Fánreinti Lánina Álügüdahani
◼ Kátaña lunbaña hamuriahan agumeiraguagüdüni o aban bisida tidan Internet?
Gíbetu tídangiñe garüdia to ídanboun gayara lan tabuinchagüdüniwa aban gárada lau hani gürigia dátosu lun tamuriahóun somu agumeiraguagüdüni o labisidahan aban gefenti luagu Heowá. Gayarati giñe lamuriahóuniwa külase tídangiñeti Bíbülia lidan páhina www.watchtower.org lánina Internet. Seremei lun aransehani le gíbeeña gürigia furendei hamaali inarüni. Gama lumoun dan le hamuriahan íbirigu lau hiri hamadagu o haduheñu gayarati ñein lan turóbuli.
Aban hénpulu, kehatiña fiú gürigia luagu lananihouña lan houn lárigiñe heresibirun somu agumeiraguagüdüni to mamuriahan hamagiru Betelirugugiñe, ani anihein lan hiri luma fulasu le ñein lubéi heredera tidan aban lísüta tani koréu. Añahein giñe fiú íbirigu ha barühaña busiganu dan le houdin bisida gürigia ha mamuriahan hamuti. Ligíati, moun lumuti labuinchagüdün ni aban íbiri somu gárada lau hani gürigia dátosu ni lun lamuriahan aban bisida tidan Internet ni ka un; lunti hadügüni ha busenbaña hafurendeirun hagía houngua. Libe-agei dan, dan le subudi hamani íbirigu Betelirugu lóunahan lan aban íbiri gárada tuguya lidan hiri amu, madügüntiña gasu tau.
Ligíati, kaba hadüga anhein busén hubéi híderagun somu hiduhe o hasubudiragun adüga umadaguaü luma Bungiu? Anhein busén hubéi libihin gürigia ligía somu agumeiraguagüdüni, ka uagu móunahan hubarun lun keisi aban idewesei? Ánheindügü hamuga busén lafurendeiruni inarüni luma labisidahani aban Gefenti, ayanuha humá hama wéiyaaña lidan afiñeni lani damuriguaü le apurichihabei lidan fulasu le ñein lubéi leredera. Anhein siñá lubéi buíngüda humoun gárada to gíriboun Sírvase visitar (S-43-S) ábame híchugunu lun íbiri le sekretariu lidan damuriguaü le ñein hubéi, le lunbei lakutihanu ani óunahalounme tidoun Beteli. Mabürüha humá tidoun Beteli hawagu gürigia ha adaürǘtiña, ha lídanbaña somu fulasu le ñein lubéi lagaranihóua houn ha busentiña hígirun aban bisiu o tidan somu tuwuyeri háspitali. Lubaragiñe lira, ariñaga humá lun, lun layanuhan hama íbirigu ha abisidahabalin fulasu ligía o lun ligía lan lungua abürüha tidoun Beteli.