Buidutimalá wadügüni katei: íderagua humaña aturiahatiña aransera lubá hapurichihan

Ka uagu súdini lubéi? Mosu hafurendeirun iseri lani Hesusu disipulugu adüga gasu “lun sun le uágubei [l]ariñaga” woun, larufudahóun inarüni houn amu ligía aban lídangiñe (Mat. 28:19, 20). Bürüwaaña saragu hádangiñe aturiahatiña Bíbülia tidan Leskuela Kristiánu lánina Apurichihani ani másiñati giñe apurichiha hamá houn haduheñu o hamadagu. Murusun murusun, aganwoundeina luba ínsiñeni le hasandirubei luagu le hafurendeirubei. Dánmeti gunfuranda hamani busén lan Heowá lun haganbuni sun gürigia uganu buiti, gayaraati hariñagun busén hamá háfuridun apurichiha, larufudubei lira, hawanseruña lan lidan hafiñen (Rom. 10:13, 14). Lárigiñe lanharúniwa lun hapurichihan úara hama lílana damuriguaü, mégeibaña iseri apurichihatiña ha hadundehóuniwa lun chóurugua lan hasandiragun houngua lidan apurichihani (Luk. 6:40).

Le lunbei wadügüni:

Íderagua huméi iseri apurichihati ibihoun agumeiraguagüdüni to lunboun lapurichihan tau tuma to lemegeiruboun lun líchugun aturiahani. Arufuda huméi lun ka lan tílabei humaletín o huposun ani afuranguagüda huméi lun ka lan un tahuuda kada agumeiraguagüdüni to tídanboun.
Anúadira humá aban lídangiñe adundehani le tídanbei Wani Ministeriu ani asayaha huméi úara. Anúadira humá aban sügǘ tídangiñeti líburu Benefíciese páhina 82 le kamaniti lidan fulasu le ñein lubéi hapurichiha. Íderagua huméi aturiahati lun lafuranguagüdüni adundehani ligía lidan ligaburi layanuhan. Haritaguagüda huméi lun súdini lan buidu tan ladaüragun gadünama tuguyame (2 Ko. 6:3, 4).
Mama ñein lararama hadundehóun iseri apurichihatiña. Arufuda humá aban tídangiñe gárada to lánina fulasu le ñein lubéi hapurichiha lun ani arufuda huméi lun ida luba lan abürüheina lani hani gürigia ha únbaña lapurichiha dátosu. Arufudaha humá giñe lun ida luba lan labürüdüni hani gürigia ha arufudubaña busén hamá hasigirun afurendeira dátosu. Ínchaha huméi lun lasigirun bisidaña gürigia ha busenbaña hasigirun afurendeira. Arufuda huméi lun ida luba lan layusuruni páhina www.jw.org/cab tuma garüdia Buenas nuevas para gente de todas las naciones (1 Ko. 3:6).
Gaguraasun humá, ariñaga humeime buiti le ladügübei lun (Ari. 25:11). Ru humá aban buiti hénpulu lun. Mabulieidun lubéi iseri apurichihati sun ídemuei luma ínsiñeni le harufudubei lun luma ubebeni le harufudubei luagu apurichihani.

Houcha humá hadügüni le lidan sun hati:

Apurichiha humá muna tuagun muna úara luma aturiahati, barǘ huméi giñe húmagua lidan hagiribudun bisidaña gürigia o íchiga aturiahani. Anhein ua lubéi aban aturiahati huma guentó, amisuraha humá aban apurichihati le málügili lúmagiñe lagumeserun apurichiha, furí láamuga apurichiha huma.