aban aturiahani tídangiñeti Bíbülia.
3. Anhein busén lubéi aban gürigia lafurendeirun, ka burí dátosu gayarabei habürüdüni?
3 Bürü huméi dátosu. Lárigiñe hayanuhan luma gürigia ligía luagu furumiñeti wéiyaasu bürü huméi liri, le ñein lubéi leredera, weyu luma oura le ídanbei habisidahei, le uágubei hayanuha, tuma agumeiraguagüdüni to hígiruboun lun, anhein ígira hubéi. Bürü huméi giñe anhein gani lubéi relihión, anhein gafamilian lubéi luma anhein nidiheri lubéi luagu somu katei o le uágubei labusenra lafurendeirun. Líderagubadün ariñahani le lun aranseñutima humá lubá burí le aban bisida. Mabulieida huméi habürüdüni weyu le lunbei hagiribudun luma álügüdahani le hígirunbei lun hóunabuni.
4. Ka uagu moun lubéi labuchadun wawagu dan le wagiribudun ayanuha hama gürigia?
4 Mabuchadalá huagu. Ladügübei Satanási sun liyaraati lun “lagidaruni dimurei” le abunúbei tidan hanigi gürigia (Mar. 4:14, 15). Ligíati, anhaña madari humá gürigia ha busenbaña hafurendeirun hábiñe, meferidira huméi huguraasun. Gayarati funa san hígirun o hóunahan aban gárada houn? Gumesetu aban prekursora aturiaha tuma aban gürigia tigibugiñe tuba, lárigiñe madaritaru ábati tóunahan aban gárada tun. Dan luagun dan ábaya tadarirunu, aba tariñagun würi tuguya wéiriti lan tañuludagun tanigi ladüga tarufudun íbiri tuguya berese tan tau. Líchuguba ugundani woun warihini láhüchün, laweiridun ani lagindun lila inarüni “darandi aguu luagu aban ilaü, o ǘrüwa-wein, o san” ladüga wáturaguñein lan (Mar. 4:20).