Teni wamá lau lóufudagun houn ha busenbaña hafurendeirun

Lúmagiñebei ladügǘniwa wani páhina lidan Internet, gánwountimarügaaña gürigia amuriaha lichugún aturiahani tídangiñeti Bíbülia houn luéigiñe. Ídehati giñe apurichihani lidan guririguaü lidan katei le. Téniwati lau lóufudagun lun katei le tidan Beteli. Aban hénpulu, anhein luéigiñe lubéi jw.org lamuriahóua aturiahani, óunahatu sukursáli awisahani houn wéiyaaña lidan afiñeni ha lídanbaña damuriguaü le unbei latokara habisidahani gürigia le busenbei lafurendeirun lubaragiñe lásügürün bián weyu. Gama lumoun, ariñawagúaali woun anihein lan dan lásügürün saragu dimaasu lubaragiñe lachülürün aban gefenti luagu Heowá bisidei gürigia le amuriahaalibei aturiahani tídangiñeti Bíbülia. Ka lunbei wadügüni lun hibihini gürigia ha ídemuei lubaragiñe mabusenrunhaña lanme ni kata? (Mar. 4:14, 15.)

Anhein arufuda gürigia busén lan lasigirun afurendeira ani mama lidan fulasu le ídanbei latokara houn lílana damuriguaü le ñein hubéi hapurichihan, buíngüda huméi ubanaü Sírvase visitar (S-43-S) lau lóufudagun ani derege humóun lun seküretáriu lidan leweñegua adamuridaguni madarasaragunga. Ábameti lóunahani seküretáriu ariñahani ligía tidoun sukursáli lubaragiñe lásügürün biama weyu, lun lira, mosu lebelurun lidoun seksióun Congregación lidan páhina jw.org. Ani mosu giñe gabügürügua lan hebelurun wéiyaaña lidan afiñeni lidoun páhina lánina Internet le. Ánhaña awisarúa anihein lan aban gürigia le arufudaali busén lan lafurendeirun lidan fulasu le atokarubei lun damuriguaü le ñein habéi, mosu hetenirun lun lau lóufudagun. Ánheinti íbiri le eresibirubalin kárugu lun lidin bisidei gürigia ligía, lunti lidin lau lóufudagun. Anhein madarirun lan gürigia ligía lúbiñe, gayaraati lígirun aban gárada lubá le ñein lumuti lariñagei liri lun luma halíaba lan ladarirei.