Furendei wamá hámagiñe ha furendeihañabaña apurichiha buidu
Wéiriti hebegi íbirigu ha furendeihañabaña apurichiha buidu woun. Añahein hádangiñe barühaña saragu irumu eseriwida lun Heowá. Añahein amu, háfuga málügili lúmagiñe hafurendeirun apurichiha buidu. Ariha hamaali sun íbirigu ha Hesukrístu lan adundehabalin damuriguaü kristiánu lidan lagumuhóun dan le, ani lawanseragüdüñein lan wadagimanu lánina apurichihani luma arufudahani (Mat. 28:19, 20). Kei barühaña lubéi saragu irumu apurichiha, sandí hamaali “óunwenbu ubafu” le íderagubaliña awanda lidan lénrengunga luma óuchawaguni (2 Ko. 4:7). Gayaraati wafurendeirun saragu hámagiñe íbirigu ha lugundun hínsiñeti houn harufudahani le furendei hamaalibei houn amu (Sal. 71:18). Ligíati buídubei lubéi wáluahan chansi lun wásügürün dan hama. Ida luba wadügüni?
Dan le wapurichihan. Lun buídutima lan hapurichihan íbirigu ha málügilibei lúmagiñe hagumeserun apurichiha, mégeitiña harufudahan ha gapurichihadibaña houn. Gayaraati lafurendeirúniwa saragu lau letenirúniwa lun ligaburi hapurichihan íbirigu ha. (Ariha huméi lǘrüwan párafu le lábugiñebei subtítulu “Ayude a los nuevos”, lidan arütíkulu le gíribei “Cómo mantener el entusiasmo en la predicación” tidan Garüdia Atalaya to lánina 15 lidan bián-hati, irumu 2015.) Ka furendei humaalibei hámagiñe íbirigu ha gapurichihadibaña dan le háfuridun apurichiha hama?
Gayaraati san hamisurahan aban hádangiñe íbirigu ha lun láfuridun apurichiha huma? Anhein sándiñein lubéi íbiri ligía, gayaraati hamisurahan, kada átiri dan, aban hádangiñe gürigia ha aturiahabarun Bíbülia huma lúbiñoun lun líchugun aturiahani úara huma. Lárigiñe, ábanme hálügüdüni ida liña lan larihin lun ligaburi híchuguni aturiahani ani anhein gayara lubéi líchugun somu adundehani huuti hun.
Sügǘ humá dan hama. Áfaagua humá lun hasubudiruniña íbirigu ha buidu. Amisuraha humá aban hádangiñe danme le háhuduragun lun Bungiu hama hiduheñu ani álügüdagua huméi ida liña lan lafurendeiruni inarüni, ka lan abiniruni resibi láalibei, ka lan asansiruni ariha láalibei lidan damuriguaü lúmagiñe lagumeserun eseriwida lun Heowá luma ka lan lubuidun sügǘ winwan láalibei lidan leseriwidun. Anhein sándiñein lubéi, adüga humá aransehani lun hadügüni áhuduraguni keisi iduheñu lúbiñe.
Mamuriaha humá saragu hámagiñe ani gunfuranda humaña. Ítara kei wagía, ámuñegueinarügüti giñe iarani le hawagubei íbirigu ha barühañabaña saragu irumu apurichiha (Rom. 12:6-8). Kei añahein lubéi hádangiñe íbirigu ha hulilihali harumudiri, háfuga siñaali hásügürün saragu dan wama. Íbini ítara, gayaraati wafurendeirun saragu lídangiñe le arufudaha láalibei ibagari houn luma lídangiñe le furendei hamaalibei lidan heseriwidun lau úaraguni lun Heowá.