Buidutimalá wadügüni katei: bürǘ waméi sun ariñahani le huuti hawagu gürigia ha ánharutiña lun uganu buiti

“Góunigiguaba buáriuagua, luma lau le barufudahabei.” (1 Tim. 4:16.) Arufudati adundehani lúmagiñeti Bungiu le líchugubei apostolu Pábulu lun Timotéu mosu lan wáfaagun lun wabuiduragüdüni ligaburi wapurichihan, meberesenga anhein wagumeseruña lubéi o lǘhadiwa lan apurichiha. Lun lira, lúmagiñe guentó ñeinbei aban iseri arütíkulu tidan Wani Ministeriu gíriti “Buidutimalá wadügüni katei”. Layanuhaba kada arütíkulu luagu aban katei le ménrengunti, gama lumoun súdiniti, líchuguba giñe adundehani libügürü ida luba lan ladügǘn. Amisurahóuati kada aban wádangiñe afalarei adundehani ligía lidan sun hati. Danme gumuhali hati, gachansinbadiwa lun wabahüdagun lidan Adamuridaguni lánina Eseriwiduni ka lan buiti wasagarubei lídangiñe wafalaruni adundehani burí ligía. Lidan hati le wamisurahóuña lun wabürüdüni sun ariñahani le huuti hawagu gürigia ha ánharutiña lun uganu buiti.

Ka uagu súdini lubéi? Lunti wagunfulirun mámarügü lau apurichihani, mosu giñe wagiribudun bisidaña gürigia ha busenbaña hasigirun afurendeira, arufudaha wameime inarüni houn, ítarati, wáturaguñeinme nadü le buná wamaalibei (Mat. 28:19, 20; 1 Ko. 3:6-9). Lun lira, súdiniti wadariruniña gürigia ámuya wéiyaasu, wayanuhan hama luagu katei burí le aubei heberesera, houcha wagíame wasigirun ayanuha hama luagu tema le wagumeserubei lagumuhóun weyu le wabisidahanbaliña. Ligíati súdini lubéi wabürüdüni sun ariñahani le huuti luagu gürigia le arufudubei busén lan lasigirun afurendeira.