“Abagarida humá lidan darangilaü hama súngubei”
1. Anhein añahein lubéi gürigia meresibirun hamutiwa buidu hábiñe, Ka adundehani tídangiñeti Bíbülia lunbei waritaguni?
1 Darangilutiña lumutuniña Heowá ani hapurichihaña aban uganu lánina darangilaü (Isa. 52:7). Gama lumoun, añahein gürigia aba hagañidun dan le woudin abisidahaña hábiñe. Ariha waméi kaba lan íderaguawa lun darangilu wamá magañidun wagíame danme lasuseredun aban katei ítarati (Rom. 12:18).
2. Ka uagu súdini lubéi lun wárügüdagun woungua luéi igañi?
2 Gunfuranda waméi le gádanbaliña gürigia. Añahein gürigia óunabatiña lau igañi ladüga mabusenrun hamá hasubudirun ni kata luagu inarüni, gama lumoun añahein hagía mama wapurichihan adügübei lun hagañidun gáñitiña ladüga amu katei. Másiñati lidan lan luriban oura wachülüra, o adügaali lan buga somu turóruli lun hagañidun lubaragiñe wachülürün. Ani íbini anhein uganu lubéi le wapurichihabei agañidagüdübaliña, chóuruti ladüga lan hafiñeruni katei burí le hariñagubei amu gürigia hawagu gefentiña luagu Heowá houn (2 Ko. 4:4). Dan le warufudun lubuidun ichügü gunfuranda wameime mama lan wagía lébunabei hóuserun gürigia ítara, líderagubadiwa lun wárügüdagun woungua luéi igañi (Ari. 19:11).
3. Ida liña warufudun inebesei houn gürigia ha únbaña wapurichiha?
3 Arufuda wamá inebehabu. Wéiriti hárügüdün besafu gürigia ha únbaña wapurichiha luagu burí hafiñen (2 Ko. 10:4). Ani le linarün katei, líbüreti kada gürigia lun desidírü lani anhein laganbubei lubéi uganu buiti o maganbun lubéi lan. Moun lumuti warufudun minebeni lun hafiñen gürigia ha únbaña wapurichiha ni lun wadügün lun hasandiragun houngua kamá hamuga ibidiñeti ni kata houn. Ánhaña ariñaga woun lun woudin hábiñegiñe, ábame woudin lau inebehabu.
4. Ka mini lubéi wóunabun lidan aban igaburi le auti “gúndaawa lan”?
4 Óunaba wamá lau lubuidun. Íbini ánhawa hanabagua gürigia, mosu wóunabun lidan aban igaburi le auti “gúndaawa lan”, lidan amu dimurei, lunti wóunabun lau darangilaü luma lau lubuidun (Kol. 4:6; 1 Fe. 2:23). Lubaragiñe wasigenehan, adimureha wamá hama luagu burí katei le ídanbei úaragua wamá hama. Lau duari, houcha wamá wasubudiruni ka lan uagu kóntüra lubéi gürigia le unbei wapurichiha lun uganu le wanügübei. Gama lumoun, libe-agei dan buítimabei lásurun wadimurehan luéitima lagañidun (Ari. 9:7; 17:14).
5. Kaba burí buiti resultóu ibihúa ánhawa óusera lau darangilaü lidan wani ministeriu?
5 Ánhawa óusera lau darangilaü, másiñati haritagubei lan gürigia ligaburi wóunabun ábameti haganbuni uganu tídangiñeti Bíbülia danme lapurichihóun houn amu weyu (Rom. 12:20, 21). Ibidiñewati anhein lachülürüba lubéi dan lun wíbirigubaña lan íbini gürigia ha kóntüratimabaña uguñe weyu lun inarüni (Gal. 1:13, 14). Sansi ligía yebe hagaburi o masansirun lan, ánhawa arufuda ragüguaü unguaü ani darangiluméme ligía wóuserun, wíchuguba uéiriguni lun Heowá ani wewendedagüdübei warufudahan (2 Ko. 6:3).