Fánreinti Lánina Álügüdahani
◼ Buiti san wayusuruni Internet lun wapurichihan o wíchugun aturiahani tídangiñeti Bíbülia houn gürigia ibidiñetiña woun ha aganóubaña lidan amu ageiraü?
Añahein íbirigu ayusuruti Internet lun híchugun aturiahani tídangiñeti Bíbülia houn gürigia ha awinwandutiña lidan burí ageiraü le ñein lubéi maha lan lúrudu lun wadagimanu lánina apurichihani le wadügübei o le ídanbei lougua hamá gefentiña luagu Heowá. Anihein dan, maribanti lidin houn. Íbini ítara, denchati wabürühan, wóunahan o weresibirun koréu hámagiñeti gürigia ibidiñetiña woun. Lau sun wasubudiragüdüni lan yebe uganu luáguti Larúeihan Bungiu houn gürigia haruma tanigi wabusenrubei lau lira, gayaraati ladügün wayanuhan hama gürigia ibidiñetiña woun lun wádaragun woungua hamoun hagübüri umadagu o wábürühan háhaburugun gürigia ha garabaguaaña luagun Heowá luma tuagun lóundarun (1 Ko. 1:19-25; Kol. 2:8). Ani lidan burí fulasu le ñein lubéi máhawa lan lun lapurichihóun uganu luáguti Larúeihan Bungiu o le ñein lubéi rua lan lébeha ladügǘn, másiñati hebelurun lúrudugu arihei ka lan lílabei burí koréu le ounahóubei houn lílana hageira. Gayaraatiti dencha lan lira houn gefentiña luagu Heowá ha aganóubaña ñein. Ligía moun lumuti lubéi wáluahan gürigia ha awinwandutiña lidan amu ageiraü luéigiñe Internet lun wapurichihani uganu buiti houn.
Ánhawa apurichiha lun aban gürigia le liábiñarügüña asariñaha lídangiñe amu ageiraü, moun lumuti wáfaagun wasigirun arufudaha lun danme le giribuhali lageiroun, ánheingubeirügü íchiga sukursáli to arihuboun lau wageira amu adundehani. Gama lumoun, gayaraabei warufuduni lun ida luba lan layusuruni páhina jw.org lun ladarirun ariñahani luma lun labürühan tidoun sukursáli to arihiboun lau hawadigimari gefentiña luagu Heowá lidan lageira. Anhein anuhein lubéi Luban Hadamuridagun gefentiña luagu Heowá lidan fulasu le ñein lubéi laganawa gürigia ligía, gayaraati wamisurahani lun lidin ñein. Anhein arufuda busén lan lasigirun afurendeira, álügüda waméi, anhein gayara, ka lan líribei ani halíatima lan lawinwanda, ábameti wabürüdüni lun wíchuguni lun seküretáriu le lídanbei damuriguaü le ñein wabéi, ligíaba óunahei ariñahani ligía tidoun Beteli luéigiñe páhina jw.org. Tídangiñeba sukursáli to arihiboun lau hawadigimari gefentiña luagu Heowá lidan lageira gürigia ligía larihúa ida luba lan lichugún ídemuei le lemegeirubei lun, lugundun hagía subudihabubalin ida liña lan léibugun katei ñein (ariha humóun Wani Ministeriu to lánina sisi-hati, irumu 2014, páhina 7 tuma Wani Ministeriu to lánina unsu-hati, irumu 2011, páhina 2).
Anhein águya lubéi aban gürigia le meha gumese wamaalibei abisidaha lidoun amu ageiraü o gumeseediwa lan íchiga aturiahani tídangiñeti Bíbülia lun aban gürigia le awinwanduti lidan amu ageiraü ani luéigiñerügüñein Internet wasubudirei, mosu wadügüni le ariñawagúbei woun lidan párafu le lubaragiñebei le. Gayaraabei wasigirun arufudaha lun sunme awanha lan agurabaha lachülürün aban íbiri le lídangiñeti fulasu ligía etenira lun. Ánheinti lidan lubéi aban ageiraü le ñein lubéi máhawa lan lun lapurichihóun uganu luáguti Larúeihan Bungiu o le ñein lubéi rua lan lébeha ladügǘn lawinwanda gürigia ligía, mosu duari wamá danme le wíridun somu katei tídangiñeti Bíbülia tidan gárada to wabürühaboun lun, o lidan le wariñagubei luéigiñe gágamuru o le wabürühabei luéigiñe Internet (Mat. 10:16).