Ǘrüwa manera lun wabuiduragüdüni warufudahan
1. Ka resun buiti uágubei mosu lan wasigirun abuiduragüdei warufudahan?
1 Máisturugu sun ha apurichihabalin uganu buiti. Wapurichihaña lan yebe, wabisidahaña aban gürigia le unbei apurichihañahadiwa lan o waturiahaña lan luma somu gürigia, warufudahaña ariñahani le súdiniti houn gürigia. Dan le wafuranguagüdüni “Lererun Bungiu” houn, íderagua wamutiña lun hibihini “lichú aau le busenwabei lun gayara lan hasalbarun gürigia” (2 Tim. 3:15). Ma lubuidun chansi! Ma aban buiti resun le, lun wasigirun abuiduragüdei ligaburi warufudahan? Ariha wamá ǘrüwa manera ida luba lan wadügüni.
2. Ida luba sensiyu lan warufudahan?
2 Sensiyulá warufudahan. Háfuga dan le wayanuhan luagu aban katei le subudi wamaali buidu, aba wabulieiduni iseriti lan houn gürigia ha úmabaña wayanuha ani hénrenguti lan houn gunfuranda hamani. Ligíati, dan le wíchuguña lan aturiahani tídangiñeti Bíbülia houn gürigia, moun lumuti wíchugun saragu ariñahani lóugiñe le lídanbei kada párafu. Lubaragiñe lira, afuranguagüda waméi puntu burí le méinibei. Mámañein lidan libe dimurei lubuidun arufudahani (Ari. 10:19). Mama giñe lunti haliihani sun bérusu burí le bürüwañubei ñein; buídurügüti haliihani le afuranguagüdübalin puntu le súdinitimabei, le ayanuhabei luagu tema le wakutihabei. Haritagua waméi arufudaha lan Hesusu inarüni le huliliti lidan Serumu luagu Wübü (Mat., kap. 5-7). Ani sensiyuti ladügüni mayanuhanti giñe saragu.
3. Ka uagu hu lubéi hénpulu lidan arufudahani, ani ka burí luwuyeri hénpulu buídutimabei?
3 Yusu wamá hénpulu. Adügati hénpulu lun hasaminarun gürigia, lun agagudúañu hamá luma lun mabulieidun hamani le hafurendeirubei. Mama mosu gabahüdaguadi wamá lun gayara lan wayusurun hénpulu le buiti. Yúsuti meha Hesusu hénpulu le chátiti ani sensiyuti (Mat. 7:3-5; 18:2-4). Huuti giñe wadügün dibuhu sensiyuti lau wáhabu. Ánhawa aransera lubaragiñe woudin arufudaha, liábinba hénpulu buíduburiti lidoun wachügü le gayarati wayusuruni.
4. Ida luba wayusuruni álügüdahani buidu?
4 Yusu waméi álügüdahani burí buidu. Yúsuati álügüdahani lun lasaminarun aturiahati. Ligíati, lárigiñe wadügüni, mosu wagurabahan lóunabun. Ánhawa afureseha óunaba, ibidiñebei woun ka lan gunfuranda lubéi gürigia. Ani anhein wuriba óunabagülei le líchugubei, mafureseha wamá ariñagei lun ka lan óunabagüleibei; buídutimabei wadügün amu burí álügüdahani lun le gayarati lanügüni lidoun óunabagülei le buídubei (Mat. 17:24-27). Úati máisturu macharati. Ligía lariñawagúnbei woun tidan Bíbülia lun wetenirun lun ligaburi warufudahan, lugundun lanügüba buiti woun luma houn ha aganbubaliwa (1 Tim. 4:16).